Duya tɛl wi bɔt we yu bin smɔl.

A bɔn na Itali insay 1943. A mɛn wit mi brɔda ɛn sista dɛn na wan smɔl vilej usay mi papa na bin fama ɛn kapɛnta. Wi mama ɛn papa mɛn wi fɔ bi gud Katolik dɛn.

Wetin mek yu bin want fɔ bi prist?

We mi na bin smɔl bɔbɔ, a bin lɛk fɔ lisin to di prist dɛn na chɔch. A bin de kɔle dɛn vɔys dɛn, wit dɛn fayn program /sɛrimoni dɛn. So a bin rili want fɔ bi prist. We a bin ol 13 ia, mi mama bin put mi na bɔda usay dɛn de tren bɔbɔ dɛn fɔ no mɔ bɔt aw fɔ bi prist tumara bambay.

Una bin de stɔdi di Baybul pan una trenin?

Nɔ-o. We a bin ol 15 ia, wan pan mi ticha dɛn bin gi mi wan buk bɔt di Gɔspɛl dɛn, dat na, stori dɛn bɔt Jizɔs in layf ɛn prichin wok, ɛn a bin rid di buk bɔku bɔku tɛm. We a bin ol 18 ia, a bin go na Rom fɔ stɔdi na di Katolik yunivasiti dɛn, we di pop de kɔntrol/oba/ed. A bin stɔdi bɔt Gɔd, mɔtalman sɛns, di we aw mɔtalman de tink ɛn biev, Latin, Grik, ɛn istri. Pan ɔl we wi bin sabi vas dɛn frɔm di Baybul, ɛn lisin we dɛn de rid di Baybul we dɛn kin prich Sɔnde, wi nɔ bin rili de stɔdi di Baybul.

Yu wok as prist we bin de in chaj bin gɛt sɔntin fɔ du wit fɔ tich?

Mi men wok we a bin gɛt na fɔ ɔganayz. Bɔt a bin de tich na klas dɛn bɔt tin dɛn we di Sɛkɔn Vatikan Kansul dɔn disayd.

Wetin mek yu bigin fɔ dawt di chɔch?

Tri tin dɛn bin de mɔna mi. Di chɔch bin de put an pan pɔlitiks. Dɛn bin gri wit di bad we aw di bigman dɛn na di chɔch ɛn chɔch mɛmba dɛn bin de biev. Ɛn sɔm Katolik tichin dɛn nɔ bin luk kɔrɛkt. Fɔ ɛgzampul, aw Gɔd we gɛt lɔv go pɔnish pipul dɛn sote go afta we dɛn dɔn day? Dɔn bak, fɔ se Gɔd rili want wi fɔ ripit wi prea dɛn bɔku bɔku tɛm wit rozri? *

Wetin yu bin du?

Wata bin de rɔn mi yay as a bin de pre to Gɔd fɔ lɛ i gayd mi. A bin bay bak wan Katolik Jerusɛlɛm Baybul, we in nɔ tu te yet we dɛn rayt am insay di Italian langwej, ɛn bigin fɔ rid am. Dɔn, wan Sɔnde mɔnin as a bin de ɛng mi lɔng klos afta savis, tu man dɛn bin kam na di kɔlɛj. Dɛn tɛl mi se dɛn na Jiova Witnɛs dɛn. Wi bin tɔk pas wan awa bɔt di Baybul ɛn wetin i se bɔt aw wi go no di tru rilijɔn.

Wetin yu bin tink bɔt di wan dɛn we bin kam fɛn yu?

A bin de kɔle dɛn fet ɛn di we aw dɛn bin de rid skripchɔ dɛn na di Katolik Baybul izi wan. Leta, wan ɔda Witnɛs we nem Mario bigin fɔ kam fɛn mi. I bin peshɛnt ɛn fetful. Ɛvri Satide mɔnin ilɛk aw di wɛda tan, i kin nak di kɔlɛj domɔt bay nayn oklɔk.

Wetin di ɔda prist dɛn bin tink bɔt di fɛn we dɛn de kam fɛn yu?

A bin invayt dɛn fɔ jɔyn mi pan mi stɔdi, bɔt dɛn nɔn nɔ bin tek di Baybul stɔdi siriɔs. As fɔ mi, a bin de ɛnjɔy am. A bin de lan wɔndaful tin dɛn, lɛk wetin mek Gɔd de alaw bad tin dɛn ɛn tin dɛn we de mek wi sɔfa fɔ de apin, ɛn dat na sɔntin we bin dɔn de mɔna mi fɔ lɔng tɛm.

Di wan dɛn we de oba yu bin tray fɔ mek yu stɔp fɔ stɔdi di Baybul?

Insay 1975, a bin go na Rom bɔku tɛm fɔ ɛksplen wetin a biliv. Di wan dɛn we bin de oba mi bin tray fɔ chenj di we aw a de tink, bɔt dɛn nɔn nɔ bin yuz di Baybul. Faynali, insay Janwari 9, 1976, a bin rayt lɛta ɛn sɛn am na Rom se mi nɔto Katolik igen. Tu dez leta, a bin lɛf di kɔlɛj ɛn tek tren fɔ atɛnd mi fɔs mitin wit Jiova Witnɛs dɛn, we na bin asɛmbli wit bɔku kɔngrigeshɔn dɛn. Ɔltin bin rili difrɛn frɔm wetin a bin yus to! Ɔlman we na Witnɛs bin gɛt Baybul, ɛn dɛn bin de pe atɛnshɔn we di spika dɛn bin de tɔk bɔt difrɛn tɔpik dɛn.

Wetin yu famili bin tink bɔt dis?

Bɔku pan dɛn bin de agens mi. Bɔt a bin kam fɔ no se wan pan mi brɔda dɛn de stɔdi wit di Witnɛs dɛn na Lɔmbadi, we na wan say na di nɔt pat na Itali. A bin go fɛn am ɛn di witnɛs dɛn we de de bin ɛp mi fɔ fɛn wok ɛn say fɔ de. Leta da ia de, a bin baptayz as wan pan Jiova Witnɛs dɛn.

Ɛnitin de we yu rigrɛt?

A nɔ gɛt wan rigrɛt! Faynali, a fil lɛk a rili de nia Gɔd, bikɔs wetin a no bɔt am kɔmɔt frɔm di Baybul, nɔto mɔtalman sɛns ɔ chɔch tradishɔn. Ɛn a kin sho se a biliv ɛn de du tin wit ɔl mi at we a de tich ɔda pipul dɛn.