Manuel: N sta kontenti di odja-u otu bês, Juzé. N gosta txeu di kes konbérsu sobri Bíblia ki nu sta ta ten tudu simana. * Modi ki bu sta?

Juzé: N sta dretu, obrigadu.

Manuel: Dja N fika kontenti di sabe kel-li. Kel últimu bês ki N ben li, nu pâpia sobri pamodi ki Tistimunhas di Jeová ta fla ma Reinu di Deus kumesa ta governa na anu 1914. * Sima nu odja, ten un kuza inportanti na profesia di Daniel kapítlu 4 ki ta prova kel-li. Bu ta lenbra kuzê ki kel profesia ta pâpia di el?

Juzé: Sin, la ta mostra ma Nabukudunuzor sunha ku un arvi grandi.

Manuel: É kel-la própi. Kel arvi uma grandi ki Nabukudunuzor sunha ku el ta txigaba ti Séu. Tanbê el obi un anju di Deus ta manda pa kel arvi kortadu má pa dexa se toku. Dipôs ki ‘seti ténpu’ pasa, kel arvi ta kriaba otu bês. * Tanbê nu odja ma kel profesia li ta kunpriba di dôs manera. Bu ta lenbra modi ki el kunpri di kel primeru manera?

Juzé: Kel-li kontise kantu Nabukudunuzor fika dodu duránti seti anu, ka simé?

Manuel: Izatamenti. Duránti un ténpu Nabukudunuzor fika dodu i el para di governa. Má na kel kunprimentu más grandi di kel profesia, govérnu di Deus ta paraba di governa duránti seti ténpu. Sima nu odja, kes seti ténpu kumesa kantu Jiruzalen distruídu na anu 607 A.J. Di la pa dianti, ninhun otu rei na Téra ka reprizenta govérnu di Jeová pa governa se povu. Má na fin di kes seti ténpu, Deus ta skodjeba un novu governanti, sô ki di es bês ta sérba un algen na Séu. Kel-li krê fla ma govérnu ô Reinu di Deus na Séu ta kumesaba ta governa na fin di kes seti ténpu. Dja nu sabe ki ténpu ki kes seti ténpu kumesa. Si nu konsigi ntende kantu ténpu ki kes seti ténpu ta dura, nu ta sabe ki ténpu ki Reinu di Deus kumesa ta governa. Bu ntende ti li?

Juzé: Sin. Foi bon torna lenbra kes pontu li.

Manuel: Boa. Gósi nu ben tenta sabe kantu ténpu ki kes seti ténpu ta dura. N faze un piskiza ki djuda-m lenbra alguns kuza inportanti. N ta ben tenta splika-s.

Juzé: Ok.

Manuel: Kantu kel profesia kunpri primeru na Nabukudunuzor, el dura seti anu. Má na kel kunprimentu más grandi, ki ten aver ku Reinu di Deus, kes seti ténpu ka pode sérba seti anu.

Juzé: Pamodi?

Manuel: Lenbra ma kes seti ténpu kumesa na anu 607 A.J. kantu Jiruzalen distruídu. Si nu konta seti anu apartir di anu 607 A.J., nu ta txiga na anu 600 A.J. Má ka kontise nada inportanti ki ten aver ku govérnu di Deus na kel anu la. Alén di kel-li, nu odja ma uns 600 anu dipôs, kantu Jizus staba na Téra, el mostra ma kes seti ténpu inda ka tirminaba.

Juzé: Amm, é simé dja N lenbra.

Manuel: Pur isu, kes seti ténpu ka pode ser seti anu. Es ta dura mutu más txeu ki kel-la.

Juzé: Kantu ténpu ki es ta dura?

Manuel: Livru di Apocalipse ta djuda-nu ntende txeu profesia ki sta na livru di Daniel. Pur izénplu, el ta djuda-nu sabe kantu ténpu sértu ki kes seti ténpu ta dura. El ta mostra ma três ténpu i meiu ta dura 1.260 dia. * Nton kes seti ténpu, ki é dôs bês más txeu ki três ténpu i meiu, ta da 2.520 dia. Inda bu sta ta ntende?

Juzé: Sin. Má N ka ntende modi ki kel-li ta mostra ma Reinu di Deus kumesa ta governa na anu 1914.

Manuel: Ok. Nu ben odja si nu ta ntende midjór. Na alguns profesia di Bíblia, un dia ta reprizenta un anu. * Si nu aplika kel régra li na kes seti ténpu, es ta da 2.520 anu. Nton si nu konta 2.520 anu apartir di anu 607 A.J., nu ta txiga na anu 1914. É pur isu ki nu ta kridita ma kes seti ténpu tirmina na anu 1914 i ma é na kel anu la ki Jizus kumesa ta governa i el bira Rei na Reinu di Deus. É interesanti ki désdi anu 1914, kontise kuzas inportanti na mundu interu i Bíblia dja flaba ma kes kuza li ta kontiseba na ténpu di fin.

Juzé: Ki kuzas ki kontise?

Manuel: Odja kuzê ki Jizus fla na Mateus 24:7. Li Jizus pâpia di kel ténpu ki el ta kumesaba ta governa na Séu. El fla: ‘Pamodi gentis di un nason ta briga ku gentis di otu nason i reinu ku reinu, ta ben ten falta di kumida i tremor di téra na un lugar tras di kel otu.’ Jizus fla ma ta tinha tremor di téra i falta di kumida. Kes tipu di kuza li sta ta kontise na nos ténpu, ka simé?

Juzé: Kel gó é simé.

Manuel: Na kel versíklu li, Jizus tanbê dja flaba ma ta tinha géra timenti el ta staba ta governa kómu Rei na Séu. I livru di Apocalipse ka ta pâpia sô di kalker géra, má el ta pâpia di géras ki ta afetaba mundu interu na ténpu di fin. * Bu ta lenbra na ki anu ki kumesa kel Primeru Géra na Mundu Interu?

Juzé: N ta lenbra sin, foi na anu 1914, kel mésmu anu ki bu sta fla ma Jizus kumesa ta governa! Nunka N ka ligaba kes dôs kuza li.

Manuel: Óras ki nu ta konpara kel profesia di kes seti ténpu ku otus profesia di Bíblia sobri ténpu di fin, tudu kes kuza li ta faze más sentidu. Tistimunhas di Jeová ten sertéza ma Jizus bira Rei i el kumesa ta governa na Reinu di Deus na anu 1914 i ma ténpu di fin kumesa na kel mésmu anu.

Juzé: Inda N sta ta tenta ntende tudu kes kuza li.

Manuel: É normal. Sima dja N flaba bo, ami tanbê N dura ki ntende kel asuntu li dretu. Má, N ta spéra ma nos konbérsu djuda-u ntende ma nbóra Bíblia ka ta pâpia di manera dirétu sobri anu 1914, kel ki nu ta inxina sobri kel anu li ten bazi na Bíblia.

Juzé: Sin. Kel-li é un kuza ki sénpri txoma-m atenson na nhos. Ka ta nporta kal ki é asuntu, sénpri nhos ta inxina ku bazi na Bíblia, envês di inxina ku bazi na nhos ideia. Má alvês N ta fika ta pensa pamodi ki kel asuntu li é konplikadu si. Pamodi ki Deus ka poi na Bíblia di un manera klaru i sinplis ma Jizus kumesa ta governa na Séu na anu 1914?

Manuel: Kel-li é un bon pergunta, Juzé. Txeu kuza na Bíblia ka sta splikadu di manera dirétu. Pamodi ki Deus kria pa Bíblia skrebedu di un manera ki nu ten ki sforsa pa nu ntende-l? Talvês nu pode pâpia sobri kel-li otu bês ki N ben li.

Juzé: Pa mi ka ten prubléma.