Favor, konta-nu modi ki bu kriadu.

N nase na Itália na 1943. Ami, nhas irmon i nhas irman, nu kria na un zóna pikinoti undi nha pai éra agrikultor i karpinteru. Nos pai ku nos mai kria-nu pa nu ser bons katóliku.

Pamodi ki bu disidi ser padri?

Kantu mi éra pikinoti, N ta gostaba txeu di obi kes padri na igreja. N gostaba txeu di ses vós i N ta fikaba dimiradu ku kes serimónia ki es ta fazeba. Pur isu N krê biraba padri. Kantu N tinha 13 anu, nha mai matrikula-m na un internatu ki ta priparaba rapazinhus pa studa pa más tardi ser padri.

Na nhos priparason, nhos ta studaba Bíblia?

Nen sénpri. Kantu N tinha 15 anu, un di nhas profesor da-m un kópia di ivanjélhus ki ta kontaba stória di vida i di pregason di Jizus. N lé kel livru txeu bês. Kantu N tinha 18 anu, N ba pa Roma studa na três universidadi, ki é papa ki ta manda na es. N studa latin, gregu, stória, filozofia, pisikolojia i teolojia. Nu ta ripitiba versíklus di Bíblia ki nu tinha dikoradu i nu ta obiba leitura di Bíblia na kes misa di dumingu, má nu ka ta studaba Bíblia.

Na kel ténpu bo éra responsável di un simináriu. Tanbê bu ta inxinaba?

Nha trabadju éra más na adiministrason. Má N ta daba aula sobri kes lei di Segundo Concílio do Vaticano.

Pamodi ki bu kumesa ta ten dúvidas sobri igreja?

Tinha três kuza ki ta inkomodaba mi. Igrejas staba nvolvidu na pulítika. El ta permitiba konportamentu mariadu entri xéfi di igreja i kes algen ki ta baba pa igreja. Ta parse ma alguns kuza ki katóliku ta inxinaba ka staba dretu. Pur izénplu, pamodi ki un Deus di amor ta kastigaba pa tudu ténpu un algen ki dja móre? Deus krê pa nu uza un rosadi ô un térsu na orason i pa nu ripiti orason un monti bês? *

Kuzê ki bu disidi faze?

Ku láguas ta kore-m na róstu, N pidi Deus pa orienta-m. Tanbê N kunpra un Bíblia katóliku ki lansadu kes ténpu na italianu, ki éra Bíblia di Jerusalem, i N kumesa ta lé-l. Na un dumingu di palmanhan, dipôs di misa, kantu N staba ta prinda nha ropa, dôs ómi txiga na simináriu. Es fla-m ma es éra Tistimunhas di Jeová. Nu pasa más di un óra ta pâpia sobri Bíblia i sobri modi  ki nu ta sabe kal ki é relijion verdaderu.

Kuzê ki bu atxa di kes Tistimunha di Jeová?

N fika spantadu ku kel kunfiansa ki es tinha i modi ki pa es éra fásil uzaba Bíblia katóliku. Un ténpu dipôs, un Tistimunha di Jeová ki txomaba Mario, fika ta ben vizita-m. El tinha txeu paxénxa i el éra un algen di palavra. Tudu sábadu, 9 óra di palmanhan, ku txuba ô ku sól, el ta tokaba kanpaínha di simináriu.

Kuzê ki kes otu padri atxa di kel-li?

N ta konvidaba es pa es kunpanha nos konbérsu, má ninhun di es ka ta lebaba studu di Bíblia asériu. Má ami, N ta gostaba txeu di kes studu pamodi N staba ta prende kuzas interesanti. Pur izénplu, N prende pamodi ki Deus ta dexa maldadi ku sufrimentu kontise. Kel-li é un kuza ki dja tinha txeu ténpu ki ta dexaba mi konfuzu.

Kes algen ki tinha más kargu di ki bo tenta pô-u para di studa Bíblia?

Na 1975, N ba pa Roma un monti bês pa N ba splika-s kuzê ki N staba ta prende. Es tenta muda nha manera di pensa, má ninhun di es ka uza Bíblia. Ti ki enfin, na dia 9 di janeru di 1976, N skrebe pa Roma ta fla-s ma N ka krê sérba katóliku más. Dôs dia dipôs, N bandona simináriu i N panha un konboiu pa ba sisti nha primeru runion ku Tistimunhas di Jeová, ki éra un asenbleia undi tinha Tistimunhas di Jeová di txeu kongregason. Tudu kuza éra diferenti di kel ki N staba kustumadu! Kada algen tinha un Bíblia i es ta uzaba el pa kunpanha diskursus ki ta papiaba di asuntus diferenti.

Kuzê ki bu família atxa di bu disizon?

Maioria fika kóntra mi. Má, N da kónta ma un di nhas irmon staba ta studa Bíblia ku Tistimunhas di Jeová na Lonbardia, un zóna ki ta fika na nórti di Itália. N ba vizita-l i kes Tistimunha di Jeová di la djuda-m atxa un trabadju i un lugar pa N mora. Más tardi, na kel anu, N batizadu kómu Tistimunha di Jeová.

Bu rapende di disizon ki bu toma?

N ka rapende di nada! Gósi N ta xinti ma N ten un amizadi di verdadi ku Deus, pamodi kel ki N sabe sobri el ten bazi na Bíblia i nau na filozofias ô na tradisons di igreja. I N ta konsigi inxina otus ku kunfiansa i sinseridadi.