Ngaih pawimawh zâwk tûr. Bible chuan, “Thil pawimawh zâwkte chu fiah rawh u,” tiin min fuih a. (Philippi 1:10, NW) Thil tih tûr pawimawh, a nih loh leh hmanhmawhthlâkte chu a indawtin ziak thla ang che; entîr nân, ei leh in lei ang chi thil pawimawhte chu thil hmanhmawhthlâk a ni kher lo thei a. Chutiang bawkin, thil hmanhmawhthlâk anga lang—kan TV program duh ber ṭan hun—chu thil pawimawh a ni kher lo thei bawk. *

Ngaihtuah lâwk rawh. Thuhriltu 10:10-na chuan: “Thîr a bila, miin a tah hriam loh chuan tharum a ngai lehzual ang,” tiin a sawi a. “Mahse, a sâwt ber mai, finna, hlawhtlin nân,” tiin a sawi belh a ni. Zir tûr chu eng nge ni? I hun neihte a ṭha thei ang bera i hman theih nâna i thil tih tûrte ngaihtuah lâwkna hmangin entîr nei i hreipui hâ chu i tât hriam thei a ni. Tih ngei ngei ngai ni lo, hun leh tha ei ral thei tih tûrte chu i tih hun tûr i sawn loh pawhin, i thil tih tûrte i chhinchhiahna aṭangin paih ang che. Tih hmasak atâna i chhinchhiahte i tih zawh hnuah hun i la nei a nih chuan, engvângin nge nakin deuhva tih atâna i chhinchhiahte chu i tih lo vang? Chutianga ngaihtuah lâwkna hmangin, a hrei hâ tât hriamtu hnathawktu fing tak angin hma i sâwn lehzual ang.

I nun tisamkhai rawh. Thil pawimawh lote hnâwl leh hun tam tak la thei thilte tih tlêm chu zir ang che. Tih tûr neih tam lutukna hian ṭûl lo taka rilru hahna a belhchhah theih bâkah, kan hlimna pawh a la bo thei a ni.

Vuaichana leh mumal lohna. “Thli pawisatuin chi a tuh lâwng, chhûm enthlatu’n a seng hek lo vang.” (Thurhriltu 11:4) Zir tûr chu eng nge ni? Vuaichana hi hun leh hmasâwnna ru botu a ni a. Hun ṭha ber nghâktu lo neitu chuan chî a tuh lovin, seng tûr a nei ngai lo pawh a ni thei. Chutiang bawkin, nuna hriat lâwk loh thil lo thlengte avânga bumin kan awm thei a. A nih loh leh, thu tlûkna kan siam hmain thil chin châng engkim kan hriat hmasak a ṭûl niin kan ngai thei bawk. Ni e, thu tlûkna pawimawh siam tûr chuan zir bingna leh sawihonate neih a ngai a ni. Thufingte 14:15 chuan, “Mi remhria erawh chuan a kalna a en ṭha ṭhîn,” tiin a sawi si a. Mahse, a nihna takah chuan thu tlûkna tam tak hian hriat lâwk loh thilthlengte pawh a keng tel ṭhîn a ni.—Thurhriltu 11: 6.

Ṭhat famkim duhna. Jakoba 3:17-na chuan: “Chung lam [a nih loh leh, Pathian] aṭanga finna lo chhuak erawh chu . . . a nunnêm,” tiin a sawi. Ni e, mahni chunga beiseina sâng tak neih chu a fakawm ngei mai! Mahse, a châng chuan mahni chunga beiseina kan neih sân lutuk avângin, chu chuan lungawi lohna leh hlawhchhamna min thlen thei a ni. Entîr nân, ṭawng dang zir tu emaw chuan sawi sual a nei theiin, chûngte aṭang chuan a inzir chho dâwn tih a hriat a ngai a. Mahse, ṭhat famkim duh mi chuan sawi sual nei anga han inngaihtuah chhin ringawt pawh a duh lo va, chutiang rilru put hmang chuan a hmasâwnna tûr a dâl thei a ni. Mahni chunga a âwm tâwk beiseina neih chu a va ṭha zâwk tak êm! Thufingte 11:2-na chuan: “Inngaitlâwmte hnênah chuan finna a awm,” tiin a sawi. Chu mai bâkah, mi inngaitlâwm chuan mahni inngaih pawimawh lutukna a neih loh avângin, rilru zângkhai taka awmin a hlim ṭhîn.

Hna leh intihhlimnaah inbûk tâwk tak ni rawh. “A dik thei e, hahdama vei khat neih pawh hi buai phîlîa thawka vei hnih neih ai chuan a ṭha.” (Thuhriltu 4:6) Hna âtchilh mite chuan “buai phîlîa thawka vei hnih neih” chu an hlâwkpui ngai meuh lo. Hun leh tha an neih tawh ṭhin loh avângin. Kawng leh lamah chuan, mi thatchhia chuan an ‘vei hniha’ an awm âwl mai mai avângin, hun hlu tak an khawhral ṭhîn a ni. Bible chuan thlîr dân inbûk tâwk tak nei tûrin min fuih a ni: Thawk rim tûr leh a rah chhuahte hlimpui tûrin. Chutiang hlimna chu “Pathian thilpêk a ni.”—Thuhriltu 5:19.

Mut kham lovin awm suh. Bible ziaktu pakhat chuan: “Thlamuang takin ka mu ang,” tiin a sawi. (Sâm 4:8) Mi puitingte chuan an tisa lam te, rilru lam te, ngaihtuahna lamte a chak theih nân dârkar riat vêl an mut a ngai a. Tui taka mut hian rilru sâwr bing thei tûr leh ṭha taka thil chhinchhiah thei tûra min ṭanpui avângin, mut hi ṭha taka hun hman dân chi khat a ni. Mahse, mut kan kham lo a nih chuan, zirna lamah min tihnufual thei a, chêt sualna te, thiltih sual palhna te, leh thinrimnate a tipung thei a ni.

Thiltum inâwmte insiam rawh. “Châkna chavai mai mai ai chuan mita hmuh sa ngei chu a ṭha zâwk.” (Thuhriltu 6:9) A sawi tum chu eng nge ni? Mi fing chu châkna inâwm lote leh tihhlawhtlin theih loh tûr thilte thununin a awm lo. Chuvângin, thil fak mawina hmanga buma awmna leh awlsam taka leiba neih theihna ang chi dinhmunte chu a pumpelh a. Chu aiin, “mita hmuh sa,” a thil neih theihahte chuan lungawi dân a zir zâwk a ni.

I nungchang chu ngaihtuah rawh. I nungchang chuan thil ṭha te, thil pawimawh te, leh thiltih manhlate chu a tifiah ang. I nunna chu thal a nih chuan, i nungchang chuan thiltum fuh tûrin a ṭanpui ang. Chuvângin, nungchang ṭha chuan nuna thil pawimawh zâwkte dah pawimawh tûr leh fing taka hun hmang tûrin a ṭanpui ang che. Chutiang nungchang ṭha chu khawiah nge i hmuh theih? Mi tam tak chuan Bible-ah finna ṭha tak tak a awm tih an hriat avângin, chutah chuan an zâwng a ni.—Thufingte 2:6, 7.

Hmangaihna chu i nungchangah bet tlat rawh se. Kolossa 3:14-na chuan hmangaihna “chu phuar famkimna a ni,” tiin a sawi a. Hmangaihna tel lo chuan, a bîk takin, chhûngkuaah hlimna dik tak leh rilru hahdamna kan nei thei lo. Chu thu dik pawm duh lo va, nuna hausakna emaw, eizawna emaw dah pawimawh zâwktute chuan hlimna dik tak an hmu lo. Chuvângin, chhan ṭha tak neiin Bible chuan hmangaihna chu vawi tam tak a târ lang a, thil pawimawh ber a nih thu a sawi a ni.—1 Korinth 13:1-3; 1 Johana 4:8.

Thlarau lam thil tih nân hun insiam rawh. Geoff-a chuan nupui fel tak, fapa leh fanu duhawm tak, leh hna ṭha tak a neih bâkah, ṭhian ṭha tak takte pawh a nei a. Mahse, a hna chu damdawi lama ṭanpuina hna a nih avângin, mite hrehawm tuar leh boral chu a hmu fo ṭhîn a. Ani chuan: “Nun hi hetiang tûr hi em ni le?” tiin a ngaihtuah ṭan a. Ni khat chu, Jehova Thuhretute tihchhuah Bible ṭanchhan thu leh hla chhuahte chu a chhiar a, chhânna lungawithlâk tak a hmu a ni.

Geoff-a chuan a thu hriatte chu a nupui fanaute a han hrilh chuan, anni pawhin an ngaihven hle a. Chu chuan an chhûngkua chu thlarau lam thilte a ngaihven ṭantîrin, an hunte chu fing thiam taka hmang tûrin a ṭanpui a ni. Chhûngkuaa Bible zirna chuan thil lothlâwn mai leh hrehawm tawrhnate awm tawh lohna khawvêla chatuan nun beiseina ropui tak a neihtîr bawk a ni.—Thu Puan 21:3, 4.

Geoff-a thiltawn chuan Isua Krista thusawi: “Mahni thlarau lam mamawh hriate chu an hlim e,” tih hi min hriat chhuahtîr a ni. (Matthaia 5:3, NW) I thlarau lam mamawhte phuhhrûk nâna hun tlêm azâwng pêk chu i inhuam em? Chutianga i tih chuan, chu chuan rei lo tê atân chauh ni lovin, i dam chhûnga fing taka hun hmang tûrin a ṭanpui ang che.