Yaḇeaḇen ro Székesfehérvár, Hungaria, mnu ḇeba ḇena sarisa ro swaf taun nasyadi ri 1.000. Yaḇesaneso kaku fafisu yaswarepen mura ḇe roi ḇeḇye ḇa ḇeḇesya ro moḇ ine snar Mamun Dunya II.

Fafisu yaba ḇa ya, yaḇarekus apus ayesu. Yaswar kaku su, mboi yaswar syadi insar apus i, Elisabeth. Kukro iso ḇefnoḇek aya fa yakyar faro Manserendi. Fyor yaḇeumur taun ri kyor, aya ma insar apus yedi nuḇenadi ker nadi sifawi i ḇe Nadi Ḇeba. Ḇape, insape yafawi mnis nadi anya fyor yaḇeumur taun ri 20.

Fyor anya apus ayesu suiso ḇefaduru aya, kukro Awin ma Kamam sufararur ras ma roḇ insama bisa sukoḇes rum ḇe inggo. Bape, ro ras Sabtu ro minggu ḇesuru ya, nggokame nggoryur fa nggonan kayam. Nggoryur kayam radine ima roi yamarisen kaku na.

Ro taun 1958, roi Awin ma Kamam sumander na ndarirya. Pipi suryur na nasrow fa subuki kyoḇes rum. Inja, barpur mura yaḇarekus Awin ma Kamam su. Yamarisen kaku! Bape, roi anna nakain fyoro ḇa. Paik ri wonem raposa, Kamam iduf kanker rawo imar.

Yaḇesanekar kaku. Yaḇenadi bo yoḇo, ”Sye Mansren o, yor Au kwar fa wafnoḇek Kamam i fa iprei. Sai ḇewar fa kwarem fararyor ayena ḇa?” Yamarisen kaku yafawi Kamam i isya ryoro. Dek ḇe nanggi ke? Ḇaido isya wer ḇa kwar? Sneri iduf kaku fyor yamam romawa ḇesesya sikmasi sisya kaker.

Indokada ras nakam, ro taun ḇe taun, yara ḇe Kamam i kubir ḇyedi. Yakain wepur ro barpon kubir ani bo yaḇenadi, ”Mansren o, yor kaku ḇe Au. Imbe yafawi kaku Kamam yedi isya ryoro.” Aya kako yaḇenadi yor fafnoḇek insama yafawi rosai knam ro kankenem ine.

Fyor yaḇeumur taun ri 13, yafarkor wos Jerman. Yakara imbude kankarem ḇyena naisya ro syap-syap Jerman ḇefo kuker fawawi anna ke. Ro taun 1967, yafarkor ro Kota Jena, ramnai ro moḇ oso ro Jerman bar Wamurem. Yamarisen kaku yawasya syap-syap filsafat Jerman, ḇesyadi ḇeyawos kuker knam ro kankenem ine. Roi nabor ḇekofen ro dori na rya napyum raryano, oso ḇaḇeri ḇefrur fa yamarisen. Yaḇenadi ḇesya kwar.

Ro taun 1970, yakaḇer ḇe Hungaria. Ro diwa, yasrow Rose i, ḇarpur ya yana i ḇe swa yedi. Fafisu anya, Hungaria ryo ḇaḇ papoik pamarenta Komunis. Nufarḇuk fyoro ḇa mura, aya ma Rose nura ḇe Austria fa nuḇarek rodiwa. Nukara fa nuḇarek ro Sydney, Australia, moḇ imem yedi ḇyarek ro ya.

Ro Austria, yasmai fararur. Ras oso, bati yedi ro moḇ yafarur ikofen fakfuken yenakam nari neḇekarem ro Refo ya. Byuk ḇe aya syap ḇeḇeso ḇeḇeknam ro Refo. Yawasya pres syap anna kam ḇape yamarisen fa yafawi nabor syadi wer. Inja, yafas surat faro ḇefrur sae na, Saksi-Saksi Yahwe, fa yor syap nabor wer.

Nufarḇuk taun oser raposa, romawa babo Saksi oso ryama ḇe rum nuḇedi. Dun syap yor kwar anna ma ifuken yamarisen yaso fararkor Refo ke? Yakarem imbo. Yamarisen fafaya ḇa inja yafarkor rarwan ri suru ro minggu oser, ma rofyor nggofarkor ido indokada oras ri fyak!

Yamanen kaku roi yafarkor ro Refo na. Fyor Saksi Yahwe sifasnai Allah snonsnon Ḇyedi, Yahwe, ro Refo wos Hungaria, yakandor kaku. Yara ḇe gereja taun ri 27 kwar, mboi yarower ro ras oso ḇaim Allah snonsnon Ḇyedi. Fakfuken yena kam Refo ya kyarem na. Yamarisen kaku kukro kankarem ḇyena nasrow ma nun sneprei kaku. Rupa ra, insape yafawi snonggaku ḇemar kwar sya sima simnis ra snonggaku ḇeyenef monda, sifawi royo ḇaḇeri. (Pengkhotbah 9:5, 10; Yohanes 11:11-15) Aya kako yafarkor asas ro Refo, isoine ro dunya babo iyama, ”marmarya isyaḇa kwar”. (Fasasna [Wahyu] 21:3, 4) Yamarisen kaku fa yasrow Kamam i wer ro dunya babo kukro rodiwa, ”nari aḇiḇer ya isya”.​—Farfyar [Kisah] 24:15.

Rose ikako dakfarkor Refo ya. Ro paik ri suru monda, nufarkor pres syap oser nubukifarkor Refo anya! Nuso fananjur ari nakam ro Balai Kerajaan, moḇ Saksi-Saksi Yahwe seari ro na. Numarisen kaku numam snonggaku ḇero diansya siswaryae si, sifnoḇekyae si, ma seoser.​—Yohanes 13:34, 35.

Ro taun 1976, aya ma Rose nusmai ijin fa nusun ḇe Australia. Nusewar beri Saksi-Saksi Yahwe ḇero diwa. Sisaser pyum kaku nu ma sifrur nu fa numarisen nuḇarek rodiwa. Ro taun 1978, nuḇebaptis ḇe Saksi Yahwe.

Insape yasrow kankarem faro fakfuken fyor iwara yasewar na. Fafisu yafanam faro Allah Yahwe, yaḇaḇir yasmai kwar Kma ḇepyum kaku. (Yakobus 4:8) Ma, yawaf kaku fa yasrow kaḇer kuker Kamam ḇekapar aya ro dunya babo ro fafisu iyama.​—Yohanes 5:28, 29.

Ro taun 1989, aya ma Rose nuyun snemuk fa nukaḇer ḇe Hungaria insama bisa nufawar roi nukyar kwar na faro bati, kina, ma snonggaku ḇese ḇero diwansya. Nubuk farkarkor Refo ḇe snonggaku riutin kwar. Snonggaku ri 70 siso fa sfarmyan ḇe Yahwe I kwar, ma kako Awin yaswar kaku ani.

Ro swaf taun ri 17 kwar, yaḇenadi yor faro kankarem. Bape, swaf taun ri 39 ḇeuser ya, yor roi ḇese ro nadi yena isoine, ”Kma yedi ro nanggi, kasumasa kukro Kwarem nadi yena kwar fyor yaba ḇa ya.”