¿Jant’ini’ jats a ejatal tam ti tsakamej?

In wa’tsin ti al an támub 1943 ti Italia. U epchalchik ani naná’ u yejey al jun i tsakam kwenchal. U papá in t’ojonchalak an tsabál ani pelak i dhakum te’. Ma tu tsakamtal u papá ani u mamá tu exóbchij k’al an religión católica.

¿Jale’ ta takuy ka t’aja’ tit sacerdote?

Tam tin tsakamej u lej kulbetnalak kin k’alej ti misa abal ku ats’a’ an sacerdote. U lej kulbetnalak jant’in tu kaw ani u lej jik’palak jawa’ in t’ajál. Ani jaxtám u le’na’ ku t’aja’ tin sacerdote. Tam tu kwa’alak 13 i támub, u mamá tin ne’dha’ al jun i atáj ju’táj tu ko’oyabak yan i tsakam abal ka exóbchin abal kin bajuwchik ti sacerdotes.

Tam tit k’wajatak taná’, ¿a exóbna’ an Biblia?

Lej we’. Tam ti u kwa’alak 15 i támub, jun i exóbchix tin pidha’ jun i libro ju’táj ti talak an Evangelios —in ejatal a Jesús⁠— ani wilk’idh u ajiy. Tam ti u kwa’alak 18 i támub in k’alej ti k’wajíl ti Roma abal kin exobláts ti universidades axi in ok’nál an papa. Taná’ in exóbchat latín, griego, historia, filosofía, psicología ani teología. Belits abal i olnál ani i ats’ál talchik i pejach ban Biblia al an k’icháj domingo, ban misa, yab i exobnalak an Biblia.

Tam tit uchbiyat ka ok’na’ an seminario, ¿jayej pelak it exóbchix?

U t’ojlábil pelak ku ok’na’ an t’ojlábchik axi taná’ u t’ajnalak, pero jayej u bína’ i exobchixtaláb tin kwéntaj an decretos k’al an Concilio Vaticano II.

¿Jant’oj ti tólmiy ka tsalpay abal yab tekedh jawa’ k’wajatak in t’ajál?

Wa’ats ox jant’oj: k’a’ál pelak abal an iglesia u otselak k’al an política, an tsabchíl pel abal yabak in boliyal an sacerdotes ani an atiklábchik tam in t’ajál i kidháb t’ajbiláb, ani oxchíl, an exobchixtaláb axi jajá’chik in binalak u exbayalak abal yab tekedh. Jun i t’iplab, ¿jale’ tin ulalakchik abal a Dios tu k’anidhál max tam ku tsemets ne’ets kin t’aja’ abal ki yajchikna’? ¿Ani max tam ki olonchij a Dios in le’ ki eyendha’ jayetsej an kaw? *

¿Jant’oj a tsalpay ka t’aja’?

U uk’inchij a Dios abal ti kin tólmiy, u ts’a’iy jun i Biblia de Jerusalén, axi ítej ti kaldhámej ti italiano, ani u tujchij ku ajiy. Jun i domingo dhajuw, talbél tu binamalak an misa, ulits tsab i inik. Tin ucha’chik abal pelak i ólchix k’al a Jehová ani u k’wajiy tu t’ilom wat’adh jun i hora tin kwéntaj an Biblia ani an k’ak’naxtaláb axi chubax.

¿Jant’oj a kulbetna’ k’al jawa’ in t’aja’ an ólchixchik k’al a Jehová?

U lej kulbetna’ kom in lej belalak jawa’ tin olchij ani abal in eyendhalak an Biblia católica abal ti kin exóbchij. Ani jun i ólchix, in bij Mario, in aynanchij ti kin tsa’biy. Ets’ey tin ko’onchij i k’aya’taláb, belits max u ulelak an ab yab in palk’anchij ti kin tsa’biy, patal an sábados, al an 9 al dhajuw taná’ k’wajatak.

¿Jant’oj in ulalak axi k’e’at an sacerdotes tin kwéntaj kit tsa’biyat?

U kaniy jayej abal ti exóbal, pero yab jita’ in le’na’. Pero naná’ u lej kulbetnalak tin exóbal. U exobnalak yan jant’oj axi lej k’ijidh. U exóbna’ jale’ ti a Jehová in jilál ki yajchikna’, kom nixé’ yab u exbayalak jale’ tu wat’el.

¿It uchan k’al jita’ ti ok’nalak ka jila’ ta exóbal k’al an Biblia?

Ti 1975 in k’alej yaníl ti Roma abal ku olna’ jant’oj exomak u exobnál tin kwéntaj an Biblia. Yan k’al jajá’ tin ucha’ abal ku jila’ tin exóbal k’al an Biblia, pero yab in eyendhalak an Biblia abal ti kin exóbchij. Ti al an 9 a enero ti 1976, u dhucha’ jun i carta abal ku ucha’ abal yabáts ne’ets ku tólmiy k’al nixé’ xi belomtaláb axi yab chubax. Tsab a k’icháj talbél, u jila’ an seminario ani in k’alej ti tamkuntaláb k’al an ólchixchik k’al a Jehová. Pelak jun i pulik tamkuntaláb ju’taj ti wa’atsak yan i atiklábchik. ¡Lej k’ijidhak! Patal an atiklábchik in kwa’alak jun i Biblia ani in aliyalak an textos axi u olnáb.

¿In kulbetna’ a yanél jawa’ a takuy ka t’aja’?

Lej tsakuychik. Pero, u exla’ abal jun u epchal exomak ti exóbal jayej k’al an ólchixchik k’al a Jehová ti kwenchal Lombardía, ti norte de Italia. In k’alej ku tsa’biy, ani an epchalchik xi taná’ tin tólmiy ku aliy jun i t’ojláb ani jun i atáj abal kin k’wajiy. Al nixé’ xi tamub u t’aja’ tin ólchix k’al a Jehová.

¿Wa’ats jant’oj axi a yajnál kom a jila’?

¡Imbáj! Xowé’ u ats’ál más in utat k’al a Dios, kom u exlanchamal in ey a Jehová k’al jawa’ in ulal an Biblia ani yab k’al jawa’ in exobnál an belomtaláb axi yab chubax. Xowé’ u éjtowal ku exóbchij an atiklábchik k’al an chubaxtaláb.