Wawa kasqaykimanta willariwayku.

Italiapi nacekorqani, 1943 watapi. Hermanosniywan hermanasniywan khuska uj juchʼuy llajtitapi wiñakorqayku. Tatayqa chajrapi llankʼaj, carpintero ima karqa. Tatasneyqa tukuyniykuta catolicosta jina uywawarqayku.

¿Imaraykutaj cura kayta ajllarqanki?

Wawa kashajteyqa misaman riy gustawaj. Chaypitaj curaj parlasqanta uyariy gustawaj, imatachus ruwasqantapis tʼukulla qhawaj kani. Chayrayku noqapis cura kayta munarqani. Mamayqa 13 watasniyoj kashajtiy uj internadoman apawarqa. Chaypeqa wawasta wakichej kanku curas kanankupaj.

Internadopirí, ¿Bibliata estudiajchu kanki?

Pisillata. 15 watasniyoj kashajteyqa ujnin profesorniy uj juchʼuy Bibliata qowarqa, chaypeqa Jesuspa kausayninmanta parlaj libroslla kasharqa, chaytataj ashkha kutista leerqani. 18 watasniyoj kashaspataj Romaman riporqani catolicospa universidadesninkupi estudianaypaj. Chay universidadesmantaqa papa cargoyoj kasharqa. Chaypi estudiarqani latinta, griegota, historiata, filosofiata, psicologiata, teologiata ima. Sapa domingo Bibliamanta versiculosta recitaspapis, Bibliamanta leekusqanta uyarispapis, Bibliataqa mana estudiajchu kayku.

Seminariomanta cargoyoj kashaspa, ¿qanpis yachachejchu kanki?

Trabajoypeqa waj imasmanta encargakoj kani. Jinapis Concilio Vaticano II nisqamanta decretosta yachachej kani.

¿Iglesiamanta imastaj mana gustasorqachu?

Kinsa imas mana gustawarqachu. Rikoj kani iglesiaqa politicaman chhapukusqanta, curasta, iglesiaman rejkunatapis sajra imasta ruwajta saqellasqankuta. Chantapis iglesiapi yachachisqankoqa umata muyuchikunapaj jina karqa. Noqaqa tapukoj kani: “¿Imaynatataj munakuyniyoj Dios runasta wañupojtinku wiñaypaj castiganmanri? ¿Diosqa munanmanchu uj cruz chayri uj rosario japʼirisqa ashkha kutista rezananchejta?”, nispa. *

Chanta, ¿imatá ruwarqanki?

Waqarikuspa Diosmanta mañakorqani yanapanawanta. Chantá uj mosoj Bibliata leenaypaj rantikorqani. Chay Bibliaqa Biblia de Jerusalén nisqa karqa, reciellanrajtaj italianopi llojsimorqa. Uj domingo paqarintaj misa pasayta sotanayta warkhuykushajtiy, iskay runas seminarioman chayamorqanku. Paykunaqa Jehovaj testigosnin kasqankuta niwarqanku. Uj hora kurajtapunitaj Bibliamanta parlarerqayku, cheqa religionmanta imatachus Biblia nisqanmantapis.

¿Imataj Jehovaj testigosninmanta gustasorqa?

Mayta tʼukuchiwarqa mana iskayrayaspa parlasqanku, católica Bibliatapis sumajta apaychasqanku. Aswan qhepatataj Mario sutiyoj testigo visitayta qallariwarqa. Payqa may pacienciayoj karqa, sapa sabadotaj parachunpis chayri imapis kachun, las nueve de la mañanataqa seminarioman chayamojpuni.

¿Imatataj waj curas yuyaj kanku Jehovaj testigosnin visitasoj jamusqankumanta?

Paykunatapis noqawan khuska estudianankupaj wajyarerqani, jinapis mana estudiarqankuchu. Noqamanqa mayta gustawaj Bibliata estudiay, ashkha imasta yachakusharqani. Yachakorqani imaraykuchus sajra imas kananta Dios saqesqanta, imaraykuchus sufrisqanchejta ima. Chaytaqa ñaupajta mana entiendeyta atillajchu kani.

¿Qanmanta aswan cargoyoj kajkuna Bibliata amaña estudianaykita nisorqankuchu?

1975 watapi ashkha kutista Romaman rerqani imatachus yachakusqaymanta parlarinaypaj. Noqamanta aswan cargoyoj kajkunaqa pantasqa kashasqayta niwarqanku, jinapis ni mayqenninku Bibliawanchu chayta sutʼinchawarqanku. Chantá 9 de enero de 1976 watapi, iglesiamanta llojsipunaypaj uj carta de renunciata qhelqarqani. Chaytataj Romaman apacherqani. Chaymanta iskay diasninmantaj seminariomanta riporqani. Jehovaj testigosninpa tantakuyninkumantaj por primera vez rerqani. Chay tantakoyqa uj jatun tantakuy karqa, ashkha congregaciones ujllapi tantasqa kasharqanku. Chay tantakoyqa mana iglesiaypi jinachu karqa, sapa uj Bibliayoj kasharqanku, Bibliankupitaj maskʼasharqanku ima versiculosmantachus parlakushasqanta.

¿Ima nerqataj familiayki chayta ruwasqaykimanta?

Casi tukuyninku phiñakorqanku. Jinapis ujnin hermanoy testigoswan Bibliata estudiashasqanta yacharqani. Payqa Lombardiapi tiyakorqa, Italiamanta norte ladopi. Payta visitaj rerqani. Chay lugarmanta testigosqa yanapawarqanku uj trabajota tarinaypaj, uj wasita tarinaypajpis. Chay watapitaj Jehovaj testigonman tukorqani.

¿Chay ruwasqaykimanta pesachikunkichu?

¡¿Imaynatá pesachikuymanri?! ¡Manapuni pesachikunichu! Kunanmá Diospa qayllanpi kani. Bibliapi yachakuni imaynachus pay kasqanta, manataj runaj yachaynillanmantachu, nitaj catolicospa costumbresnillankumantachu yachakuni. Kunanqa runasman yachachini, imatachus yachasqay cheqa kasqanta yachaspa.