Qʼamantza qeye tzeʼn jaw chʼiya.

In nul itzʼje toj tnam Italia toj abʼqʼi 1943 ex in jaw chʼiye kyukʼil wermane toj jun tal tnam. In naqʼunantoq nmane tiʼj txʼotxʼ ex te carpintero. Católico nmane ex ntxuʼye.

¿Tiquʼn kubʼ t-ximana tuʼn toka te pal?

Tej kʼwalx qine, ngantoqe tuʼn tok nbʼine pal aj tetz tqʼoʼn xnaqʼtzbʼil. Ngantoqe tuʼn tok nbʼiʼne tqʼajqʼajel twiʼ ex qe tiʼchaq in che bʼanttoq tuʼn, tuʼntzunju, kubʼ nximane tuʼn woke te pal. Tej qʼiʼntoq 13 abʼqʼi wuʼne, in xi qʼiʼne tuʼn ntxuʼye toj jun tja xnaqʼtzbʼil jatumel in tzaj qʼoʼn xnaqʼtzbʼil kye kʼwal kyaj tuʼn kyok te pal.

¿Xnaqʼtzana tiʼj Tyol Dios tej ttzaj qʼoʼn xnaqʼtzbʼil teya toj Universidad?

Mintiʼxix. Tej qʼiʼntoq 15 abʼqʼi wuʼne, tzaj tqʼoʼn jun aj xnaqʼtzal jun libro weye kyiʼj uʼj in che yolin tiʼj tanqʼibʼil Jesús ex jaw wuʼjine nimku maj. Tej in japune twiʼ 18 abʼqʼi, in xiʼye anqʼil toj tnam Roma tuʼntzun nxiʼye kyoj universidad jatumel in netz kyxnaqʼtzbʼil pal, aʼyeju ateʼtoq tjaqʼ tkawbʼil papa. Kyoj universidad lu in xnaqʼtzane tiʼj yol latín ex griego. Ax ikx, in xnaqʼtzane tiʼjju bʼaj toj ambʼil ojtxe, tiʼj filosofía, psicología ex tiʼj teología. Maske ojtzqiʼntoq junjun taqikʼ Tyol Dios quʼne ex ok qbʼiʼne tej kyjaw uʼjin toj misa kyoj qʼij domingo, mintiʼ kubʼ qxnaqʼtzaʼne.

Tej tonina tiʼj seminario, ¿ax ikx xi tqʼoʼna xnaqʼtzbʼil?

Tej wonine tiʼj seminario mas in nonine tuʼn tbʼaj nukʼet aqʼuntl, noqtzun tuʼnj, ax ikx xi nqʼoʼne xnaqʼtzbʼil kyiʼj decreto del Concilio Vaticano II.

¿Tiquʼn ya mintiʼ ok qeʼ tkʼuʼja tiʼj Iglesia Católica?

Ya mintiʼ ok qeʼ nkʼuʼje tiʼj tuʼn tpaj oxe tiʼ. Tnejel, tuʼnju in che onintoq kyiʼj aj kawil. Tkabʼin, tuʼnju mintiʼ in xi kyqʼamaʼn jun tiʼ kye pal nix kye xjal nya bʼaʼn kymod. Ex toxin, tuʼnju el nnikʼe tiʼj qa nya toj ttxolil taʼ junjun kyxnaqʼtzbʼil. Jun techel, qa at tkʼujlalil Dios, ¿tiquʼn jaku kubʼ tqʼoʼn tkastiw jun xjal te jumajx aj tkyim? Ex ¿tajpe Dios tuʼn kukx tajbʼen jun rosario quʼn ex tuʼn t-xi qqʼamaʼn aʼyex yol toj qnaʼj Dios? *

¿Tiʼ kubʼ t-ximana tuʼn tbʼant tuʼna?

In kubʼsane twitz Dios tuʼn tonin wiʼje. Tzaj nlaqʼoʼne jun Biblia de Jerusalén, aju tzmatoq in netz toj yol italiano ex xi tzyet tuʼn wuʼjine tiʼj. Toj jun prim te qʼij domingo, akux in xi nkʼuʼne nxbʼalune ajbʼen toj misa, pon kabʼe xinaq toj seminario. Tzaj kyqʼamaʼn weye qa testigo de Jehová qe ex in nok tene yolil kyukʼil. Mas te jun or in yoline kyukʼil tiʼj Tyol Dios ex tiʼjju in tzaj tqʼamaʼn tiʼj okslabʼil axix tok.

¿Tiʼ kymod testigo de Jehová bʼaʼn ela toj twitza?

In jaw labʼine kyiʼj tuʼnju e yolin tukʼil tzalajbʼil ex tukʼil tkyaqil kykʼuʼj kyiʼj texto jaw kyuʼjin toj jun Biblia católica. Tej tikʼ chʼintl ambʼil xi tzyet tuʼn tpon Mario visitaril weye, jun testigo de Jehová. Ten nim tpasens wiʼje tuʼnju tkyaqil sábado pon visitaril weye a las nueve te prim, maske attoq jbʼal.

¿Tiʼ tzaj kyqʼamaʼn pal teya tej tok kykeʼyin in che visitarin Testigo teya?

Xi nqʼamaʼne kye tuʼn kyten qukʼile, pero ni jun kye ok tqʼoʼn toklen xnaqʼtzbʼil tiʼj Tyol Dios, atzun weye ngantoqe. El nnikʼe kyiʼj tbʼanel xnaqʼtzbʼil. Jun techel, el nnikʼe tiʼj tiquʼn in tzajtoq tqʼoʼn Dios ambʼil te yajbʼil ex te nya bʼaʼn, atzun jlu wajtoqe tuʼn tel nnikʼe tiʼj.

¿Tzaj kyqʼamaʼn qe nejenel te okslabʼil teya tuʼn ya miʼn t-xnaqʼtzana kyukʼil Testigo?

Toj 1975, in xiʼye nimku maj toj tnam Roma tuʼn nyoline tiʼjju otoq tzʼel nnikʼe tiʼj. Ok tilil kyuʼn nejenel tuʼn tkubʼ nkʼuʼje kyuʼn qa nya ax tok aju tzaj xnaqʼtzaʼn weye, pero ni jun kye ajbʼen Biblia tuʼn. Tej tikʼ chʼintl ambʼil, toj 9 te enero de 1976 kubʼ ntzʼibʼine jun carta tuʼn tkyaj ntzaqpiʼne Iglesia Católica ex xi nsamaʼne atz Roma. Tej tikʼ kabʼe qʼij, kyaj nqʼoʼne seminario ex in xiʼye tnejel maj toj jun nimaq chmabʼil kye testigo de Jehová, atz jatumel in che pon nim kʼloj okslal. Ok nqʼoʼne nwitze tiʼj qa junxitl tkyaqil. Kykyaqilx qʼiʼn kybiblia ex in che jyon kyiʼj taqikʼ Tyol Dios etz tqʼamaʼn qʼol chikʼbʼabʼil.

¿Tiʼ kyqʼama toj tjaya tiʼjju bʼant tuʼna?

Chʼixme kykyaqil tzaj kyqʼoj. Noqtzun tuʼnj, ok nbʼiʼne qa in xnaqʼtzantoq jun wermane kyukʼil testigo de Jehová atz Lombardía, toj jawni te Italia. In xiʼye visitaril te ex onin qe Testigo wiʼje atz tuʼn tkanet jun waqʼune ex jun ja jatumel tuʼn wanqʼine. Tojx abʼqʼi aju jaw aʼ nwiʼye ex in noke te Testigo de Jehová.

¿Atpe jun tiʼ in tzaj tbʼisa tiʼj?

Mintiʼ. In kubʼ nnaʼne qa nqayin atine tiʼj Dios, tuʼnju o tzʼonin Xjan Uʼj wiʼje tuʼn telxix nnikʼe tiʼj. Mintiʼ onin kyxnaqʼtzbʼil xjal wiʼje nix kyxnaqʼtzbʼil católico. Jaku chin yoline tiʼj Dios kyukʼil xjal jaʼlo, tuʼnju ojtzqiʼn wuʼne qa in xi nyekʼine axix tok kye.