Wamra kanqëkita willayämë

1943 watachömi Italia nacionchö yurikurqä. Wawqïkunawan noqaqa juk caserïuchömi winayarqä. Papänïqa chakrachömi trabajaq y carpintërum karqan. Papänïwan mamänïqa catölicum kayarqan, tsëmi pëkunanölla creiyänäpaq yachatsiyämarqan.

¿Imanirtan cüra këta munarqëki?

Wamra kanqä witsanmi alläpa gustamaq misachö cüra yachatsikamunqanta wiyë. Cürapa voznin y Diosta adoranampaq imëkata ruranqankunata rikëmi alläpa gustamarqan. Tsënöpam cüra këta munarqä. 13 watayoq këkaptïmi, cüra kayänampaq yachatsiyanqan escuëlaman mamänï apamarqan.

¿Alliku tsëchöqa Bibliapita yachakurqëki?

Ichikllatam yachakurqä. 15 watayoq këkaptïmi juk profesornï Jesuspa vïdanta willakoq Mateu, Marcus, Lücas y Juan librukunata qaramarqan. 18 watayoq këkarnam, Röma nacionta ëwakurqä pontificias universidäkuna nishqanchö estudianäpaq, y tsë universidäkunata dirigeqqa karqan kikin päpam. Tsëchömi yachakurqä latin idiömata, griëgu idiömata, historiata, filosofïata, psicologïata y teologïata. Bibliapa versïculunkunata de memoria yacharpis, y domingukunapa misachö Bibliata leyiyämunqanta wiyarpis, manam Bibliataqa shumaqqa estudiayaqtsu kayä.

¿Seminariuchö kanqëki witsanqa imakunatataq ruraq kanki?

Seminariuchöqa masqa trabajarqä dirigenti këchömi. Tsënö karpis, alumnukunatam yachatsirqä Conciliu Vaticänu II niyanqanchö patsätsiyanqankunata.

¿Imataq iglesia catölicachöqa gustashurqëkitsu?

Kë kima cösaskunata rikanqämi gustamarqantsu: jukqa karqan, polïticaman mëtikuyanqanmi; ishkë kaqnam, cürakuna y tsë religionpita kaqkuna mana allikunata rurayaptimpis mana ima niyanqan; y kima kaqnam, catölicukuna creiyanqanqa Biblia yachatsikunqanwan mana igualanqan. Këkunatam yarpachakoq kä: Diosnintsik kuyakoq këkarqa, ¿imanötan pipis wanoqta para siempri castiganman? ¿Rasumpatsuraq Diosqa munan rosariuta aptarkur juk rëzuta mëtsika kuti rezakunantsikta? *

¿Imata ruranëkipaqtaq decidirqëki?

Waqëpam Diosta mañakurqä yanapëkamänampaq; italiänu idiömachö tsëllaraq yarqamushqa Biblia de Jerusalentam rantirqä, y tsëtam leyir qallëkurqä. Juk domingum, misata rurarir sotänäta colgadorninman churëkarqä, y tsë höram ishkë nunakuna seminariuman chäyämurqan. Jehoväpa testïgun kayanqantam niyämarqan, y alli unëmi pëkunawan parlakur kayarqä. Bibliapaq y alli kaq religionpaq Bibliachö ima ninqantam juk höra maspa parlakuyarqä.

¿Imatan gustashurqëki Jehoväpa testïgunkuna parlapäyäshuptiki?

Catölicu Bibliachö textukunata ashiyämunan kaptimpis, pëkunaqa kushishqa y segürum tsë Bibliachö textukunawan yachatsiyämarqan. Tsëpitanam Mariu jutiyoq juk Testïgu cada semäna yachatsimaq shamurqan. Pëqa pacienciawanmi yachatsimarqan. Alalaptimpis o achachaptimpis cada säbadum pëqa seminariu punkuchö las nuëvi puntuqa tsëchöna këkaq.

¿Y wakin sacerdötikunaqa ima niyarqantaq tsënö watukayäshuptiki?

Pëkunapis yachakuyänanta munarmi invitarqä, peru manam Bibliapita yachakuyta munayarqantsu. Noqataqa Bibliapita yachakuy alläpam gustamaq. Alläpa shumaqmi yachakuykarqä. Tsëchömi yachakurqä mana allikuna pasakunanta imanir Dios permitinqanta y imanir sufrinqantsikta, tsëkunatam noqaqa musyëta munarqä.

¿Mandayäshoqnikikunapitaqa mëqanllapis Bibliata estudiëta dejanëkipaq niyäshurqëkiku?

1975 watachöqa atska kutim Römata ëwarqä Bibliapita yachakuykanqäta pëkunata willanäpaq. Atskaq mandayämaqkunam niyämarqan mana allita yachakuykanqäta, peru manam mëqampis Bibliawanqa tsëta rikätsimëta puëdiyarqantsu. Y 1976 wata 9 de enërum Iglesia catölicapita yarqukunqäta willakurnin Römaman juk cartata apatsirqä; tsëpita ishkë junaq pasariptinmi seminariupita ëwakurqä, y Jehoväpa testïgunkunapa reunionninkunamanmi ëwarqä. Tsë reunionchöqa atska congregacionkunam juntakäyarqan, testïgukunapa asamblëankunam kanaq. ¡Tsëchöqa llapampis jukläyam karqan! Llapankunapam Bibliankuna kayäpoq, y yachatsikamoqkuna ima textuta niyämuptimpis llapankunam Bibliankunachö ashiyaq.

Tsëta ruranqëkipitaqa, ¿ima niyarqantaq familiëkikuna?

Cäsi llapan familiämi cölerakuyarqan. Tsënö kaptimpis, Italia nacionpa norti kaq lädunchö Lombardia markachö täkoq wawqïmi, Jehoväpa testïgunkunawan Bibliapita yachakuykarqan. Tsëta musyarirmi watukaqnin ëwarqä, y tsë markachö täraq Testïgukunam yanapayämarqan trabäjuta tarinäpaq y mëchö täränäpaq kaqtapis. Tsë watam Jehoväpa testïgun kanäpaq bautizakurqä.

¿Imallatapis arrepentikunkiku?

¡Manam arrepentikütsu! Kananmi sïqa Dioswan rasumpa amïgu kanqäta sientï, Bibliawanmi yachakurqö Diosnintsik imanö kanqanta, y manam filosofïata estudiartsu ni catölicukunapa costumbrinkunawantsu. Kananqa, rasumpa kaqtam nunakunata yachatsï.