YESU KRISTO aya: “Mo gá ku kpuroni yo koyo du abadiangbaro ni, ki gumba gu bakere apai fu yo mangi Gbia foro, na gu pai ini ko foro.” Si nawira wa ti gu regbo re ko adu Gadara yo, du bangbanda sudiyo na uroyo nga ga Baime Gariraya, ko aafura fu gu dee naaida ka da ni gako bawiriki. Afugo Yesu nayugo gupai nga ko aima rugatiko na bangua sino aboro—gu nyemupai nga ka gumbapa ga boro nyemuapai na agu apai nyakipaha na agume.—Mk. 5:19.

Ani nabi kina ngbatunga gu sino re areme dedede a, wa vura duhe nga rogo kura arago si ima du gbaiga ki susi agu akura arago. Sidu, ho boro ada ni niirisi ndikidi Mbori nga Yekova, ni naida dedede kaa fura tipa gani vovo idapase fu agumeni. Ono waigu si aida ni mangihe? Waigu ni narengbe ka zio ngbadu agu agumeni yo du gayo pambori kia—watadu adunga na idapase kandara tooni ya? Baibiri nafu wene bipai na agu arugute da ada.

Rogo bambata sa kama agarã, Andarea nangia gu bambata boro naini gupai nga Yesu nangia Masiya. Na da nangia gu boro ko ape gipai re funi ni basa? “Ko [Andarea] ki nigbata kina wirinako mbata nga Simona ki bi ko, ki ya fu ko, ‘Ani bi Masiya’ (si wa ka i ya, Kristo).” Andarea andu na Petero koyo du Yesu ni, na gipai re ki fu momu fu Petero ko da ni boro sa dagba ga Yesu abawiriki yo.—Yo. 1:35-42.

Agarã wa sita kusa ti gu regbo Petero aaraka Yapo yo, i ayambu ko ko ndu ku nodiyo ku Kaisaria yo tipa ka ndu kua Korunerio yo, nga guko nangia barukurii aborovura. Ada du Petero abi yo i nadunguratiyo ku rogo gu kporo re? “Korunerio asunguda kina [Petero na agu aboro ko aandu na yo], ko nadungura agumeko na wene abadiako.” Sidu, Korunerio afu momu fu agumeko i gi agu apai Petero aagumbaha na i ki mangi diaberã riimburu gupai i agihe.—Amo. 10:22-33.

Ginipai rengbe ani ka wirikaha ti gu gene Andarea na Korunerio amangipai ngbaha na agumeyo?

Boro ho dagba Andarea na Korunerio naambu apai si mangi gbua mbiko momu te. Andarea nitiko naandu na Petero fuo Yesu, Korunerio amangi mbakadapai tipa agumeko gi agu apai Petero agumbaha. Ono Andarea na Korunerio aasosodanga agumeyo watadu ka asada ka zomia yo rogo birĩ yo tipa i da ni apefuo Kristo te. Ya mo mo bingo pai rogo gupai re rengbe ani ka wirikaha? Si naida ani naamanga pai wakina gure. Ani ima rengba ka peka aberãpai fu agumerani na ki gbata amomu fuyo tipa i ini agu arengo nga Ziazia Kekeapai na ki gbia akuarani aidipase. Ono wa vura duhe wo, ani nairisa gayo ranirii airisa nga ga siapai na ani nane gupai nga ka sosoda yo ngba gbegberẽ gene. Tipa ka yugo kpia wai rengbe ani ka undo agumerani, oni bingo gu kpiapai nga ga Jürgen na Petra, nga arogotise Germani yo.

Petra awiriki Ziazia Kekeapai na aDezire Yekova na fuo regbo kusa ri ki zi bapatiza. Kumbari nga, Jürgen, angia banyaki rogo sunge abanzengere. Ti tonatonaha, Jürgen aadunga na ngbarago na gu diaberã diako amangihe te. Ono fuo regbo kusa, ko arugutiko na gupai nga aDezire Yekova natungusa gu rengo du rogo Ziazia Kekeapai. Ko aye a tigako ki kpara gako raka fu Yekova, na areme ko nga bakumba rogo dungurati. Gini rugute ko afuhe awere nibipa zio ngbadu gu gume yo du na gani idapase kia?

Jürgen aya: “Si aidanga ani asadi ka mangapai ngbaome na kaa peka kina agu apai nga ga toro fu agumerani ni bakerehe te. Mangaha wo rengbe ka nyakasa gayo ndundu kina kumbatayo. Kumbatayo gizo, gupai rengbe ka ngba gbe nga kaa peka pai fuyo rukutu rukutu ni tatamana. Si ima du a ni wenepai ka sa agumerani i gbia agu awirina du garã yo sa na yo na du na kina gu bangisa nyemuapai du yo na ni. Mangaha wo ima rengba ka undo yo i du na wene pagume.”

Gu mokedi nangia Petero gbiati agume Korunerio aima mangapai niipo kuti gu pangbanga nangia ga Baibiri. Agu akurayo naadu rogo bambata kama agarã nagbia rengo, i aaida na bakere regbo tipa ka manga diaberã.

Dungu agume Yesu adu kinaho naadu na idapase kutiko ti regbo gako sunge tungusapai. Ni kpiapai, si nawira gupai nga agu amokedi nangia Yakoba na Yoane angia agume Yesu na nayo nangia, Sarome, angia wirina nako. Si rengbe kadu nga ri angia boro sa dagba gu dungu adee yo “naamanga pa yo [Yesu na gako amokedi] na gayo ũkumuko.”—Rk. 8:1-3.

Ono tie, kura ga Yesu aborokporo aadunga na idapase kutiko nibasa te. Ni kpiapai, ti kura regbo sa garã naima susa sa fuo zio Yesu bapatiza, ndurumo aboro adunguratiyo ku rogo kporo tipa ka gia ko. “Ho [agumeko] agi he ni, i ki ndu ka zia ko; bambiko i aya we: ‘Iranzanga nga ko.’” Fuo regbo kusa, ho awirina Yesu asanahe ni tipa pa gako nunguro, ko aakaraganga pai fuyo ziazia te. Tipagine? Bambiko “awirinako aida nga pa ko a te.”—Mk. 3:21; Yo. 7:5.

Ginipai rengbe ani ka wirikaha ti gu gene Yesu amangipai ngbaha na agumeko? Rago aagberãnga tiko ho agu akurayo aya ni wẽ irazanga nga ko te. Zavura tingbafuo i imi Yesu na ko ki zingi be kpio, ko afu kura ngarasaro fu agumeko ni kura ko fu wirinako nangia Yakoba. Si nawira gupai nga gipai Yesu amangihe nga ka kura fu Yakoba re aima sa Yakoba gbiati kura awirina Yesu i idi kuti gupai nga Ko angia Masiya nzunzu. Sidu, i adu na amokedi gbiati kura aboro rogo gu vuru bambu naadu kuari Yerusarema yo na si ni rengo nga i agbia ziazia toro. Fuo regbo kusa, aYakoba na Yuda, nga guko nangia boro sa dagba awirina Yesu yo andu kumbatayo kaa gbia ngbarago ti wenewene amomu.—Amo. 1:12-14; 2:1-4; 1 Kor. 15:7.

A wa si adu rogo bambata sa kama agarã, gu kura agume areme naida na bakere regbo mbata fu i tona ndu ngba gu gene nandu koyo du unga ni. Oni bingo gu kpiapai nga ga Roswitha, nga guri naadu ni kakaka boro Katoriko ho kumbari azi bapatiza ni ni boro sa dagba aDezire Yekova yo rogo 1978. Mbiko gupai nga Roswitha aima ida kuti gari aida na kpotoriyo dunduko, ri aasoga kumbari asoga ti tonatonaha. Ono wa agarã aasusa, gari sogote atona kaa zera na ri aye ka bi gupai nga aDezire Yekova nayugo gupai nga rengo. Ri azi bapatiza rogo 2003. Ginipai naafu be kuti gu ariapai re? Kuba gupai nga kumbaku Roswitha du na gberãrago mbiko wai ri aasoga ko ti tonatonaha, ko afu amomu furi tipa ri aria gari bipai. Gini rugute ri afuhe? “Bakere wenepai rengbe ka kura mbiko zerangbaduse, zerangbaduse, na bakere zerangbaduse.”

Monika azi bapatiza rogo 1974, na awiiri ue ni akumba ada ni aDezire Yekova agarã bawe kusa. Wa si avura du nga kumbari nga Hans, aasoganga gayo idapase te, ko aye ka zio bapatiza kina boro rogo 2006. Gini rugute gi riikporo re afuhe fuo ye yo ka rugatiyo na gupai naaundo yo? “Mo du niruru ro ki kakuti Yekova, na ka mo mangingo agu apai nika gberesapa gamo idapase ya.” Rengo ngaha nga, si adu ni nyanyakipa pai kaa kido Hans ti aregbo dunduko na gupai nga i ima kpinyemu ko. Na i aambunga du na maabangirise nga ko nika yeaye ki di gayo idapase kugume te.

Ti kura regbo sa, Yesu afura tipa gu pangbanga nga ga rengo ki ya si wakina gu ime nafu nyenye unga. (Yo. 4:13, 14) Ani naida agumerani gbia wasa ni mbira yo zezere ziazia ime nga ga rengo. Nirengo, si aidanga ani sa yo omeyo bati mbiko gupai nga ani naafu ime ni bakerehe gbe ni kina boro ipo te. Si ngia i nagbia wasa watadu omeyo nabata, gure naru riipa wai ani asakapai fuyo tipa gaani idapase. Ziazia Kekeapai nagumba gupai nga, “berã ruru boro nawisiga pa karagapai” na “berã iratatamana naruga fugoni nzunzu, ki niyugu pa zomiapai fu ngbani.” Waigu rengbe ani ka mangapai kuti gi rugute re?—Snz. 15:28; 16:23.

Diakumba ima rengba kadu na nyemu ka sakapai tipa gari idapase fu kumbari. Ka ri ‘wisigi pa karagapai’ watadu ka berãkuriipai mbata fu karagapai, ri nika sia gari afugo na rubangirise na ri agbanga sa fugo te. Si aidanga ri yugu gupai nga ri nga ruru boro watadu ri pari nanyaki te. Agu afugo ri nika berã aberã mbata ka gumbaha re rengbe kadu ni pa wasa na ki sonosi zereda. Gini regbo du kumbari zezeredi na si kidu taata ka fura na ko? Gini apai ko nakpinyemu fura tipaha watadu gedaha? Ya mo ko na nyemu agu apai tiko nga ga birĩ-inohe, mobirimo, watadu ambaro? Waigu rengbe ri ka ba nyemu gupai tiko nga ga Ziazia Kekeapai ono ki duadu na irisa tipa gako aberãpai ti kina gu bangisa regbo re? Berãpa agu apai re nika undo ri ri fura na ki mangipai na rugatinapai.

Zio ngbadu gu gaani aborokporo yo ata danga ni aDezire Yekova ya nga gupai gbua nga ka sakapa gaani idapase fuyo rengbe arengba te. Si naida ani songodi gupai ani apehe na wene sino mangaapai.

Jürgen, nga guko i nifura tipa ko mbata kusayo aya: “Mo naamangapai kuti agu abangua arengo nga ga Ziazia Kekeapai ti aregbo dunduko rogo gamo raka yo. Gure nga bawene gene ka sa gumero ni sungu kaa bi gupai mo amangaha, ka si vura du vurũ nga ni aidanga kuti dungu apai te.” Hans, nga guko naazi bapatiza agarã naima mbeda kuti 30 fuo zio diako bapatiza ima ida kuti gupai re. “Wenesino mangaapai ima du na nyanyakipaha, tipa gupai nga gumerani bi gu wenepai rengo amangaha rogo gaani raka yo.” Si naida agumerani bi gupai nga gaani idapase nasarani ani du kia ti kura aboro ngba wene gene, angianga ngba gbegberẽ gene ya.

Gu mokedi nangia Petero afu nyanyakipa rugute fu dereakumba nga aguyo adunga akumbayo rogo idapase yo na yo ya, ko aya: “Oni rá fu kina akumbaroni; ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te; wa i nabi gaoni rurupai du na gunde ti ni. Gaoni fongo ka si du nga ni gu fongo du bangirise nga tu mangeri, na kendegekendege marã, na ukadi remu ya; ono si du ni gu okooko boro du kpoto yo, nga gu ka azirã nga ya, kina gu fongo nga bayee toro du zezeredi, si bangiri Mbori ni bakere genoho.”—1 Pet. 3:1-4.

Petero ake gupai nga gu wenesino nga ga diakumba ima rengba ka sa kumbari ko idi pa Mbori. Na gu papara Ziazia Kekeapai re berãse yo, wirina du rimori nga Christa ninaasada ka zio ngbadu kumbari yo na gari sino mangaapai natona ti gu regbo ri azi bapatiza rogo 1972 . Wa vura duhe nga kumbari awisigi Ziazia Kekeapai awisigo na aDezire Yekova ti kura regbo sa, ko ata sanga rengo ni gako te. Ko ninaandu andu tipa kura adunguratise nga ga aKristano na ko kidu wenengai na agu aboro du rogo dungurati. Na i nairisa gu rengo airisa du ko na ni ka siapai. Wai du Christa ninaasada ka zio ngbadukoyo?

“Mi ima diaberã ka kakuti gu gene Yekova aida mi ndu ngbaha. Ti kina gu bangisa regbo re, mi naasada ka zio ngbadu kumbami yo na gi wene mangaapai zanga ‘gumba fugo.’ Mi naamanga agu apai dunduko rengbe mi ka mangaha tipa ka pekafuo agu apai ngba tiko, ho du he ni nga si atagbaganga tihe na agu abangua rengo nga ga Ziazia Kekeapai te. Na mi nairisa gako ranirii airisa na kini mbu gupai re ku be Yekova.”

Ga Christa mangaapai nayugopa wai du gupai nga ga zanga kakuti bangisapai sa na nyanyakipaha. Ri namanga agu apai nga ga toro wenengai, kodihe na du pati adunguratise dedede na kini mangi sunge tungusapai wenengai. Ono wa vura duhe wo, ri nayugo rugatinapai, kini rugu tiri na gupai nga kumbari ima du na rengo beko ka ida gari nyemuse, regbo, gbiati gbeberãse. Zanga kakuti bangisapai sa na kidu na rugatinapai nga patatamana fu agurani dunduko adunga agumerani rogo gaani idapase ya. Ziazia Kekepai nape gupai nga, “Ahe na regboho ti ni dunduko.” Gipai re nakoda gu regbo ani adiaha na gaani aborokporo, gbe gaani abadiarogatise nga aguyo adunga na ani rogo idapase yo ya. Dia regbo sa nasonosa fugodagbase. Apangbanga nayugo gupai nga wene fugodagbase nasa gupai nga ka i naabingo ho nga i nisayo na i ima mbu yo, na si nasa gupai a nga ka i dunga na ngbaduse ya.—Batu. 3:1.

Holger, nga guko bako azi bapatiza agarã 20 fuo kura aborokporo naima zio bapatiza aya: “Si ni nyanyakipa pai ka yugo gupai nga ani ima kpinyemu gaani borokporo na ani namanga kparakpee amanga tipa ni.” Christa ape gupai berewe nga ri ‘azanga du na maabangirise tipa gupai nga kumbari nika diaberã adia ka iriso Yekova na ki di rengo kugume te.’ Si naida ani du ti aregbo dunduko na ruru bipai tipa agu agumerani adunga na ani rogo idapase yo ya, na si naida ani du na maabangirise tipa yo.

Gaani sasa nga ka banda gaani pagume na agumerani, ka fu momu fuyo i ini rengo, na ka zio ngbaduyo yo na gu pangbanga nga ga Ziazia Kekeapai. Na rogo apai yo dunduko, si naida ani naamangapai “ni zera na irisa.”—1 Pet. 3:15.