ဂုာ်ကျဲးစၢးဒ်သိး ကထုးန့ၢ် နဘူးနတံၢ်လၢ တစူၢ်တနာ်တၢ်ဘၣ်အသး
ဖဲယ့ၣ်ၡူးအိၣ်လၢ ကဒါရၤအဟီၣ်ကဝီၤ လၢပီၣ်လဲၣ်ကၤလံၤလါ အကလံၤထံးအခါ အဝဲတဲတၢ်ဒီး ပိာ်ခွါတဂၤလၢ အဲၣ်ဒိးကဲထီၣ်အပျဲၢ်အဘီၣ်. ယ့ၣ်ၡူးတဲအီၤလၢ “က့ၤလၢ နအိၣ်တၢ်လီၢ်, လၢနဘူးနတံၢ်အအိၣ် ဒီးတဲဘၣ်အဝဲသ့ၣ် တၢ်ခဲလၢာ်လၢ ယဟိဝၤယွၤ မၤန့ၢ်နၤ ဒီးတၢ်သးကညီၤလၢ အဝဲပာ်ဖျါထီၣ်လၢ နဖီခိၣ်အဂ့ၢ်တက့ၢ်.” ယ့ၣ်ၡူးအတၢ်ကတိၤသ့ၣ်တဖၣ်အံၤ ပာ်ဖျါထီၣ်ဝဲလၢ အဝဲနၢ်ပၢၢ်ပှၤဟီၣ်ခိၣ်ဖိ အတၢ်အိၣ်သး. ဒီးပှၤဟီၣ်ခိၣ်ဖိသ့ၣ်တဖၣ်န့ၣ် အဝဲသ့ၣ် အဲၣ်ဒိးတဲဘၣ် အဘူးအတံၢ်လၢ တၢ်လၢအဝဲသ့ၣ် ဘၣ်သူၣ်ဘၣ်သးဝဲဒီး တၢ်လၢအရ့ဒိၣ်သ့ၣ်တဖၣ်.—မၢ်ကူး ၅:၁၉.
မုၢ်မဆါတနံၤအံၤစ့ၢ်ကီး ပထံၣ်ဘၣ်လၢ ပှၤအါဂၤန့ၣ် အဝဲသ့ၣ် အဲၣ်ဒိးတဲဘၣ် အဘူးအတံၢ်လၢ တၢ်လၢအဝဲသ့ၣ် ဘၣ်သူၣ်ဘၣ်သးဝဲတဖၣ်. ဒီးညီနုၢ် ပှၤတဂၤ မ့ၢ်ကဲထီၣ် ယဟိဝၤယွၤ အခ့အပှၤန့ၣ် အဝဲအဲၣ်ဒိးတဲဘၣ် အဘူးအတံၢ်သ့ၣ်တဖၣ် ဘၣ်ဃးဒီးအတၢ်စူၢ်တၢ်နာ် လၢအသီတခါအံၤအဂ့ၢ်. ဘၣ်ဆၣ် အကြၢးတဲဝဲလၢ ကျဲဒ်လဲၣ်. တၢ်လၢ အတဲဝဲသ့ၣ်တဖၣ်န့ၣ် ဒ်သိး ကထုးန့ၢ်အဘူးအတံၢ်လၢ အတၢ်စူၢ်တၢ်နာ် တဒ်သိးဒီးအီၤဘၣ်တဖၣ်အဂီၢ် အဝဲကြၢးတဲဝဲလၢ ကျဲဒ်လဲၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ တၢ်ဟ့ၣ်ကူၣ်လၢအကဲဘျုး.
“ပထံၣ်ဘၣ် မ့းၡံအၤလံ”
ဖဲယ့ၣ်ၡူးအစိၤန့ၣ် စီၤအၣ်ဒရ့းမ့ၢ်ဝဲ ပှၤအဆိကတၢၢ်တဖၣ်အကျါတဂၤလၢ အသ့ၣ်ညါဝဲလၢ ယ့ၣ်ၡူးမ့ၢ် မ့းၡံအၤ. ဘၣ်ဆၣ် ဖဲစီၤအၣ်ဒရ့း သ့ၣ်ညါဝဲအခါ အတဲဘၣ်ဆိမတဂၤလဲၣ်. လံာ်စီဆှံ ပာ်ဖျါထီၣ်ဝဲလၢ “အဆိကတၢၢ်န့ၣ် စီၤအၣ်ဒရ့း လဲၤထံၣ်လိာ်အသးဒီး အဒီပုၢ်ဝဲၢ်ခွါ စီၤၡံမိၣ် ဒီးတဲအီၤလၢ “ပထံၣ်ဘၣ် မ့းၡံအၤလံ” (အခီပညီမ့ၢ်ဝဲ “ခရံာ်”).” ဖဲအံၤတဲဝဲလၢ စီၤအၣ်ဒရ့း လဲၤကိးဝဲ အဒီပုၢ်ဝဲၢ်ခွါ စီၤပ့းတရူးလၢ ယ့ၣ်ၡူးအအိၣ် အဃိ စီၤပ့းတရူး န့ၢ်ဘၣ်တၢ်ခွဲးတၢ်ယာ်လၢ ကကဲထီၣ်ဘၣ် ယ့ၣ်ၡူး အပျဲၢ်အဘီၣ်တဂၤ.—ယိၤဟၣ် ၁:၃၅-၄၂.
ဃုနံၣ်ဝံၤအလီၢ်ခံ ဖဲစီၤပ့းတရူးအိၣ်လၢ ဝ့ၢ်ယၤဖိၤအခါ ပှၤမၢအလဲၤလၢ သုးခိၣ်စီၤကန့လံး အဟံၣ် လၢအအိၣ်လၢ ဝ့ၢ်ကဲၤစါရံၤအပူၤ. ဖဲအဝဲလဲၤတုၤလၢ ဝ့ၢ်ကဲၤစါရံၤအခါ အဝဲထံၣ်ဘၣ် မတၤသ့ၣ်တဖၣ်လဲၣ်. လံာ်စီဆှံတဲဝဲလၢ “စီၤကန့လံးန့ၣ် အိၣ်ခိးကွၢ်လၢ် အဝဲသ့ၣ် ဒီးကိးဖှိၣ်ပာ်စၢၤဝဲ အဘူးအတံၢ် ဒီးအသကိးလၢ အရ့ဝဲ ဘူးဘူးတံၢ်တံၢ်တဖၣ်လီၤ.” ပထံၣ်ဘၣ်လၢ စီၤကန့လံး ဒုးအိၣ်ထီၣ် တၢ်ခွဲးတၢ်ယာ်ဒ်သိး အဘူးအတံၢ်သ့ၣ်တဖၣ် ကနၢ်ဟူဘၣ်တၢ်လၢ စီၤပ့းတရူး ကတဲဝဲသ့ၣ်တဖၣ်ဒီး မၤစၢၤအဝဲသ့ၣ်လၢ ကဆၢတဲာ်တၢ်လၢ အဘၣ်ကသ့အဂီၢ်.—မၤတၢ် ၁၀:၂၂-၃၃.
စီၤအၣ်ဒရ့း ဒီးစီၤကန့လံး မၤစၢၤအဟံၣ်ဖိဃီဖိဒ်လဲၣ် ဒီးပမၤလိန့ၢ်တၢ်လၢ အဝဲသ့ၣ်အိၣ်ဒ်လဲၣ်.
စီၤအၣ်ဒရ့း ဒီးစီၤကန့လံးန့ၣ် ဒုးအိၣ်ထီၣ်န့ၢ် တၢ်ခွဲးတၢ်ယာ်လၢ အဘူးအတံၢ်သ့ၣ်တဖၣ် ကနၢ်ဟူဘၣ် တၢ်သးခုကစီၣ်. ပထံၣ်ဘၣ်လၢ စီၤအၣ်ဒရ့း အနီၢ်ကစၢ်ဒၣ်ဝဲ တဲဘၣ်အဒီပုၢ်ဝဲၢ်ခွါ စီၤပ့းတရူး လၢယ့ၣ်ၡူးအဂ့ၢ်. မ့မ့ၢ် စီၤကန့လံးန့ၣ် ရဲၣ်လီၤကျဲၤလီၤဝဲလၢ အဟံၣ်ဖိဃီဖိ ကနၢ်ဟူဘၣ် တၢ်လၢစီၤပ့းတရူး ကတဲဝဲသ့ၣ်တဖၣ်. ဘၣ်ဆၣ် စီၤအၣ်ဒရ့း ဒီးစီၤကန့လံးန့ၣ် တမၢဆူၣ် အဘူးအတံၢ်ဒီး တဆီၣ်သနံး အဝဲသ့ၣ်လၢ ကကဲထီၣ် ခရံာ်အပျဲၢ်အဘီၣ်ဘၣ်. အဃိ ပကွၢ်လိ အဝဲသ့ၣ် ကသ့ဒ်လဲၣ်. ပကွၢ်လိ အဝဲသ့ၣ်သ့ ခီဖျိ ပတဆီၣ်သနံး ဒီးမၢဆူၣ်ပဘူးပတံၢ်တဖၣ်ဘၣ်. လၢတၢ်န့ၣ်အလီၢ် ပကတဲပၠးဘၣ် ပဘူးတံၢ်လၢ တၢ်လၢပသ့ၣ်ညါဘၣ် သ့ၣ်တဖၣ် ဒီးဒုးအိၣ်ထီၣ် တၢ်ခွဲးတၢ်ယာ်ဒ်သိး အဝဲသ့ၣ် ကသ့ၣ်ညါဘၣ် လံာ်စီဆှံ တၢ်မ့ၢ်တၢ်တီဒီး ကရ့လိာ်ဘၣ်အသးဒီး ဒီပုၢ်ဝဲၢ်မုၣ်ခွါတဖၣ်အဂီၢ်. ပကပာ်ကဲအဝဲသ့ၣ် တၢ်ဃုထၢဒီး ပတဆီၣ်သနံး ဒီးပတမၢဆူၣ် အဝဲသ့ၣ်ဘၣ်. ပမၤစၢၤ ပဘူးပတံၢ် ကသ့လၢကျဲဒ်လဲၣ်န့ၣ် ခဲအံၤ ပကတဲသကိး ပှၤနီၢ်ဒီမိၢ်ဝၤခံဂၤ လၢအမ့ၢ် ယိကဲၤ ဒီးဖဲးထြၢ် လၢအအိၣ်လၢ ကီၢ်ကၠၢမနံၣ်န့ၣ် မၤဝဲဒ်လဲၣ်.
ဖဲးထြၢ် မၤလိလံာ်စီဆှံဒီး ယဟိဝၤပှၤအုၣ်အသး ဒီးလၢခံန့ၣ် အဝဲဒိးဘျၢထံလီၤ. အဝဲမၤဝဲဒ်အံၤန့ၣ် သီသီခါဒု အဝၤယိကဲၤ လၢအကဲသုးခိၣ်န့ၣ် တဘၣ်သးဝဲဘၣ်. ဘၣ်ဆၣ်သနာ်က့ လၢခံန့ၣ် အဝၤသ့ၣ်ညါထီၣ်လၢ ယဟိဝၤပှၤအုၣ်အသးတဖၣ်န့ၣ် သိၣ်လိတၢ်မ့ၢ်တၢ်တီလၢ လံာ်စီဆှံပူၤ. အဃိ အဝဲစ့ၢ်ကီး ဟ့ၣ်လုၢ်ထီၣ်သး ဒီးဒိးဘျၢထံ ဒ်ယဟိဝၤပှၤအုၣ်အသး တဂၤအသိး ဒီးခဲအံၤ အဝဲကဲဝဲ တၢ်အိၣ်ဖှိၣ်သးပှၢ်တဂၤလံ. ဒ်သိးတၢ်လၢ ပတဲသ့ၣ်တဖၣ် ကထုးန့ၢ် ပဘူးပတံၢ်တဖၣ်လၢ အတၢ်စူၢ်တၢ်နာ် တဒ်သိးဒီးပှၤဘၣ် အသးအဂီၢ် အဝဲဟ့ၣ်ကူၣ်ဝဲဒ်လဲၣ်န့ၣ် ခဲအံၤ ပကတဲသကိးအီၤ.
ယိကဲၤ တဲဝဲလၢ “ပတကြၢးတဲဆူၣ် ပဘူးပတံၢ်တဖၣ်လၢ လံာ်စီဆှံအဂ့ၢ်ဘၣ်. ပမ့ၢ်တဲဆူၣ် အဝဲသ့ၣ်န့ၣ် ကကဲထီၣ် တၢ်တံာ်တာ်လၢ အဝဲသ့ၣ်အဂီၢ် ဒီးအဝဲသ့ၣ် တဘၣ်သးတဲတၢ်ဒီးပှၤလၢၤဘၣ်. ဘၣ်ဆၣ် ပမ့ၢ်တဲဘၣ်အဝဲသ့ၣ် တၢ်ဂ့ၢ်သ့သ့ဘၣ်ဘၣ် တဘျီတစဲးတဘျီတစဲးန့ၣ် ကဂ့ၤဝဲ. တကးဒံးဘၣ် ပမ့ၢ်ဒုးထံၣ်လိာ်သးဒီး ဒီပုၢ်ဝဲၢ်မုၣ်ခွါ လၢအသးနံၣ် ထဲသိးလိာ်အသးဒီးအဝဲသ့ၣ် ဒီးကၠဲးတၢ်ဒ်သိးလိာ်သးဒီး အဝဲသ့ၣ်န့ၣ် ဘၣ်သ့ၣ်သ့ၣ် ကကဲထီၣ်တၢ်မၤစၢၤလၢ အဝဲသ့ၣ်အဂီၢ်. ပမ့ၢ်မၤဒ်န့ၣ်န့ၣ် ပမၤစၢၤဘၣ် ပဘူးပတံၢ် ကညီထီၣ်ဝဲ.”
ယိကဲၤ တဲဝဲလၢ “ပတကြၢးတဲဆူၣ် ပဘူးပတံၢ်တဖၣ်လၢ လံာ်စီဆှံအဂ့ၢ်ဘၣ်.”
တၢ်မၢဖိပ့းတရူး ဒီးစီၤကန့လံး အဘူးအတံၢ်သ့ၣ်တဖၣ်န့ၣ် တူၢ်လိာ် လံာ်စီဆှံတၢ်မ့ၢ်တၢ်တီချ့မး. ဘၣ်ဆၣ် မ့မ့ၢ်ပှၤအဂၤသ့ၣ်တဖၣ်လၢ တၢ်မၢဖိအစိၤန့ၣ် တတူၢ်လိာ် လံာ်စီဆှံတၢ်မ့ၢ်တၢ်တီ ချ့ချ့ဘၣ်.
မ့မ့ၢ်ယ့ၣ်ၡူး အဒီပုၢ်ဝဲၢ်တဖၣ်တခီမီၤ
ဖဲယ့ၣ်ၡူး မၤတၢ်စံၣ်တဲၤတဲလီၤတၢ်မၤ အဆၢကတီၢ်န့ၣ် အဘူးအတံၢ်တနီၤ စူၢ်က့ၤနာ်က့ၤအီၤ. အဒိ ဖျါလီၤဂာ်လၢ တၢ်မၢဖိယၤကိာ် ဒီးတၢ်မၢဖိယိၤဟၣ်န့ၣ် မ့ၢ်ယ့ၣ်ၡူးအတခွါ. ဒီးအဝဲသ့ၣ်အမိ နီၢ်စၤလိၣ်န့ၣ် မ့ၢ်ဝဲယ့ၣ်ၡူးအမုၢ်ဂၢ်ဒီး “အသူဝဲ အနီၢ်ကစၢ် အတၢ်စုလီၢ်ခီၣ်ခိၣ် ဒ်သိးကမၤစၢၤ ယ့ၣ်ၡူးဒီးအတၢ်မၢဖိတဖၣ် အဂီၢ်လီၤ.”—လူၤကၣ် ၈:၁-၃.
ဘၣ်ဆၣ် မ့မ့ၢ်ယ့ၣ်ၡူး အဟံၣ်ဖိဃီဖိ လၢအဂၤတဖၣ်န့ၣ် တစူၢ်က့ၤနာ်က့ၤ အီၤတဘျီဃီဘၣ်. အဒိ ဖဲယ့ၣ်ၡူးဒိးဘျၢထံန့ၢ် တနံၣ်ဘျဲၣ်န့ၣ် ပှၤကမျၢၢ်တဖၣ် ပာ်ဖှိၣ်ထီၣ်အသးလၢ ဟံၣ်တဖျၢၣ်အပူၤ ဒ်သိး ကဒိကနၣ်တၢ်လၢ ယ့ၣ်ၡူးတဲဝဲတဖၣ်. “ဘၣ်ဆၣ် ဖဲယ့ၣ်ၡူးအဘူးအတံၢ်တဖၣ် နၢ်ဟူဝဲ ဘၣ်ဃးဒီး တၢ်မၤအသးတဖၣ်အခါ အဝဲသ့ၣ်လဲၤဝဲ ဒ်သိး ကဖီၣ်အီၤအဂီၢ် မ့ၢ်လၢ အဝဲသ့ၣ်တဲဝဲလၢ ‘အပျုၢ်လံ’ အဃိလီၤ.” လၢခံ ဖဲယ့ၣ်ၡူး အဒီပုၢ်ဝဲၢ်သ့ၣ်တဖၣ် သံကွၢ်အီၤလၢ အကလဲၤဖဲလဲၣ်အခါ အဝဲတစံးဆၢ အဝဲသ့ၣ်လိၤလိၤဘၣ်. ဘၣ်မနုၤအဃိလဲၣ်န့ၣ် မ့ၢ်လၢ “အဒီပုၢ်ဝဲၢ်ခွါတဖၣ်န့ၣ် တစူၢ်က့ၤနာ်က့ၤအီၤဒံးဘၣ်.”—မၢ်ကူး ၃:၂၁; ယိၤဟၣ် ၇:၅.
ယ့ၣ်ၡူး ရ့ဒီးအဘူးအတံၢ်ဒ်လဲၣ်န့ၣ် ပဟံးန့ၢ် တၢ်မၤလိသ့. ယ့ၣ်ၡူးအဘူးအတံၢ် တဲအီၤလၢ အပျုၢ်သနာ်က့ ယ့ၣ်ၡူးတသးထီၣ် အဝဲသ့ၣ်ဘၣ်. ဖဲပှၤမၤအၢမၤနးယ့ၣ်ၡူး ဒီးယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ ယ့ၣ်ၡူး ဟ့ၣ်ဂံၢ်ဟ့ၣ်ဘါ အဘူးအတံၢ်သ့ၣ်တဖၣ် ခီဖျိ လီၣ်ဖျါထီၣ်အသးလၢ အဒီပုၢ်ဝဲၢ်ခွါ စီၤယၤကိာ်အမဲာ်ညါ. ယ့ၣ်ၡူး လီၣ်ဖျါထီၣ်အသးတဘျီအံၤန့ၣ် ကဲထီၣ်တၢ်မၤစၢၤလၢ စီၤယၤကိာ်အဂီၢ် ဒ်သိးအကနာ်ဝဲလၢ ယ့ၣ်ၡူးန့ၣ် မ့ၢ်ဝဲ မ့းၡံအၤ. တကးဒံးဘၣ် ဖျါလီၤဂာ်လၢ အကဲထီၣ်စ့ၢ်ကီး တၢ်မၤစၢၤလၢ ယ့ၣ်ၡူးအဒီပုၢ်ဝဲၢ် လၢအဂၤသ့ၣ်တဖၣ်အဂီၢ် ဒ်သိးအဝဲသ့ၣ် ကနာ်ဝဲလၢ ယ့ၣ်ၡူးန့ၣ် မ့ၢ်ဝဲ မ့းၡံအၤ. ဒီးဖဲတၢ်မၢဖိသ့ၣ်တဖၣ် ဒီးပှၤအဂၤသ့ၣ်တဖၣ် အိၣ်လၢ ဟံၣ်ဖီခိၣ်တကထြၢလၢ ဝ့ၢ်ယရူၤၡလ့ၣ်အပူၤအခါ ယ့ၣ်ၡူးအဒီပုၢ်ဝဲၢ်တဖၣ် အိၣ်ဖဲန့ၣ်အဃိ ဖျါလီၤဂာ်လၢ အဝဲသ့ၣ်စ့ၢ်ကီး ဒိးန့ၢ်ဘၣ်သးစီဆှံ. လၢခံန့ၣ် ယ့ၣ်ၡူးအဒီပုၢ်ဝဲၢ် စီၤယၤကိာ် ဒီးစီၤယူဒၤစ့ၢ်ကီး အဝဲသ့ၣ် ဒိးန့ၢ်ဘၣ်တၢ်ခွဲးတၢ်ယာ်လၢ ကမၤဘၣ်ကစၢ်ယွၤ အတၢ်ဖံးတၢ်မၤ.—မၤတၢ် ၁:၁၂-၁၄; ၂:၁-၄; ၁ ကရံၣ်သူး ၁၅:၇.
ပှၤတနီၤနီၤန့ၣ် လိၣ်ဘၣ်တၢ်ဆၢကတီၢ်အါမး
ရိၤစဝံသး တဲဝဲလၢ “ပမ့ၢ်အိၣ်ဒီးတၢ်ဝံသးစူၤ ဒီးပမ့ၢ်ဆဲးပာ်ဖျါထီၣ် တၢ်ဝံသးစူၤန့ၣ် လၢခံ အကကဲဘျုးအါမး.”
ပဘူးပတံၢ်တနီၤန့ၣ် ဒ်သိး အဝဲသ့ၣ် ကလဲၤလၢ တၢ်မူအကျဲပူၤအဂီၢ် အဝဲသ့ၣ် လိၣ်ဘၣ်တၢ်ဆၢကတီၢ် ဒ်ပှၤတဖၣ်လၢ တၢ်မၢဖိစိၤအသိး. အဒိ ဖဲ ၁၉၇၈ န့ၣ်ပိာ်မုၣ်တဂၤ လၢအမံၤမ့ၢ် ရိၤစဝံသးန့ၣ် အဝၤဒိးဘျၢထံ ဒီးကဲထီၣ် ယဟိဝၤပှၤအုၣ်အသးတဂၤ. ဖဲန့ၣ်အခါ ရိၤစဝံသးန့ၣ် အသးဆူၣ်လၢ ရိမဲခဲၣ်သလ့ၣ် အတၢ်ဘူၣ်တၢ်ဘါ အတၢ်ဖံးတၢ်မၤဒိၣ်မး. အဝဲဆိကမိၣ်ဝဲလၢ အတၢ်စူၢ်တၢ်နာ်န့ၣ် ဘၣ်ဝဲအဃိ သီသီခါဒု အထီဒါအဝၤ. ဘၣ်ဆၣ် တဘျုးနံၣ်ဝံၤအလီၢ်ခံ အထံၣ်ဝဲလၢ ယဟိဝၤပှၤအုၣ်အသးတဖၣ်န့ၣ် သိၣ်လိတၢ်မ့ၢ်တၢ်တီအဃိ အဝဲတထီဒါ အဝၤလၢၤဘၣ် ဒီးအဒိးဘျၢထံဖဲ ၂၀၀၃. တၢ်မနုၤမၤစၢၤ ရိၤစဝံသး လၢအကဆီတလဲ အတၢ်ထံၣ်လဲၣ်. ရိၤစဝံသးန့ၣ် အထီဒါအဝၤဘၣ်ဆၣ် အဝၤကသးပှံၢ်ထီၣ်အီၤဘၣ်. အဝၤ ဆဲးမၤစၢၤအီၤဒ်သိး အကဆီတလဲ အတၢ်ထံၣ်. အဃိန့ၣ် ရိၤစဝံသး ဟ့ၣ်ကူၣ်ဝဲလၢ “ပမ့ၢ်အိၣ်ဒီးတၢ်ဝံသးစူၤ ဒီးပမ့ၢ်ဆဲးပာ်ဖျါထီၣ် တၢ်ဝံသးစူၤန့ၣ် လၢခံ အကကဲဘျုးအါမး.”
မ့မ့ၢ် ဒီပုၢ်ဝဲၢ်မုၣ်မါနံခၤ န့ၣ်အဒိးဘျၢထံဖဲ ၁၉၇၄ ဒီးအနံၣ် ၁၀ ဝံၤအလီၢ်ခံ အဖိခွါခံဂၤဒိးဘျၢထံစ့ၢ်ကီး. အဝၤ ဟဲၤ(စ်) န့ၣ်တထီဒါအီၤ နီတဘျီဘၣ်. ဘၣ်ဆၣ်သနာ်က့ အဝၤဒိးဘျၢထံလၢ ၂၀၀၆ မၣ်. ခီဖျိလၢ ဒီပုၢ်ဝဲၢ်မုၣ်မါနံခၤ အိၣ်ဒီးတၢ်ဝံသးစူၤအဃိ ကဲဘျုးဝဲအါမး. ဒီးအဟံၣ်ဖိဃီဖိ ဟ့ၣ်ကူၣ်ဝဲလၢ “တီဒီးယဟိဝၤယွၤ ထီဘိ ဒီးဆၢထၢၣ်ဂၢၢ်ကျၢၤ လၢနတၢ်နာ်အပူၤ.” ဒီးအဝဲသ့ၣ် ကဘၣ်ပာ်ဖျါထီၣ် တၢ်အဲၣ်လၢ ဟဲၤ(စ်) အဖီခိၣ်န့ၣ် အရ့ဒိၣ်စ့ၢ်ကီး. ဒီးအဝဲသ့ၣ် တဟ့ၣ်အၡူဘၣ် ဒီးအဝဲသ့ၣ်နာ်ဝဲလၢ မုၢ်ကအိၣ်ဝဲတနံၤန့ၣ် ဟဲၤ(စ်) ကတူၢ်လိာ် အဝဲသ့ၣ် အတၢ်စူၢ်တၢ်နာ်.
ဟ့ၣ်ဂံၢ်ဟ့ၣ်ဘါပှၤဂၤလၢ တၢ်မ့ၢ်တၢ်တီလၢ အလီၤဂာ်ဒီးထံ
ဘၣ်တဘျီ ယ့ၣ်ၡူးပာ်ဖျါထီၣ်ဝဲလၢ လံာ်စီဆှံတၢ်မ့ၢ်တၢ်တီန့ၣ် အလီၤဂာ်ဒ်သိးဒီး ထံလၢအဟ့ၣ်ပှၤ တၢ်မူအထူအယိာ်. (ယိၤဟၣ် ၄:၁၃, ၁၄) ပအဲၣ်ဒိး ဟ့ၣ်ဂံၢ်ဟ့ၣ်ဘါ ပဘူးပတံၢ်လၢ လံာ်စီဆှံတၢ်မ့ၢ်တၢ်တီ လၢအလီၤဂာ်ဒ်သိးဒီး ထံလၢအခုၣ် ဒီးအကဆှီ. အဃိ ပကဘၣ်ပလီၢ်ပသးဒ်သိး ပသုတဒုးအီဘၣ် ပဘူးပတံၢ် လၢတၢ်မ့ၢ်တၢ်တီအထံ အါတလၢ ဒီးချ့တလၢတဂ့ၤ. ပမ့ၢ်ဒုးအီအဝဲသ့ၣ်အါတလၢဒီးချ့တလၢန့ၣ် အဝဲသ့ၣ်ထုးတလုာ်သ့. အဃိ လံာ်စီဆှံတၢ်မ့ၢ်တၢ်တီလၢ ပတဲဘၣ်အဝဲသ့ၣ်န့ၣ် ကကဲထီၣ် တၢ်ဂံၢ်တၢ်ဘါဧါ ကကဲထီၣ်တၢ်သးဘၣ်တံာ်တာ်ဧါန့ၣ် ဒိးသန့ၤထီၣ်သးလၢ ပတဲပၠးအဝဲသ့ၣ် ဒ်လဲၣ်အဂ့ၢ်. လံာ်စီဆှံတဲဝဲလၢ “ပှၤတီပှၤလိၤန့ၣ် တချုးလၢ အစံးဆၢတၢ်ဒံးဘၣ်အခါ ဆိကမိၣ်ထံဝဲ” ဒီး “ပှၤကူၣ်တၢ်သ့န့ၣ် တဲတၢ်လၢ တၢ်ကူၣ်သ့အပူၤ ဒီးအတၢ်ကတိၤန့ၣ် ထုးန့ၢ်ပှၤသးလီၤ.” ပမၤထွဲ တၢ်ဟ့ၣ်ကူၣ်တခါအံၤ ကသ့ဒ်လဲၣ်.—ကတိၤဒိ ၁၅:၂၈; ၁၆:၂၃
မါတဂၤကအဲၣ်ဒိး တဲပၠးဘၣ် အဝၤလၢ အတၢ်စူၢ်တၢ်နာ်အဂ့ၢ် ဘၣ်ဆၣ် “တချုးလၢ အစံးဆၢတၢ်ဒံးဘၣ်အခါ” အမ့ၢ် “ဆိကမိၣ်ထံဝဲ” တၢ်ကတိၤသ့ၣ်တဖၣ် လီၤတံၢ်လီၤဆဲး ဒီးတကရီတဲတၢ်ဘၣ်န့ၣ် ကဂ့ၤဝဲ. အဝဲတကြၢး လီာ်သရၣ်အသး ဒီးပာ်ဖျါထီၣ်လၢ အသ့ဒိၣ်န့ၢ်ဒံးအဝၤဘၣ်. တချုးလၢ အဝဲတဲတၢ်ဒံးဘၣ်န့ၣ် အဝဲမ့ၢ်ဆိကမိၣ်ထံ တၢ်ဂ့ၢ်လီၤတံၢ်လီၤဆဲးန့ၣ် ကကဲထီၣ်တၢ်ဂံၢ်တၢ်ဘါလၢ အဝၤအဂီၢ် ဒီးကဒုးအိၣ်ထီၣ် တၢ်ဃူတၢ်ဖိး. ဒ်သိးအဝဲ ကတဲတၢ် သ့သ့ဘၣ်ဘၣ် ဒီးတဲတၢ်လၢ တၢ်ကူၣ်သ့အပူၤန့ၣ် အကြၢးဆိကမိၣ်ဆိ တၢ်သံကွၢ်တဖၣ်အံၤ. အဝၤပာ်အသး မုာ်မုာ်ခုၣ်ခုၣ် ဒီးသးအိၣ် တဲသကိးတၢ် အခါဖဲလဲၣ်. တၢ်ဂ့ၢ်လၢ အဝၤတဲသကိးဝဲမုာ် ဒီးဖးဝဲမုာ်န့ၣ် မ့ၢ်တၢ်ဂ့ၢ်မနုၤသ့ၣ်တဖၣ်လဲၣ်. မ့ၢ်အဝၤ သးအိၣ်ဘၣ်ဃးဒီးစဲအ့ၣ်, ထံဂ့ၢ်ကီၢ်ဂ့ၢ် ဒီးတၢ်လိာ်ကွဲဧါ. ဖဲအဝဲ ထိၣ်ဟူးထိၣ်ဂဲၤထီၣ်အဝၤလၢ အကအဲၣ်ဒိး သ့ၣ်ညါအါထီၣ် လံာ်စီဆှံအဂ့ၢ်အခါ အဝဲပာ်ကဲ အဝၤအတၢ်ထံၣ် ဒီးတၢ်ဆိမိၣ် ကသ့ဒ်လဲၣ်.
ဒ်သိး တၢ်လၢပတဲတဖၣ် ကထုးန့ၢ် ပဘူးပတံၢ်လၢ အတမ့ၢ် ယဟိဝၤပှၤအုၣ်အသးဘၣ်တဖၣ် အသးအဂီၢ် ထဲဒၣ်ပတဲပၠး အဝဲသ့ၣ်လၢ ပတၢ်နာ်အဂ့ၢ်န့ၣ် တလၢပှဲၤဒံးဘၣ်. ပကဘၣ် ပာ်ဖျါထီၣ် လၢပတၢ်မၤ.
ပာ်ဖျါထီၣ် တၢ်ဒိတၢ်တဲာ်လၢအဂ့ၤ
ယိကဲၤ တဲဝဲလၢ “ပကဘၣ်အိၣ်မူမၤထွဲ လံာ်စီဆှံအတၢ်ဟံးစုနဲၣ်ကျဲ လၢပတၢ်အိၣ်မူပူၤ ကိးနံၤဒဲး. ပမ့ၢ်မၤဒ်န့ၣ်န့ၣ် ဖဲပဘူးပတံၢ်တဖၣ် ထံၣ်ဝဲအခါ အဝဲသ့ၣ် မ့ၢ်တတူၢ်လိာ် တၢ်မ့ၢ်တၢ်တီဘၣ် သနာ်က့ အဝဲသ့ၣ် ကဒိကနၣ် တၢ်လၢပတဲ ဒီးကဆိမိၣ်ထံဝဲ.” ဟဲၤ(စ်) တူၢ်လိာ်ဝဲ တၢ်ကတိၤအံၤလီၤ. ဟဲၤ(စ်) အမါဒိးဘျၢထံန့ၢ်ဘူးထီၣ်လၢ အနံၣ် ၃၀ မၣ် ဟဲၤ(စ်) ဒိးဘျၢထံ. ဟဲၤ(စ်) တဲဝဲလၢ “ဒ်သိးပဘူးပတံၢ် ကထံၣ်ဘၣ်ဝဲလၢ လံာ်စီဆှံတၢ်မ့ၢ်တၢ်တီ ကဲဘျုးလၢ ပတၢ်အိၣ်မူပူၤန့ၣ် ပကဘၣ်ပာ်လီၤ တၢ်ဒိတၢ်တဲာ်လၢအဂ့ၤ.” ပဘူးပတံၢ်တဖၣ် မ့ၢ်ထံၣ်ဘၣ်ဝဲလၢ ပအိၣ်ဒီး လုၢ်လၢ်လၢအဂ့ၤန့ၣ် အဝဲသ့ၣ် ကသ့ၣ်ညါဘၣ်ဝဲလၢ ပလီၤဆီဒီး ပှၤလၢတၢ်ချၢတဖၣ်.
ဟဲၤ(စ်) တဲဝဲလၢ “ဒ်သိးပဘူးပတံၢ် ကထံၣ်ဘၣ်ဝဲလၢ လံာ်စီဆှံတၢ်မ့ၢ်တၢ်တီ ကဲဘျုးလၢ ပတၢ်အိၣ်မူပူၤန့ၣ် ပကဘၣ်ပာ်လီၤ တၢ်ဒိတၢ်တဲာ်လၢအဂ့ၤ.”
ဒီပုၢ်ဝဲၢ်မုၣ်လၢ အဝၤတမ့ၢ် ယဟိဝၤပှၤအုၣ်အသးဘၣ်န့ၣ် တၢ်မၢဖိပ့းတရူး ဟ့ၣ်ကူၣ်ဟ့ၣ်ဖးဝဲလၢ “ဒိးပၢသုသးလၢ သုဝၤအဖီလာ် ဒ်သိးအဝဲသ့ၣ် မ့ၢ်တဒိကနၣ် ကစၢ်ယွၤ အကလုၢ်ကထါဘၣ် ဒီးသုမ့ၢ်တတဲ ကစၢ်ယွၤ အကလုၢ်ကထါ နီတစဲးဘၣ် သနာ်က့ သုကထုးန့ၢ် အဝဲသ့ၣ်အသးဆူ တၢ်စူၢ်တၢ်နာ် ခီဖျိလၢ သုလုၢ်လၢ်သကဲာ်ပဝးအဃိ, မ့ၢ်လၢအဝဲသ့ၣ် ကထံၣ်ဘၣ် သုလုၢ်လၢ်သကဲာ်ပဝး လၢအကဆှီ ဒီးသုပာ်ကဲအီၤဒိၣ်မး အဃိလီၤ. မ်သုတၢ်ဃံတၢ်လၤန့ၣ် တဘၣ်မ့ၢ် တၢ်လၢအအိၣ်ဖျါလၢခိ ဒ်သိးဒီး တၢ်သံၣ်ခိၣ်ဆူၣ်, တၢ်သိးထူသိးလွဲ ဒီးတၢ်ကူတၢ်ကၤ ဃံဃံလၤလၤတဖၣ် န့ၣ်တဂ့ၤ. ဘၣ်ဆၣ် မ်အကမ့ၢ်တၢ်လၢ အအိၣ်ခူသူၣ်အသးလၢ သုသူၣ်ကံၢ်သးလဲအပူၤ, တၢ်ဃံတၢ်လၤလၢ အဟးဂီၤတသ့ဘၣ် လၢအမ့ၢ် တၢ်ပာ်သး မုာ်မုာ်ခုၣ်ခုၣ် ဒီးတၢ်သူၣ်စူၤသးစူၤန့ၣ်တက့ၢ်. တၢ်အဝဲအံၤ မ့ၢ်တၢ်လၢ အလုၢ်ဒိၣ်ပှ့ၤဒိၣ်လၢ ကစၢ်ယွၤအမဲာ်ညါလီၤ.”—၁ ပ့းတရူး ၃:၁-၄.
စီၤပ့းတရူး တဲဝဲလၢ မါတဂၤမ့ၢ်အိၣ်ဒီး လုၢ်လၢ်သကဲာ်ပဝးလၢအဂ့ၤန့ၣ် ကထုးန့ၢ်အဝၤအသး. ဒီပုၢ်ဝဲၢ်မုၣ် ခရံၣ်စတၤ လၢအဒိးဘျၢထံဖဲ ၁၉၇၂ နံၣ်တဂၤန့ၣ် အဝဲမၤထွဲဝဲ လံာ်စီဆှံ အတၢ်ဟံးစုနဲၣ်ကျဲအံၤ. ဒီးအဝဲဂုာ်ကျဲးစၢၤ ထုးန့ၢ်အဝၤအသး ခီဖျိ အဝဲပာ်ဖျါထီၣ်လၢ အအိၣ်ဒီး လုၢ်လၢ်သကဲာ်ပဝးလၢအဂ့ၤ. လၢညါန့ၣ် ခရံၣ်စတၤ အဝၤမၤလိလံာ်စီဆှံဒီး ယဟိဝၤပှၤအုၣ်အသးဘၣ်ဆၣ် အတတူၢ်လိာ် တၢ်မ့ၢ်တၢ်တီဒံးဘၣ်. အဝဲဟဲထီၣ်တၢ်အိၣ်ဖှိၣ် ဒီးရ့ဒီးဒီပုၢ်ဝဲၢ်မုၣ်ခွါတဖၣ် ဘၣ်ဆၣ် အဝဲကဃုထၢလၢ အကကဲထီၣ် ယဟိဝၤပှၤအုၣ်အသးဧါ တကဲထီၣ်ဘၣ်ဧါန့ၣ် ဒီပုၢ်ဝဲၢ်မုၣ်ခွါသ့ၣ်တဖၣ် ပာ်ကဲဝဲ အတၢ်ဃုထၢ. ဒီးအမါ ခရံၣ်စတၤ ဂုာ်ကျဲးစၢးထုးန့ၢ်အသး လၢကျဲဒ်လဲၣ်.
ဒီပုၢ်ဝဲၢ်မုၣ်ခရံၣ်စတၤ တဲဝဲလၢ “ယပာ်လီၤယသးလၢ ယကမၤထွဲတၢ်လၢ ယဟိဝၤယွၤ အဲၣ်ဒိးလၢ ယကမၤသ့ၣ်တဖၣ်. ဒီးယဂုာ်ကျဲးစၢး ပာ်ဖျါထီၣ် လုၢ်လၢ်သကဲာ်ပဝးလၢအဂ့ၤ ဒ်သိး ကထုးန့ၢ်ယဝၤအသး. တၢ်လၢယဝၤ မၢယမၤတဖၣ် မ့ၢ်တထီဒါလိာ်အသးဒီး လံာ်စီဆှံ အတၢ်ဟံးစုနဲၣ်ကျဲဘၣ်န့ၣ် ယဂုာ်ကျဲးစၢး မၤထွဲအီၤ. ဒီးယပာ်ကဲ အတၢ်ဆၢတဲာ် ဒီးယအးလီၤ ယတၢ်ကီတၢ်ခဲလၢ ယဟိဝၤယွၤ အစုပူၤ.”
ခရံၣ်စတၤ အတၢ်လဲၤခီဖျိန့ၣ် ပာ်ဖျါထီၣ်ဝဲလၢ ပမ့ၢ်တကဲပှၤလၢအခိၣ်ကိၤဘၣ်န့ၣ် ကဲဘျုးဝဲဒိၣ်မး. အဝဲဆဲးမၤဆူၣ်ထီၣ် အနီၢ်သး ခီဖျိ အဝဲလဲၤထီၣ်တၢ်အိၣ်ဖှိၣ် ဒီးစံၣ်တဲၤတဲလီၤတၢ်ထီဘိ. ဒီးအဝဲသ့ၣ်ညါဝဲလၢ အဝၤကြၢးဒိးန့ၢ် အတၢ်အဲၣ်, အတၢ်ဆၢကတီၢ်အဃိ အဝဲပာ်ဖျါထီၣ် တၢ်ဒိသူၣ်ဒိသးလၢ အဝၤအဖီခိၣ်. လံာ်စီဆှံတဲဝဲလၢ “တၢ်ဆၢကတီၢ် အိၣ်ဝဲလၢ တၢ်ခဲလၢာ်အဂီၢ်” အဃိ ပကဘၣ်ရ့ဒီး ပဘူးပတံၢ်သ့ၣ်တဖၣ် လီၤဆီဒၣ်တၢ် ပသးသမူတံၤသကိး လၢအတမ့ၢ် ယဟိဝၤပှၤအုၣ်အသးဘၣ်သ့ၣ်တဖၣ်. ပမ့ၢ်ရ့ဒီးအဝဲသ့ၣ်န့ၣ် ပတၢ်ရ့လိာ်သးဒီးအဝဲသ့ၣ် ကဂ့ၤထီၣ်. ဒီးအဝဲသ့ၣ် တတူၢ်ဘၣ်လၢ အအိၣ်သယုၢ်သညိ ဒီးပပာ်တ့ၢ်ကွံာ် အဝဲသ့ၣ်ဘၣ်အဃိ အဝဲသ့ၣ် တသူၣ်က့ၣ်သးက့ၣ်ပှၤဘၣ်. ဖဲပရ့ဒီး ပဘူးပတံၢ်လၢ အတမ့ၢ် ယဟိဝၤပှၤအုၣ်အသးဘၣ်အခါ ပမ့ၢ်တကဲပှၤလၢအခိၣ်ကိၤဘၣ် ဒီးအိၣ်ဒီးတၢ်ဒိသူၣ်ဒိသးန့ၣ် ပကမ့ၢ်ပှၤလၢ အအိၣ်ဒီးတၢ်ကူၣ်သ့.—စံၣ်တဲၤတဲလီၤတၢ် ၃:၁.
ဟ့ၣ်အၡူတဂ့ၤ
ဟိကၢၤန့ၣ် အပါ ဒိးဘျၢထံလၢ အဟံၣ်ဖိဃီဖိဒိးဘျၢထံန့ၢ် အနံၣ် ၂၀ ဝံၤမၣ်. ဟိကၢၤတဲဝဲလၢ “ပကဘၣ်ပာ်ဖျါထီၣ် တၢ်အဲၣ်တၢ်ကွံလၢ ပဟံၣ်ဖိဃီဖိအဖီခိၣ် ဒီးဃ့ဘါထုကဖၣ်န့ၢ်တၢ်လၢ အဝဲသ့ၣ်အဂီၢ်န့ၣ် အရ့ဒိၣ်ဒိၣ်မး.” ဒီပုၢ်ဝဲၢ်မုၣ် ခရံၣ်စတၤ တဲဝဲလၢ အဝဲမုၢ်လၢ်ဝဲလၢ အဝၤကဘူၣ်ထီၣ်ဘါထီၣ် ယဟိဝၤယွၤ ဒီးတူၢ်လိာ်တၢ်မ့ၢ်တၢ်တီ အဃိ အဝဲတဟ့ၣ်အၡူ နီတဘျီဘၣ်. ပဘူးပတံၢ်လၢ အတၢ်စူၢ်တၢ်နာ် တဒ်သိးဒီးပှၤဘၣ်န့ၣ် ပကဘၣ်ပာ်ဖျါထီၣ် တၢ်သူၣ်ဂ့ၤသးဝါလၢ အဝဲသ့ၣ်အဖီခိၣ် ဒီးမုၢ်လၢ်လၢ အဝဲသ့ၣ် ကတူၢ်လိာ် တၢ်မ့ၢ်တၢ်တီ.
ပတၢ်တိာ်ပာ်န့ၣ် မ့ၢ်ဝဲ ပကဆဲးရ့လိာ်သးဒီး ပဘူးပတံၢ် ဒီးမၤစၢၤအဝဲသ့ၣ် ဒ်သိး အဝဲသ့ၣ် ကသ့ၣ်ညါနီၤဖး တၢ်မ့ၢ်တၢ်တီ ဒီးကထုးန့ၢ်အဝဲသ့ၣ် အသးဂီၢ်. တၢ်လၢပမၤ တမံၤဂ့ၤတမံၤဂ့ၤန့ၣ် ပကဘၣ်အိၣ်ဒီး “တၢ်သးစူၤ ဒီးတၢ်ပာ်ကဲဒိၣ်မး.”—၁ ပ့းတရူး ၃:၁၅.
