Julio: Yaui Ernesto, niyolpaki sampa nimitsitas. Tlauel nechpaktia nimitspaxalos sejse chikueyi uan timokamanaljuisej tlen Biblia. * ¿Kenijkatsa tiitstok?

Ernesto: Kuali niitstok, tlaskamati.

Julio: ¡Kualtitok! Kema timokamanaljuijkej tikitakej kenke Jehová itlajtoltemakauaj tikijtouaj toTeotsij iTlanauatijkayo pejki tekichiua ipan xiuitl 1914. * Tlen tikitakej ipan Daniel capítulo 4 techpaleuia ma tijkuamachilikaj kenke kiampa tikijtouaj. ¿Tikilnamiki?

Ernesto: Kena, tlen nopa tlanauatijketl Nabucodonosor kitemijki.

Julio: Kualtitok. Ya kitemijki se ueyi kuauitl tlen asiyaya iluikak. Nojkia kiitak se iluikaejketl katli tlanauatik ma kitsontekikaj nopa kuauitl. San mokajki nopa kuatsomitl uan ineljuayo. Teipa, panok “chikome xiuitl” uan nopa kuauitl sampa moskaltik. * Nojkia, tikitakej nopa tlajtolpanextili ompa moaxitik. ¿Tikilnamiki kenijkatsa achtoui moaxitik?

Ernesto: Nelia, nikilnamiki tlen kipanok Nabucodonosor. Chikome xiuitl uiuitixki.

Julio: Kena. Uiuitixki uan ayokmo uelki tlanauatia. Nopa tlajtolpanextili moaxitik ika ompa, kema “chikome xiuitl” ayokmo tlanauatik toTeotsij ipan Tlaltipaktli. Uan pejki kema kitsontlamiltijkej Jerusalén ipan xiuitl 607, kema ayamo ualajtoya Jesús. Ipan nopa tonali, ayokmo itstoyaj tlanauatianij katli Jehová kintlapejpenijtoya ma tlanauatikaj ipan Tlaltipaktli. Uan kema panoskia nopa chikome xiuitl, toTeotsij kitekimakaskia se yankuik tlanauatijketl, katli itstoskia iluikak. Nopa kiijtosneki kema tlamiskia nopa chikome xiuitl, peuaskia tekichiuas toTeotsij iTlanauatijkayo ipan iluikak. Uajka, ya tikitakej kema pejki nopa chikome xiuitl. Nama moneki tijmatisej keski xiuitl uejkajki uan kiampa tijmatisej kema pejki tekichiua toTeotsij iTlanauatijkayo. ¿Kuali tijkuamachilijtia?

Ernesto: Kena, ya nikilnamijki tlen timokamanaljuijkej kema tinechpaxaloko.

Julio: Kualtitok. Uajka ma tikitakaj keski uejkajki nopa chikome xiuitl. Na nojkia monejki nikompauis, kiampa kuali nikilnamiktoskia. Nijchiuas kampeka kuali nimitsixtomilis.

Ernesto: Kualtitok.

Julio: Nopa tlajtolpanextili achtoui moaxitik ipan tlanauatijketl Nabucodonosor uan uejkajki chikome xiuitl. Uan kema ika ompa moaxitik, ika toTeotsij iTlanauatijkayo, tlauel uejkajki uan amo san chikome xiuitl.

Ernesto: ¿Uan kenijkatsa tijmati?

Julio: Nopa chikome xiuitl pejki ipan xiuitl 607 kema ayamo ualajtoya Jesús uan ipan nopa tonali kitsontlamiltijkej Jerusalén. Tlaj peuas tijpouasej chikome xiuitl ipan 607, titlamisej ipan xiuitl 600 kema ayamo ualajtoya Jesús, uan ipan nopa xiuitl amo tleno panok ika toTeotsij iTlanauatijkayo. Uan kej ya tikitakej, kema Jesús ualajki ipan Tlaltipaktli kiijtok ayamo tlamiyaya nopa chikome xiuitl.

Ernesto: Kena nelia, ya nikilnamijki.

Julio: Uajka, amo san uejkajki chikome xiuitl, monejki panos tlauel miak xiuitl.

Ernesto: ¿Uajka keski xiuitl uejkauaskia?

Julio: Ipan pilamochtsi Apocalipsis eltok seyok tlajtolpanextili tlen techpaleuis kuali tijmatisej keski tonali uejkajki nopa chikome xiuitl tlen Daniel kiijtok. Ipan nopa tlajtolpanextili kiijtoua eyi xiuitl uan tlajko kiijtosneki 1,260 tonali. * Uajka, chikome xiuitl kiijtosneki 2,520 tonali. ¿Kena tijkuamachilijtia?

Ernesto: Kena, san amo kuali nijkuamachilia kenke inkineltokaj toTeotsij iTlanauatijkayo pejki tekichiua ipan 1914.

Julio: Kualtitok, namantsi tikitasej. Ipan se keski tlajtolpanextili tlen Biblia, se tonali kiijtosneki se xiuitl. * Uajka, tlaj nopa chikome xiuitl kej nopa tijpouaskiaj, amo san eliskia 2,520 tonali, eliskia 2,520 xiuitl. Uan tlaj ipan xiuitl 607 kema ayamo ualajtoya Jesús tijpiuilisej nopa 2,520 xiuitl, titlamisej ipan xiuitl 1914. Yeka, uelis tikijtosej ipan nopa tonali tlanki nopa chikome xiuitl uan Jesús kitekimakakej kej Tlanauatijketl ipan toTeotsij iTlanauatijkayo. Nojkia, ipan 1914 pejki moaxitia sekinok tlamantli tlen Biblia kiijtoua panoskia ipan itlamia tonali.

Ernesto: Xinechnextili se neskayotl.

Julio: Kena, ipan Mateo 24:⁠7, Jesús kiijtok tlake panoskia kema peuaskia tlanauatis ipan iluikak. Xikita: “Tlakamej ipan tlaltinij kampa ueli motlalanasej uan moteuisej tlakamej ipan sekinok tlaltinij. Tlanauatianij uan ininsoldados tlateuisej ininuaya sekinok tlanauatianij uan ininsoldados. Onkas kokolistli tlen fiero, uan ueyi mayantli uan kampa ueli mojmolinis tlali”. Nikaj Jesús kiijtoua onkaskia uejueyi mayantli uan mojmoliniskia tlali. Uan ya nopa tikitstokej pejki nojua tlauel mochiua ipan xiuitl 1914 uan nojua mochijtok ipan ni tonali.

Ernesto: Kena, nelia tlen tikijtoua.

Julio: Jesús nojkia kiijtok onkaskia uejueyi tlauilankayotl. Uan nopa pilamochtsi Apocalipsis kiijtoua amo san mokualaniskiaj ipan se keskij altepemej, kiijtoua ipan nochi Tlaltipaktli onkaskia uejueyi tlauilankayotl. * ¿Tikilnamiki kema panok nopa Achtoui Ueyi Tlauilankayotl?

Ernesto: Kena, ipan xiuitl 1914. Kema inkiijtouaj pejki tlanauatia Jesús. Amo kema nimoiljuijtoya ipan nopa tlamantli.

Julio: Nelia, uelij tikitaj nopa tlajtolpanextili tlen nopa chikome xiuitl, mouika ika nopa tlajtolpanextili kampa kiijtoua tlen panoskia ipan itlamia tonali. Jehová itlajtoltemakauaj timotemachiaj Jesús nelnelia pejki tlanauatia ipan xiuitl 1914 uan uajka pejki itlamia tonali. *

Ernesto: Nojua monekis nijchiuas kampeka kuali nijkuamachilis.

Julio: Nopa nelia, na nojkia tlauel ouij nijmatki kema achtoui nechixtomilijkej. San nijnekiskia tlen timokamanaljuijkej ma mitspaleui xijmati maske ipan Biblia amo nesi nopa xiuitl 1914, tojuantij tikitstokej miak tlamantli tlen techpaleuia tijmatisej Jesús nelnelia pejki tlanauatia ipan nopa xiuitl. Nojkia nijnekiskia ma mitspaleui tikitas nochi tlen tojuantij tijneltokaj mokixtijtok ipan Biblia.

Ernesto: Kena, tlauel nimosentlachilia pampa kiampa nikita. Ta nochipa tikixtoma tlen nimitstlajtlania ika Biblia. Kema nimitstlajtlania se tlamantli, amo kema tikijtoua “Na nimoiljuia” o “Na nikijtoua”. Ta nochipa tijtekiuia Biblia. Uan, ¿kenke tlauel ouij se kikuamachilis? ¿Kenke toTeotsij amo xitlauak kiijtok Jesús peuaskia tlanauatis ipan 1914?

Julio: Kualtitok pampa tinechtlajtlania nopa, Ernesto. Onka miak tlamantli ipan Biblia tlen amo xitlauak kiijtoua tlake kiijtosneki. ¿Kenke kiampa kichijki toTeotsij? ¿Kenke moneki tijchiuasej kampeka tlaj tijnekij tijkuamachilisej? ¿Tijnekiskia ya nopa timomachtisej ne seyok semana?

Ernesto: Kualtitok, uajka nimitschias.