Xinyoʼlaak saʼ Székesfehérvár, jun li tenamit re Hungría li numenaq jun mil chihabʼ xtiklajik ut wank naabʼal resil chirix li xwanjik. Ra xyeebʼal, abʼan xokxo saʼ linchʼool chixjunil li rahilal li kikʼulmank saʼ li xkabʼ nimla yalok u.

Xinkʼiik rikʼin linnaʼchin ut linyuwaʼchin. Junelik wankebʼ saʼ linchʼool, qʼaxal wiʼ chik li xʼElisabeth linnaʼchin. Aʼan kixkʼut chiwu naq wank jun li Yos. Naq wank oxibʼ chihabʼ we kixkʼut chiwu naq tento tintijoq rajlal qʼoqyink li tij li kixkʼut li Jesús. Abʼanan toj 30 chihabʼ wank we naq xintaw ru li naraj xyeebʼal li tij aʼin.

Linnaʼchin ut linyuwaʼchin xineʼxkʼiresi xbʼaan naq linnaʼ linyuwaʼ kaw nekeʼkʼanjelak re naq teʼruuq xloqʼbʼal junaq li ochoch bʼarwiʼ tooruuq chi wank. Abʼan, rajlal oʼlaju kutan naqachʼutubʼ qibʼ joʼ junkabʼal re waʼak saʼ komonil. Junelik ninjultika li kutan aʼan.

Saʼ 1958 linnaʼ linyuwaʼ xeʼruuk xloqʼbʼal li rochoch. Kʼajoʼ xsahoʼk linchʼool, anaqwan tinruuq wank rikʼinebʼ! Abʼan moko najt ta kiwank li xsahil inchʼool xbʼaan naq waqibʼ po chirix aʼin kikamk linyuwaʼ xbʼaan li kanser.

Ra tzʼaqal li xinkʼul, kachʼin chik ma xinʼosoʼk. Jultik we naq nintijok ut ninye re li Yos: «Xintzʼama chaawu naq inkʼaʼ tkamq linyuwaʼ. Nawaj naq twanq wikʼin! Kʼaʼut naq inkʼaʼ xinaawabʼi?». Ninyoʼoni xnawbʼal bʼar wank linyuwaʼ. «Ma xko tawiʼ saʼ choxa, malaj ma bʼar chik wank?» Ninkaqalihebʼ li kokʼal li toj yoʼyokebʼ li xyuwaʼ.

Chiru naabʼal chihabʼ rajlal kutan ninwulak saʼ li muqlebʼaal. Ninwiqʼibʼ wibʼ chiru li naʼaj bʼarwiʼ muqmu linyuwaʼ ut nintijok chiru li Yos: «At Inyos bʼaanu usilal nawaj xnawbʼal bʼar wank linyuwaʼ» Ninpatzʼ ajwiʼ re naq tinxtenqʼa chi xnawbʼal kʼaru xyaalal linyuʼam.

Naq wank 13 chihabʼ we, xinʼok xtzolbʼal li aatinobʼaal alemán xinkʼoxla naq saʼebʼ li tasal hu li tzʼiibʼanbʼil saʼ alemán tintaw xsumenkil ebʼ linpatzʼom. Saʼ 1967 xkohin chi tzolok saʼ li tenamit Jena, li wank saʼ li najteril Alemania oriental. Xwil chixjunil ebʼ li tasal hu li xwulak saʼ wuqʼ, qʼaxal wiʼ chik li nekeʼaatinak chirix kʼaʼut naq wanko arin. Usta xwulak chiwu li xwil, abʼan inkʼaʼ xintaw xsumenkil ebʼ linpatzʼom. Inkʼaʼ ninkanabʼ xpatzʼbʼal re li Yos naq tinxtenqʼa chi xtawbʼal xsumenkil.

Saʼ 1970 xinsutqʼiik wiʼ chik Hungría, aran xinnaw ru li xRose li kikanaak choʼq wixaqil. Saʼebʼ li kutan aʼan, li tenamit Hungría wank rubʼel xwankil ebʼ li awabʼej li nekeʼxsikʼ li junaqik, joʼkan naq tojeʼaq li qasumlajik xooʼelelik Austria. Xqakʼubʼ xik Sydney, Australia bʼarwiʼ wank jun li wikan.

Saʼ junpaat xintaw linkʼanjel aran Austria. Saʼ jun kutan, jun li wechkʼanjel kixye we naq li Santil Hu naxsume yalaq kʼaru chi patzʼom ut xkʼe we wiibʼ li tasal hu li naʼaatinak chirix li Santil Hu. Saʼ junpaat xinchoy rilbʼal ebʼ li tasal hu. Saʼ xkʼabʼaʼ naq nawaj xkomon linnaʼlebʼ xintzʼiibʼa ebʼ laj testiiw re li Jehobʼa li nekeʼkʼubʼank re li tasal hu re naq teʼxtaqla we jalan chik li hu.

Saʼ li kutan naq xqabʼaanu jun chihabʼ li qasumlajik, xoorulaʼani jun li saaj al aj Testiiw. Kixkʼam chaq li hu li xinpatzʼ chaq ut kixyeechiʼi intzolbʼal rikʼin li Santil Hu. Saʼ junpaat xinkʼulubʼa. Saʼ xkʼabʼaʼ naq nawaj xnawbʼal xkomon li naʼlebʼ, nintzolok wiibʼ sut chiru li xamaan, chiru kaahibʼ hoonal.

Sa chaq inchʼool chi xtzolbʼal li Santil Hu rikʼinebʼ laj testiiw re li Jehobʼa. Naq xeʼxkʼut chiwu saʼ Linsantil Hu saʼ húngaro naq wank xkʼabʼaʼ li Yos, moko ninpaabʼ ta. 27 chihabʼ wokik chi xik saʼ miix ut maajunwa wabʼihom li kʼabʼaʼej: Jehobʼa. Xsach inchʼool rilbʼal naq moko chʼaʼaj ta peʼ chanru li Santil Hu naxsume linpatzʼom. Jun li naʼlebʼ li xintzol aʼan naq ebʼ li kamenaq maakʼaʼ nekeʼxnaw, chanchan tawiʼ naq sahebʼ xwara (Eclesiastés 9:5, 10; Juan 11:11-15). Xintzol ajwiʼ naq li Yos naxyeechiʼi naq twanq jun akʼ ruuchichʼochʼ bʼarwiʼ «inkʼaʼ chik taawanq kamk» (Apocalipsis 21:3, 4, Li Santil Hu, Sociedad Bíblica de Guatemala, SBG). Anaqwan kʼojkʼo inchʼool naq «teʼwakliiq wiʼ chik chi yoʼyo» ebʼ li kamenaq saʼ li akʼ ruuchichʼochʼ ut twil wiʼ chik linyuwaʼ (Hechos 24:15, SBG).

Li xRose xinxtenqʼa chi anchal xchʼool. Saʼ junpaat xookʼiik saʼ li qapaabʼal ut chiru wiibʼ po xqaraq li qatzolbʼal. Junelik nokoowulak saʼebʼ li xchʼutam rehebʼ laj Testiiw, nasach qachʼool chi rilbʼal chanru nekeʼrahok, nekeʼkʼehok ochochnal ut wankebʼ saʼ junajil (Juan 13:34, 35).

Saʼ 1976 xqakʼul qaleseens re qʼaxonk Australia. Naq xoowulak aran, xqasikʼebʼ laj Testiiw xqekʼa naq chanchano li xjunkabʼal naq xooʼeʼxkʼul. Saʼ 1978 xooʼok joʼ aj testiiw re li Jehobʼa.

Anaqwan xintaw xsumenkil ebʼ linpatzʼom li naxrahobʼtesi chaq inchʼool. Xintaw ajwiʼ jun li yuwaʼbʼej li qʼaxal chaabʼil: aʼ li Jehobʼa (Santiago 4:8). Ut qʼaxal oxloqʼ chiwu xnawbʼal naq nawoybʼeni rilbʼal wiʼ chik linkamenaq yuwaʼ sa li akʼ ruuchichʼochʼ li kixyeechiʼi li Yos (Juan 5:28, 29).

Saʼ 1989 xoosutqʼiik Hungría re xkʼebʼal chi naweʼk li chaabʼil esil rehebʼ li qakomon, li qamiiw ut jalan chik ebʼ li kristiʼaan. Xqamaatani xtzolbʼalebʼ chi siʼeent li kristiʼaan. Numenaq tana setenta rehebʼ xeʼok joʼ aj testiiw re li Jehobʼa, saʼ xyanqebʼ wank linnaʼ li qʼaxal ninra.

Chiru 17 chihabʼ xintijok chiru li Yos re naq tixsume linpatzʼom ut chalen 39 chihabʼ anaqwan kixkʼe xsumenkil chiwu. Saʼebʼ li qakutan toj nintijok chiru li Yos, abʼan anaqwan ninye re: «At inchoxahil Yuwaʼ, bʼanyox aawe naq xaasume chaq lintij li xinbʼaanu saʼ linsaajilal».