Nanao akore ty nifiaigna’o tamy rehe mbe nikede?

Naterake ta Italia agne raho tamy 1943. Tanàgne kedekede tam-banevohitse agne ty nisy anay. Fito zahay tie niharo troke sady mpambole naho mpandrafitse ty baba’ay. Fivavahagne Katolika ty nitezagne anay.

Nagnino rehe ro te hanjare pretra?

Nahafinaritse ahy ty feon-dry mompera naho fa nanao lamesa. Teako ka i fombafomba maro anoegne am-piangonagne aoy. Tapa-kevetse areke raho fa hanao mompera. Nazily i Reneko tamy ty kilasimandre hoahy ty ajalahy te hanao mompera raho naho fa nifeno 13 taogne.

Nianatse Baiboly vao nareo?

Tsy le izay loatse. Nisy mpampianatse anay zay nagnomey ahy Evanjely, tamy raho ni-15 taogne. Nivakieko mateteke io satria nisy tantara i Jesoa naho ty raha natao’e. Nianatse tamy ty oniversite Katolika ta Roma agne raho naho fa nifeno 18 taogne. Tambane fahefa i papa o oniversite rehoe. Nianatse firehake latinina naho grike raho tie tagne sady nianatse tantara, filozofia, psikolojia vaho teolojia. Nagnerenkeregne andinin-teny zahay tie tagne sady nitsanogne famakiagne Baiboly tamy i toritenỳ ao isake lahady. Faie tsy tena nianatse Baiboly zahay.

Inogne iaby ty niasa’o naho fa nanjare sefo rehe?

Niasa birò ty tena nataoko tamy izay. Faie misy fotoagne avao raho nampianatse taranja miomba ty Konsily Faharoe o Vatikanao.

Nagnino rehe ro nanjare tsy natoky o eglizio sasa?

Raha telo ty nanahiragne ty saiko. Voaloha’e, nanao politike o eglizio. Faharoe, tsy voasaze ze pretra ndra ze mpivavake raty findesam-batagne. Fahatelo, tsy mitombegne ty fampianaragne ila’e amy ty fivavahagne Katolika. Agnisa izay ohatse tihoe, i Andrianagnahare bey hateay ro nao hagnasaze ndaty nainai’e agn’afobey agne. Andrianagnahare vao le tena mitake antikagne hampiasa sapile, le hagnerenkeregne vavake in-jato mahery? *

Ino ty natao’o?

Sady nitagny raho ro nivavake mba hatoron’Andrianagnahare ahy ty tena maregne. Nivily Baiboly Katolika amy ty rehake Italiana ka raho, sady nanomboke namaky aze. Nagnatogne i akanjokoy raho tamy lahady indraike zay naho fa boake nanao lamesa, le nisy lahilahy roe rezay niavy tamy i toeragne nisy anaỳ teo. Nirehake iareo tie Vavolombelo i Jehovah. Nirehake miomba ty Baiboly naho ty fomba amantaragne ty fivavahagne maregne zahay tagnate ty lera’e raike mahery.

Ino ty nahafinaritse azo tamy iareo?

Tena rese lahatse tamy ty raha ninoa’e iareo sady nimora tama’e ty nipay andinin-teny ndra tie Baiboly katolika aza ty nampiasaegne. Nisy Vavolombelo i Jehovah atao tihoe Mario zay ka nitilike ahy naho fa tafara tatoy. Nanam-paharetagne tamako reke, sady niavy avao ndra soa ndra raty i androy. Sady ireke magnaja lera! Naho vaho paike ty amy sive, le fa io reke mampagneno sonerỳ ambavahady eo.

Akore ty nifahatreava ty pretra ila’e izay?

Nampagnatrefeko i fianaragney iareo faie tsy nisy vognogne hianatse Baiboly. Fa izaho le tena tea aze. Maro ty raha soa nianarako. Agnisa izay ohatse tihoe, nagnino ro engàn’Andrianagnahare hisy o fijaleagneo naho o raha ratio. Sady toe fa ela ro nanahiran-tsaigne ahy zay.

Nisakagne azo tsy hianatse Baiboly vao i lahibei’areo rey?

Nandeha ta Roma agne mateteke raho tamy 1975 mba hagnazava ty raha inoako. Nikezake nandrese lahatse ahy i lahibei’ay rey faie tsy nisy nampiasa Baiboly. Nanoratse ta Roma tagne raho, tamy 9 Janvie 1976 fa hiala tsy ho Katolika sasa. Niala tamy i tragno i mompera rey tao raho roe andro tafara izay. Nandeha lamasina raho, le nandeha amy ty fivoria o Vavolombelo i Jehovah-o agne. Io ty fivoriagne voaloha’e natreheko. Kay havoriambey tamy io sady fiangonagne maromaro ty niarake tao. Tena hafa ty raha nitreako tagne. Sambe nanagne Baiboly iaby ze tao, sady nagnorike ze andinin-teny nivakie i mpizaka nagnazava foto-kevetse sambe hafa rey.

Akore hoe o keleia’ò?

Tena nitsekake ty ankamaroa iareo sady nanohetse ahy. Faie nireiko fa nianatse Baiboly amy ty Vavolombelo i Jehovah ka ty zaiko lahilahy raike, ta Lombardie amy ty faritse avara Italia agne. Nandeha agne areke raho, sady nagnampe ahy hahatrea asa soa naho tragno hitobohagne ty Vavolombelo i Jehovah tagne. Natao badisa raho tao’e raike tafara izay, le nanjare Vavolombelo i Jehovah.

Tsy nanegnegne vao rehe?

Tena tsy nanegnegne ndra raike raho! Ela ty ela ta nahatsiaro ho narine an’Andrianagnahare raho! Tena boake amy Baiboly ao ze hamarenagne miomba aze fa tsy boake amy ty filozofia ndra tantaran-drazagne. Izao raho vaho milamigne ty saiko fa raha maregne ty ampianareko o ndatio.