Tugambire aha bikwatiraine n’okuzaarwa kwawe.

Nkazaarirwa omuri Italy omuri 1943. Nkakura na beene tata na banyaanyazi, omu kyaro kikye ahu tata yaabaire naakorera eby’obuhingi n’obubaizi. Abazaire baitu bakatukuza kuba Abanyakaturiki barungi.

Ahabw’enki waabaire nooyenda kuba omwegyesa w’ediini?

Nkiri muto, nkaba ninkunda kuhurikiza abeegyesa b’ediini omu kanisa. Nkaba ninkunda oku barikugamba, n’emigyenzo mingi ei barikukora. N’ahabw’ekyo omutima gwangye nkaguta aha kuba omwegyesa w’ediini. Obu naabaire nyine emyaka 13, maawe akantwara omu ishomero eryabaire niritendeka aboojo bato kwija kuba abeegyesa b’ediini.

Okutendekwa kwawe kukaba nikutwariramu okwega Baibuli?

Ngaaha buzima. Obu naabaire nyine 15, omwe aha beegyesa bangye akampa ekitabo ky’Engiri ezirikukwata ahari Yesu n’obuheereza bwe. Ekitabo ekyo nkakishoma emirundi mingi. Aha myaka 18, nkaza Rooma omu mashomero ga yunivasite agari ahansi y’obushoboorozi bwa paapa. Nkeega Orulaatini, Orugriika, ebyafaayo, ebigunjano, okumanya ebiteekateeko by’abantu n’entwaza yaabo, n’ahari Ruhanga n’enyikiriza z’ediini. N’obu turaabe twabaire nitujuriza ebyahandiikirwe kuruga omu Baibuli tukahurira na Baibuli neeshomwa aha Sande, kwonka buzima tukaba tutarikugyega.

Okaba omwegyesa w’ediini, eki kikaba nikitwariramu okwegyesa?

Nkaba ndi omwebembezi. Kwonka nkaba ninyegyesa aha bikwatiraine n’enyikiriza z’Ekanisa y’Ekinyakaturiki.

Ahabw’enki waatandikire kubangaanisa aha nyegyesa z’ekanisa?

Nkaba ninteganisibwa ebintu bishatu. Ekanisa ekaba neeyejwanzya omu by’obutegyeki. Bakaba nibashwekyerera ebihagaro by’abeebembezi b’ediini. Kandi enyegyesa zimwe z’Ekinyakaturiki zikaba nizireebeka nk’ezitahikire. Nk’eky’okureeberaho, Ruhanga oine rukundo naabaasa ata kufubira abantu ebiro byona baaheza kufa? Kandi shi Ruhanga naayenda ngu tugaragarukye omu kushaba turikukoresa esapuri? *

Okakora ki?

Ndikurira, nkashaba obuhabuzi. Nkagura na Baibuli eya Jerusalem Bible, eyaabaire eherize kushohozibwa omu rurimi rwa Italy, reero naatandika kugishoma. Kandi, Sande akasheeshe kamwe nkaba ndiyo nimpanika eganduura yangye bwanyima y’okuruga omu kanisa, abashaija babiri baija aha seminare. Bakanyeyanjurira ngu n’Abajurizi ba Yehova. Tukagaaniira ahari Baibuli kumara nk’eshaaha emwe n’eki erikugamba aha bumanyiso bw’ediini ey’amazima.

Okatwara ota abagyenyi abo?

Nkakunda obuhame bwabo n’oku baabaire nibooroberwa kusherura ebyahandiikirwe omu Baibuli y’Abanyakaturiki. Bwanyima, Omujurizi wa Yehova ondiijo orikwetwa Mario, akatandika kuntaayaayira. Akaba naagumisiriza kandi ari omwesigwa, buri Sande omu kasheeshe, yaaba enjura neegwa nari hariho omushana, akaba aija aha seminare shaaha ishatu z’akasheeshe.

Abeebembezi b’ediini abandi bakaba nibateekateeka ki aha kutaayaaya kwe?

Nkabeta kunyegaitaho omu kugaaniira oku, kwonka tihaine owaafiireyo kwega Baibuli. Kwonka nyowe nkaba ninkundira kimwe. Nkaba niinyega ebintu by’amaani, nk’ahabw’enki Ruhanga akirekireho ebibi n’okubonabona ekintu ekyabaire kitwire nikinteganisa.

Bakama baawe bakateeraho kukuremesa kwega Baibuli?

Omuri 1975, nkaza omuri Rooma emirundi mingi kushoboorora enshonga zangye. Bakama bangye bakateeraho kuhindura emiteekateekyere yangye, kwonka tihaine owaakoreise Baibuli. Aha muheru, Okwokubanza 9, 1976, nkahandiikira aba Rooma ndikworeka ngu tinkyebara nk’Omunyakaturiki. Bwanyima y’ebiro bibiri, nkaruga aha seminare naatemba egaari y’omwika kuza omu ruteerane rwangye rw’okubanza orw’Abajurizi ba Yehova, orwabaire ruri oruteerane oruhango rurimu ebibiina bingi. Buri kimwe kikaba nikitaanira kimwe n’ebi naabaire mmanyiriire! Buri omwe akaba aine Baibuli arikukuratira abagambi baaba nibashoboorora enshonga nyingi.

Eka yaawe ekatwara eta okucwamu oku?

Baingi aharibo bakangirira ekiniga. Kwonka nkaija kumanya ngu omwe ahari beene tata, Abajurizi ba Yehova bakaba nibamwegyesa Baibuli omuri Lombardy, omu bukiizi-bwa-bumosho bwa Italy. Nkaza kumutaayaayira, kandi ku naahikireyo Abajurizi ba Yehova bakampwera kutunga omurimo n’oburaaro. Bwanyima omu mwaka ogwo, nkabatizibwa nabo omwe aha Bajurizi ba Yehova.

Oine okwefuuza kwona?

Ngaaha buzima! Hati, nimpurira ndi haihi na Ruhanga, ahakuba ebi ndikumumanyaho nibyegamira ahari Baibuli, bitari bigunjano nari emigyenzo y’ekanisa. Kandi nimbaasa kwegyesa abandi nyine obuhame n’amazima.