ǂHâǂhâsa ǃkhais ai mâi re. ‘ǂHâǂhâsa xūna du ǂgurose mâi re’ dis ge Elobmîsa ra ǀapemā. (Filipeǁîn 1:10) Taena du nî dīsa xoamâi re. Aiǁgause ǃhaese du nî dī tamas ka io ǂhâǂhâsa xu-e. ǂÂis ǃnâ du ūhâ re, tae-i kaise ǂhâǂhâsasa.​—Aiǁgause ǃuia du nî ǂû, ǂû-i ge di kōse ǂhâǂhâsa tama hâ. Tsî a ǃâu ǁkhā. Sado kaise ǁoaxaba xu-i tv’s ai hâ-i tsîn ge ǂhâǂhâsa tama hâ. *

Ais ai ǀnai ǂâi re. “ǃŌs ga ǂubuo, tsîs ga amsa ǀāǀāhe tama io, ob ge ǁnās ǃgâ-ai nî ǀgaib ǀkha sîsen.” Dis ge Aoǁnâ-aob 10:10 sa ra mî. Tsî ra ǀaro “xawe gā-aisib ge ǃnāsa ǂansa” ra hō. Tae-e da nēsa xu ra ǁkhāǁkhāsen? Sadu ǃōsa ǀāǀā re. Nēs ge ra ǂâibasen, ais ai ǀnai aiǂhomisen re. Mati du sadu ǁaeba ǃgâise nî sîsenūsa. Kaise ǂhâǂhâsa tama xūn hîna, sadu ǁaeb tsî ǀgaib tsîna ra sîsenūna du mâiǂui re. ǂGui sîsenne du ūhâ tama tsî du ǂgui ǁaeba ūhâsa du ga mûo. Tae-i xa du ǀkhara sîsenni egas ǃaroma du mâiǂui hâ-e, ǁnā ǁaeb ai dī tama? Aiǂhomisens ge ra hui tsi îts ǃgâise dī. ǁNā sîsen-aob hîna ǁîb ǃōsa ǀnai ra ǀāǀāb khami.

Sadu ûiba supusupu re. ǂHâǂhâsa tama xūn, sadu di ǁaeba ra ǃnarina ǃoa hî-i ti mîsa ǁkhāǁkhāsen re. ǂGui xūna dīs ge ǂhâbasa tama ǂâiǂhânsende mā du. Tsî sadu ǂkhîba nî ūbē.

Mâiǂui tsî mîǁgui-e dīǁoas. “ǂOab ai ga ǃgaoǃgâb, ǁnāb ge tsoro tide; tsî ǃâude ga kōb, ǁnāb ge ǃgao tide.” (Aoǁnâ-aob 11:4) Tae-e da nēsa xu ra ǁkhāǁkhāsen? Mâiǂuis ge ǁaeb tsî ǀnaits ga dī hâ xū-i tsîna ra ǃnari. ǃHana ǂgā-aob hîna ǃgâi mâsiba ra ǃaub ge. ǁÎb ǃhomde ǀnîtsēs tsîna ǂgā tide. ǁNās ǁkhās khami da ge ta nî mā-am, i ûib mâsiga tā sida mîǁguiga ǂhani. ǀNî ǁaegu ai da ge ra ǂhâba, i da hoa ǂansa ūhâ mîǁgui-e da nî dīs aiǃâ. Ama i ge ǂhâǂhâsa mîǁguiga dīs ge ôaǃnâs tsî ǂâiǃâs tsîna ǂhâba hâ. ǂKhoamîdi 14:15 ge ra mî. “Gâreb ra mâ mîs hoasa ǂgom.” Xawe ama xū-i hîna hâ i ge, ǃnāsa ǁaeba da ge sida mîǁguigu mati nî ǂoaxasa a ǀū.​—⁠Aoǁnâ-aob 11:6.

Xū-i hoa-e ǂhanuse ǀgui dīǂgoas. Jakobub 3:17 ge ra mî. “Xawe ǀgapiseba xu hâ gā-aisib ge ǂgurose a.  . . tsauraǃnâ.” Ama i ge xūna ǃgâise dī ǂgaos ge kaise a ǃgâi. Xawe ǀnî ǁaega da ge ǁnāti kōse ǀgapi ǂâi ǀgauga sida xa ra ūhâ. Tsî da ge ǁnās xa ra tsûaǂgao. Tamas ka io dī hō tama hâ. Aiǁgause ǀasa gowaba ra ǁkhāǁkhāsen khoe i ge. Mî-e i nî mîsa as a ǂan. Tsî ǂâis ǃnâ nî ūhâ nēsa xu-i nî ǁkhāǁkhāsensa. Xawe xu i hoa-e ǂhanuse ra dī ǂgao khoe-i ge. Dīsās xas tsîna ǂâiǂgao tama hâ​—⁠tsî nēs ge ǁî-e aiǃgûsa ra khoa-ao kai. ǁNā-amaga i ge a ǂhâbasa sida xu ǃgâiba ǃâubasensa. ǂKhoamîdi 11:2 ge ra mî. “Gā-aisib ge ǃgamǃgamsen hân ǀkha hâ.” ǃGamǃgamsenxa khoe-i ge dīsā ǁkhā i a sa a ǂan. Tsî ǀnî ǁaega âisens tsîna ra hî.

Sîsenni tsî ǃgâi ǁaeba ūhâsa ǁîs ǃkhais ai mâi re. ‘ǃOms ǀoa sâroba ūhâs ge ǀhupub tsî ǂoaba ǃkhoesaos, ǃgâ-ai a ǃgâi.’ (Aoǁnâ-aob 4:6) Kaise ra sîsen khoen ge ǃnāsa ǁaeba, ǁîn ‘ǃomkha dī hâ sîsenne’ ra ǀgâisen. ǁÎn ge ǁae-i tamas ka io ǀgai-e ūhâ tama hâ. ǀOpesa khoe-i ge ‘ǃomkha ǀoa’ sâba ūhâ. Tsî ǁnās ǀkha ǂâusa ǁaeba ūhâ ǁoms diba. Elobmîs ge ra ǂhâǃnâ da i da ǀnōsa mûǂûiba ūhâ. ǃGarise sîsen re i ǃgâiaǂgao. ǁNāti-i ǃgâiaǂgaob ge ‘Eloba xu ra hā ǀkhommi tamas ka io ǀkhaeba.’​—⁠Aoǁnâ-aob 5:18.

ǂÂu hâse ǁom re. Elobmîs xoa-aob ge ra mî. “ǂKhîb ǃnâ ta ge ǁgoe tsî nî ǁom.” (Psalmdi 4:8) Kai hâ khoen ge ǃnāsa ǁaeba 8 irga nî ǁom. Nēs ge ǁîn di soros, tsâsin tsî hoa xūn ǃaroma a ǃgâi. ǁOms ge kaise a ǃgâi. ǃGâise ǂâi kai tsi, tsî i sa ǂâiǀgaub tsîna ra ǃgâiǃgâi amaga. Tsits ge ǃnāsases tsîna a ǁkhāǁkhāsen ǁkhā. ǃGâise ǁom tama îs ge ǀorose ǁkhāǁkhāsens, ongelukan, xūna dīsās tsî stress i tsîna ǃkhōǂgā hâ.

Sīǃnâ hō du nî mîǁguiga dī re. ‘Mûdi ra mû xūn xa ǃgâiaǂgaos ge turaba ǃgûǃgûs xa a ǃgâi.’ (Aoǁnâ-aob 6:9) Tae-e i ra ǂâibasen? Gā-ai khoe-i ge mā-am tama hâ, i i tura î ra xū-e ǁî-i di ûiba ǃkhōmâi. ǃNāsase ǁnā xūn hînan a sīǃnâ ǁoana. ǁÎ-i ge gā-ai ǁgauǂui ti. Tamas ka io supuse surudeb-ai a hōhe ǁkhā xūn, xa ǂgaeǂhapuhe tama hâ. Xawe i ge hō ǁkhā i a xū-i ai ǂâisa ra ǂnûi​—‘mûdi ra mû xūn.’

Sadu ǀgauga ǂâis ǃnâ ūhâ re. Sadu ǀgaugu ge tae-i a ǃgâi tsî ǂhâǂhâsa sa nî mûǂan kai du. Sadu ûib ga ǂnoa-ūhe ra hai io. O i ge sadu di ǀgaugu tamas ka io ǂâisa ǁnā haigu ai nî hâ. ǃGâi ǀgauga ūhâs ge ra hui du, i du sadu ûib ǃnâ ǂhâǂhâsa xūna ais-ai mâi. Tsî sadu ǁaeba ǃgâise sîsenū, tsēs hoasa. Mâba du ǁnāti i ǃgâi ǀgauga hōǁkhā? ǂGui khoen ge nēs ǃaroma Elobmîsa ǃoa ra kō. Hîna ǀgapi gā-aisiba ūhâsa.​—ǂKhoamîdi 2:6, 7.

Ā i ǀnamma kaise ǂhâǂhâsaba du re. Koloseǁîn 3:14 ge ra mî ǀnammi ge a “dīǀoaǀoasib di ǃkhōǀhaoxū.” ǀNammi ose da ge ama ǂkhîba ūhâ tide. Tsî da ge omaris ase ǀguipa hoaǁae hâ tide. Khoen hîna nēsa ǃgôaǁnâ tsî ǃkhūsib tsî ǀgapi ǁkhāǁkhāsen sa ra ôan ge ǂkhîba ūhâ tama hâ. ǁNā-amagas ge Elobmîsa ǃgâi ǃaromasa ūhâ. Tsî ǀnamma ra mâǂoa kai. ǂGui ǃnāde i Elobmîs ǃnâ xoasa amaga.​—⁠1 Korinteǁîn 13:1-3; 1 Johaneb 4:8.

ǁAeba ǁamaǂui re i du Eloba ǂan. Geoff di ǀnon hâ aob ge ǀnamǀnamsa taras. ǀGam ǀgôan, ǀhōsan tsî ǃgâi sîsenni tsîna ge ūhâ i paramedic se. (Ongeluk-i ǃnâ ra ǃkhō hui khoe-i.) ǁÎb sîsenni ge ǃnāsa ǁaeba ǃgomma tsâs tsî ǁōb ǀkhā ǁîba gere ǀhaoǀhao. “Uiba nēti ǀgui nî ī?” tib ge ra dî. Jehovab ǃoaba-aon xa ǁgâisa ǂkhininab ra khomâi hînab ge ǃereamsa ge hō.

Geoffi-i ge ǁkhāǁkhāsen i ge xūna ǁîb taras tsî ǀgôan tsîna ge ǁgamba. Tsîn ge ǁîn tsîna nē xa ge ǃgâibahe. Omaris asen ge Elobmîsa ge ǁkhāǁkhāsen tsoatsoa. Tsîs ge nēsa ǁîn ûib ǃnâ ǁîna kaise ge hui. ǁÎn ge ǁîn ǁaeba kaise gā-aise ge sîsenū. Elobmîs ǁkhāǁkhās ge ǁîna ǃgâi ǃâubasens ǀamo ûib disa ge mā. ǂÂibasen-e ūhâ tama tsî ǃgomma tsâhe tama ǃhūbaib ǃnâ.​—⁠ǂHaiǂhais 21:3, 4.

Geoff-i ge ǃkharuǃnâ xūn ge Jesub ge mî, mîdi xa ra ǂâi kai da. ‘ǃGâiǃōn ge hâ gagasi ǂhâsiga ūhâna.’ (Mateub 5:3) Sadu tsîna ǂkhari ǁaeroba ra mâiǂui ǂgao, i du sadu gagasi ǂhâsiga kōǃgâ? Nēti i xūn ǃnâ sadu ǁaeba ūhâs ge gā-aisiba nî mādu. Tsēs hoas ǀguisa tama i tsî sadu ûib hoaba.