’PULAI ke rumah ngagai bala pangan nuan, lalu padahka ngagai sida pemayuh utai ti udah dikereja Petara ke nuan, enggau pengasih Iya ke nuan,’ ku Jesus Kristus ngagai seiku ke deka nyadi murid iya. Maya nya, iya engka ba Gadara begian tenggara Tasik Galili. Jesus nemu mensia—rindu bekunsika utai ti ngalitka ati sereta beguna ngagai kaban belayan sida.—Mrk. 5:19.

Kemayaharitu, kitai suah beratika ulah tu ba mayuh orang. Kadang-kadang ulah tu tampak agi dipeda ba sekeda adat bansa. Lebuh seseiku orang nyadi penyembah Jehovah, iya ke suah iya deka bekunsika pengarap iya ngagai kaban belayan. Tang, nama chara iya? Baka ni iya nyapai ati kaban belayan ke enda sepengarap? Bup Kudus meri jaku lalau ti ngena sereta positif.

Ba abad keterubah, Andrew entara orang ti keterubah ke ngelala Jesus ke nyadi Messiah. Iya madah ngagai sapa dulu? “Andrew lalu ngiga menyadi lelaki iya Simon, lalu madah ngagai iya, ‘Kami udah tetemuka Messiah.’” Andrew mai Simon Peter ngagai Jesus lalu muka peluang ngagai iya nyadi murid Jesus.—Jhn. 1:35-42.

Kira-kira enam taun udah nya, lebuh Peter diau ba Joppa, iya dibai betemu enggau Kornelius, seiku pemesai soldadu ba Siseria. Peter betemu enggau sapa ba rumah Kornelius? “Kornelius endang udah nganti penatai [Peter enggau sida ke datai enggau iya], lalu udah ngempuruka semua kaban belayan enggau pangan iya.” Nya alai, Kornelius meri peluang ngagai kaban belayan iya kena ninga jaku Peter lalu milih sekalika sida deka nerima pemendar tauka enda.—SKR. 10:22-33.

Nama ulih dipelajarka kitai ari chara Andrew enggau Kornelius ke nulung kaban belayan sida?

Andrew enggau Kornelius enda diau diri aja. Andrew mai Peter ngagai Jesus lalu Kornelius ngatur ngambika kaban belayan iya ulih ninga jaku Peter. Andrew enggau Kornelius enda mejal tauka nipu kaban belayan sida ngambika nyadi murid Kristus. Nama utai ke ulih dipelajarka kitai? Kitai ulih berandau lalu ngiga peluang kena bekunsi pemendar Bup Kudus ngagai kaban belayan kitai sereta mai sida bekelala enggau bala menyadi Kristian kitai. Tang kitai patut bebasaka pemutus sida lalu enda mejal sida. Aram kitai meda chunto sepasang laki-bini ari Jerman, Jürgen enggau Petra.

Petra belajar Bup Kudus enggau Saksi-Saksi Jehovah lalu udah nya dibaptisa. Laki iya, Jürgen, seiku pemesai soldadu. Keterubah iya, Jürgen enda rindu pemutus ke digaga bini iya. Nyau kelama, iya nemu, Saksi-Saksi Jehovah ngajar utai ti bendar ari Bup Kudus. Iya mega nyerahka diri ngagai Jehovah. Diatu iya seiku tuai gempuru ba siti eklisia dia. Nama jaku lalau ke diberi iya pasal chara nulung kaban belayan ke enda sama pengarap?

Jürgen madah: “Kitai enda patut ngansak sereta madahka kelalu mayuh utai pasal pengarap kitai. Tu engka ngasuh sida nulak kitai. Manah agi enti kitai belubah-lubah bekunsika utai ngagai sida. Manah mega enti kaban belayan kitai bekaban enggau bala menyadi Kristian ti serambau sereta bisi minat ti sama. Chara tu ulih nulung sida nerima pemendar.”

Rasul Peter enggau kaban belayan Kornelius jampat nerima pesan ari Bup Kudus. Orang bukai ba abad keterubah engka begunaka mayuh awak kena nerima pemendar.

Lebuh Jesus ba dunya, beberapa orang ari kaban belayan Jesus bisi pengarap ngagai iya. Ambika chunto, rasul James enggau John. Engka seduai iya petunggal Jesus. Indai sida Salomi ibu Jesus. Iya engka seiku ari entara ‘mayuh indu ke bukai, ke ngena duit sida empu nulung Jesus enggau sida murid iya.’—Luk. 8:1-3.

Kaban belayan Jesus ke bukai enda pechayaka iya tekala nya. Setaun pengudah Jesus dibaptisa, mayuh orang begelumu dalam siti rumah ngambika ulih ninga ajar iya. Tang lebuh kaban belayan Jesus ninga utai ti nyadi, sida deka mai iya pulai, laban sida madah: “Iya nyau udah gila!” Enda lama udah nya, lebuh menyadi tiri Jesus nanya pasal pelan pejalai iya, Jesus enda nyaut enggau nyemetak. Nama kebuah? Laban “sida menyadi iya deh enda arapka iya.”—Mrk. 3:21; Jhn. 7:5.

Nama ulih dipelajarka kitai ari chara Jesus ngintu kaban belayan iya? Iya enda ringat lebuh sida madahka iya udah gila. Indah pengudah iya diangkatka idup baru, Jesus meransang kaban belayan iya enggau pegari ba mua menyadi tiri iya James. Tu ukai semina ngasuh James andal, tang bala menyadi iya ke bukai mega andal Jesus nya meh Messiah ke disemaya. Nya alai, sida bisi enggau bala rasul sereta orang bukai ba bilik sadau di Jerusalem lalu nerima roh kudus Petara. Udah nya, bala menyadi Jesus ke bukai, James enggau Jude, mega nerima berekat ti manah tu.—SKR. 1:12-14; 2:1-4; 1 Kor. 15:7.

Baka ba abad keterubah, sekeda kaban belayan kitai engka lubah nerima pemendar. Ambika chunto, Roswitha, amat aktif enggau Roman Katolik. Laki iya dibaptisa nyadi seiku ari Saksi-Saksi Jehovah ba taun 1978. Roswitha amat kering ba pengarap lalu ngelaban laki iya. Betaun-taun udah nya, iya sedar, bala Saksi ngajar utai ti bendar. Nya alai, ba taun 2003, Roswitha dibaptisa. Nama utai ti ngasuh iya berubah? Laki iya enda ringat lebuh dilaban, lalu iya meri peluang ngagai Roswitha kena ngubah runding iya. Nama jaku lalau ke diberi Roswitha? “Asil ti manah ulih dijapai enti kitai sabar, sabar, sereta majak besabar.”

Monika dibaptisa ba taun 1974, kira-kira sepuluh taun udah nya, dua iku anak lelaki iya nyadi Saksi. Taja pan laki iya Hans enda ngelaban, tang iya ngena awak ti lama ngambika ulih dibaptisa. Iya nya ba taun 2006. Nama jaku lalau ari sida? “Mengkang tetap ati ngagai Jehovah sereta enda ngereja utai ti ngelaban enggau prinsip Bup Kudus.” Kelimpah ari nya, Monika terus ngayanka pengerindu ngagai Hans. Sida seruran ngarapka Hans deka nerima pemendar.

Jesus kala ngambarka pemendar baka ai ti ulih meri pengidup ti meruan belama iya. (Jhn. 4:13, 14) Kitai deka kaban belayan kitai berasai nyamai ketegal ai pemendar tu. Endang amat, kitai enggai ngasuh sida lemas ketegal kelalu mayuh ai. Chara kitai nerangka pengarap kitai tau mai empas ba sida. Bup Kudus madahka “orang ke menyana berunding dulu sebedau sida nyaut,” sereta “orang ke bepenemu-dalam, berunding dulu sebedau sida bejaku. Utai ti disebut sida dipendingka orang magang.” Baka ni kitai ulih nitihka jaku lalau tu?—J-lam. 15:28; 16:23.

Seiku bini ke deka madahka pengarap iya ngagai laki iya patut “berunding dulu sebedau . .  . nyaut.” Iya enda nyaut enggau berumban tang iya milih leka jaku enggau manah. Iya enda ngumbai diri alim tauka pama agi ari orang bukai. Jaku bini ti bepenemu-dalam ulih meransang sereta mai pemaik. Kemaya laki berasai nyamai berandau? Kati iya bisi minat pasal sains, politik tauka sukan? Baka ni bini ulih ngasuh laki iya deka nemu pasal Bup Kudus tang ba maya ti sama bebasaka asai ati sereta runding iya? Tanya ke baka tu ulih nulung bini milih leka jaku ti bepenemu-dalam.

Nyapai ati kaban belayan ti enda sepengarap ukai semina ngena jaku aja. Jaku kitai patut disukung ulah ti menyana.

Jürgen madahka: “Titihka meh prinsip Bup Kudus ba pengidup besehari-sehari. Tu meh chara ti pemadu manah kena narit ati kaban belayan kena nemu pasal Bup Kudus.” Hans dibaptisa 30 taun pengudah bini iya dibaptisa. Iya madahka: “Chunto manah orang Kristian amat beguna ngambika kaban belayan ulih meda baka ni pemendar mai empas ti manah ba pengidup kitai.” Kaban belayan patut ulih meda asil ti manah ari pemendar ke bisi ba pengidup kitai ke ngasuh kitai bebida ari orang bukai.

Rasul Peter meri jaku lalau ti beguna ngagai bini ke bisi laki ti enda sepengarap. Ku iya madahka: ‘Tunduk ngagai laki kita, ngambika enti sida enda ngasika jaku Petara, sekeda sida ulih dibai arap ketegal ulah kita, ukai ketegal jaku kita. Lebuh sida meda pengudus enggau pemadas ulah kita. Pemajik kitai ukai datai ari utai ti ulih dipeda, baka jalai kita ngaduka buk kita, tauka bekenaka perengka emas, tauka gari, tang awakka pemajik kita datai ari ati kita ti bendar, ti enda nemu luya, ti nelap sereta imun, ti pemadu berega di mua Petara.’—1 Pet. 3:1-4.

Rasul Peter madahka ulah bini ti manah ulih mai laki iya ngagai pemendar. Christa bebendar nitihka prinsip tu kenyau ari maya iya dibaptisa ba taun 1972. Iya nguji nyapai ati laki iya nengah ulah iya ti manah. Taja pan laki iya kala belajarka Bup Kudus enggau Saksi-Saksi Jehovah, tang iya agi bedau nerima pemendar. Iya kala datai beberapa kali ngagai gempuru Kristian lalu rindu begulai ba eklisia. Bala menyadi mega bebasaka hak iya milih. Baka ni Christa ulih nyapai ati laki iya?

“Aku keran deka ngasika Jehovah. Ba maya ti sama, aku nguji nyapai ati laki aku nengah ulah aku, ukai ari jaku aku. Lebuh utai enda belaban enggau prinsip Bup Kudus, aku ngasika laki aku. Endang amat, aku bebasaka hak iya kena milih sereta nyerahka utai tu ba jari Jehovah.”

Chunto Christa nunjukka, ulah ti nemu berundingka orang bukai nya amat beguna. Iya tetap ngereja pengawa ti bekaul enggau pengarap, baka datai ngagai gempuru sereta enggau pengawa nginjil. Tang Christa nemu, laki iya mega bisi hak nerima pengerindu, awak sereta pengibuh ari iya. Lebuh nulung kaban belayan ke enda sepengarap, kitai patut ngena penemu-dalam, berundingka sida sereta nguji meretika sida. Bup Kudus madahka: “Semua utai ti nyadi di dunya ti endang nyadi ba maya ti diletak.” Tu nyengkaum awak ke dikena enggau diri sebilik, kelebih agi kaling pengidup ti enda sepengarap. Mayuh agi awak dikena begulai, mayuh agi peluang berandau enggau pangan diri. Randau ti manah ulih ngurangka asai ati ti puang, dikelaung tauka kepapas.—P-jar. 3:1.

Seiku menyadi lelaki ke benama Holger madahka: “Nya endang beguna enti kitai ngayanka pengerindu ngagai diri sebilik sereta besampi ke iya.” Apai iya dibaptisa 20 taun pengudah diri sebilik iya ke bukai dibaptisa. Christa madahka iya ‘terus ngarapka laki iya ila deka nerima pemendar.’ Kitai patut seruran ngembuan runding ti positif sereta ngarapka kaban belayan kitai deka nerima pemendar.

Tuju kitai nya ngetanka kaul ti manah enggau kaban belayan, meri sida peluang ngelala pemendar sereta nyapai ati sida nengah ajar ari Bup Kudus. Kelimpah ari nya, kitai mega patut ngintu sida enggau “nelap sereta nangi.”—1 Pet. 3:16.