Ani nahõpai bero mo gumbanga pai furani tipa gamo raka mbu ro ni gude.

I avungure Itaria yo rogo 1943. Mi asono na awirina nangia akumba na adee rogo wiri tooni gbaria nga gu buba aamangasunge rogoho ni basopobino na ni basekengua. Avungurani asonosi rani tipa ani du ni wene aboro Katoriko.

Tipagine mo aaida ka da ni bavugahe ti ni?

Mbure ni tooni paranga, mi aima kpinyemu gia wai abavugahe anaafura kanisa yo. Mi aima du na bakere ngbarago kaa gia fugoyo, na agu apai i anaamangaha kanisa yo. Sidu, mi kini idi nzunzu ka da ni bavugahe. Ho garã re adu ni nga 13, nina andu na mi ku rogo gu sukuru aboro araka kina yo nga gu naambakada rukutu aparanga tipa kumbatayo, i wirikipai ni bakerehe tipa sunge abavugahe.

Ya mo gu rabahe i aafuhe foro aakoda wirika Baibiri?

Si aadunga wo nzunzu te. Ho garã re ada ni nga 15, kura gimi bayugupai sa afu Akitabu Wene Pangbanga fere—agu apangbanga du tipa ga Yesu raka na gako sunge tungusapai—na mi agedi gu buku re ni badunguhe. Ho garã re ada ni nga 18, mi andu ku Roma yo tipa ka wirikapai rogo gu yunivasiti nga pontifical universities, nga gu du tii gu pagbia nga ga papa. Mi awiriki pa-Tiriani, pa-Giriki, kuru apangbanga, wisigopai dudunguroo tipa raka, gu sino berã nga ga aboro, gbiati wisigopai tipa aida nga ga apambori. Wa si avura du nga ani anaape averesi rogo Baibiri yo ngbarirani na kini gi geda Baibiri rogo gu tungusapai naanidu Rago Poso, ani aawisigongo Baibiri nzunzu te.

Mo ada ni barumbatayo. Ya mo gipai re aakoda pa yugopai?

Gimi sunge adu gbe nga ga mbakadapai na kini ngerekurii riigbu. Ono mi anaayugopai ayugo tipa andiko Second Vatican Council yo.

Tipagine mo atona du na kapa ti ni kuti kanisa?

Mi aabakabangire tipa apai biata. Gu kanisa re aakodatihe akoda na agu apai nga ga birĩ-zogarago. Si aambu gene ambu fu gbegberẽ mangaapai dagba abarumbatayo rogo pambori gbiati aboro kanisa. Na gu kura ayugopai nga ga Katoriko aadunga ni ruruhe nzunzu te. Ni kpiapai, wai rengbe Mbori nyemuse ka mbusa aboro nyeanye kindi fuo kpio yo? Na berewe, ya mo Mbori naida gupai nzunzu nga ani naadogoda bangisa akparakpee ni badunguhe na arozaria? *

Ginipai mo amangihe?

Mi amangi kparakpee na aume bangire yo tipa gupai ka mi mangihe. Na mi angbe gu ga aKatoriko Baibiri nga Jerusalem Bible, nga gu i akusihe ti gu regbo re rogo pa-Tiriani, na mi kini tona gedaha. Fuo gure, rogo kura Rago Poso sa, mi aasa gimi agire nga ga abavugahe tifuo nyasa kpara fu Mbori, akumba ue aye ku siminario yo. I aya fere i nga aDezire Yekova. Ani afura tipa he naima susa saa sa tipa Baibiri na gupai si apehe tipa gupai nayugo ndikidi pambori.

Mo aabi agu aboro naye ka bi ro re wai?

Mi aima kpinyemu wai i aafura si kini yugu gupai ayugo nga i ima ida kuti gupai i apehe na si nga rengo na wai i aayugo bara apai fere ku rogo gu Baibiri nga ga Katoriko naadu bere. Kusa, gu kura Dezire Yekova rimoko angia Mario, atona ye fuo re. Ko adu na zerangbaduse na kidu ni ruruko—aRago Nzengu dunduko, ka si vura du nga mai nana watadu uru na faa, ko anaanara nzoro nga ga siminario ti ndu uru ribua.

Ginipai gu kura abavugahe anaaberãha tipa wai ko anaaye fuo ro?

Mi anaasana yo asana i ye kaa du pati gaani sakapai, ono boro ho dagbayo yo nadi wirika Baibiri na nyanyakipaha te. Ono mi anaagbia ngbarago agbia ti ni tigimi. Mi aawirika dungu weneapai, wa ngbatunga gu nga ndu gupai Mbori ambu gene ti ni fu gbegberẽ apai gbiati rungo—nga gupai mi aima tona ni bakibangire tipaha tipa gbanga regbo.

Ya mo agu aboro naangera kuriro a asadi ka sa ro mo mbu wirika Baibiri?

Rogo gu garã nangia 1975, mi andu ku Roma yo bara dunguhe tipa ka sakapai tipa gimi bipai. Agu aboro naangera kurire a asadi ka aria gimi bipai, ono boro ho dagbayo yo namangisunge na Baibiri te. Ni yangaraha, rogo Ngi 9, 1976, mi akepai ku Roma yo tipa ka gumba gupai nga mi berewe nga boro Katoriko te. Tifuo auru ue kusa, mi aguari siminario yo na ki di gatara tipa ka ndu kadu pati gu dunguratise nga ga aDezire Yekova ni bambataha, nga gu naye kadu kusa nga si angia bakere dunguratise nga gu naakoda badungu adungurati. Apai dunduko adu kia ti gu mi ainidi he! ADezire Yekova dunduko naadu na Baibiri beyo na i kini pekefuo abagumbapai wa i aasaka rii-apai ni bakiakia.

Ginipai gamo aborokporo apehe tipa agi apai dunduko re?

Badunguyo adu na zinga na kini sogo re. Ono tie, mi aye ka ino gupai nga kura tooni tame re aawirikapai awirika na aDezire Yekova Lombardy yo, nga gu rago du Itaria yo ku nodiyo. Mi andu ka bi ko, na agu aDezire Yekova naadu yo aundo re mi gbia sunge na gu ba ka mi aaraka rogoho. Kusa rogo gu garã re, mi azi bapatiza na ki da ni Dezire Yekova.

Ya mo mo nabiranga tiro?

Mi abiranga tire kandara tooni te! Ni yangaraha, mi nabi tire nga mi nzunzu mbembedi na Mbori, mbiko mburu gupai mi nainihe tipa ko rii Baibiri, angianga riimburu wisigopai dudunguro tipa raka watadu agu asino nga ga kanisa ya. Na mi ima rengba ka yugopai fu aboro kidu na gu ida nga gupai mi ayugoho nga rengo.