Nakulizile mu tawuni lya Los Angeles, ku California, mu America, awantu wano wikalanga kwe co-o icifulo walinji nu lombwa nkaninye swinya wawomvyanga ni miti yino ikakola. Twakwasilwe 6, nene anemuno nakonka katote.

Twapepanga ku evangelical church. Nomba pano nafisile mu cimo ca wulumendo natalisile ukucita iviwipe. Pa mulandu wakuti nalinji mwi wumba lye wa kimbila mu calici, lyonsinye pa Sabata nayanga mukwimbila kwaya. Ne mukasi ke sabata, nayanga sana ku maparte, nawomvyanga nkaninye imilembo ino ikakola swinya nacitanga nu wuzelele.

Nafulwanga zuwa swinya nalinji nu lombwa. Nawomvyanga icanzo icili consinye ukumilako awantu. Vino nasambililanga ku calici vitalenzile indeke ukucita iviwipe. Nakunzile ukulanda ukuti: “Icilanduzi aca kwe Tatakulu, nenenye anemuno akawomvya pakulandula.” Mu 1960, pano nalinji ku sukulu lya ku secondari, wano walinji mu kaliwumba ka mapolitiki aka Black Panthers kano kalandilangako awantu pa nsambu zino wakwata, wantunkanga ukuti nacita iviwipe. Acino ninjizile mukawungwe ka kwe wakasukulu kano kalandilanga awantu pa nsambu zino wakwata. Ilivule twacitanga ivimvulunganya ica kuti wiyalanga na masukulu.

Ntacitanga vye ivimvulunganya lelo natalisile ukusansa awantu wano wafumile ku nsi yinji. Impindi zimwi twayanga mukutamba amafilimu na wawunji. Wanda wumwi twamvile e filimu yino yalandanga pe vino awazya wano wafumile ku Africa wawacuzyanga mu America. Pa mulandu wakuti mwe yo-o filimu awazungu wacuzyanga nkaninye awazya, twatalisile ukuma awazungu wano wizile mukutamba filimu. Ukufuma pa-a twayile mu mang’anda ya wazungu mukuwuma.

Pano nalinji nukufisya imyaka 20, nene ne songo wane nga nuzuna wane, twakunzile nkaninye ukucita uwunkalwe. Pa mulandu na vino twacitanga, wakapokola watuvwambanga. Umuzuna wane walinji mukaliwumba ka vipondo swinya nanenye nizyanga na wa mwe ka-a akaliwumba. Imiwele yane yayanga yikuwipilako vye.

Awakwasi we ciwuza wane walinji awa Nte. Wanda wumwi wanenile ukuti tukazanwe nawo mukulongana, swinya nazumizile. Pe wonye uwanda wuno nazanilweko mukulongana, naweni vino wa Nte wapusanako na wantu wanji. Wonsinye walinji na ma Baibolo yano wawomvyanga pa kulongana. Na wananye awatici walandangako amalyasi pakulongana! Nakunzile ukumanya ukuti izina lya kwe Leza we Yehova, swinya nakunzile nukwivwa kuno wakuliwomvya. (Amalumbo 83:18) Nanti aca kuti mwi wungwe mwalinji awantu wano wafumile ku nsi impusanepusane, nsitela ndolepo wakupatulalana, mutalinji akapatulula.

Ntalondanga ukuti nasambilila Baibolo ni Nte zya kwe Yehova, nakunzile vye ukulongana nawo. Wanda wumwi pano nalinji mukulonga na wa Nte, wawunji wayile ku pate. Pano walinji ku pate, wumile umulumendo mpaka awamukoma, pa mulandu vye wakuti wakanile ukuwapa ejaketi yino wazwite. Uwanda wuno wakwonsilepo wasimikanga vye pe vino wakomile umulumendo. Pano wawaluwulusyanga mu koti, walolanga ngati ni ciluwo cino wapanzile. Awavule wawapingulizile ukufwila mu cifungo. Nakunzile nkaninye amuno ntalinji na wawunji pe wo-o uwanda wuno wakomile we-e umulumendo. Natalisile ukupiluka vino nalinji swinya natalisile nu kusambilila Baibolo.

Nazanwanga nkaninye na wantu wano walinji na kapatulula ka nkanda, lelo wa Nte weni asa vino walinji. Ku cakulolelako, pano e Nte umuzungu wayile ku nsi yinji, wasecezizye awana wakwe ku lupwa lwa wantu awatifi ukuti wawasakamala. Swinya umuzungu wasenzile umulumendo uwa nkanda intifi ukuti awakwikala nawe amuno atalinji na pakwikala. Nasinincizizye ukuti wa Nte wakakonka vino vyawa pe Yohani 13:35 pano pakati: “Ndi mwakundana, apano awantu wonsi walimanya kuno mwewasambilizi wane.” Ntavwilikanga ukuti nazanile awanyina wane.

Vino nasambililanga mwe Baibolo vyalenzile njiluke ukuti nzipizile ukuleka ukucita iviwipe. Napilusile nkaninye pa kuti nakwivwana na wantu swinya naweni ukuti apano imikalile yane yalinji nukuzipa. (Waroma 12:2) Mukupita kwa mpindi nalundulusile. Mu January 1974, natazizwe. Imba Inte ya kwe Yehova.

Napano nabatizizwe nye, akakufulwa zuwa keni kasyazile. Fwandi nelezyanga na maka ukuti pa kuti ntafulwa zuwa. Ku cakulolelako, wanda wumwi pano twawizyanga ku ng’anda ni ng’anda, umung’o wizile ayiwa e redyo yino yalinji mwe motoka yane, avyo twatimbilikine, papo pano nati namulema nukumulema, avyo wasile aponye redyo, atwalilila nukusamala. Nalile nasimicilako wanji pe co-o cino cacitisile, e eluda wankolowozizye ukuti: “Mwanga mumuleme nga temwamucita wuli?” Vino we-e eluda wankolowozizye vyalenzile njelenganyepo sana, paponye naweni ukuti nzipizile ukuwombela pa kuwa nu mutende.

Mu October 1974, natalisile umulimo wakusambilizya awantu Baibolo, wuno nawombanga amaawazi 100 cila mwezi. Mukupita kwa mpindi nawomvileko na pa maofesi makulu aya Nte zya kwe Yehova ku Brooklyn, mu New York. Mu 1978, nacozilemo ku Los Angeles, mukusunga mayo pano walwile. Pansizi ya myaka yiwili, natwite Aarhonda, e wakwane wino nakunda nkaninye. Wanjavwizye nkaninye ukusunga mayo pano walwalanga ukuficila ni mfwa yakwe. Mukupita kwa mpindi nene ne wakwane, twazanilwe kwi Sukulu lya Gilead swinya watutumile ukuya mukuwombela wu mishonari ku Panama, nanombanye akuno tucili tukawombela wumishonari.

Ukufuma vye pano nabatizizwe, awantu wacili wakacita vino vikandumya umwezo. Nga kwawa wino wacita wo-o, nkafumapo nanti ukwelezya vye ukucitako vino vingalenga ncefyeko uwukali. Awantu awavule nye ukuwikako ne wakwane wakansalifya pe vino nkacita nga nafulwa. Nanemweneco nye nkazunguka vino napiluka. Nsilonda ukuyisalifya pe vino napilula imiwele yane, amuno namanya ukuti e Baibolo yawa na maka yakupilula umuntu.​—Waheberi 4:12.

Vino nasambilila mwe Baibolo vyalenga imbe ne muntu umuzima. Nkakwivwa na wantu wanji. Yo-o impindi nsikuma awantu, lelo nkawavwa ukusambilila pe Leza. Nasambilizyanga wumwi wino twapusine nkaninye pa sukulu swinya tutivwananga. Walile wabatizwa, twatalisile ukwikala nawe. Yo-o impindi we ciwuza wane wino nakunda nkaninye. Nene ne wakwane twavwa awantu ukucila 80 ukusambilila Baibolo. Yo-o impindi wonsinye wa-a Ante zya kwe Yehova.

Nkasalifya Yehova nkaninye pe vino wanjavwa ukupiluka. Na pakumpa awanawitu wano wakansansamusya.