Tunenini vino mwali uku wance.

Navyaliilwe uku Italy umu 1943. Nakuzile pamwi na ina yane na ya nkazi yane umu muzi unono muno ya tata yaombanga umulimo wa kulima nu kuwaza. Avyazi itu yatukuzizye ukuya ya Katolika akamamo na manzi.

U mulandu ci uno mwalondelanga ukuya simapepo?

Lino nali umulumendo natemilwe ukukutika kuli ya simapepo mu calici. Nuvwanga ningo mazwi yao kumwi ni ntambi zino yalondelanga. Fwandi nalondesyanga ukuya simapepo. Lino nali ni myaka 13, ya mayo yantwazile uku sukulu lya ku boding’i kuno alumendo yasambililanga ivyali nu kuyazwa nga yakula, kuno nali nu kusambilila sana vyakwe usimapepo.

Uzye muli vino mwasambililanga mwali nu kusambilila Baibo?

Awe. Lino nali ni myaka 15, mwalimu umwi wampeezile ibuku umwaya malyasi akalanda pa umi wakwe Yesu alino nu mulimo uno waomvile, nupya nalibelenzile pa miku iingi. Lino nali ni myaka 18, naile uku Rome ku mayunivesiti aakasambilizya vyakwe upapa na ubishopu aakatungululwa na papa. Nasambilile Cilatini, Cigiliki, malyasi ya mpiti, mano ya untunze, melenganyo ya untunze, nupya nasambilile pali Leza na pa vizumilo ivyaya umu mipepele. Nanti cakuti twasungiile ivikomo ivyaya muli Baibo nupya tuvwanga lino ya kubelenga Baibo lino yakupepesya pa Mulungu, tutasambililanga Baibo.

Mwizile imuya umukalamba pi sukulu ilyasambilizyanga ivya mapepo. Uzye umu mulimo uwo mwali nu kusambilizya?

Umulimo wane ukalamba wali uwakwangalila sile. Lelo nasambilizyanga mu makalasi ndi cakuti natumwa na amwi umba lyakwe ya Second Vatican Council.

U mulandu ci uno mwatandike ukutwisikila kuno mwapepanga?

Kwali ivintu vitatu ivyancuzyanga. Kuno napepanga yatungililanga ivikanza vya miteekele. Yazumilizyanga vicitwa iviipe vyakwe ya simapepo na vyakwe yano ikalanga pa vikulwa vi calici. Nupya ivisambilizyo vimwi vyakwe ya Katolika vitaali ningo. Wakwe, uzye Leza uwaya nu kutemwa angatwalilila ukufulula antu amanda pe pa cisila cakuti yafwa? Nupya uzye Leza akalonda twalanda ivili vimwi umu mapepo imiku iingi ala tuli nu musalaba? *

Uzye mwacisile uli?

Napefile kuli Leza kuti antungulule ala nkuponya na minsozi. Nupya nakazile na Baibo wakwe ya Katolika akaamwa ukuti Jerusalem Bible, ala alino wacifuma umu lulimi lwa Ciitalian, nupya natandike ukubelenga. Lyene wanda umwi katondo pa Mulungu lino nanikanga ivyakuzwala pa cisila ca kuwela uku maasi, aonsi yaili izile pa sukulu. Yanenyile iyati aa Nte Yakwe Yeova. Twalanzyanyizye nayo Baibo ukucila pi awala lyonga, alino na pali vino ikalanda ukuti avino tungamanyilako ukupepa kwa cumi.

Uzye i cani cino mwatemilwe kuli yano yamutandalile?

Natemilwe ivizumilo vyao na vino yalondololanga ningo malembo ukuomvya Baibo wakwe ya Katolika. Lyene pa cisila, Nte muze uwi zina lyakuti Mario watandike ukuntandalila. Wali umutekele nupya wali uwa cumi; lyonsi pa Cibelusi katondo asi mulandu ni miceele, wizanga pa sukulu ni nsita yakwe 9:00.

I vyani vino ya simapepo yauzo yelenginye pali vino ya Nte yamutandalilanga?

Nayalalikanga ukuti yangaazanwako lino tukulanzyanya, lelo kusi uwisileko mano ku kusambilila Baibo. Nomba nemo naipakizyanga. Nasambililanga ivintu ivisuma, wakwe umulandu uno Leza walekela iviipe nu ucuzi vyacitika, ivintu ivyamvulunginye pa nsita itali.

Uzye aamucizile icifulo yezyanga ukumulesya ukusambilila Baibo?

Umu 1975, nayanga uku Rome imiku iingi mu kulondolola vino nayuvwanga. Aancizile icifulo yezyanga ukusenula vino nelenganyanga, lelo kusi uwaomvyanga Baibo. Lyene pa 9 Januwale umu 1976, nalemvile kalata ku Rome nu kulondolola ukuti lyene nafuma muli ya Katolika. Lino papisile manda yaili, nafumile pa sukulu nu kukwela isitima inja ku kulongana kwakwe ya Nte Yakwe Yeova pa muku wa kutandikilapo, kuno nizile inzana ukuti fwandi wali ukongano apaali vilongano ivingi. Vyonsi vyapusine sana na vino naelizye! Nte wensi wakweti Baibo nupya wakonkangamo lino cila kalanda ukulanda ilyasi.

Uzye ulupwa lwinu lwelenginye uli pali vii vyonsi?

Aingi yankaanyanga sana. Lelo nazanyile ukuti umutowane wenga umonsi wasambililanga Baibo na ya Nte umu Lombardy, ku citungu ca ku katutu ka Italy. Naile umu kumulola, nupya ya Nte aali kuuku yangazwile ukuzana incito alino nu mwakwikala. Lyene umwaka kwene uwa nabatiziwe ukuya Nte Wakwe Yeova.

Uzye kwaya vimwi vino mukalanguluka?

Awe! Lyene nkayuvwa ukuti napalama sana kuli Leza pano namumanya kulingana na vino Baibo ikasambilizya, asi kulingana na mano ya untunze nanti intambi zya mwi calici. Nupya nkasambilizya yauze ukwaula ukutwisika nupya ukulingana ni cumi.