Njakolelele mu mutambela umo uje wakala kuyehi na nganda ya Rome, muje mwakala manene tuhutu. Buyoye bwakaluwile. Kunjazibukile banana ba kunjikita, co lalo kunjakele na kulitombola na batate. Ngeci, njalilongesele mwakuyoyela mu mitambela yaikalu kuyoyamo.

Munjakele na myaka 10, te njashangumuka laja kwiba. Co munjakele na myaka 12, njatundile hembo lwa kulibanga. Tupokola banjikwatele lwalwingi, oloni batate bakele na kuya na kukanjipatula na kunjilwisa kwimbo. Njakele na kulicokota na banu kushwa kumo. Njapwile munu wa lwozi simbu yoshe. Munjakele na myaka 14, njatundile hembo, co kunjelukile lalo. Njakayoyele mu bitapalo na kushangumuka kupangesa bumbanda bwa kupendesa. Kunjakele noku kwa kulala. Ngeci, njakele na kukobela mu minyau yambala kwa kujeneka kubalomba na kulalamo kweta ku mutondo. Kutundaho, njakele na kutonda-tonda mema a kutana.

Njazibukile manene kwiba. Njakele na kukwebula byuma byambala mu bingonga na kupukula binjibo. Co butsiki njakele na kwiba mu binjibo bya kulala bangenzi. Banu babangi bazibukile bilinga byange byabibi. Mu kwita kwa simbu, njashangumukile kulikwatasana na cibunga ca bikenya, co njakele oni na kwibila bibanki. Njapwile wa kukenyuka. Ngeci, bakwetu banjalikwatasanene nabo muje mu cibunga bashangumukile kunjisingimika. Kunjakele na kuseza buta bwange, njakele bene na kulala nabwo. Njapwile munu wa lwozi na likamba, co lalo njakele na kupangesa bumbanda bwa kupendesa, kwiba, na kulinga bukwizi. Ngeci, tupokola bakele na kunjishakezeka simbu yoshe. Co banjikutile na kunjaka mu kamenga ha bisimbu byabingi.

Simbu imo munjatundile mu kamenga, njaile na kumona banana bashongo ya banana. Kunjazibukile ngwange bapwile Bakaleho ba Yehova hamolika na bishongo bange babali. Banjilanyele ku ciwano cimo ca Bakaleho. Njaileko mwafwa njashakele kukamona bikalingiwako. Mutwaketele ku Njibo ya Bumwene, njakakateyeye ngwange njitumbamena ku cikolo mangana njimone boshe bakobela na kutuhuka. Njambatele na buta bwange.

Cije ciwano catengulwile buyoye bwange. Njalizibile ngwe njakele mu lifuti lyeka. Banu bezile na kunjimeneka na nzanzu oku bali na kumwesula. Bakaleho basholokele kupwa ba kulongwa na kukala na ngozi. Bilinga byabo byalisezelele kulako na bilinga bya babusamba bange.

Njashangumukile kulilongesa Mbimbiliya na Bakaleho. Co munjatwaleleleleho kulilongesa, njanangukile ngwange njapandele kutengulula futisi yange. Njapangesele cinangulo cili ku mukanda wa Visimo 13:20 uje wendeka ngwawo: ‘Uje enda na baka-mana apwa muka-mana lalo, oloni uje enda na bilema akobela mu bukalu.’ Njamwene ngwange njapandele kwecela kulikwatasana na cibunga ca bikenya cinjakele na kulikwatasana naco. Kulinga ngoco kukwapwile kwakwasi, oloni Yehova wanjikwasele, co njecelele kulikwatasana naco.

Kuli byuma bikwabo lalo binjalingile. Njalingile mwoshe munjaselele kwecela kusipa na kupangesa bumbanda bwa kupendesa. Njatehwile biñambu byabilaha binjakele nabyo, njecelele kuzala masikiyo na kwecela kwendeka na likamba. Co lwa kulibanga mu kuyoya kwange, njashangumukile kutengulula bilinga byange byabibi.

Kunjashakele manene bya kutanda na kulilongesa, co kwanjikaluwilile kutanda na kulilongesa Mbimbiliya. Oloni omwo njalifwitile kulinga ngoco, njashangumukile kuzema Yehova kamandondo-kamandondo, co citakutaku cange cashangumukile kunjipaya. Kakangi njakele na kukala na bisinganyeka bya kuhenga. Njakele na kuliziba ngwe Yehova kasa kunjikonekela mwafwa njalingile manene byuma byabibi. Ha bisimbu bya cifweci, njakele na kutanda muzimbu wa Mwene Ndabiti uje walingile bubi bwakama, oloni Yehova wamukonekelele. Ou muzimbu wakele na kunjizembeleka manene.—2 Samwele 11:1–12:13.

Cuma cikwabo canjikaluwilile capwile kwambulwila ha njibo na njibo. (Mateo 28:19, 20) Njakele na kutewa ngwange hamo njasa kuliwana na munu umo injabiisilile. Oloni mu kwita kwa simbu, lyoba linjakele nalyo lyahwile. Njashangumukile kulikuwa kukwasa bakwetu balilongese bya Tate yetu wa mwilu wamubwa, uje akakonekela mwakama.

Kulilongesa bya Yehova kunanjobola! Babusamba bange bamo banjakele na kulikwatasana nabo banatsi, bamoco bali mu kamenga. Oloni yange njili na kulikuwa kuyoya, co njalabelela byuma byabibwa kulutwe. Njalilongesa ngwange njinapande kupwa wa kulikehesa, kwononoka binangulo bya Njambi na kukwata mbunge. Ngeci, njili na kulikuwa kulikwatasana mwamubwa na bakwetu. Nange na mwebwange Carmen tuli na kuyoya mu kubwahelela. Co tubaboshe tukalikuu kukwasa bakwetu balilongese Mbimbiliya.

Ha simbu ino, njili na kulikuwa cipangi cacibwa, co simbu imo njikapangela ku bibanki. Keti kwiba, oloni kubijelesa.