Fawarḇair fafisu waba ḇa ya.

Awin nya aya ro mnu kasun ḇero sup Italia ro taun 1943. Kamam ima fyararur ro yaf ma ifrur ai na ḇe robebor na. Kamam ma awin sufarkor aya ma eba kasun ayesi fa nggokenem ḇe snonggaku Katolik ḇefrur pyum.

Rosai ḇefnai fa wamarisen ­wakḇe pastor?

Fafisu yaba ḇa ya, yamarisen kaku fa yarower pastor ya dawos ro gereja. Mgarem ḇyeja ryok myaren ma yamarisen yamam moḇ sifrur ari ro gereja ine. Naiso ḇefrur fa yamarisen yakḇe pastor. Fafisu yaḇeumur taun ri 13, awin dun aya fa yaksun ro rumfarkor ḇena asrama. Rumfarkor ine iso moḇ sfarkor romawa sya fa sakḇe pastor.

Sbuk Refo fa ­sikfarkor Au ro rumfarkor anya ke?

Yamam mboi oroḇa. Fafisu yaḇeumur taun ri 15, guru oso byuk syap Injil ḇeser Manseren Yesus kankenem ma fararmyan ḇyena ḇe aya. Yawasya ker syap ani. Fafisu yaḇeumur taun ri 18, yafarkor ro universitas kepausan ri kyor ro sup Roma, ma ḇemamwarek rumfarkor ine iso Paus manggundi. Ro diwa, yafarkor wos Latin, Yunani, sejarah, filosofi, psikologi, ma teologi. Nggowasya mnuk-mnuk ma nggorower siwasya Refo ya ro mimbar ro ras ari ya, fama nggofarkor kaku na ḇa.

Wakḇe pastor inja wakfarkor snonggaku ḇese ke?

Ayama yafrur ker roi sor ḇe administrasi na. Imbape, yakbuk farkarkor ḇekur ketetapan-ketetapan Konsili Vatikan Kedua na kako.

Rosai ḇefnai fa muniwara rya wakyar manggun faro gereja wer ḇa?

Roi ri kyor naisya. Gereja dakso ro fararur polotik. Gereja myam pastor ma snonggaku ḇyesi sasar sena ḇa. Ma, farkarkor ro agama Katolik isya yakara ima syasar. Rupa ra, kaku Manseren Allah byuk samamyai ḇekain fyoro-fyoro faro snonggaku sya fafisu simar kwar ke? Oso wer ido, Manseren Allah iwan ko fa konadi nabor kaku kuker koḇepake rosario ke? *

Inja, rosai wafruri?

Yakain yakanes bo yanadi fa yor farkankin. Yara yakowes Refo Katolik Jerusalem Bible fa yawasya na. Refo ine insape sisasyar babo na ro wos Italia. Mura ras oso, yaris sansun pastor ayeja rofyor Misa ya imnai, snon ri suru surama susrow aya ro seminari. Suyoḇe suma Saksi Yahwe suirya. Nggokain nggawos Refo ma nyan komam agama ḇekaku raris rosai Refo ikofen na. Nggawos rawo oras oser syadi.

Moḇsa mam rarama suḇena rai?

Yamanen su kukro fafisu suḇas mnuk-mnuk ḇero Refo Katolik, sumgak ḇa ma suḇas pyum na. Ḇarpur mura, Saksi oso wer ḇenir ḇe Mario dakrama dakmamfar aya. Ima kyabaḇ kaku ma imkuepen. Dares ya iba ke mekem ya dado ke, ras Sabtu oras siw ya, na ryama.

Pastor ḇesesya ido ryariso?

Yor si fa sakfarkor, imboi simewer sfarkor pyum Refo ya. Manggundaya ḇardi, yamarisen fafaya ḇa. Yafarkor roi ḇepyum nabor raris roi ḇefnai fa Manseren Allah myam monda kaker roi ḇeḇarḇor ma kandera na naisya. Roi nanema yakara na kawan kwar.

Ḇebukor ro Au sya sifnai Au fa wamnai wafarkor Refo ya ke?

Ro taun 1975, yara ker ḇe Roma fa yakofenḇair roi yakyar babo ine. Pastor ḇena nasan ḇekaki ro aya sor myaren ker aya fa yamnai. Imboi, roi sikofen na ndramuma ro Refo ya ḇa. Inja ro tanggal 9 paik Januari 1976, yafarem surat ḇe Roma ma yoḇe yamewer yaro Katolik wer. Ras ri suru mura, yasasyar ro seminari ma yek kereta fa yara yakso Saksi-Saksi Yahwe sya munara sarawrow sena. Yakandor monda ima munara ḇeba kukro ḇeyakso ro munara ine iso sidang jemaat ḇeḇeso. Roi yamam ro diwa na, nasnai ḇese kaku. Saksi sya oser-oser sna Refo ro manggunsi ma fafisu ḇeyun faya dap mnuk-mnuk ro Refo fa siwasya, sikame sḇas Refo sena.

Kina Bansya ido ryariso?

Ḇebor sya simarisen aya ḇa. Imboi, kasun yedi eḇe snon ya dakfarkor Refo kuker Saksi Yahwe ro Lombardy, ro bar wambrur sup Italia. Inja, yara ḇe sup anya ma Saksi ḇero moḇ anya sisewar pyan fararur ḇe aya ma moḇ fa yaḇarek. Taun anya kako sebaptis aya ḇe Saksi Yahwe.

Wafafko ke?

Oroḇa ḇeri! Yamam fafisu ine yafanam syadi faro Manseren Allah kukro yana fawawi ḇepyum ḇekur I roro farkarkor snonggaku ḇaido tradisi ro gereja ḇa boi Refo ya.