Ko mudabadwira kuponi?

Nidabadwira ku Itália mu gole ya 1943. M’banja mwathu tenzemo wana 7 ndipo tenze wa Katolika. Tingakhala m’muyi unango ung’ono. Ababa wangu enze mulimi komasoti wopala matabwa.

Nchani chidakuchitisani kuti mukhale wantsembe?

Nili mulumbwana, nikambabvesera wantsembe akunilalikira vimbanikomedza maninge. Ningachita chidwi na momwe mawu yawo yambabvekera komasoti miyambo yomwe angachita. Vimwevi vidanichitisa kuti niyambe kuganiza vokhala wantsembe. Ninamagole 13, amayi wangu adaniyendesa kushikola yokhaliratu muko yomwe ingapfunzisa alumbwana kuti adzakhale wantsembe.

Ko kushikola muko mungapfunzirasoti Baibolo?

Osati maninge. Nina magole 15, aticha wangu anango adanipasa kabaibolo komwe kenze na ntontholo wabwino basi ndipo nidakawerenga maulendo yanganani. Ninamagole 18, nidayenda ku Rome kukapfunzira pa univerisidade inango yomwe imbanyang’aniriwa na papa. Ningapfunzira Chilatini, Chigiriki, mbiri yakale, nzeru za wanthu, komasoti mapfunziro ya vachipembedzo. Timbalewa va mavesi ya m’Baibolo yomwe tidazolewera komasoti timbabvesera Baibolo inkuwerengewa pa ulaliki wa pa Sondo. Koma ningalewelini kuti timbapfunzira Baibolo.

Manje pamudakhala wantsembe mumbapfunzisasoti wanthu?

Nthawe zinango nimbapfunzisa vomwe nauziwa na akuakulu wa ku Vatican. (Itália) Koma nthawe zizinji nimbaphata basa ya mu ofesi.

Ndawa chani mudayamba kukaikira vomwe chipembedzo cha Katolika chingapfunzisa?

Pana vinthu vitatu vomwe vinganikaikisa. Choyamba, tchetchi mweyi imbangenerera ndale. Chachiwiri, imbalekerera akuluakulu akuchita makhalidwe yoipa. Ndipo chachitatu, vinthu vinango vomwe tchetchi mweyi ingapfunzisa, vimbachokeralini m’Baibolo. Mwakulinganiza, vingakwanisike tani kuti Mulungu yemwe ni wachikondi, ambalange wanthu pakuwawotcha pamoto mpaka kalekale? Komasoti ko ni shuwadi kuti Mulungu achafuna kuti timbandobwerezera pemphero ibodzibodzi mweyo kazinjizinji pakuphatisa basa korona? a

Manje mudachita tani?

Nidapemphera kwa Yahova kuti anithandize, misozi inkuyerera m’maso mwangu. Nidagula pomwe Baibolo inango ya Chikatolika yomwe yenze idadindiwa chamanjemanje mu Chitaliyana ndipo nidayamba kuiwerenga. Koma machibese yanango pa Sondo patidandomaliza mwambo wa Misa, wa Mboni awiri adafika komwe tingakhala. Tidacheza nawo nthawe ikulu ndipo timbapfunzira vokhudza Baibolo komasoti vomwe ichapfunzisa pa nkhani ya chipembedzo chaicho.

Nchani chidakuchitisani chidwi na wa Mboni mwawa?

Nidachita chidwi na momwe angayankhulira akambafotokoza mavesi ya m’Baibolo yangu ile. Ambawoneka kuti angakhulupirira na moyo wose vose vomwe Baibolo imbanena ndipo ambafototokoza mosakaikira. Pamwapo nidayamba kupfunzira Baibolo na wa Mboni munango dzina yake Mario. Iye wenze woleza ntima ndipo ambabwera pa Satade iliyose cha m’ma 9 ora machibese, vishupe vitani.

Ko wantsembe anango adachita tani padawona kuti mwayamba kupfunzira na wa Mboni?

Enze alibe navo chidwi maninge. Nidakumbira anango kuti timbapfunzirire pabodzi, koma palibe yemwe adapitiriza. Koma inepano nidakomedzewa maninge na vomwe ningapfunzira. Nidagumana ndawiro wa mbvunzo womwe umbanisokoneza msolo kwa nthawe itali. Mbvunzo wake wenze wakuti, ndawa chani Mulungu abvuma kuti wanthu ise timbadzudzike komasoti kuti voipa vimbachitike padziko mweyi?

Ko akuluakulu wa chipembedzo chanu alibe kukulambizani kupfunzira Baibolo?

Mu 1975, nidayenda kanganani kose ku Rome kukawauza va maganizo yangu. Akuluakulu mwawa adayesesa kuniuza kuti nichinje maganizo yangu, koma palibe adaphatisa basa Baibolo. Koma pa 9 Janeiro 1976, nidanemba kalata nkuwauza kuti ndinelinipomwe wa Katolika. Pazidapita ntsiku ziwiri nidachoka komwe tingakhala kule nkukwera barko kuyenda kukapemphera na wa Mboni za Yahova. Pakuyamba nimbadziwalini kuti nsonkhano moyu ni ukulu, pomwe pachakhala mipingu ya Mboni za Yahova yazinji. Vomwe nidawona pa nsonkhano moyu venze vosiyana maninge na vomwe vingachitika kutchetchi kwathu. Pafupifupi wose enze na Baibolo ndipo wokamba nkhani akatomola vesi, aliyese ambafungula Baibolo yake nkumbatewedza akambawerenga.

Ko azibale wanu adachita tani padabva vimwevi?

Azinji alibe kukomedwa navo ndipo ambanitsutsa mogopsa. Koma patsogolo pake nidabva kuti mng’ono wangu akupfunzirambo na wa Mboni mudera ya Lombardy ku Itália. Nidayenda kukamuwona ndipo wa Mboni wa kumuko adanithandiza kugumana basa komasoti malo yokhala. Kumapeto kwa gole mweyo nidabatizika nkukhala wa Mboni za Yahova.

Ko mudandaula na vomwe mudachita ivi?

Neye. Ninkuwona kuti nili paushamwali wabwino na Mulungu ndawa nikumudziwa bwino kuchokera pa vomwe nidapfunzira m’Baibolo, osati pakundotewedzera nzeru za wanthu panango miyambo ya chipembedzo. Manjeuno nikambapfunzisa wanthu nikondwa ndawa nidziwa kuti vomwe nikuwapfunzisa ivo ni chaivo.