Me ono sawuyu ndraʼo, toröi ndraʼaga ahatö ba Leipzig, Jerman Timur, lö aröu moroi ba nola Cheska ba Polandia. Me önö fakhe ndröfigu, iʼohe ndraʼaga bapagu ba luar negeri börö halöwönia. Si oföna ba Brasil aefa daʼö ba Ekuador.

Me 14 fakhe ndröfigu, labeʼe ndraʼo ba asrama ba Jerman. Börö me aröu nahia waʼatoröi ndra satuagu ba Amerika Selatan, tatu yaʼo samösa zondrorogö faʼaurigu. Tola usöndra zoguna khögu ba lö uʼameʼegö tödö saʼae hewisa lua-lua gamuatagu ba niha böʼö.

Me 17 fakhe ndraʼo, mangawuli ndra satuagu ba Jerman. Ba wamobörö, toröi ndraʼo khöra. Hizaʼi, lö omasido na lafatörö ndraʼo; daʼö mbörö wa abua khögu na sambua omo ndraʼaga. Me 18 fakhe ndraʼo, mofanödo moroi ba nomo.

Itugu lö ahono-hono dödögu, uforege wangalui hadia gohitö dödö ba waʼauri andre. Me no unehegö ngawawa niha hegöi lagu waʼaurira, faduhu dödögu wa sabölö sökhi yaʼia daʼö uʼogunaʼö waʼaurigu ba woʼanöröi planet si sökhi andre fatua lö lafakiko niha gulidanö.

Uröi Jerman, uʼöli hondragu ba möido ba Afrika. Hizaʼi, ufulido ba Eropa ba wangehaogö hondragu. Lö ara aefa daʼö, ofetado ba nasi Portugal. Ba daʼö uhalö gangetula wa lö ufake hondra saʼae, hizaʼi köfa.

Farahu ndraʼo ba ngawawa ndraono matua si no mamaʼanö yaʼira ba wanörö Samudra Atlantik. Ba daʼö falukhaga woʼomogu Laurie. Si oföna matörö Kepulauan Karibia. Aefa daʼö, tebato ndraʼaga ba Puerto Riko, ba mangawuli ndraʼaga ba Eropa. Omasiga na masöndra göfa si tola mabaliʼö nahia waʼatoröima. Hizaʼi, me no irugi tölu waŵa ba wangalui köfa, ha ba zi lö arara, tebato saʼae halöwö andrö. Lakaonido enaʼö fao ndraʼo ba dinas militer ba Jerman.

Mohalöwö ndraʼo 15 waŵa ba angkatan laut Jerman. Me luo daʼö, maʼera-era Laurie enaʼö mangowaluga ba ohitö dödöma mafasui gulidanö. Lö ara me mohalöwö ndraʼo tobali saradadu, maʼöli döla göfa moroi ba zi sambua köfa penyelamat. Gasa-gasa wohalöwögu ba dinas militer, mafatohu-tohu göi wangehaogö köfa tobali kapal layar. Ohitö dödöma toröiga ba göfa ba mafasui gulidanö. Me luo daʼö, me no awai halöwögu ba dinas militer ba lö nasa sawai göfa daʼö, möi ndra Samaduhuʼö Yehowa khöma ba mabörögö wamahaʼö yaʼaga ba Zura Niʼamoniʼö.

Ba wamöbörö, lö moguna ufaböʼöni waʼaurigu. No mangowalu ndraʼo ba no uböhöli woroko. (Efeso 5:5) Sanandrösa ba gohitö dödöma ba wamasui ulidanö, umane tödögu wa so gunania na uhorigö waʼaurigu ba wonehegö niwöwöi Lowalangi sahöli-höli dödö.

Hizaʼi, sindruhunia sa moguna ubulöʼö waʼaurigu, mendrua manö gamuatagu. Börö me asiliyawa sibai ndraʼo ba uʼodaligö ndraʼo samösa, ba arörö ndraʼo ba gohitö dödögu sinangea ukhamö. Ha faʼaurigu niʼera-eragu.

Samuza inötö, ubaso Huhuo Yesu ba Hili si no tehöngö. (Mataiʼo, faza 5-7) Ba wamobörö lö aboto ba dödögu sanandrösa ba waʼohahau dödö niwaʼö Yesu. Duma-dumania, ohahau dödö niha solofo ba sowökhi tödö. (Mataiʼo 5:6) Lö aetu uʼangeragö hana wa omuso dödö niha soʼamböta. Me lö uböhöli wamahaʼö yaʼo, awena aboto ba dödögu wa dozi ita moguna khöda gö wamati. Enaʼö tebönökhi zoguna simane daʼö, moguna khöda wangide-ngideʼö. Imane Yesu, ”Yaʼahowu niha soʼameʼegö tödö soguna ba wamati.”—Mataiʼo 5:3.

Me no mabörögö wamahaʼö yaʼaga ba Zura Niʼamoniʼö, findra ndraʼaga ba Prancis ba afuriata ba Italia. Gofu hezo möiga, falukha ndraʼaga ndra Samaduhuʼö Yehowa. Adöni sibai dödögu ba waʼomasi niforomaʼöra khö nawöra zamösana hegöi fahasara dödöra. Uʼila wa laʼokhögö waʼafatalifusöta ira Samaduhuʼö Yehowa ba zi sagörö ulidanö. (Yohane 13:34, 35) Ba gafuriata, yaʼo hegöi Laurie labayagö ndraʼaga idanö tobali Samaduhuʼö Yehowa.

Me no aefa tebayagö ndraʼo idanö, lö uböhöli wamulöʼö amuatagu. No mahalö gangetula Laurie ba woʼanöröi singa nasi Afrika, aefa daʼö maʼanöröi Samudra Atlantik numalö ba Amerika Serikat. Ba samudra daʼa, me ha darua ndraʼaga bakha ba göfa side-ide ba dalu nasi sebolo, awena aboto ba dödögu wa lö eluaha ndraʼo na mufaedogö khö Zomböi sebua lakhömi. Börö me oya ginötögu (lö oya zi tola mufalua ba dalu nasi), andrö wa uʼogunaʼö ginötö daʼö ba wombaso Sura Niʼamoniʼö. Tofakha sibai ba dödögu waö-waö waʼauri Yesu ba gulidanö. Lö irai ihöni ia samösa. Lö iʼogunaʼö waʼaurinia ha ba zomasi-masi ia, hizaʼi khö Namania si so ba zorugo.

Me uʼangerönusi duma-duma Yesu, aboto ba dödögu wa Famatörö Lowalangi zinangea uʼofönaiʼö ba waʼaurigu, tenga ba daʼö arörö ndraʼo ba ngawalö zomasi dödögu. (Mataiʼo 6:33) Me marugi Amerika Serikat, mahalö gangetula toröiga ba daʼö ba maʼosambuaʼö dödöma ba wamosumange Lowalangi.

Me föna, abölö uʼodaligö ndraʼo samösa, hizaʼi asese so khögu waʼaombö dödö. Iadaʼa, no usöndra gumbu waʼatua-tua si tola uʼodaligö ba wameʼe khögu fanuturu lala. (Yesaya 48:17, 18) So gohitö dödögu ba waʼauri andre yaʼia daʼö ba wamosumange Lowalangi hegöi ba wanolo niha enaʼö lafahaʼö ira sanandrösa khönia.

Itugu aro wongambatöma me mafalua mene-mene Zura Niʼamoniʼö. No göi matema howu-howu yaʼia daʼö onoma ono alawe si baga-baga, si no manöndra faʼaboto ba dödö ba sangomasiʼö Yehowa.

Tenga göi daʼö geluahania lö hadöi bade ba wongambatöma. Hizaʼi, börö wanolo moroi khö Yehowa, mahalö gangetula wa lö awuwu ndraʼaga mazui mabato wangodaligöma yaʼia.—Amaedola 3:5, 6.