Ndofi wadia muna lumbu kina wasompa. E ndofi yayi ya nzingu kiawonso, wakanga e kangu dia tatidila nkaz’aku yo singika e ntantani zikunubwila.

Kansi, vava e mvu miviokanga, e ntantani muna longo zilenda fwasa e ngwizani eno. Adieyi obenze, nga e ndofi wadila nkaz’aku olungisanga yo e?

E ndofi i nsabi za longo, ke nsinga vana laka ko. O unu, wantu ayingi ke bezolanga ndofi a longo ko. Akaka bemonanga vo o dia ndofi a longo dina nze ngeye uyikangidi o nsinga vana laka. Kansi ongeye, badikilanga e ndofi aku nze nsinga utaninanga longo lweno. Nkento mosi nkumbu andi Megan, wavova vo: “Dimosi muna diambu disundidi o mfunu muna ndofi a longo, i zaya vo kana vabwidi e ntantani, ke mosi ko ovambana yo kwandi.” a Wau nuzeye vo ke nuvambana ko, dilenda sadisa mu baka nzengo za singika e ntantani zeno. Tala e babu, “ Ndofi a Longo ye Kwikizi.”

Mfoko a diambu: Avo ntantani luna zau muna longo lweno, e yayi i ntangwa yakumika e ndofi aku, vana fulu kia yindula vo kwadi sompa ko. Aweyi olenda kumikina e ndofi aku?

Fimpulula e ngindu zaku. “Lufwa kaka lukutuvambula.” Aweyi omwenanga e mvovo miami? Mina nga ngeye obakamene mu ntambu yovo luvuvamu mikutwasilanga? Avo ntantani zibwidi, nga oyindulanga vo ovambana yo nkaz’aku i ngindu zambote? Muna kumika e ndofi aku, diambote wabadikilanga longo lwaku se kangu dia kwele mvu.—Nkanikinu wa Nkand’a Nzambi: Matai 19:6.

Yindula mambu wamona. Nanga mana wamona kwa mase maku mekufilanga mu lembi zitisa e ndofi aku muna longo. Nkento mosi nkumbu andi Lea, wavova vo: “Vava yakala nleke mase mame bavonda o longo lwalu, nanga i diau dikumfilanga mu lembi zitisa e ndofi a longo.” Kansi ongeye kuvangi wo ko muna longo lwaku. Kufwete landa vilwa wa mase maku ko.—Nkanikinu wa Nkand’a Nzambi: Ngalatia 6:4, 5.

Keba e mvovo miaku. Avo mu tantana wina yo nkaz’aku, venganga e fu kia vova diambu dina okuyibanzila, nze “Ngiele kwame!” yovo “Ngiele vavi muntu okunzitisa!” Mvovo miami mifwasanga e ndofi a longo. Vana fulu kia singika diambu, mifilanga yakala yo nkento mu fingana. Vana fulu kia sadila mvovo miambi, olenda sadila mvovo emi: “Mbwene vo yeto awole ku makasi twina. Adieyi tulenda vanga mu singika e diambu diadi?”—Nkanikinu wa Nkand’a Nzambi: Ngana 12:18.

Songa vo ndofi aku ozitisanga. Tula e foto dia nkaz’aku vana osadilanga. Vovelanga mambu mambote ma longo lweno kwa akaka. Avo kuna ku nzo ko, kalanga ye fu kia bokela nkaz’aku konso lumbu. Sadilanga o mvovo “yeto.” Olenda vova vo, “omono yo nkaz’ame.” E mvovo miami milenda songa kwa wantu vo otoma zolanga nkaz’aku.

Sola aludiki ambote. Vava akazi azikuka ana basingika e ntantani za longo lwau mu mpila yambote. Ubayuvula: “Aweyi nubadikilanga e ndofi muna longo lweno? Aweyi ikunusadisilanga?” Muna Nkand’a Nzambi tutanganga vo: “O tadi ulengola tadi; o muntu olengola mpw’a nkwandi.” (Ngana 27:17) Landila nkanikinu wau, nga ke diambote ko mu lemvokela malongi ovewanga kwa akazi besingikanga e ntantani muna longo lwau?