ИИСУС аның соонҷа парарға итчеткен кізее чоохтаан: «Ибіңзер парып, Хан Худай [Иегова] сағаа ниме иткенін паза сағаа Ол хайди айаанын кізілеріңе чоохтап пир». Пу кирек Гадарда полған полар. Иисус пілген: кізілер хынығ паза аарлығ пілістернең туғаннарынаң ӱлезерге хынчалар, аннаңар пу кізіні ибзер ысхан (Марк 5:19).

Кізілер ам даа туғаннарынаң ӱлезерге хынчалар, аннаңар кізі Иеговаа пазырып пастаза, ол позының наа киртінізінеңер туғаннарынаң ӱлезерге хынча. Хайди анзын идерге? Пасха религиядағы алай Худайға киртінминчеткен туғаннарның чӱректеріне хайди теңерге? Библия анзына чахсы чӧптер пирче.

Пастағы векте Андрей Иисус Мессий полчатханын прайзынаң пурун піліп алған полар. Ол хабарнаң ол кемнең ӱлескен? «Піс кізілер сағыпчатхан Мессийні (пу „Христосты“ теені полча) таап алдыбыс». Іди Андрей Петрға Иисустың ӱгренҷізі полып аларға полыс пирген (Иоанн 1:35—42).

Алтыҷа чыл пазынаң Петр Иоппияда полғанда, аны Кесариязар Корнилийнің туразынзар килерге сурынғаннар. Петр Корнилийзер килгенде, анда кем полған? «Корнилий, тізең, туғаннарын паза чағын арғыстарын хығырып алып, оларны сағыпчатхан». Іди Корнилий туғаннарына паза нанҷыларына Петрның чооғын истіп аларға оңдай пирген (Илҷ. 10:22—33).

Андрейнең Корнилий туғаннарынаң хайди тудынғаннарынаң нимее ӱгренчебіс?

Андрей дее, Корнилий дее туғаннары пос алынҷа Худай сӧзін истіп аларына ізенмееннер. Андрей Петрны Иисуснаң таныстыр салған, Корнилий, тізең, туғаннарын Петрның чооғын истіп алар ӱчӱн, ибінзер хығырып алған. Корнилий дее, Андрей дее туғаннары Иисустың ӱгренҷілері пол парар ӱчӱн, оларны кӱстебееннер паза кӧйтіктенмееннер. Анзында піске хайдағ ӱгредіг? Піске ідӧк тудынарға кирек. Туғаннарыбысха Худай сӧзін искірерге паза олар Худай сӧзін истіп алзыннар тіп, оларға оңдай пирерге. Ӧмедегі харындас-пиҷелернең таныстырарға кирекпіс. Піс оларның алған пӧгіннерін улуғлапчабыс, аннаңар оларны кӱстирге чарабас. Хайди туғаннарыбысха полызарға Германиядағы Йюргеннің паза Петраның кӧзідімін кӧр кӧреелер.

Петра Иегованың киречілерінең Библия ӱгренген, нинҷе-де тус пазынаң кіреске тӱскен. Ол туста аның ирі армияда офицер полған. Пастап ипчізінең Библия ӱгренчеткені аның кӧңніне кірбеен. Пола-пола Иегованың киречілері Библиядағы сыннаңар чоохтапчатханын ол піліп алған. Ол ідӧк кіреске тӱскен. Ам ол ах сағал полча. Пасха религиядағы туғаннарның чӱректеріне теңерге хынчатханнарға Йюрген хайдағ чӧп пирче?

Йюрген чоохтапча: «Сырбалҷых поларға паза Библиядағы сыннаңар сыбыра чоохтирға чарабас. Іди итсе, кізінің истері саңай килбинібізер. Оңдай полза, духовнай пілістернең кӧместең ӱлезерге кирек. Ідӧк тиң арах частығ паза пір нименең айғасчатхан харындас-пиҷелернең таныстыр саларға чарир. Прай пу киректер тик ле полбас».

Петр илҷі паза Корнилийнің туғаннары Библиядағы хабарға табырах ӱндескеннер. Пасхаларына Иисустың соонҷа парарға пӧгін аларға кӧп арах тус кирек полған.

Иисус чирде полғанда, ағаа киртінген туғаннар полғанох. Кӧзідімге, Иисустың іҷезінің пиҷезі, Саломия, паза аның ікі оолғы, Иаковнаң Иоанн. Саломия илҷілерге паза Иисусха ниме-нооларнаң полысхан ипчілернің пірсі полған полар (Лука 8:1—3).

Че Иисустың пасха туғаннары ағаа киртінерге маңзырабааннар. Кіреске тӱскен соонда пірҷе чыл пазынаң Иисусты истіп аларға чон чыылысханда, аның туғаннары «„Иисус алҷаахча“ тіп, Аны апарыбызарға килгеннер». Ханҷа-да тус пазынаң аның харындастары аннаң сурығ сурғанда, Иисус оларға кӧні нандырбаан. Ноға? Аның харындастары ағаа киртінмееннер (Марк 3:21; Иоанн 7:5).

Иисус туғаннарынаң іди тудынғаны пісті нимее ӱгретче? Туғаннарының піреелері ол алаах парды тееніне Иисус тарынмаан. Казнь соонда, тіріл парып, Иисус позының харындазынзар Иаковсар килген. Іди килгені Иаковха ла нимес, че Иисустың пасха даа харындастарына Иисус Мессий полчатханына киртінерге полыс пирген. Аннаңар олар Иерусалимде илҷілернең паза пасха даа ӱгренҷілернең хада ызых хут алғаннар. Соонаң Иаков паза Иисустың пасха харындазы Иуда пасха даа аарлығ тоғыстар иткеннер (Илҷ. 1:12—14; 2:1—4; 1 Кор. 15:7).

Пастағы вектегі чіли, пірее кізілерге, сынның чолынзар турыбызар ӱчӱн, кӧп тус кирек. Росвитаның ирі 1978 чылда Иегованың киречізі пол парғанда, ол католик ипчі полған. Аннаңар ол иріне тоғырланған. Че пола-пола аның чӱрее амырап парыбысхан паза Иегованың киречілері сынға ӱгретчеткенін піліп алған. 2003 чылда ол кіреске тӱскен. Ноға? Аның ирі Росвитаның тоғырланыстарына тарынмаан паза ағаа кӧрістерін алыстырарға оңдай пирген. Росвита хайдағ чӧп пирче? «Тыстаныснаң кӧп нимее чидіп аларға чарир».

Моника 1974 чылда кіреске тӱскен. Онҷа чыл пазынаң аның ікі оолғы ідӧк Иегованың киречілері пол парған. Мониканың ирі тоғырланмаан даа полза, ол 2006 ла чылда кіреске тӱскен. Ол сӧбіре хайдағ чӧп пирерҷік? «Иеговаа киртістіг полыңар паза киртістеріңнең хыйа парбаңар». Ідӧк Моника паза ооллары Хансха хыныстарын кӧзіткеннері уғаа аарлығ полған. Паза олар Ханс Иегованың киречізі пол парарына киртіністерін чідірбееннер.

Иисус сынны мӧгі чуртас пирчеткен суғнаң тиңнестірген (Иоанн 4:13, 14). Пістің туғаннарыбыс ол суғдаң кӱс алынып алзыннар тіп хынчабыс. Че олох туста ол суғны кӧп паза удаа пиріп, оларны пурлухтыр саларға хынминчабыс. Кӱс кирінерлер бе алай пурлуғарлар ба піс оларға постарыбыстың киртінізібістерібістеңер хайди чоохтирыбыснаң палғалыстығ. Библияда «арығ чӱректіг кізінің чӱрее нандырар алнында сағынып алча» паза «хыйға кізі чоохтир алнында ниме тирге чахсы сағынып алча паза аның сӧстері киртістіг истілче» тіп пазылча. Пу чӧптернең хайди тузаланарға? (Прит. 15:28; 16:23).

Кӧзідімге, ипчізі иріне позының киртінізінеңер чоохтирға сағынча. «Нандырар алнында сағынып ал турза», ол чахсы сӧстер тілир паза маңзырап нандырбас. Позының киртінізінің ӱчӱн ирін нимее салбин полбас. Аның чахсы сағынып алған сӧстері ирінің кӧңнін кӧдірер паза таласпасха полызар. Хаҷан ирі пӧзік кӧңніліг полча? Нимедеңер чоохтазарға паза хығырарға хынча? Науканаң, политиканаң алай спортнаң айғасча ба? Иріне Библия хынығ ползын тіп ниме идерге паза олох туста аның чувстволарын паза кӧрізін хайди улуғлирға? Пу сурығлардаңар чахсы сағынып алғаны ағаа хыйға тудынарға полызар.

Киречілер полбинчатхан туғаннарның чӱректеріне теңер ӱчӱн, киртінізібістеңер кӧместең чоохтааны асхынах полар. Пістің киректерібіс сӧстерібіске килізерге кирек.

Йюрген чоохтапча: «Библияның принциптерінең хаҷан даа хыйа сыхпаңар. Анзы туғаннарыңны, олар анзын чоохтабазалар даа, Худайдаңар сынны піліп аларға хынарға кӧӧктірер». Ипчізінің соонда 30-ча чыл пазынаң кіреске тӱскен Ханс чоохтапча: «Библия принциптерінің хоостыра тудынғаны уғаа аарлығ. Анзы Худайдаңар сын сірерні чахсы саринзар алыстырчатханын кӧзітче». Киртінізібістің сылтаанда кізілерге тӧӧй полбинчатханыбыс піс хомай кізілер пол парғаныбысты нимес, чахсы кізілер пол парғаныбысты кӧзідерге кирек.

Иеговаа киртінминчеткен ирліг ипчілерге Петр илҷі уғаа аарлығ чӧп пирген. «Сірер, ипчілер, ідӧк ирлеріңнің сӧзінең сыхпаңар. Андада Худай сӧзін испинчеткен хай пірее ирлер, ипчілерінің чуртастары пастыра ла, артых чоохтаспин, Худайға хозыл парарлар. Сірернің арығ сағыстығ, Худайдаң хорығып чуртапчатханнарыңны кӧрзелер, оларға пір дее ниме чоохтирға кирек чох полар. Сірерні састы сіліг ӱрінгені, алтын чазағларны алай кеен кип-азахты кискені нимес, че чӱректең тӧріпчеткен нымзах, амыр кӧңніңернің уурабас сілии чазазын. Худай анзын аарлапча» (1 Пет. 3:1—4).

Пу стихтарда Петр ипчізі позының тудынызынаң ирін Худайзар ағылып аларынаңар чоохтапча. Криста пу чӧптер хоостыра 1972 чылда кіреске тӱскеннең сығара тудынча. Ол ирінің чӱреене позының киректерінең пастыра теңерге кӱстенче. Аның ирі нинҷе-де тус Библия ӱгренген полза даа, Иегованың киречізі пол парбаан. Ол нинҷе-де чыылыға чӧрген, ӧмедегі кӧбізі харындас-пиҷелернең таныс. Иегованың киречілері аның кӧрізін улуғлапчалар. Хайди Криста ирінің чӱреене тееп аларға кӱстенче?

Криста чоохтапча: «Иегова кӧзіт пирген чолҷа аннаң андар парарға хынчам. Олох туста мин аны Худайзар позымның киректерімнең ағылып аларға хынчам. Библиядағы принциптер сайбалбинчатса, ол хынчатхан оңдайнаң тудынчам. Мин аның кӧрізін улуғлапчам паза прай нимені Иегованың холына пир салғам».

Кристаның кӧзідімі духовнай киректерні дее, туғаннарыбысты даа тастабасха кирек полчатханын кӧзітче. Криста сыбыра ӧме чыылығларына чӧрче паза нымысчыланча. Олох туста ол пілінче: ағаа ирінең тус иртірерге, хынарға паза ағаа хайығ саларға кирек. Киртінминчеткен туғаннары пар Киречілерге, Криста чіли, оларның кӧрістерін санға аларға кирек. Библияда «прай нимее позының тузы пар» тіп пазылча. Киртінминчеткен туғаннарнаң нинҷе тус иртірерінде пу принципті санға аларға кирек. Ирі алай ипчізі киртінминчетсе, пу принципче уламох тудынарға кирек. Хоных хонғаныңнаң сыбыра чоохтасса паза кӧп тус иртірзе, ағаа ол чалғысханзым тіп пілдірбес паза кӱннебес (Эккл. 3:1).

Хольгернің пабазы, аның сӧбірезі Иегованың киречізі пол парған соонда, 20 ле чыл пазынаң кіреске тӱскен. Ол чоохтапча: «Киртінминчеткен туғаннарыбысха хынчатханыбысты паза олардаңар пазырчатханыбысты кӧзідерге уғаа кирек». Криста чоохтапча: «Ирім Иегованың киречізі пол парарында ізенізімні пір дее чідірбессім». Піске Иегованың киречізі полбинчатхан туғаннарыбысты нимее салбин полбасха паза ізенізібісті чідірбеске кирек.

Пістің кӧстиибіс — туғаннарыбыснаң ынағ поларға, Библиядағы сынны піліп аларға оңдай пирерге паза Библиядағы хабарнаң чӱректеріне теңерге кӱстенерге. Прай итчеткен киректерібісті амыр паза улуғласнаң тудынарға кирек (1 Пет. 3:15).