Nebʉrata bʉ warraraena kʼãrẽ berabaridata.

Mʉ̃ra tosida Italiade 1943de, mʉ̃ mebẽrãta mʉ̃mera daira pʉwʉrʉ zakede warisi. Mʉ̃ zezera oide trajabasi akʉza bakurude nekʼãrẽ obasi. Mʉ̃ zezeba mʉ̃ papaʉ̃meba daira dapʉẽsi religion katolikade.

¿Kʼãrẽa saserdote bʼaita krĩcha zesi?

Warrarainʉba mʉ̃ra wãkĩrãbasi ãyi bedʼeabarabʉ ũrĩne. Mʉ̃a ũrĩkĩrãbasi saserdote bedʼeara, kãgabasi ãya kʼãrẽ obʉra. Mamaʉ̃ba ʉ̃ta krĩcha zesi saserdote bʼaita. Mʉ̃ 13 poagabaside mʉ̃ papaba mʉ̃ra edesi awuru kolegioeda mamara estudiapanasi yi saserdote bakĩrãbʉta.

¿Bʉ maʉ̃ estudiabʉedara Daizeze Bedʼeara akʉbasika?

Mejãcha ẽ basi. Mʉ̃ 15 poagabʉde mama nejaradiabari abaʉba diasi mʉ̃aʼa libro aba, maʉ̃ librora Evangelios basi (mamara bedʼeabʉ Jesu bada ʉ̃rʉ), akʉda ʉ̃rʉ akʉsi mʉ̃a maʉ̃ra ewari biobayeda. Mʉ̃ 18 poagabaside wãsi unibersida Romanebemaena. Mama maʉ̃ unibersidara zokʼabasi papaba (katolikora buruba). Mama mʉ̃ra estudiasi latin bedʼeade, griego bedʼeade, istoria, filosofía, sicologia akʉza teologiata. Daiba domingode misa opananara ʉ̃kʉrʉ bersikulota dai krĩchaba jarapanasi akʉza ʉ̃kʉrʉta wiña nebʉrapanasi Daizeze Bedʼeadeba, mamina bia ũdukʼawuada ẽ basi Daizeze Bedʼeara.

¿Bʉa seminario mawũã zokʼabasidera bʉabida jaradiabasika?

Mʉ̃ trajora akʉibarabasi wuabemaraba bia omarẽã. Mamina edaʉde jaradiabasi naʉ̃ ʉ̃rʉ: Concilio Vaticano II.

¿Kʼãrẽa ĩjã ẽ wãsi bʉara iglesia bʉ bada ʉ̃rʉra?

Nekʼãrẽ ũbea kʼarea: ãyira eda politikade wãbasi, saserdoterata akʉza ẽbẽrarã mama wãbadarata ãya nekayirua obasimina kʼãrẽ ẽ kĩrãkʼa akʉpanasi, adewara ʉ̃kʉrʉ ãya jaradiabadara wãrĩnu ẽ basi. Bari jaraita, Daizezeba dayirãta kãgabʉbʉrʉ, ¿iyara sãwũã zokʼai tʉbʉeda wãmarẽã ẽbẽrarã beibʉrʉdera? ¿Wãrĩnu dayirãta Daizezeʉ̃me bedʼeakĩrãbʉbʉrʉ zokʼaibaraka rosariota akʉza iyabaʉ bedʼeata jaraibaraka? a

¿Maʉ̃ kʼarea bʉara kʼãrẽta oita krĩchasi?

Mʉ̃ra mejãcha jẽga yiwidʼisi Daizezeʼa kʼarebamarẽã. Mʉ̃a edasi Daizeze Bedʼea aba (Biblia de Jerusalén), maʉ̃ra ʉ̃ra ʉ̃tʉ zebisida italiano bedʼeade. Maʉ̃ta mʉ̃a le jʉ̃drʉsi. Domingo diapeda mʉ̃ misa oberabarida tẽã, yumakẽrãta ũme eda zesi mama. Ãya jarasi Jeowa ʉ̃rʉ Kʼawuabipanʉrãta, maʉ̃ne mʉ̃ra ãyibawara bedʼea jʉ̃drʉsi. Ũmadaʉ aba basi daira Daizeze Bedʼea ʉ̃rʉ bedʼeapanʉta akʉza bedʼeasi kʼãrẽta jarabʉta religion wãrĩnu ʉ̃rʉ.

¿Bʉara kʼãrẽta krĩchasi Jeowa ʉ̃rʉ Kʼawuabipanʉrã ʉ̃rʉ?

Mʉ̃ra mejãcha kĩrãmigasi ãya sãwũã soiduba jarabadadeba akʉza ãyara biʼia zokʼa kʼawuabasi testorata mʉ̃ Daizeze Bedʼeara katolika basimina. Maʉ̃ tẽã Jeowa ʉ̃rʉ Kʼawuabipanʉrã iyi trʉ̃ Marioba akʉ ze jʉ̃drʉsi mʉ̃ra. Iyara mejãcha jʉ̃ãbʉta ũdubisi akʉza iya mʉ̃ra sabadoza badua 9 diapeda akʉ jʉ̃ẽbasi, kue zenʉmʉta kue ze ẽãta.

¿Maʉ̃ kʼarea kʼãrẽta krĩchasi wuabemara saserdoterãra?

Mʉ̃a jarasi mʉ̃bawaraʉba Daizeze Bedʼeata akʉmarẽã, mamina ãya akʉ ẽ basi maʉ̃ra. Mʉ̃ara mejãcha kãga baera akʉ jʉ̃drʉsi. Nekʼãrẽ biata mejãcha kʼawua wãsi. Bari jaraita, mʉ̃a kʼawuasi kʼãrẽa Daizezebara iduaribibʉ zʉbʉriara. Mʉ̃ra maʉ̃ krĩchakibʉba mejãcha krĩcha zroma obasi.

¿Bʉara jarabarisidaka bʉ audre ʉ̃ta zokʼabʉbara Daizeze Bedʼea wua akʉ ẽ bamarẽãra?

1975de mʉ̃ra ewari bio jʉ̃ẽsi Romaena mʉ̃ nokʼora jaraita mʉ̃a Daizeze Bedʼea kʼawuanʉmʉ ʉ̃rʉ. Ãyara mʉ̃aʼa ũdubikĩrãbasi mʉ̃a kʼawuanʉmʉra añabʉta, mamina ãyara mʉ̃ara ũdubida ẽ basi Daizeze Bedʼeara. Maʉ̃ audre ẽãne 9 enero 1976de Romaena zokʼa bʉesi kartata, mama mʉ̃a bʉsi mʉ̃ra wua katoliko bakĩrã ẽãta. Maʉ̃ ewari ũmene mʉ̃ra wãsi mamaʉ̃bara. Mʉ̃ra jipa jʉ̃ẽkabasi ãba yi jʉrebari Jeowa ʉ̃rʉ Kʼawuabipanʉrãinʉra, mamina maʉ̃ne jʉ̃ẽsi asambleaeda. Mamara mejãcha basi ãyirata. Jipa jõma awuarabasi akʉza ãyi aba abakaʉba erbasi Daizeze Bedʼeara. Adewara yi ẽbẽra ʉ̃tʉba eda bedʼeanʉmʉba testo jarabʉrʉdera jõmaʉ̃ba jʉrʉpanasi.

¿Bʉa mawũã oda kʼareara bʉ mebẽrãbara sãwũã akʉsi maʉ̃ra?

Mʉ̃ mebẽrãnebema ʉ̃kʉrʉra kĩrʉsida. Mawũãsidu mʉ̃a ũrĩsi mʉ̃ mebẽãrata, Daizeze Bedʼea kʼawuanʉmasita Jeowa ʉ̃rʉ Kʼawuabipanʉrãbawara, iyira Lombardía pʉwʉrʉdebasi. Maʉ̃ne wãsi mʉ̃ra mʉ̃ mebẽã akʉde. Mama Jeowa ʉ̃rʉ Kʼawuabipanʉrãba kʼarebasida trajo ũduita akʉza sama bʼaita. Maʉ̃ poagade mʉ̃ra Jeowa ʉ̃rʉ Kʼawuabipanʉrãbasi.

¿Bʉa kʼãwũã odadebara edaʉde krĩchabarika ãĩbe osita?

Mawũã krĩchaka. Awuarabʉrʉ mʉ̃ra audre sentibʉ Daizeze kʼawabʉta. Mʉ̃ara kʼawuabʉrʉ baera iyi ʉ̃rʉ Daizeze Bedʼeaba jarabʉtrʉ, mawũã katolikoba jarabʉtrʉ kʼawuabʉrʉ ẽ. Mʉ̃a idibʉrʉ ẽbẽrarã wãrĩnuta jaraseabʉ, wãrĩnuta kʼawuasi baera.