AS JËSUS in Gadara wäir, dicht an dai Galileia meer, hät hai tau air kërl sägt wat em någåe wul: “Gå na huus, na dijn früün, säg eer ales wat Jehovaa for dij måkt hät un dai barmhärtsigkët wat hai dij weese hät”. Jësus sijn wöör wijse dat hai dai lüür gaud kene däir. Hai wüst dat dai lüür gërn fortele daue mit eer fründschaft oiwer daile woo oiwer sai sich ankëre daue un wat groot wërd for eer hät. (Mar 5:19)

Kan sin dat wek ni soo måke daue, åwer dai mëste lüür wile tau eer fründschaft fortele dat sai anfånge häwe dai wår God, Jehovaa, dijne. Sai wile tau eer fründschaft fortele dai nijge daile wat sai uute Bijbel lërt häwe. Åwer, wat fon is dai best moor taum dat måke? Wosoo koine wij måke dat oos fründschaft wat al aine kirch häwe urer an går nischt glööwe daue sich ankëre daue oiwer dai wårhët fone Bijbel? Dai Bijbel helpt oos koråsch häwe taum ni nålåte preege tau oos fründschaft un waite dat wek dai wårhët airer anneeme daue as dai andrer.

In Jësus sijn tijd, André is air fon dai airste wääst wat ruuterfuune hät dat Jësus dai Messias wäir. Un tau wem hät hai dat airst fortelt? “Hai [André] hät airst sij braurer Simão [Pedro] fuune un hät em sägt: ‘Wij häwe dai Messias fuune’ (wat Kristus bedüürt).” André is mit Pedro bet Jësus hengåe, un soo hät küüt Pedro uk Jësus någåe. (João 1:35 bet 42)

Bijnå 6 jåre nåheer, as Pedro in Jope wäir, hät dai hailig gaist em nam Cesareia schikt taum Cornélio besuike, dai oiwerst mank dai soldåte. Wee wäir dår as Pedro kåme is? “Cornélio, däir gewiss eer luure un bij em wäire em sij früün un dai woo mit hai ümgang har.” Dat Cornélio em sij fründ nöögt hät taum Pedro hööre häwe küüt sai ain uutsuiken måke nå dat wat sai höört häwe. (Atos 10:22 bet 33)

Wat koine wij lëre mit dat wat André un Cornélio måkt häwe mit eer früün?

André un Cornélio häwe wat måkt dat eer früün uk dai wårhët kene küüne. André is mit Pedro bet Jësus hengåe un Cornélio hät em sijn früün nöögt taum hööre dat wat Pedro eer säge däir. Åwer sai häwe ni eer früün andreewe taum Jësus någåe. Häst duu wat lërt? Kan sin dat wij tau oos früün preege daue urer daue wij wat måke dat air tau eer preege kan, åwer wij daue eer uutsuike låte un daue nischt måke dat sai mit gewald dai wårhët anneeme schåle. Taum lëre wosoo wij oos früün helpe koine, wiman’s saie wat passijrt is mit Jürgen un Petra, air pår forfrigt fon Düütschland.

Petra hät dai Bijbel lërt mit Jehovaas Tüügen un hät sich tauwe låte. Eer kërl, Jürgen, wäir dai oiwerst mank dai soldåte. Im anfang, hät em dat ni gefale dat sijn fruug Tüüge fon Jehovaa woore is. Åwer, mitm tijd, hät hai saie dat dai Jehovaas Tüügen dai wårhët fone Bijbel preege däire. Jürgen hät sich uk tauwe låte un hüüt is hai air ülst ine gemaind. Wat sägt hai dat helpe kan air fründ wat anerd kirch hät sich ankëre oiwer dai wårhët?

Jürgen hät sägt: “Wij döre ni mit gewald urer taufeel mit ais oiwer dai Bijbel mit oos früün fortele. Dat kan eer ni gefale. Kan beeter sin mit schik un ni glijk taufeel mit eer fortele oiwer dai Bijbel. Is uk gaud dat sai bruirers un swesters kene wat soo uld sin as sai un dai neemlig daile mage daue as sai. Dat kan eer sër mithelpe mër oiwer dai wårhët waite wile.”

Pedro un Cornélio sijn früün häwe glijk annåme dat wat sai fone Bijbel höört häwe. Åwer andrer fon dere tijd wat uk dai wårhët fone Bijbel höört häwe, häwe ni glijk dat annåme.

As Jësus hijr preege däir upe Ër, wek fon em sijne früün hare gloobe an em, soo as Tiago un João wat kan sin wäire Jësus sijn prims, un eer sijn mama Salomé, kan sin wäir Jësus sijn tante. Kan sin Salomé wäir ain fon dai ‘feel andrer fruuges wat mit eer sijn aigen saichen daile’, Jësus un dai apostels ‘helpe däire.’ (Luc 8:1 bet 3)

Åwer, andrer fon Jësus sijn früün häwe ni glijk an em glööwt. Ain mål, mër as ain jår nåheer as Jësus sij tauwen, feel lüür häwe sich in ain huus t’hoophule taum hööre wat Jësus inlëre däir. “Åwer, as sijn früün waiten kreege häwe, wat dår passijre däir, sin någåe taum em weghåle, weegen sai däire säge: ‘Hai hät der forstand forlåre.’” Tijd nåheer, as em sijn bruirers em sägt häwe hai schul na Judeia henrëse, Jësus hät ni glijk eer air richtig antwoord geewt. Woweegen ni? “Em sijn bruirers, däire wirklig ni gloobe an em wijse”. (Mar 3:21 un João 7:5)

Wat koine wij lëre woo Jësus em sijn früün behanelt hät? Hai hät sich ni argret dat wek fon sijn früün häwe sägt hai har dai forstand forlåre. Nåheer as Jësus doodbleewe un upleewt woore is, hai hät sogår em sij fründschaft koråsch geewt. Hai hät sich tau sij braurer Tiago weese, dat hät hulpe dat Tiago un uk sijn andrer bruirers glööwe däire dat Jësus wirklig dai Messias wäir. Dårweegen wäire sai t’hoop mit dai apostels un andrer bruirers un swesters in ain huus in Jerusalém, un dår häwe sai dai hailig gaist kreege. Mite tijd, Tiago un uk Judas, Jësus sijn halw bruirers, häwe groot amt kreege. (Atos 1:12 bet 14, 2:1 bet 4 un 1 Cor 15:7)

Soo as in Jësus sijn tijd, hüüt wek früün daue uk ni glijk anneeme dai wårhët fone Bijbel. Sai man’s oiwer Roswitha, wat katolisch wäir un däir sich sër hule an dat wat sai glööwe däir. As eer kërl sich tauwe låte hät as air Tüüge fon Jehovaa in 1978, sai wäir dår gëgen. Åwer, dai jåre sin forbij gåe, un sai hät saie dat Jehovaas Tüügen däire dai wårhët inlëre un dun sai hät anhule gëgen sin eer kërl. Un in 2003, sai hät sich uk tauwe låte. Wat hät eer hulpe aners denke? Eer kërl is ni argrig woore dat sai am anfang gëgen em wäir, åwer eer kërl hät eer hulpe aners denke as sai denke däir. Wat fon formånen giwt sai hüüt? “Air dail wat groote wërd hät is geduld, geduld un nog mër geduld häwe.”

Monika hät sich tauwe låte in 1974, un eer twai jonges sin Jehovaas Tüügen woore tëgen jåre nåheer. Eer kërl, Hans, is ni gëgen eer wääst, åwer hai hät sich tauwe låte bloos in 2006. Wat koine wij lëre fon dës familg? “Blijwt reäl an Jehovaa un kan sin wat giwt låt nij ais dijn gloobe im stig.” Gans sicher, Hans sij familg hät uk ümer weese dat sai em sër lijbe däire. Sai hare uk ümer dai hofnung dat hai ais dai wårhët anneeme däir.

Jësus hät air mål sägt dat dai wårhët is grår soo as air wåter wat leewend up ümer giwt. (João 4:13 un 14) Wij wile häwe dat oos fründschaft dës rëgen un frisch wåter drinke schåle. Gans sicher, wij wile ni dat sai dës wåter soo rasch drinke daue dat “sai sich forsluke daue”. Dat dat ni passijre schal, den muite wij oos gloobe mit schik tau eer uutdüüre. Dai Bijbel sägt dat “dai gerecht mësch sij härts däit grüüwle airer as antwoore” un dat “dem klauke sijn härts giwt forståen taum sijn wöör un däit sicherhët tausete tau sijn wöör.” Wosoo koine wij måke soo as stäit in dës sprüüch? (Prov 15:28 un 16:23)

Kan sin dat ain fruug fortele wil mit eer kërl oiwer eere gloobe. Wen sai grüüwle däit airer as em antwoore, sai kan sijn wöör gaud uutsuike un ni taufeel fortele. Sai dört ni uutsaie låte soo as wen sai kluiker is as hai urer dat sai denkt bloos sai is richtig. Wen sai gaud denke däit airer as wat fortele dat kan freere bringe un eer kërl gefale. Un wat fon stuun is dij kërl ruig un is beeter tau mit em fortele? Woo oiwer magt hai gërn fortele urer leese? Wat kan dai fruug måke dat sij kërl mër waite wil oiwer dai Bijbel? Un up dai neemlig tijd wijse dat sai forståe däit dat wat hai denke däit un forneeme däit? An dës daile denke kan dai fruug helpe klauk sin wen sai fortelt un wosoo sai dai daile måke däit.

Wen wij wile dat oos früün mër oiwer dai Bijbel waite wile nutst ni bloos oos gloobe mit schik uutdüüre, sai muite saie dat wij leewe nå dat wat wij preege daue.

Jürgen, wat al maint woore is, hät soo sägt: “Låt nij ais besijd nå dai Bijbel jërer dag leewe. Dai wårhëte un formånen fone Bijbel någåe is air sër gaud dail dat air fründ saie däit woo wij aners woore sin, lijkerst dat hai ni oos dat säge däit.” Hans, wat 30 jåre nåheer as sijn fruug tauwt woore is, denkt uk soo as Jürgen. Hai hät sägt: “Wen wij Jësus gans un går nåmåke daue in oos leewend dag for dag, oos fründschaft koine klår saie dat dat gaud wääst is dat wij dai wårhët fone Bijbel lërt häwe.” Weegen oos gloobe wij sin gans aners as dai andrer lüür, åwer dat is air gaur dail un mut klår sin for oos früün.

Tau der fruuges wat eer kërls kaine gloobe hare, Pedro hät gaure formånen geewt. Hai hät sägt: “Neemlig soo, duu, fruug, must uuner dem kërl sijn ordnung sin, weegen wen hai ni God sij woord horgt, kan hai gewune ware åne wöör, doir dai fornünftigkët fon sijne fruug, doir tüüge sin dat hai eer gaur fornünftigkët saie hät t’hoop mit groot ëren. Låt dat ni dijn fainhët uutwarts sin schal, soo as geflechte håre, guldig daile anmåke taum fain sin urer sich sër fain antreke, åwer dat sin schal dai mësch wat’s duu im härts büst, mit dai fainhët wat ni alwart, wat fon dai ruig un fråm gaist kümt, wat foir God sij oogen groote wërd hät.” (1 Ped 3:1 bet 4)

Pedro hät weese wen dai fruug sich gaud forhule däit dat kan helpe dat dai kërl dai wårhët fone Bijbel anneeme däit. Dai swester Christa, wat in 1972 tauwt woore is, denkt ümer an dës sprüüch taum sij kërl helpe dai wårhët fone Bijbel anneeme. Nog dat hai dai Bijbel al lërt hät, hai hät nog ni dai wårhët annåme. Åwer hai gäit up wek forsamlunge oiwer dai Bijbel un hät ain gaure ümgang mit dai bruirers un swesters un sai daue uk em ëre un daue ni em andrijwe dai wårhët anneeme. Wat mökt Christa dat sij kërl dai wårhët fone Bijbel anneeme wil?

“Ik häw mij uutsöcht ümer Jehovaa horge. Ik dau uk mij anstrenge taum mij gaud forhule taum mij kërl åne wöör gewine. Wen air dail ni gëgen dai wårhët fone Bijbel is, ik forsuik ümer måke wat em gefült, un gewis, ik wait dat hai is frai taum uutsuike wat hai wil un ik luur up Jehovaa dat hai mij kërl nå dai wårhët lenkt.”

Dat wijst dat nöörg is dat dai mësch wat Jehovaa dijne däit ni ales måke schal soo as dai wil. Jërer dag Christa mökt daile wat eer gloobe stärke däit, soo as upe forsamlung oiwer dai Bijbel gåe un dai preegarbëd måke. Åwer sai forstäit dat eer kërl recht hät up eer sij lijb, tijd, un dat sai nå em uppasst. Dai mësch wat früün hät wat nog ni Jehovaa anbeere daue, mut dere forståe un wen dat gäit, daile måke wat eer gefale daue. Dai Bijbel sägt: “Tau ales is ain richtig tijd.” Dat hät uk besägen mit dai tijd wat wij ruuterneeme taum t’hoop sin mit dai früün, uphaupt mit dai kërls urer dai fruuges wat nog ni dai neemlig gloobe häwe as wij. Wen wij oos tijd neeme taum t’hoop sin mit eer, wij koine mit eer fortele. Gaur fortelen häwe mit dai früün mökt dat sai sich ni alaine urer forlåre forneeme, un dat sai kain ciúme forneeme daue. (Ecle 3:1)

Air braurer, wat Holger hit, wat em sijn papa hät sich tauwe låte 20 jåre nåheer as dai andrer fone familg, hät soo sägt: “Is sër gaud wijse dat wij eer lijbe un beere for eer.” Swester Christa sägt uk, “dat sai bijblijwe däit luure dat eer kërl ain dag dai wårhët anneeme däit un dat hai anfänge däit Jehovaa dijne”. Wen wij an oos fründschaft wat nog ni Jehovaa dijne daue andenke, döre wij ni nålåte eer helpe oiwer Jehovaa kene un luure dat sai aine dag dat anneeme daue.

Wij wile ain gaure ümgang häwe mit oos fründschaft, eer helpe dai wårhët lëre un dat sai dai wårhët fone Bijbel anneeme wile. Un ümer mit eer fortele mit “sër feel fråmhët un ëren.” (1 Ped 3:15)