Олған тузыңнаңар чоохтап пиріңер.

Мин 1943 чылда Италияда тӧреем. Піс кічиҷек аалда чуртаабыс. Минің пабам фермер паза плотник полған. Пісті, олғаннарны, іҷе-пабабыс католиктер киртінізіне ӱгреткеннер.

Ноға сірер абыс поларға хын сыххазар?

Мин кічігдең сығара тигірибде абыстарның проповедьтерін истерге хынҷаң полғам. Оларның ӧтіг ӱннеріне паза тигірибнің кибірлеріне уғаа хынҷаң полғам. Аннаңар мин абыс поларға сағын сыххам. Мағаа 13 час тол парғанда, іҷем мині школа-интернатха пирібіскен. Анда оолахтарны абыс поларға тимнепчеткен тирең ӱгредіге тимнееннер.

Анда сірер Библияны ӱгренгезер бе?

Сынында ӱгренмеебіс. Мағаа 15 час полғанда, пір ӱгретчі Евангелиелер пирген. Анда Иисустың чуртазынаңар паза нымысчыланызынаңар пазылча. Мин оларны нинҷе-де хати хығырыбысхам. 18 частығда мин Римзер парғам. Анда мин ӱс папскай университетте — папа устапчатхан ӱгредіг тураларында — ӱгренгем. Анда мин богословиені, историяны, философияны, психологияны, ідӧк латинскай паза греческай тіллерні ӱгренгем. Піс Библияның стихтарын наизусть пілҷең полғабыс паза позырахтағы проповедьтер тузында Библия хығырчатханнарын исчең полғабыс. Че сынында піс Библияны ӱгренмеебіс.

Ректор полған туста сірер ӱгреткезер бе?

Кӧбізін мин устағ тоғызын апарғам. Че андағ даа полза, Ікінҷі Ватиканскай соборның декреттеріне ӱгретчең полғам.

Ноға сірер постарыңның религияңарда ікінҷілеп сыххазар?

Мағаа истіг чуртирға ӱс сурығ пирбеен. Пастағызын, тигіриб политикаа ара кірче. Ікінҷізін, тигіриб абыстарның паза тигірибзер чӧрчеткеннернің аразындағы сайбах тудынысха хайбинча. Ӱзінҷізін, католическай религияның пірее ӱгредіглері мағаа саба пілдіргеннер. Кӧзідімге: хыныстығ Худай кізіні, ӧлген соонда, мӧгі тус иреелир бе? Алай, четкаларны холда тудып, пазырысты чӱзер хати чоохтанарын Худай киректепче бе? *

Сірер ниме иткезер?

Хайди поларға чол кӧзіт пирзін тіп, Худайдаң ылғап ала сурынғам. Паза мин итальянскай тілнең наа ла сығарылған католическай «Иерусалимскай Библия» алып алып, аны хығыр сыххам. Пірсінде иртен, позырахтағы месса ирт парған соонда, абыс кип-азағын ілчеткемде, семинариязар ікі ирен кір килген. Олар піс Иегованың киречілерібіс тееннер. Мин оларнаң пір час азыра Библиядаңар паза сын религияны кӧзітчеткен нимелердеңер чоохтасхам.

Ол кізілер сірерге хайдағ кізілер тіп пілдір парған?

Оларның ікінҷілебин чоохтанчатханнары паза католическай Библияны чахсы пілчеткеннері уғаа хайхастығ пілдірген. Соонаң минзер пасха Киречі кил сыххан. Аның ады Марио полған. Ол тыстаныстығ паза киртістіг кізі полған: суббота сай, наңмырлығ даа, айас таа кӱн полза, ол минзер, семинариязар 9 час иртен килҷең.

Пасха абыстар ол тоғазығларға хайди хайҷаңнар?

Мин оларны миннең хада Библияны ӱзӱрерге хығырҷаң полғам. Че оларның пірдеезі Библия ӱгренерін аарлыға санабаан. Мин, тізең, аны ӱгренерге хынғам. Мағаа хаҷаннаң истіг чуртирға пирбинчеткен сурығларыма хайхастығ нандырығлар таап алғам. Кӧзідімге, ноға Худай чабал киректерні паза иреелерні чох итпинче?

Сірердең пӧзік турчатхан абыстар сірерге Библия ӱгренмеске чоохтабааннар ба?

1975 чылда мин, позымның кӧрістерімні чарыда чоохтап пирер ӱчӱн, Римзер нинҷе-де хати чӧргем. Пӧзік турчатхан абыстар минің саба киртінчеткенімні кӧзіт пирерге хынғаннар, че оларның пірдеезі постарының сӧстерін Библияда тӧстебееннер. Аннаңар мин 9 январьда 1976 чылда Римзер позымны паза католикке санабинчам тіп пічік ызыбысхам. Ікі кӱн пазынаң мин, семинарияны артыс салып, поезднең Иегованың киречілерінің чыылиина пастағызын на парғам. Ол Иегованың киречілерінің конгрезі полтыр, нинҷе-де ӧме чыылыс партыр. Оларны кӧрерге мағаа пасхаҷыл полған. Полған на Киречінің позының Библиязы полған. Чоох чоохтапчатхан кізілер аймах-пасха темалар ӱзӱргеннер, прайлары, тізең, оларның соонҷа Библияларын ас турғаннар.

Сӧбіреңер иткен алызығларыңа хайди хайған?

Минің сӧбіремде кӧбізі мағаа тоғырлан сыххан. Че мин Италияның алтынзархы саринда, Ломбардияда чуртапчатхан харындазым Иегованың киречілерінің Библия ӱгренчеткенін ис салғам. Мин андар ааллап парғам. Андағы Киречілер мағаа тоғыс паза чуртаҷаң орын таап пиргеннер. Соонаң, олох чылда, мин, кіреске тӱзіп алып, Иегованың киречізі пол парғам.

Ол пӧгіннер ӱчӱн ачырғанчазар ба?

Пір дее ачырғанминчам. Минің пілістерім философияда паза тигірибнің кибірлерінде нимес, че Библияда тӧстелчелер. Аннаңар мин Худайға сынап чағын полып алғам. Ам мин кізілерні арығ чӱрекнең, пір дее ікінҷілебин, ӱгретчем.