Полэ, со май важно. Андэ Библия пистромэ, кай амэ трэбуй тэ полас «со май важно всаворэстар» (Филиппийцам 1:10). Запистросар и май важно и май срочно дила, сави тути трэбуй тэ стерэс. Но на бистэр, кай и важно дила, например, тэ тинэс хамос каринг о обедо, нэ значит, кай када срочно дила. Ай кода, со можэт тэ здэлпэ, кай срочно, например, тэ на промэкэс и любимо пэрэдача, нэ значит, кай када важно *.

Гиндосар, со авэла май англэ. Андэ библия, андэ Экклезиаст 10:10 пистромэ: «Если о товэр ашэля най востро и лэс на парнярэна, тоди прижалапэ тэ стон бут зор. Но и мудрость поможый тэ домардён о лашимос». Сости амэн сытярэн кадэла алава? Парняр пэско товэр, то есть, погиндосар, со авэла англэ, кай май годявэрнэс тэ тратис и время. Отстов и на тер и дила, сави най важно и кати залэл и время и о зор. Если тутэ появисайля свободно время, васо бы тэ на стерэс кода, со камэсас тэ стерэс потом? Кала ту май англал пала вся погиндоса, када поможыя тути бут со тэ стерэс. Тоди ту авэса, сар о мануш, саво важ пэстири дила май англал парнярэл пэско товэр.

Жув май просто. Сытюв тэ ԥэнэс «най» кодэлэсти, со най важно, и со кати залэл и время. Кала проандярэс фартэ бут время лэ манушэнца и терэс бут дила, кадэлэстар можэт тэ авэл стрессо и тэ на авэл радость.

Кала отстос и дила и аштярэс май лащи время. «Кодэва, ко следий пала балвал, никала на сеия, и ко диқэл пэ тучи, никала на стидэла о уражаё» (Экклезиаст 11:4). Сости амэн сытярэн кадэла алава? Кала о мануш отстол и дила, во хасарэл и время и лэстэ на вижал бут тэ стерэл. Кала о мануш, саво залэлпэ ла ԥувьяса, аштярэл, кай тэ авэл фартэ лащи поӷода, во никала нисо на сеия и никала на стидэла о уражаё. Андэ жызня бут со парудёл и через када амэ можэм тэ лас тэ аштярас, кала авэла май лащи время, кай варисо тэ стерас. Или амэнди можэт тэ здэлпэ, кай фэдэр потом тэ прилас варисави ришэния, пока на уӷанаса вся, со трэбуй. Канешно, тэ прилас и важни ришэнии трэбуй годяса. Андэ Притчи 14:15 пистромэ: «Годявэрно [мануш] обгиндой, со лэла тэ терэл». Но, кала прилас бут ришэнии, амэ просто нэ можэм тэ шас сама пэ вся (Экклезиаст 11:6).

Кала аштярэс пэстар бут. Андэ Иакова 3:17 ԥэнэнпэ: «И мудрость... годявэрни». Када драго, кай амэ цырдаспэ каринг о лашимос. Но если амэ аштярас пэстар фартэ бут, амэндэ авэла ԥаримос и амэ умэкаса и вас. Например, о мануш, саво сытёл авэр шыб, трэбуй тэ авэл ӷотово каринг кода, кай лэла тэ шылийпэ, важ кода кай через када во можэт и тэ сытёл. Ай о мануш, саво аштярэл пэстар бут, дарал дажэ тэ гиндой пала кода, кай можэт тэ ԥэнэн варисо най кода. Пэ скати жэ дэ драго тэ авас сэжи и тэ на аштярэс пэстар бут! Андэ Притчи 11:2 пистромэ: «И мудрость кодэлэ манушэндэ, савэ сэжи». О мануш, саво сэжо и саво на заваздэл о шэро, на диқэл пэр пэстэ фартэ строӷо и можэт тэ асалпэ корко пэстар, кала лэстэ варисо на вижал.

Дик правильно пэ бути и по отдыхо. «Фэдэр набут покоё, чем бут ԥари бути и тэ ӷониспэ пала балвал» (Экклезиаст 4:6). Лэ манушэнди, савэ терэн фартэ бут бути, часто на дорэсэлпэ о лашимос важ и дила, сави вонэ стердэ. Лэндэ на ашэлпэ зор и время, кай тэ лошавэн кодэлэсти, со лэндэ вижыля. Ай и мануша, савэ на любин нисо тэ терэн, камэн, кай лэндэ тэ авэл «бут» покоё, ай екжэнэ пэ балвал вишон и время, сави фартэ куч. Андэ Библия пистромэ, кай амэ трэбуй пэ вся тэ диқас правильно. Анда оди тэ терас бути и тэ радосавас кодэлэсти, со стердэ амарэ вас. Кацави радость, када тожэ «лашимос лэ Дэвлэстар» (Экклезиаст 5:19).

Драго висовпэ. Андэ Библия пистромэ: «Спокойно пэрава и спокойно авава тэ совав» (Псалом 4:8). Лэ взрослонэ манушэсти, кай драго тэ отцыёл и тэ лэл зор, трэбуй и рят тэ совэл 8 часоря. Кала о мануш драго висовэлпэ, во май драго вся запоминает и ашэл май внимательно. Вся када поможый, кай май драго тэ терэл и годи. Ай кала о мануш на висовэлпэ, во лэл май долӷо тэ гиндой. Через када о мануш ашэл май холинако, лэл тэ шылийпэ и можэт тэ терэлпэ варисаво найлашимос.

Стов цэли, савэ вижала тэ домардёс. «Фэдэр тэ лошавэс кодэлэсти, со диқэн и яқа, чем тэ камэс кода, со нэ можэт тэ авэл тутэ» (Экклезиаст 6:9). Сости амэн сытярэн кадэла алава? О годявэрно мануш на домэкэл, кай лэса тэ хулаий кода, со во камэл. Особенно, кала када нэ можэт тэ авэл. Важ када во на шол сама пэ реклама и пэ кода, кай можно вушэро тэ лэл кредито. Кацаво мануш лошало кодэлэсти, со диқэн лэстирэ яқа, то есть, со можэт лэстэ тэ авэл.

Погиндосар пала кода, со тути куч. Кода, со па чачимастэ куч, поможый тэ полас, со драго, важно и полезно. Если и жызня тэ сыстосарас ла стреласа, тоди кода, со па чачимастэ куч, поможыя лати тэ витидэл правильно направления. Кода, со па чачимастэ куч, поможыя тути тэ витидэс, со май важно всаворэстар и годявэрнэс тэ тратис и время кажно дес и кажно часо. Кай жэ тэ виарақэс кода, со па чачимастэ куч? Бут мануша важ када адинон и Библия и прижанэн, кай андэр латэ вся и чачуни мудрость (Притчи 2:6, 7).

Мэк андэ тири жызня ӷлавно авэла и любовь. Андэ Колоссянам 3:14 пистромэ, кай и любовь, када «май ӷлавно и [вой] стидэл всаворэн». Если амэндэ нинай любовь, амэ нэ можэм тэ авас па чачимастэ бахталэ, особенно андо ери. И мануша, савэ на шон пэ када сама и терэн вся, кай тэ барвадён и варисо тэ домардён андэ жызня, ашэн най бахталэ и лэндэ нинай радость. Най евья андэ Библия ԥэнэнпэ, кай и любовь, када ӷлавно и пала латэ пистройпэ фартэ бут разоря (1 Коринфянам 13:1—3; 1 Иоанна 4:8).

Витидэ время важ о Дэл. Еқэ муршэстэ, савэс ақарэн Джефф, сас лашо ери, када хулаи, сави лэс любияс, и дуй бэяцэ. Ай кадяжэ лэстэ сас лашэ друӷоря и бути, сави лэсти чалёлас. Во сас врачо. Но пэ пэстири бути во часто диқэлас, со када смэрть и ԥаримос. Во гиндояс: «Чаче вся кадя и трэбуй сас тэ авэл?» Еқварэс лэсти динэ публикацыи, савэ лэ Иеговастирэ свидетеля стердэ па Библия. Кала во лэн проадиносардя, во виарақля бут атветоря пэ пэстирэ вопросоря.

О Джефф росԥэндя пэстиря хулаяти и лэ бэятонэнди кода, со уӷангля. Лэнди тожэ ашэля интересно и библейско новость. Кадя всаворэ ери ля май драго тэ уӷанэн лэ Дэвлэс. Через када вонэ ашэлэ май бахталэ и линэ тэ цэнин и время. Кода, кай вонэ линэ тэ изучают и Библия, дя лэнди тэ аштярэн и вечно жызня пэ люма, андэ сави нинай ԥаримос (Откровение 21:3, 4).

Кадэва примеро напоминает амэнди лэ Иисусостирэ алава: «Бахталэ, ко полэн, кай лэнди трэбуй о Дэл» (Матфея 5:3). Ай ту ӷотово тэ витидэс время важ о Дэл? Кати кадя тутэ авэла и мудрость, сави поможыя тути тэ на прожувэс ни ек дес евья.