“NZHOGꞸMA in nzunge, ri xipji kʼo in bʼedyige texe kʼua ja ba juentsʼkʼe Mizhokjimi Jehová ñe kʼua ja ba mbøxkʼꞹ”, akjanu go xipji e Jesús dʼa bʼɇzo ke mi nee ro nge in discípulo angeze. Bʼꞹma bʼɇchʼi mi bʼꞹntrjo a Gadara, a sureste kja kʼe trjazapjꞹ a Galilea. Kʼo go mama e Jesús mi ñetsʼe ke mi pa̱ra̱ na joo jaga nge yo ntee:​ke nee ra xipji in bʼedyi ma pje kʼo tøtrʼꞹji kʼo me na joo​(Mar. 5:​19).

Yo padya xo ñetsʼe ke jegakjanu yo ntee, xo bʼꞹbʼꞹ kʼo jñiñi ke mazi ñetsʼe akjanu. Ngekʼua ma kjo pjɇzhi testigo e Jehová me nee ra zopjꞹ kʼo in bʼedyi kʼo na pa̱ra̱ kja o Jñaa e Mizhokjimi. ¿Jarga tsjapꞹ? ¿pje ni jyodʼꞹ ra tsjaa ngekʼua ra zⱥtrʼpʼⱥ kja o mꞹbʼꞹ yo bʼedyi ke pɇsʼi nandyo religión​o kʼo dya xi kreo e Diosi? Ne Jñakjimi jitsʼiji kʼo søø ra kjaaji.

Kja kʼe otrʼꞹ siglo e Andrés nge kʼꞹ otrʼꞹ go mba̱ra̱ ke e Jesús mi ngeje kʼe Mesías. ¿Kjo go xipji dabadiji? “Kʼꞹ otrʼꞹ go chjɇbi bo nge e Simón kʼꞹ nu kjuarma, kjanu o xipji: ‘A ro totrʼꞹjme kʼe Mesías’ (kʼo nee ra mama ngeje e Cristo).” Nakʼua o zidyi e Pedro nu ja mi bʼꞹbʼꞹ e Jesús i akjanu xo go ngeje o discípulo​(Juan 1:​35-​42).

Ma o kjogꞹ ñanto kjɇɇ, e Pedro —ke mi bʼꞹbʼꞹ a Jope— o ma xiji ke ro ma a norte de Cesarea kja o ngumꞹ dʼa xundaro ke mi chju̱u̱ Cornelio. ¿Kʼo nge kʼo mi bʼꞹbʼꞹnu? Nu Jñakjimi mama “E Cornelio, ya mi tebʼeji [kʼo mi pøji ko e Pedro], i e Cornelio a bi xipji kʼo in bʼedyi i ñe kʼo in jobi”. Akjanu, e Cornelio go jyɇzi ke in bʼedyi ro dyⱥrⱥji e Pedro i ro mba̱ra̱tsjɇji ma mi nee ro dyⱥtⱥji e Tsʼitajensʼe​(Hech. 10:22-​33).

¿Pje ri pjechpiji e Andrés ñe e Cornelio ja ba mbøsꞹbi in bʼedyibi?

Angezebi dya go jyɇzibi ke ro zⱥtsʼɇ dʼa nu paa ma kjo ro jichiji in bʼedyibi, iyo. E Andrés o jyodʼꞹ in kjuarma ngekʼua ro mba̱ra̱ kjo mi nge e Jesús, i e Cornelio go jmutꞹ o bʼedyi kja i nzumꞹ ngekʼua ro dyⱥrⱥji e Pedro. Angezebi dyago obligaobi in bʼedyibi ro pjɇzhiji cristiano. ¿Pje jitsʼkøjikʼo? ¿Pje ri pjechpʼijikʼo? Bʼꞹma søø ra ñaji ko in bʼedyiji kʼo nee ra mba̱ra̱ji. Ra jodʼꞹji dʼa nu paa ke ra ma kjijñiji ngekʼua ra xøpꞹji nu Jñakjimi, xo na joo ke ra kjapji ra mba̱ra̱ji yo in joji ke ngeji testigo e Jehová. Ni jyodʼꞹ dya ra obligaoji i ra jɇzitsʼɇji ra nuji pje nee ra tsjaaji. Ra pa̱ra̱ji jarga pjøsʼꞹji, ra nuji kʼo go tsjabi e Jürgen ñe nu suu e Petra, ke je tsjabi a Alemania.

E Petra go xørꞹ nu Jñakjimi ko yo testigo e Jehová i o juinji kja nrreje. In xira mi nge xundaro, angeze dya mi nuu na joo kʼo go tsjaa e Petra. Ma go kjogꞹ yo paa go unꞹ nguenda ke yo testigo e Jehová jizhiji kʼo na kjuana ja ga mama nu o Jñaa e Yose. Ngekʼua angeze xo go juinji kja nrreje i bo nge testigo e Jehová, i nudya a nge dʼa anciano kja jmurkjimi. ¿Pje mama angeze ke ra kjaji ngekʼua ra zⱥtrʼpʼⱥji kja o mꞹbʼꞹji yo in bʼedyiji ke pɇsʼiji nandyo religión?

Jürgen mama: “Dya ra obligaoji ra mba̱ra̱ji kʼo ri kreogøji ko na punkjꞹ información. Ma ra kjaajikʼo dya kja ra nee ra dyⱥrⱥji. Mazi na joo ke ra xiji chikileje dʼa jñaa ma ra chjɇji. Xo na joo ma ra mba̱ra̱ji kjo nge yo in kjuarmaji kja jmurkjimi ñe yo in jobigoji. Akjanu ra nee ra mba̱ra̱ji kjo ngezgojme”.

Kʼe apóstol Pedro ñe nu pjamilia e Cornelio dya go mezheji ro tsjaaji kʼo mama e Yose. Kja kʼe otrʼꞹ siglo xo go bʼꞹbʼꞹ ntee ke xo go mezheji ro nee ro tsjaaji kʼo nee e Tsʼitajensʼe.

Janzi o bʼedyi e Jesús go nee go mba̱ra̱ji kʼo mi jizhi angeze. Nzakja kʼe apóstol Santiago ñe e Juan mi primojikʼo, i nu nanayo mi ngeje e Salomé i angeze mi nge nu zizi e Jesús. Bʼꞹma e Salomé “mi nge dʼa kʼo nrrinxꞹ” ke mi “unꞹji e Jesús kʼo pje nrre mi jyodʼꞹ”​(Luc. 8:​1-3).

Ma o mbꞹrꞹ o jizhi e Jesús o jñaa e Mizhokjimi janzi o kjuarma dya go tsjapꞹji nguenda. Da nu paa, ma a bi kjogꞹ dʼa kjɇɇ ke a bi nginji kja nrreje na punkjꞹ ntee go jmurꞹji kja dʼa ngumꞹ ngekʼua ro dyⱥrⱥji kʼo mi jizhi angeze. “Ma kʼo in bʼedyi go dyⱥrⱥji kʼo mi jizhi —mama kʼe pezhe—, o mbedyeji i mi nee ro sꞹrꞹji, nange mi manji: ‘dya kja trjꞹmbeñenu’. ” Ma o kjogꞹ janzi paa, kʼo o kjuarma ke mi nge kʼo o chii nu jⱥta e Jesús o xiji ja ro søø ro maa, angeze dya pje bo mama. ¿Pjekja dya o tsjapꞹ nguendakʼo? Nange “dya mi creoji kʼo mi jizhi e Jesús”​(Mar. 3:​21; Juan 7:5).

¿Pje ri pjechpiji kʼo o tsjaa e Jesús ko in bʼedyi? Dya go ꞹdʼꞹ ma o xiji ke dya kja mi trjꞹmbeñe. Nzakja ma o mbotrʼꞹji i o nanga na yeje xi go mbøsꞹ in bʼedyi, nzakja ma o chjɇbi o kjuarma e Santiago zø a bi nrru̱u̱ e Jesús e Santiago go jñanrra na yeje,­ i nujyo o mbøsꞹ trexe o bʼedyi ro creoji ke mi ngeje nu Mesías. Nange angezeji xo mi bʼꞹnji ko kʼo apóstole ma mi bʼꞹnji a Jerusalén kja dʼa jyⱥxkomꞹ xo go bʼꞹbʼꞹ nu zɇzhkjimi ko angezeji. Ma xi go kjogꞹ janzi kjɇɇ e Santiago ñe e Judas kʼo mi kjuarma e Jesús xi go unꞹji pje nrre ro pjɇzhiji ​(Hech. 1:​12-​14; 2:​1-4; 1 Cor. 15:7).

Nzakja kʼe otrʼꞹ siglo, bʼꞹnkʼo go mezhe ke ro jñechʼeji o mꞹbʼꞹ e Yose ngekʼua ro minji texe yo paa. Nzakja kʼo go kjogꞹ e Roswitha, me mi sʼiya nu religión católica i kjijñi ke ma joo kʼo mi kreo, ma o xira go nge testigo e Jehová kja nu kjɇɇ 1978, e Roswitha dya go zⱥmpⱥ kʼo mi kreo angeze. Ma o kjogꞹ yo kjɇɇ i o jñanrra ja ma mimi nu xira dya kja go ꞹdʼꞹ i go unꞹ nguenda ke yo testigo e Jehová jizhiji kʼo mama nu Jñakjimi, i kja nu kjɇɇ 2003 bo juinji kja nrreje i akjanu bo ngeje testigo e Jehová. ¿ i pjekja go tsjaa akjanu? kʼo o mbøsꞹ ma o jñanrrba ke nu xira dya mi ꞹdʼꞹ, ke ma jonrre angeze mi tebʼe ke ro potꞹ ja ma ngijñi. Angeze mama: “me ra mbøxkꞹji ke ra tebʼeji i mazi ra tebʼeji.”

E Monika bo juinji kja nrreje kja kʼe kjɇɇ 1974, i ma go kjogꞹ dyechʼa kjɇɇ kʼo yeje o trʼii go ngejui testigo e Jehová. Nu xira e Hans zø dya pje mi mama, ixko kjogꞹ 22 kjɇɇ ma kja bo ngeje testigo e Jehová kja kʼe kjɇɇ 2006. Ma kjijñiji kʼo go kjogꞹ, ¿pje mama angezeji ke ra kjaaji? “Dya ri jyɇzi ri tsjaa kʼo nee e Jehová zø pje ma nrrumꞹ ri kjogꞹ.” Nu kʼo nrre o mbøsꞹ e Hans nge ke in bʼedyiji me mi xiji ke me mi sʼiyaji. Dya bo jyɇziji ro ngijñiji ke dʼa nu paa ro mbɇzhi testigo de Jehová.

Da nu paa e Jesús o mama ke o Jñaa e Mizhokjimi chenjui kʼe nrreje ke ra mbøsꞹ ra mimi texe yo paa (Juan 4:​13, 14). Ri negøji ke in bʼedyiji ra siji ne nrreje ke kjaapji ra søji na joo i ra søø ra mimiji texe yo paa. Pero dya ri nee ra kjaapji ra ziji dabadiji texe dʼa nu paa. Ke ra tsjapji ra søji na joo o ra søji obligaoji nge jarga zopjꞹ. Nu Jñaa e Yose mama ke “i mꞹbʼꞹ kʼꞹ na jontee kjijñi ante ke ra jñaa” i ñe “i mꞹbʼꞹ yo na jonte kjapꞹ ra mba̱ra̱ na joo kʼo mama in tee. Ñe kjapꞹ ke kʼo ra mama rga kjuana”. ¿Jarga kjaji yo mamaba?​(Prov. 15:28; 16:23.)

Dʼa su̱u̱ ke nee ke nu xira ra mba̱ra̱ o jñaa e Mizhokjimi ni jyodʼꞹ ra “kjijñi ante ke ra jñaa”, kʼo nee ra mama, ke jodʼꞹ kʼo jñaa kʼo ra mama i dya nee ra nrrꞹrꞹ dabadiji. Dya ra tsjaa ke mazi pa̱ra̱ na punkjꞹ ke nu xira. Akjanu, kʼo ra mama ra mbøsꞹ ra mimibi na joo. Ngekʼua “na joo kʼo mama in tee”, ne suu søø ra tsjaa yo trʼønꞹ: “¿pje ma ndajme dya kja na pɇpji ngekʼua søø ra jñabʼe? ¿pje nge kʼo nee ra jñaa? ¿pje nge kʼo jñaa kʼo xørꞹ? ¿nee ra mba̱ra̱ nu ciencia, nu política ñeje yo trʼeñe? ¿pje ra kjaa ngekʼua ra nee ra mba̱ra̱ kʼo mama ne Jñakjimi i ñe ra tʼekjañomꞹ kʼo kjijñi?”.

Ke ra zⱥtrʼpʼⱥji kja i mꞹbʼꞹ yo in bʼedyiji ke dya ngeje testigo dya ngextjo ke ra jichiji jmachʼa rga jmachʼa. Kʼo ra manji ni jyodʼꞹ ke nge kʼo rna kjaagoji.

“Mimi ja ga mama o Jñaa e Mizhokjimi texe yo paa. Akjanu in bʼedyi ra unꞹ nguenda ke gi kjaa kʼo na joo, zø dya pje ra xitsʼi”, ja ga mama e Jürgen, ke ro nⱥjni mi ndajme. E Hans, ke go mezhe 30 kjɇɇ juinji kja nrreje ma nu suu ya mi juinji xo mama akjanu “Ni jyodʼꞹ ra potpꞹji nguenda kʼo ri kjaagoji. Ma ra kjaagoji akjanu nu in bʼedyiji ke dya ngeji testigo ra unꞹji nguenda ke ri kjaagoji ja ga mama e Palesito ajensʼe”. Akjanu in bʼedyi ra unꞹ nguenda ke in religión na kjuana i ke pjøxkꞹji ra jonteji.

Kʼe apóstol Pedro go mama pje ni jyodʼꞹ ra tsjaa yo suu ke nu xira dya kreoji e Mizhokjimi: “Nutsʼkʼeji in ndixuji, ri dyⱥtⱥji yo nin xiraji. Nu jma dya nee ra jñejme o Jñaa Mizhokjimi kʼo nin xiraji, dya ri sido ri xipjiji ra jñejmeji. Ri sido ri dyⱥtⱥji angezeji. Akjanu, ra unꞹji nguenda in kjaaji kʼo na joo, xa jma xo ra jñejmeji. Na nge angezeji ra nukʼꞹji ja kʼo nzi gi suji Mizhokjimi gi tsjaji kʼo na joo. Kʼꞹ rra zøtskʼeji, dya nge kʼꞹ me ri jokꞹji kja in ñigeji​dya ri chebgeji o oro, kʼꞹ ra jñantkʼaji. Ni xo ri sꞹtkeji kʼo, ni xo ri tsøtkʼeji in dyɇji. Ni xo ri nge bʼitu kʼo me ni mubi kʼo ri jyegeji. Na ngejyo, ngextjo a xesʼe kʼꞹ ni jñetse na zø yo​, kʼꞹ rra zøtskʼeji, je nge a mboo kja in mꞹnʼkʼeji nu ja dya kjo janda. Ngeje kʼꞹ ri dyⱥtⱥji na joo, dya ri tsjapkeji na nojo, dya ri chjꞹnrꞹji, ma ri tsjaji yo, me rgi mubitsʼꞹji jma a jmii Mizhokjimi”​(1 Ped. 3:​1-4, Nu O̱ Jña Mizhocjimi nu mama ja ga cja e Jesucristo, ro junsʼꞹ kʼua jaga opjꞹjidya.)

E Pedro go mama ke yo suu søø ra mbøsꞹ yo nu xiraji ma ra tsjaji kʼo na joo. Akjanu go tsjapꞹ nguenda kʼo mama Mizhokjimi na kju̱ʼu̱ ke ni chjꞹꞹ Christa, angeze me kjapꞹ nguenda ra zⱥtrʼpʼⱥ o mubʼꞹ in xira ndizi o juiji kja nrreje kja kʼe kjɇɇ 1972. Zø angeze a xørpꞹji ko yo testigo e Jehová nu Jñakjimi, dya be na kjaa janzi ga nee e Jehová. Zø ya paa kja janzi jmurkjimi i na joo ga jñaa ko yo kjuarma i angezeji tʼekjañomꞹji i jɇziji ke angeze tsʼe ra mama jingua ra tsjaa kʼo nee e Jehová. ¿Pje kjaa e Christa ngekʼua ra zⱥtrʼpʼⱥ kja in mubʼꞹ?

“Angeze mama: “ri nee ra kjaago kʼo xitsʼi e Jehová. Xo ñe ri kjaago kʼo na joo ngekʼua i xira ra unꞹ nguenda ‘zø dya pje ra xipji’. Ma dya ga nuu na sʼoo o Jñaa e Mizhokjimi, nge ma ri kjago texe kʼo otrʼkʼꞹ ngekʼua ra søø na joo. Ri tʼekjañomꞹgo kʼo nee ra tsjaa angeze, i akjanu ri jezpi ke e Jehová ra ñꞹnbʼꞹ o mubʼꞹ”.

Kʼo kjaa e Christa jitskøji ke na joo ra kjapji nguenda in xira ma kʼo xitsiji dya nu na sʼoo o Jñaa e Mizhokjimi. Angeze dya jɇzi ra tsjaa kʼo nee Mizhokjimi nzakja kʼꞹ paa kja jmurkjimi, i nⱥdⱥkjimi, i xo tʼekjañomꞹ nu xira i kjapꞹ nguenda. Angeze pa̱ra̱ ke ni jyodʼꞹ ra sʼiya nu xira i ra jyodʼꞹ jyadʼꞹ ke ra bʼꞹntsʼebi. Texezꞹji ni jyongꞹji ra kjapji nguenda in bʼedyiji ke dya ngeji testigo e Jehová ma kʼo xitsʼi ra kjaaji dya nu na sʼoo o Jña e Mizhokjimi. “Bʼꞹbʼꞹ na nrrajme kʼo pje nrre søø ra kjaaji”, mama nu Biblia. Nujyo nee ra mama ke ra juajni dʼa nrrajme ke ra bʼꞹnji ko yo in bʼedyiji ke dya ngeji testigo e Jehová nzakja in xira o in suuji. Kʼꞹ ra bʼꞹnji ko yo in bʼedyiji, søø ra ñaji i dya kjo ra zøø ke bʼꞹntsʼɇ i dya kjo ra ꞹdʼꞹ​(Ecl. 3:1).

“Ni jyodʼꞹ ke in bʼedyiji ra mba̱ra̱ji ke me ri sʼiyaji i ke dya ra jɇziji ke ra øtꞹji Kjimi ke ra mbøsʼꞹyo”, nge kʼo mama e Holger, ke nu tata go mezhe 20 kjɇɇ ma kja ngibi kja nrreje, ma ya bi tsjajikʼo texe o bʼedyi. E Christa xo mama: “dya ra jɇzi ra tebʼe ke i xirago ra tsjaa kʼo mama e Mizhokjimi Jehová dʼa nu paa”. Dya ra jɇziji ra kreoji ke in bʼedyiji dʼa nu paa ra ngeji testigo e Jehová.

Dya ra jyombeñeji ke ra jodʼꞹji in bʼedyiji ngekʼua dʼa nu paa ra zⱥtrʼⱥ kja i mꞹbʼꞹ o Jñaa e Mizhokjimi. Ngekʼua, texe yo paa “ra zopjꞹji na joo y ra tʼekjañomꞹji”​(1 Ped. 3:​15).