JESÚS okijli se tlakatl akin kinekiya nochiuas inomachtijkauj: “Xuiya mochan, niman xkijli mofamilia nochi on uejueyi tlajtlamach tlen Dios okichiu mopampa, niman ken omitsiknelij”. Nesi ika yejuamej nemiyaj nisiuj ueyikalpan Gadara, tlen nokaua kampa sureste itech mar de Galilea. Tlen Jesús okijli yejuin tlakatl, techititia ika Jesús kimatstoya ika tinochimej tiknekiskiaj tikimijliskej tochanejkauan tlen tejuamej tikuelitaj (Mar. 5:19).

Aman miyekej noijki kinekiskiaj kiteijliskej tlen yejuamej yokasikamatkej. Ika yejon, ijkuak yakaj peua kitekichiuilia toTajtsin Jehová, kanaj kinekis kimijlis ichanejkauan tlen nomachtijtika. San ika ¿kenon uelis kimijlis? ¿Kenon uelis ajsis ipan inyojlo ichanejkauan akin kipiyaj okse inreligión noso xkineltokaj toTajtsin? Biblia kijtoua kenon uelis tikchiuaskej.

Ipan kachtopa siglo, Andrés katka se itech akin kachtopa okimatkej ika Jesús katka Mesías. ¿Akinon nimantsin okijli? “Andrés achtoj oyaj okitejtemoto Simón on ikniuj, niman okijlij: ‘Yotiknextijkej on Mesías —yejuan kijtosneki Cristo’”. Sakin, okuikak Pedro kampa nemiya Jesús, niman ijkon okipaleui noijki manochiua inomachtijkauj Jesús (Juan 1:​35-42).

Chikuasen xiuitl sakin, ijkuak Pedro nemiya Jope, okinotskej mauiya Cesarea, ichan Cornelio, se tlakatl akin tlayekanaya ipan ejército. ¿Akinomej okimitak ijkuak ompa oajsik? Biblia kijtoua: “Cornelio kinchixtikatka inuan oksekimej yejuan achi ken kinta niman on yejuan más kuajli itlajsojkaikniuan yejuan yokinsentlalijka”. Cornelio kinekiya ika ichanejkauan makikakikan tlen Pedro kimijliskia niman san no yejuamej makijtokan tla kineltokaskiaj (Hech. 10:​22-33).

¿Tlenon tiuelij itech kenon Andrés niman Cornelio okinnotskej inchanejkauan?

Omemej okinemilijkej kenon kinnotsaskej inchanejkauan. Andrés okichiuj ika ikniuj makixmati Jesús, niman Cornelio okinsentlali ichanejkauan para makikakikan Pedro. San ika, nion se de yejuamej xokinchiualtijkej ichanejkauan manochiuakan inomachtijkauan Jesús. ¿Tlenon techmachtia yejuin? Niman, ¿kenon uelis tikchiuaskej ken yejuamej? Uelis tikimijliskej tochanejkauan itlaj tlen yotiuelkej niman ijkon makixmatikan tlen Biblia temachtia, noso matikinpaleuikan makimixmatikan oksekimej iteixpantijkauan Jehová. San ika, matiktlakaitakan tlen kitlapejpeniaj kichiuaskej niman maka matikinchiualtikan makineltokakan tlen tejuamej tikneltokaj. Para tikmatiskej kenon uelis tikinpaleuiskej, matikitakan tlen okichiujkej Jürgen niman isiuatsin Petra akin chantij Alemania.

Petra onomachti Biblia imiuan iteixpantijkauan Jehová niman onoapolakti. Iueuentsin nemiya ipan ejército niman xokuelitak ijkuak Petra opeuj nomachtia Biblia. Sakin, okitak ika iteixpantijkauan Jehová temachtiaj tlen melauak itech Biblia. Ika yejon, opeuj kitekichiuilia Jehová, niman aman tekiti ken tlayekanketl ipan tlanechikojli. Yejua techijlia tlenon uelis tikchiuaskej ijkuak tiknotsaskej se tochanejkauj akin nemi ipan okse religión.

Jürgen kijtoua: “Maka xchiualti makineltoka tlen tejua tikneltoka niman maka nochipa xkijlijto tlen timomachtia, pampa yejon kichiuas ika nion achijtsin xkinekis mitskakis. Más kuajli yeskia, tla san kemantika san achijtsin tiknojnotsa itech Biblia. Noijki uelis kipaleuis tla kimixmati tokniuan akin kuelitaj tlen yejua kuelita noso sa no yejua xiuitl kipiyaj ken yejua”.

Apóstol Pedro niman ichanejkauan Cornelio nimantsin okineltokakej tlen okinmachtijkej. San ika, oksekimej akin nemiyaj ipan siglo primero más ouejkaujkej.

Sekimej akin ken kimitaya Jesús, itech otlaneltokakej ijkuak yejua tenojnotstinemiya. Nesi ika apóstol Santiago niman Juan katka iprimos niman inminan Salomé katka itía. Kanaj yejua katka se intech yejon siuamej akin kipaleuiayaj Jesús niman inomachtijkauan “ikan on tlen kipiyayaj” (Luc. 8:​1-3).

San ika, oksekimej ikniuan Jesús kachtopa xitech tlaneltokayaj. Ipantsin se xiuitl sakin ika Jesús yonoapolaktijka, miyekej onosentlalijkej ipan se kajli para kikakiskej. Biblia kijtoua: “Ijkuak ifamilia okimat, oualajkej para kuikaskiaj, pampa yejuamej kuitiayaj xok kipiya itlamachilis”. Se tonajli, ijkuak itlakpaikniuan okijlikej kanon ueliskia yaskia, yejua xokinnankili. ¿Tleka? “Pampa nion yejuamej xkineltokayaj” (Mar. 3:21; Juan 7:5).

¿Tlenon tiuelij itech kenon Jesús okiminots akin ken kimitaya? Xokualan ijkuak okijlikej ika xok kipiya itlamachilis. Sakin ika yokimiktijkaj niman yoyoliujka okinyolchikauj ichanejkauan, pampa okinojtiti itlakpaikniuj Santiago. Yejuin okichiuj ika Santiago niman oksekimej itlakpaikniuan makineltokakan ika Jesús yejua katka Mesías. Niman yejuamej nemiyaj imiuan iapóstoles niman oksekimej ijkuak onosentlalijkej Jerusalén niman noijki okiselijkej espíritu santo. Sakin, Santiago niman Judas, akin noijki katka itlakpaikniuj Jesús, okinmakakej seki tekitl ipan tlanechikojli (Hech. 1:​12-14; 2:​1-4; 1 Cor. 15:7).

Ijkon ken ipan kachtopa siglo, aman miyekej tochanejkauan uejkauij para kitaskej tla kitekichiuiliskej toTajtsin. Ken Roswitha, akin melak católica katka ijkuak iueuentsin onochiuj iteixpantijkauj Jehová, ipan 1978. Pampa yejua melak kuelitaya tlen kineltokaya, xokuelitak tlen okichiuj iueuentsin. San ika, sakin, xok ijkon otlanemili. Opeuj kita ika iteixpantijkauan Jehová temachtiaj tlen melauak, niman ipan 2003 onoapolakti. ¿Tlenon okipaleui ijkon makichiua? Pampa kitaya ika iueuentsin xkualaniya ijkuak yejua xkuajli kinotsaya niman kikauiliaya makita tla kuajli katka tlen kijliaya. Roswitha techijlia tlen uelis techpaleuis, yejua kijtoua: “Melak uelis techpaleuis tla titeijyouiyaj, titeijyouiyaj niman melak titeijyouiyaj”.

Monika onoapolakti ipan 1974, niman omemej ikoneuan onoapolaktijkej majtlaktli xiuitl sakin. Iueuentsin, Hans, nochipa okikauili makitekichiuili toTajtsin, san ika, yejua okinek onoapolakti hasta ipan 2006. ¿Tlenon techijliaj yejuamej ika uelis techpaleuis? “Nochipa xtlakamati Jehová niman itech xyolmelaujkanemi”. Hans noijki okipaleui ika ichanejkauan nochipa kititiayaj ika kitlasojtlayaj. Xkeman onosiaujkaujkej niman kichiayaj ika se tonajli noijki makitekichiuili Jehová.

Se tonajli, Jesús okijto ika tlen melauak yeskia kentla atl tlen uelis kichiuas matinemikan para nochipa (Juan 4:​13, 14). Tiknekiskiaj ika tochanejkauan makonikan yejon atl tlen melak kinpaleuis. San ika, xtiknekij tikinchiualtiskej melak miyek atl makonikan. Ijkuak tikimijliskej tlen tikneltokaj ompa nesis tla tikinchiualtiaj noso ka. Biblia kijtoua ika “on tlakatl yejuan yolmelajki, achtoj kuajli tlanemilia ijkuak tenankilia” niman ika “yejuan tlanemilia ikan tlamatkilistli achtoj kuajli kinemilia tlinon kijtoua”. ¿Kenon uelis ijkon tikchiuaskej? (Prov. 15:28; 16:23).

Se siuatl akin kineki ika iueuentsin makixmati tlen yejua kineltoka “tlanemilia ijkuak tenankilia”, noso kuajli kinemilia tlen kijtos niman kemanon kijtos. Xkeman kinemilia ika yejua más ueyixtika xijkon ken iueuentsin san pampa nomachtia Biblia. Tla kuajli kinemilia tlen kijtos, kiyolchikauas iueuentsin niman ika inyojlo nemiskej. Niman para kiteititis ika kuajli kinemilia tlenon kijtoua, uelis notlajtoltis: “¿Kemanon uelis ninonojnotsas iuan noueuentsin? ¿Itech tlenon kuelita tlajtos? ¿Itech tlenon kuelita tlaamapouas? ¿Kuelita tlen tlajtoua itech ciencia, política noso deportes? ¿Kenon uelis nikchiuas para makineki kiamapouas Biblia, niman niktlakaitas tlen kimachilia niman tlen kinemilia?”.

San ika, tla tiknekij tajsiskej ipan inyojlo tochanejkauan, xsan noneki kemantika tikimijliskej tlen tikneltokaj, noijki noneki tikchiuaskej tlen tikijtouaj.

Jürgen akin kemach otikteneujkej kijtoua: “Nochipa xchiua tlen tiueli ipan Biblia. Ijkon tochanejkauj kitas ika melak tepaleui tlen temachtia Biblia maski yejua xtlaj kijtoua”. Hans, akin onoapolakti treinta xiuitl sakin ika yonoapolaktijka isiuatsin noijki ijkon kinemilia. Yejua kijtoua: “Noneki tikchiuaskej tlen kuajli, niman ijkon tochanejkauan akin xnomachtiaj Biblia kitaskej ika techpaleuiya tlen titomachtiaj”. Tochanejkauan kitaskej ika tlen tikneltokaj techpaleuiya más matokojtilikan para tikchiuaskej tlen kuajli.

Apóstol Pedro okimijli tokniuan siuamej akin inueuentsitsinuan xtlaneltokaj ken yejuamej: “Nemejuamej siuamej, xtlakaitakan nemoueuentsin. Ijkon tej, tla se de nemejuamej kipiya iueuentsin yejuan xkineltoka itemachtil Dios, uelis noyoleuas ika on ken tejua timouikas, niman xafuerza tiknojnotsas, pampa kitas ika timouika ikan chipaualistli, niman kenijki tiktlakaita Dios. Nemokualtsinka xkitocaroua kipiyas de on tlajmachyotl yejuan tlachijchijtli ikan oro, noso ikan tlakentin yejuan pajtio, noso tla notsonmalinaj sanoyej kualtsin. Yej nemokualtsinka noneki kisas ipan nemoyojlo. Sen siuatl ikualtsinyo kisa ipan iyojlo ijkuak yolyemanki niman tenotski. In yejua ueyi kijtosneki ixpan Dios” (1 Ped. 3:​ 1-4).

Pedro okijto ika se tokniuj siuatl uelis kichiuas ika iueuentsin makuelita nomachtis Biblia, tla kichiua tlen kuajli. Se tokniuj, itoka Christa, kilnamiki tlen Pedro okijto. Ika yejon, desde ijkuak onoapolakti ipan 1972, nokojtilia para kipaleuis iueuentsin para maajsi ipan iyojlo tlen nomachtia. Maski iueuentsin nomachtia Biblia iuan iteixpantijkauan Jehová, xikitlapejpenia kitekichiuilis toTajtsin. Kemantika yauj tlanechikoltin niman kuajli nouika imiuan tokniuan pampa yejuamej kitlakaitaj tlen yejua kitlapejpenia. ¿Tlenon kichiua Christa para iueuentsin makineki kitekichiuilis toTajtsin?

Yejua kijtoua: “Yoniktlapejpeni nikchiuas tlen Jehová nechmachtia, niman noijki ninokojtilia makuelita noueuentsin tlen nikchiua. Ijkuak itlaj kineki manikchiua niman nikita ika xnikpanauiya se itlanauatil toTajtsin, nikchiua tlen yejua nechijlia. Noijki niktlakaita tlen noueuentsin kitlapejpenia niman niktlajtlanilia Jehová maajsi se tonajli ijkuak yejua kitekichiuilis”.

Tlen kichiua Christa techititia ika noneki titeasikamatiskej niman xsan tiknekiskej manochiua tlen tejuamej tikuelitaj. Maski yejua tenojnotsa niman yauj tlanechikoltin, noijki kiteititia ika kasikamati iueuentsin. Yejua kimatstika ika noneki kixelos tiempo para nonojnotsas iuan iueuentsin niman noijki kititis ika kitlasojtla. Tinochimej noneki tikimasikamatiskej tochanejkauan akin xiteixpantijkauan Jehová. Biblia kijtoua ika nochi kipiya kemanon nochiuas. Niman yejuin tlen kijtoua Biblia, techmachtia ika noneki tikxeloskej tiempo para tinemiskej imiuan tochanejkauan akin xiteixpantijkauan Jehová noso akin iuan yotimonamikti. Tla tikxelouaj tiempo imiuan tonojnotsaskej, yejon kichiuas kuajli manomachilikan niman maka makinemilikan ika tikintlalkauiyaj noso ika xtikimitasnekij (Ecl. 3:1).

Holger, akin itaj onoapolakti veinte xiuitl sakin ika onoapolaktijkej sekimej ichanejkauan, kijtoua: “Noneki ika tochanejkauj makimati ika tiktlasojtlaj niman ika tikchiuaj teoyotl ipampa”. Niman Christa kijtoua: “Ika nochi noyojlo nikchia ika noueuentsin se tonajli makitlapejpeni kitekichiuilis Jehová”. Nochipa matiknemilikan ika tochanejkauan se tonajli kanaj kinekiskej kitekichiuiliskej Jehová. Maka matosiaujkauakan.

Tiknekij kuajli touikaskej imiuan tochanejkauan, tikinpaleuiskej makixmatikan tlen melauak niman maajsi ipan inyojlo tlen kijtoua Biblia. Ika yejon, noneki kuajli tikinnotsaskej tochanejkauan niman tikintlakaitaskej (1 Ped. 3:15).