Carlo: Che bon catarte nantra volta, Gioani. Me piase parlar con ti sora la Bìblia tute le stimane. * Come steto?

Gioani: Mi stao ben, gràssie.

Carlo: Che bon. Ntela ùltima volta, ghemo parlà parché le Testimònie de Geovà le dise che el Regno de Dio el ga scominsià a governar in 1914. * E ghemo catà una prova de questo assunto nela professia che ghen’è in Daniel capìtolo 4. Ricòrdito?

Gioani: Si, l’era del sogno de Nabucodonosor sora una pianta granda.

Carlo: Eco. In quel sogno, Nabucodonosor el ga visto una pianta granda che la rivea fin el cielo. Lu el ga scoltà un àngelo de Dio che el ga comandà butar do la pianta e assar la so soca lì in tera. Dopo de “sete tempi”, la pianta la vegnaria su nantra volta. * Anca, ghemo visto che questa professia la se realisa de due maniere. Ricòrdito dela prima maniera?

Gioani: La prima la ze stata quando el rè Nabucodonosor l’è restà mato par sete ani, mia vera?

Carlo: Giusto. Nabucodonosor l’è restà mato par un poco de tempo, e cossita lu no’l podea pi governar. Ma, ntela seconda maniera dela professia realisarse, el governo de Dio ntela Tera el saria fermà par sete tempi. Come ghemo visto, i sete tempi i ga scominsià quando Gerusalen la ze stata destruta in 607 vanti de Cristo. De lì avanti, gnanca un governante el ga rapresentà Geovà Dio ntela Tera. Ma, ntel fin dei sete tempi, Dio el ndaria far un novo rè governar sora el so pòpolo, ma questa volta ntel cielo. O sia, el final dei sete tempi saria el scomìnsio del governo del Regno de Dio ntel cielo. Belche savemo quando i sete tempi i ga scominsià. Alora, se semo boni de saver quanti ani i ga i sete tempi, ndaremo saver quando el Regno de Dio el ga scominsià a governar. Gheto capio fin qua?

Gioani: Si, l’è stà bon ricordar.

Carlo: Giusto. Adesso ndemo veder quanti ani i sete tempi i ga. Mi go pena ledesto una matèria che la me ga giutà a ricordar arquanti punti importanti. Vao proar spiegarteli.

Gioani: Va ben.

Carlo: Quando questa professia la se ga realisà in Nabucodonosor, l’è stà ciaro che i sete tempi i ze stati sete ani. Ma, quando la se ga realisà nel Regno de Dio, i sete tempi i gavaria de esser tanto de pi che sol sete ani.

Gioani: Ma parché?

Carlo: Ricòrdate che i sete tempi i ga scominsià cola destrussion de Gerusalen in 607 vanti de Cristo. Se contemo sete ani de lì avanti, rivemo a 600 vanti de Cristo. Ma gnente che ga de veder col Regno de Dio ga sucedesto in quel ano. E anca ghemo visto che Gesù, quando l’era qua ntela Tera sècoli dopo, el ga parlà che i sete tempi no i era gnancora finidi.

Gioani: Ah, si, adesso me ricordo de quel lì.

Carlo: Alora, i sete tempi i ga de esser tanto de pi che sol sete ani.

Gioani: Ma quanto tempo?

Carlo: El libro de Apocalisse el ne giuta a capir el libro de Daniel. E cossita, podemo saver quanti ani i sete tempi i ga. In Apocalisse, l’è scrito che tre tempi e meso i ze 1.260 giorni. * Cossita, sete tempi, che l’è el dópio de tre tempi e meso, i ze 2.520 giorni. Gheto capio fin qua?

Gioani: Si, ma no go gnancora capio come che quel lì che te ghè spiegà el prova che el Regno de Dio el ga scominsià a governar in 1914.

Carlo: Giusto, proemo capir quel lì. Dele volte, ntele professie dela Bìblia, un giorno rapresenta un ano. * Se un giorno el vol dir un ano, i sete tempi i saria 2.520 ani. Se contemo 2.520 ani dopo de 607 vanti de Cristo, rivemo al ano de 1914. * L’è par quela che capimo che el ano de 1914 l’è quando i sete tempi i ze finidi e che Gesù el ga scominsià a governar come rè ntel Regno de Dio. E anca vedemo che, de 1914 fin qua, tante professie dela Bìblia sora i ùltimi giorni le ze drio realisarse.

Gioani: Che professie?

Carlo: Varda quel che Gesù el ga dito in Mateo 24:7 sora quel che ndaria suceder quando el scominsiesse a governar ntel cielo: “Nassion se levarà su contra nassion e regno contra regno, ghen sarà mancansa de magnar e teremoti in un posto dopo l’altro.” Gheto visto? Gesù el ga dito che, dopo che el scominsiesse a governar ntel cielo, ghen saria teremoti e mancansa de magnar. L’è pròpio cossita che vedemo el mondo ancoi, mia vera?

Gioani: L’è vera.

Carlo: In questo testo, Gesù anca el ga dito che ghen saria guere intanto che el saria drio governar come rè del Regno de Dio. E el libro de Apocalisse el dise che queste guere le ndaria cambiar el mondo. * Te ricordi quando che la Prima Guera Mondial la ga scominsià?

Gioani: L’è stà in 1914, el medèsimo ano che te ghè dito che Gesù el ga scominsià a governar! Mi mai ghe gavea pensà sora.

Carlo: Quando femo una comparassion intrà la professia sora i sete tempi e altre professie dela Bìblia sora el tempo del fin, semo boni de capir cossa che la Bìblia la vol dir. Le Testimònie de Geovà le ze sicure che Gesù el ga scominsià a governar come rè del Regno de Dio in 1914 e che i ùltimi giorni i ga scominsià pròpio in quel ano. *

Gioani: Son ancora drio proar capir tuto quel lì.

Carlo: L’è cossita pròpio. Me ga metesto tempo par capir ben questo assunto. Ma mi resto contento se al manco son stà bon de giutarte a veder che, anca se la Bìblia no la parla pròpio nel ano 1914, te ghè visto che quel che le Testimònie de Geovà le crede sora questo ano vien pròpio dela Bìblia.

Gioani: Si, me piase che valtri sempre doperé la Bìblia par provar quel che valtri disé, invesse de parlar dele vostre idee. Ma parché che l’è tanto fadiga capir questo assunto? Parché che Dio no’l ga solche metesto nela Bìblia che 1914 saria el ano che Gesù el ndaria scominsiar a governar nel cielo?

Carlo: L’è una bona domanda, Gioani. Infati, tante robe no le ze spiegade de maniera ciara nela Bìblia. Parché che Dio el ga volesto che la Bìblia la fusse scrita de una maniera che ghe volaria sforso par capirla? Fursi podemo discorer sora questo assunto nela pròssima volta che vegno qua.

Gioani: Me par bon.