Dimoa yɛ mɔɔ hyia la. Baebolo ne tu folɛ kɛ, ‘bɛnwu ninyɛne mɔɔ hyia kpalɛ la.’ (Felepaema 1:10) Kɛlɛ ninyɛne mɔɔ anwo hyia nee mɔɔ ɔhyia kɛ ɛyɛ ye ndɛndɛ la. Kakye kɛ ngakyile wɔ nu. Kɛ neazo la, nwolɛ hyia kɛ ɛtɔ aleɛ nwo ninyɛne mɔɔ ɛbahyia nwo nɔsolɛ la, noko bie a ɔnrɛhyia kɛ ɛyɛ ye ndɛndɛ. Eza tɛ mekɛ ne amuala a debie mɔɔ hyia ndɛndɛ la anwo hyia a. Kɛ neazo, bie ɔbahyia kɛ ɛyɛ ye ndɛ ɛkɔnea TV zo gyimalilɛ bie, noko ɛhye ɛngile kɛ gyimalilɛ zɔhane anwo hyia. *

Suzu nwolɛ sie. Nolobɔvo 10:10 ka kɛ, “Saa awie akuma tili na yeanzi a, ɔwɔ kɛ ɔfa anwosesebɛ dɔɔnwo ɔyɛ gyima.” Akee ɔtoa zo kɛ: “Noko nrɛlɛbɛ boa maa bɛdi konim.” Ɛzukoalɛdeɛ ne a le boni? Wɔ ɛke edwɛkɛ si wɔ akuma ne, ɛlɛmaa wɔ anwosesebɛ kɛ ɛzuzu mɔɔ ɛkulo kɛ ɛyɛ la anwo ɛzie amaa wɔava wɔ mekɛ wɔali gyima kpalɛ. Yɛ ninyɛne mɔɔ anwo ɛngyia la amozi anzɛɛ gyakyi amaa wɔanyia mekɛ nee anwosesebɛ wɔayɛ mɔɔ anwo hyia la. Saa ɛnwu kɛ wɔyɛ gyima bie ndɛndɛ la ati ɛlɛ mekɛ a, duzu ati a ɛnyɛ mɔɔ anrɛɛ ɛbayɛ ye nzinlii la bie a? Saa ɛsuzu mɔɔ ɛyɛ la anwo ɛsie a, ɔbamaa wɔayɛ gyima dɔɔnwo kɛ mɔɔ awie mɔɔ ɛzi ye akuma yɛ la.

Tete ninyɛne zo wɔ wɔ ɛbɛlabɔlɛ nu. Bɔ mɔdenle kɛ ɛbakpo ninyɛne mɔɔ anwo ɛngyia na ɔsɛkye mekɛ la. Saa ɛfa ninyɛne dɔɔnwo ɛbobɔ zo a, ɔbamaa wɔavɛ na ɛ nye ɛnrɛlie.

Tusie yɛɛ kpɔkɛ mɔɔ bɛngola ye si. “Sonla mɔɔ nea anwoma ne la ɛnrɛlua ma, yɛɛ sonla mɔɔ nea amungu ne la ɛnrɛde ma.” (Nolobɔvo 11:4) Duzu a yɛsukoa yɛfi nu a? Tusie wua yɛ mekɛ yɛɛ ɔmmaa yɛnyɛ dɔɔnwo. Ɛyazonlɛnli mɔɔ kpondɛ kɛ maanle nu tɛnlabelɛ ne yɛ kpalɛ bɔkɔɔ na yealua ma la ɛnrɛlua anzɛɛ ɛnrɛde ye ma. Zɔhane ala a kenle bie edwɛkɛ mɔɔ yɛnze la bahola amaa yeayɛ se kɛ yɛbazi kpɔkɛ a. Anzɛɛ bie a yɛbade nganeɛ kɛ ɔwɔ kɛ yɛkendɛ kɔkpula kɛ yɛkɛnwu debie biala wienyi kolaa na yɛazi kpɔkɛ. Nɔhalɛ nu, ɔwɔ kɛ yɛyɛ neɛnleanu na yɛazi kpɔkɛ mɔɔ anwo hyia la. Mrɛlɛbulɛ 14:15 ka kɛ, “Mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.” Noko nɔhalɛ ne a le kɛ, kpɔkɛzilɛ dɔɔnwo wɔ ɛkɛ ne mɔɔ yɛnrɛnwu mɔɔ bavi nu ara la wɔ ɛkɛ ne ala a.​—⁠Nolobɔvo 11:6.

Mmanea ade kɛ ɛnrɛyɛ nvonleɛ. Gyemise 3:17 ka kɛ, ‘Nrɛlɛbɛ ne mɔɔ vi anwuma lɔ [anzɛɛ Nyamenle] la . . . lɛ ndelebɛbo.’ Ɔle zɔ, saa ɛkola ɛyɛ debie biala pɛpɛɛpɛ a, ɔle kpalɛ! Noko ɔdwu mekɛ ne bie na yɛangola yɛanyɛ ninyɛne pɛpɛɛpɛ kɛ mɔɔ yɛkpondɛ la a, ɔmaa yɛ sa nu to na yɛdi nyane. Kɛ neazo la, ɔwɔ kɛ awie mɔɔ ɛlɛsukoa aneɛ fofolɛ la nwu ye kɛ ɔbayɛ nvonleɛ na yɛazukoa debie yeavi nu. Noko saa yeanyɛ zɔ a, ɔnrɛhola ɔnrɛha aneɛ ne ɔluakɛ ɔze kɛ ɔbayɛ nvonleɛ na ɛhye ɛnrɛmaa ɔnrɛnyia anyuhɔlɛ. Nea kɛzi nwolɛ hyia kɛ ɛbɛlɛ ɛ nwo aze na ɛnwu mɔɔ ɛbahola wɔayɛ a! Mrɛlɛbulɛ 11:2 ka kɛ “Bɛlɛvoma ze nrɛlɛbɛ.” Bieko, menli mɔɔ bɛlɛ bɛ nwo aze la ɛmbu bɛ nwo somaa, yemɔti saa bɛti a ɔngyegye bɛ.

Nyia mekɛ mɔɔ ɛfa ɛyɛ gyima nee mɔɔ ɛfa ɛdie ɛ nye la. “Bɛ menle ɛlielɛ ekyi le kpalɛ tɛla gyima ɛsesebɛyɛlɛ nee anwoma mɔɔ bɛpele bɛtoa ye la.” (Nolobɔvo 4:6) Menli bie mɔ yɛ ‘gyima ɛsesebɛ’ somaa na bɛnnyia mekɛ bɛnlie bɛ menle ekyi bɔbɔ. Saa ɔbaye zɔhane a ɔmmaa bɛnnyia mekɛ nee anwosesebɛ. Noko mgbovonle sonla ‘die ɔ menle’ na ɔnva mekɛ ne ɔnyɛ gyima ɛsesebɛ. Baebolo ne maa yɛnyia adwenle mɔɔ fɛta la: Yɛ gyima ɛsesebɛ na maa ɛ nye ɛlie mɔɔ vi nu ba la anwo. Anyelielɛ ɛhye le “Nyamenle ahyɛlɛdeɛ.”​—Nolobɔvo 5:19.

Nyia mekɛ da. Baebolo kɛlɛvolɛ ko hanle kɛ, “Mebala na mealafe anzodwolɛ nu.” (Edwɛne 4:8) Ɔwɔ kɛ menli mɔɔ ɛnyi la anu dɔɔnwo kola da dɔnehwele mɔtwɛ amaa bɛade kpɔkɛ wɔ nwonane nu, nganeɛdelɛ nu na bɛahola bɛadwenle kpalɛ. Nafelɛ le adenle titili ko mɔɔ bɛdua zo bɛmaa adwenle ne yɛ gyima kpalɛ na bɛkakye edwɛkɛ a. Ɛhye ati saa ɛnyia mekɛ ɛda a, ɔmaa ɛkola ɛsukoa debie. Menli mɔɔ ɛnla kpalɛ la ɛnda ɛnnwu debie, bɛyia esiane, bɛnda bɛnyɛ bɛ gyima kpalɛ yɛɛ ɔngyɛ na bɛava ɛya.

Fa bodane mɔɔ ɛbahola wɔadwu nwolɛ la sie ɛ nye zo. “Ɔle kpalɛ kɛ ɛbava mɔɔ ɛ nye dua ye la wɔalie ɛ nye tɛla kɛ ɛbabɔ mɔdenle kɛ ɛdi wɔ atiakunluwɔzo nzi.” (Nolobɔvo 6:9) Ɛzukoalɛdeɛ ne a le boni? Sonla mɔɔ ze nrɛlɛbɛ la ɛmmaa atiakunluwɔzo ɛngile ye adenle, titili saa ɔbaye wɔ ninyɛne mɔɔ ɔnlɛ zolɛ tumi la anwo a. Yemɔti saa bɛlɛbɔ debie bie anwo nolo a, ɔmmaa ɔndwehwe ye adwenle. Emomu, ɔbɔ mɔdenle kɛ ɔbamaa ɔ kunlu adwo ekyi biala mɔɔ ɔbahola yeanyia ye la anwo​—yemɔ a “ɔ nye dua ye” a.

Subane mgbalɛ. Subane kpalɛ mɔɔ ɛbanyia la baboa wɔ yeamaa wɔanwu mɔɔ le kpalɛ, mɔɔ anwo hyia nee mɔɔ ɔwɔ kɛ ɛyɛ la. Saa wɔ ɛbɛlabɔlɛ le kɛ ɛda a, subane kpalɛ mɔɔ ɛbanyia ye la bahile wɔ ɛda ne adenle. Yemɔti subane kpalɛ baboa wɔ yeamaa wɔanwu debie mɔɔ anwo hyia wɔ ɛbɛlabɔlɛ nu la, na wɔava wɔ mekɛ wɔali gyima kpalɛ alehyenlɛ biala. Nienwu a ɛbanwu subane mgbalɛ ɛhye mɔ a? Menli dɔɔnwo kpondɛ ye wɔ Baebolo ne anu, ɔluakɛ bɛze kɛ nrɛlɛbɛ mɔɔ wɔ nu la tɛla biala.​—Mrɛlɛbulɛ 2:6, 7.

Maa ɛlɔlɛ ɛyɛ subane mɔɔ anwo hyia wɔ kpalɛ a. Kɔlɔsaema 3:14 ka kɛ, ɛlɔlɛ “maa menli koyɛlɛ di munli.” Saa yɛanla ɛlɔlɛ ali a, yɛ nye ɛnrɛlie, titili wɔ abusua ne anu. Menli mɔɔ bu bɛ nye gua nɔhalɛ edwɛkɛ ɛhye azo na bɛfa gyima nee anwonyia bɛdimoa bɛ ɛbɛlabɔlɛ nu la anye ɛnlie. Ɔnyɛ nwanwane kɛ Baebolo ne ka ɛlɔlɛ nwo edwɛkɛ fane dɔɔnwo kɛ nwolɛ hyia la!​—⁠1 Kɔlentema 13:​1-3; 1 Dwɔn 4:​8.

Ye mekɛ sie ɛkɛ fa di wɔ sunsum nu ngyianlɛ nwo gyima. Ɛnee nrenyia bie mɔɔ bɛfɛlɛ ye Geoff la lɛ yelɛ kpalɛ yɛɛ ngakula nwiɔ mɔɔ bɛ nye die la nee agɔnwolɛma kpalɛ. Ɛnee eza ɔyɛ gyima kpalɛ bie. Noko ɛnee ye gyima ne fa ye ngoane to esiane nu yɛɛ ɛnee ɔnwu amaneɛ. Ɔbizale ɔ nwo kɛ, “Asoo kɛ ɔwɔ kɛ asetɛnla ne yɛ la ɛne?” Kenle ko ɔgengale Baebolo nwo buluku bie mɔɔ Gyihova Alasevolɛ ɛyɛ la na ɔnyianle mualɛ mɔɔ ɔkpondɛ la.

Geoff hanle mɔɔ ɔlɛsukoa la bie hilele ɔ ye nee ɔ mra ne mɔ na bɛ nye liele nwolɛ. Ɛhye maanle abusua ne anu amra bɔle ɔ bo kɛ bɛdi bɛ sunsum nu ngyianlɛ nwo gyima na bɛava bɛ mekɛ bɛali gyima nrɛlɛbɛ nu. Baebolo ne mɔɔ bɛzukoale la maanle bɛnyianle anyelazo kɛ bɛbadɛnla aze dahuu wɔ ewiade mɔɔ amaneɛnwunlɛ ɛnle nu la anu.​—⁠Yekile 21:​3, 4.

Geoff anwubielɛ ne maa yɛkakye edwɛkɛ mɔɔ Gyisɛse Kelaese hanle la: “Anyelielɛ a le bɛdabɛ mɔɔ bɛze bɛ sunsum nu ngyianlɛ la.” (Mateyu 5:3) Asoo ɛlɛ ɛhulolɛ kɛ ɛbaye mekɛ ekyi wɔazie ɛkɛ wɔava wɔali wɔ sunsum nu ngyianlɛ nwo gyima ɔ? Kakye kɛ, saa ɛye ɛhye ɛsie ahane a, debie biala ɛnle ɛkɛ mɔɔ bamaa wɔala nrɛlɛbɛ ali wɔ alehyenlɛ ko biala anu wɔ wɔ ɛbɛlabɔlɛ nu a.