Chabʼij chqe chiʼ at akʼal na.

Xinalax pa Italia pa ri junabʼ 1943. In y ri wachalal xojkʼiy pa jun alaj tinamit. Ri nutat are tikonel y carpintero. Ri nutat y ri nunan xojkikʼiysaj pa ri kojonem católica.

¿Jasche xawaj xatux sacerdote?

Chiʼ in akʼal na sibʼalaj utz kinnaʼ kinbʼe pa ri misa rech kintaʼ ri kubʼij ri sacerdote. Qas utz kinta ri uchʼabʼal y ri jastaq che kubʼano. Chilaʼ xkʼiy wi ri nurayinik che kwaj kinux sacerdote. Chiʼ kʼo 13 nujunabʼ ri nunan xinukʼam bʼi pa jun internado che kyaʼ wi tijonik chke ri akʼalabʼ che kkaj keʼux sacerdote.

¿La xikoj ri Biblia pa ri tijonik?

Qas ta xqakojo. Chiʼ kʼo 15 nujunabʼ jun chke ri ajtij xuya jun wuj chwe che kʼo ri kajibʼ Evangelios chupam, che kuya ubʼixik chrij ri ukʼaslemal ri Jesús, y kʼi taq mul xinsikʼij. Chiʼ kʼo 18 nujunabʼ xinbʼe pa Roma rech xinbʼe pa ri universidades pontificias, che kʼo chuxeʼ ri utaqanik ri papa. Chilaʼ xinwetaʼmaj latín, griego, historia, filosofía, psicología y teología. Paneʼ qetaʼm jujun taq versículos rech ri Biblia y kqato chiʼ ksikʼix uwach pa ri misa pa taq domingos, are kʼu kqanikʼoj taq upam.

¿La xaya tijonik are chiʼ xatkʼojiʼ pa ri seminario?

Ri nuchak are kinwil ri kbʼan chilaʼ, are kʼu xinya jujun taq mul tijonik chrij ri decretos del Concilio Vaticano II.

¿Jasche xubʼan kebʼ akʼuʼx chrij ri Iglesia?

Kʼo oxibʼ rumal: xinwilo che ri Iglesia kumin ribʼ pa política, kʼo ta kubʼij chke ri itzelal che kkibʼan ri sacerdotes y ri winaq che kebʼe chilaʼ, y jujun taq kʼutunem che kkikʼutu are ta ri qastzij. Jun kʼutbʼal, ¿jasche jun Dios che kloqʼoqʼenik kukʼajisaj kiwach ri winaq pa ri qʼaqʼ are chiʼ kekamik? ¿Y la kraj ri Dios kqakoj jun rosario chiʼ kqabʼan qachʼawem che? *

¿Jas xabʼano?

Rukʼ oqʼej xinta che ri Dios che kinutoʼo; xinloqʼ jun Biblia de Jerusalén, che kʼate xel lo pa italiano, y xinmajij usikʼixik. Jun domingo aqʼabʼil, chiʼ tajin kinkʼol ri nusotana che xinkoj pa ri misa, xeʼopan kebʼ achijabʼ pa ri seminario. Xkibʼij che are testigos rech Jehová y xqamajij tzijonem. Más che jun hora xojchʼaw chrij ri Biblia y ri kubʼij chrij ri qastzij kojonem.

¿Jas xachomaj chkij ri Testigos?

Utz xwilo che kʼo nim kikojonik y che kʼax ta kkibʼan che ukʼutik textos pa ri Biblia católica. Chiʼ xqʼax ri tiempo jun achi ubʼiʼ Mario xumajij nusolixik. Areʼ kʼo upaciencia y ronojel taq sábados xopan chuchiʼ ri seminario a las nueve aqʼabʼil paneʼ kʼo jabʼ o saqʼij.

¿Y jas xkibʼij ri nikʼaj chi sacerdotes chrij wariʼ?

Xinbʼij chke che kekʼojiʼ qukʼ are kʼu nijun xok il che retaʼmaxik chrij ri Biblia. In sibʼalaj utz xwilo. Rumal che tajin kwetaʼmaj kʼakʼ taq jastaq. Jun kʼutbʼal, xwetaʼmaj jasche Dios uyaʼom bʼe che kʼo kʼaxkʼolil e itzelal, che amaqʼel in chomanaq chrij.

¿E kʼu ri kʼo nim kitaqanik pa ri akojonem, la kʼo jumul xkibʼij chawe che kaya kan retaʼmaxik chrij ri Biblia?

Pa 1975 kʼi mul xinbʼe pa Roma rech kinchʼaw chrij ri tajin kwetaʼmaj. Ri nim kibʼanik pa ri nukojonem xkichomaj che xa insachinaq, are kʼu nijun xukoj ri Biblia. Pa 9 re enero 1976, xintzʼibʼaj jun carta rech kinbʼij che kwaj ta chik kinux sacerdote y xintaq bʼi pa Roma; xqʼax kebʼ qʼij xinel bʼi pa ri seminario y xinbʼe nabʼe mul pa jun riqbʼal ibʼ kukʼ ri testigos rech Jehová. Are jun nim riqbʼal ibʼ che kimulim wi kibʼ kʼi taq congregaciones. ¡Are sibʼalaj utz! Konojel kʼo jun kiBiblia y kkitzukuj ri textos che kbʼixik.

¿Jas xkichomaj ri afamilia?

Kʼi chke xpe koyowal. Are kʼu, xinto che jun chke ri wachalal xuqujeʼ tajin kretaʼmaj chrij ri Biblia kukʼ ri Testigos pa Lombardía, jun tinamit che kʼo pa ri norte rech Italia. Xinbʼe che rilik, y ri Testigos che e kʼo chilaʼ xinkitoʼ che utzukuxik nuchak y wachoch. Pa ri junabʼ riʼ xinux testigo rech Jehová.

¿La kawaj kakʼex ri xachaʼ ubʼanik?

Kwaj taj, kimik kinnaʼ chik che naqaj in kʼo wi che ri Dios, rumal che wetaʼmam ri qastzij che kukʼut ri Biblia chrij ri Dios, are ta ri filosofías y ri kkibʼan ri católicos. Kimik kinkunik kinchʼaw kukʼ ri winaq rumal che wetaʼm che tajin kinbʼij ri qastzij.