Mani oi maragi negana ena sivarai oi gwauraia.

Lau be 1943 Italy ai lau vara. Lau be egu kakadia bona tadidia ida hanua maragina ta dekenai ai tubu daekau, egu tamana be fama bona kapenta tauna. Emai tama sina ese ai idia hadibaia Catholic tomadiho dalana ai badinaia totona.

Dahaka dainai oi ura pris tauna ai oi lao?

Lau mero maragi neganai dubu ai pris edia hereva lau ura henia. Edia hereva idia gwauraia daladia ese egu lalona ia veria. Unai dainai egu lalona lau hadaia pris ai lau lao totona. Lau be 13 neganai, egu sinana ese boarding sikuli ta dekenai lau ia atoa, unai sikuli ai memero matamatadia idia hadibaia idia stadi goada pris ai idia lao totona.

Emu treinini ai Baibel stadi oi karaia danu, a?

Lasi. Lau be 15 neganai, egu tisa ta ese lau dekenai Evanelia Bukadia ta ia henia—Iesu ena mauri bona ena haroro dalana ia herevalaia—bona unai buka lau duahia loulou. Lau be 18 neganai, Rome dekenai lau lao pontifical university ai lau stadi totona, unai sikuli be pope ese ia gunalaia. Lau be Latin, Greek, history, philosophy, psychology, bona theology lau stadilaia. Ena be Baibel ena siri haida ai herevalaia bona Sunday ai Baibel idia duahia bona ai kamonai, to Baibel ai stadilaia lasi.

Rector eiava gunalaia tauna ai oi lao neganai, hadibaia gaukara oi karaia danu, a?

Nega momo lau be admin gaukara lau karaia. To klas haida dekenai hadibaia gaukara lau karaia Second Vatican Council ena hakaua dalana henunai.

Dahaka dainai dubu oi daradaralaia matamaia?

Gaudia toi ese lau dekenai daradara ia havaraia. Tomadiho be politikol karadia lalonai idia vareai. Dubu idia lao taudia bona edia gunalaia taudia edia kara be Baibel ena taravatu hegeregerena lasi. Bona Catholic edia hadibaia herevadia haida be maoro lasi. Hegeregere, edena dala ai lalokau Diravana be idia mase taudia do ia panisia hanaihanai? Danu, momokani Dirava ia ura ageva amo guriguri ita gwauraia loulou, a? a

Dahaka oi karaia?

Mai mata ranu ida heduru totona lau guriguri. Danu Catholic Jerusalem Bible ta lau hoia bona duahia matamaia, ia be Italy gado ai idia halasia. Bena Sunday daba ta ai, Mass murinai egu dabua lau tauadae lalonai, tau rua be sikuli gabuna (seminary) dekenai idia mai. Idia ruaosi idia gwau, idia be Iehova ena Witnes taudia. Hora ta mai kahana lalonai Baibel, bona tomadiho momokani ena toana ai herevalaia.

Oi idia vadivadi henia taudia dekenai dahaka oi laloa?

Idia abia dae gaudia lau ura henia bona lau moale, badina egu Catholic Baibel amo lau idia durua siri lau duahia totona. Gabeai, Witnes ma ta ladana, Mario ese lau ia vadivadi henia. Saturday daba ibounai, ena be medu ia diho eiava dina ia siahu, to ia be mai haheauka ida 9 o’clock do ia mai bona iduara ai ia pidipidi.

Unai tadikaka ia vadivadi dainai pris ma haida be dahaka idia laloa?

Idia lau invait stadi lalonai idia helai vareai totona, to idia ta ese Baibel stadilaia karana ia laloa bada lasi. To lau be unai lau moalelaia bada. Badina gau namodia lau dibaia, hegeregere dahaka dainai Dirava ese kara dika ia koua lasi—nega daudau lalonai unai topik dekenai lau daradara.

Emu bosi ese oi idia koua toho Baibel oi stadilaia lasi totona, a?

Lagani 1975 ai, nega rua o toi bamona Rome dekenai lau lao, egu lalohadai lau gwauraia hedinarai totona. Egu bosi taudia idia ura egu lalona idia haidaua, to idia ta ese Baibel ia gaukaralaia lasi. Bona lagani 1976 January 9 ai, Rome lau tore henia bona idia lau hadibaia lau be Catholic tauna ta lasi. Dina rua murinai, sikuli gabuna lau rakatania bona train lau abia bena Iehova ena Witnes taudia edia hebou dekenai lau lao, to unai be hebouhebou negana ta bona kongrigeisen momo idia lao. Gau ibounai be idau momokani egu dubu gunana amo! Witnes ta ta be mai edia Baibel bona tok henia taudia be topik idauidau idia herevalaia neganai, edia Baibel amo idia badinaia.

Emu famili be dahaka idia laloa?

Idia momo ese lau idia dagedage henia. To gabeai lau davaria, egu tadina mero be Italy ena not kahanai ia noho hanua Lombardy ai, Witnes taudia ida ia stadi. Ia lau vadivadi henia, bona unuseniai Witnes taudia ese lau idia durua moni gaukara bona noho gabuna ta lau abia totona. Unai lagani murinai, lau bapatiso bona Iehova ena Witnes tauna ta ai lau lao.

Unai oi karaia dainai, oi lalohisihisi, a?

Lasi momokani! Hari lau mamia lau be Dirava kahirakahira lau noho, badina Baibel amo ia lau dibaia, to taunimanima edia aonega eiava tomadiho edia hahediba herevadia amo lasi. Bona mai abidadama bona goada ida ma haida lau hadibaia diba.