Xinasjik Acul, pan jenaj abʼix reh i Qiche, reh i tinamit Guatemala. Reʼ i nufamilia aj Ixil taqeh, jun tzuhbʼ chi kʼachareel kichalik ruukʼ taqeh maya. Kinqʼorik naq kaxlan qʼorik xa reʼ laʼ xnutijej i qaqʼorbʼal. Xinkʼihik noq wilik i kʼaxkilal ruum i qʼaqʼinik re’ xchahmik 36 haabʼ. Chupaam i qʼaqʼinik reʼreʼ xikimik kʼih taqeh i aj Ixil.

Noq wilik naq weh kijibʼ haabʼ, reʼ waas wilik naq reh wuquubʼ haabʼ. Kʼoʼnik naq irubʼan ruukʼ jenaj granada eh reʼ i wilih xker. Ruum i wilih maʼ kinilwiik ta chik eh reʼ waas xkimik. Ruum aj reʼ pan nukʼisinal xinooj pan jenaj molaabʼ reh moywach, pan nimlaj tinamit Guatemala, ahaʼ wiiʼ xnutijej rilariik i braille. Maʼ jaruuj xnunabʼej chaaj woʼ reet taqeh ajkamanoom ma inkiyeʼew ta naq qʼabʼ chi ne kinqʼorik kuukʼ taqeh tokoom halakʼun eh reʼ taqeh wuchʼihiil maʼ kinkiqʼorej ta naq. Xa wukʼteel woʼ naq. Xa inwaaj naq chik chi ne imponik i kiʼibʼ poh reh chi ne kinikʼik ruukʼ i nutuut pan paat. Qʼeʼ naq chaqʼlaam wuukʼ xa reʼ laʼ xkimik noq wilik weh lajeebʼ haabʼ. Qʼeʼ xtiʼbʼik nukʼux ruum chi xnuqʼebʼ i kʼachareel reʼ i ti q’e’ kiraaj.

Noq wilik naq weh 11 haabʼ xinchalik pan nuyuqʼul. Xinkʼacharik ruukʼ i rakʼuun i wajaaw eh i rufamilia. Xkiyeew nuwaʼ nusoʼ xa reʼ laʼ maʼ ajwach ta naq kirutobʼeej pan nukʼaxkilaal. Wilik pech xa inupahqaaj naq chik reh i Dios ¿ti chaaj woʼ reet xkimik i nutuut? eh ¿chaaj woʼ reet maʼ kinilwik ta chik? Reʼ tinamit inkiqʼor naq weh chi reʼ kʼahchiʼ nukʼuluum reʼ naq i reʼ iraaj i Dios. Ruum aj reʼ xnukapaaj chi reʼ i Dios maʼ korik ta wach i rubʼanooj. Mi xuyeew ta naq riibʼ chi nuwach xnukansaj naq wiibʼ.

Noq maʼ kinilwik ta naq chik, xa chuʼnchel naq chik inkibʼan weh. Pan nukʼisinal kʼih pech xinkichop eh maʼ xooj ta nuqʼor keh i policía ruum chi xnukapaaj chi maʼ ajwach ta kiraaj. Reʼ i tinamit xa kʼaxik chik noq kinkiqʼoreej. Tiʼ naq nukʼux eh maʼ nukʼax ta naq wach wihʼik kuukʼ i kʼachareel ruum chi maʼ inuchikʼaa ta naq chik nukʼux chi kiij.

Noq wilik naq weh 13 haabʼ jenaj kaxaro testigo reh Jehová xinkiqʼoreej noq kʼoʼnik naq inubʼan pan escuela. Jenaj ajkuhtaneel tiʼ naq kirikʼraj ruum xuqʼor keh chi ne naq kinkiqʼoreej. Reʼ keh xkiqʼor weh chi reʼ i Santo Laj Huuj iruqʼor chi reʼ taqeh maʼ kiʼilwiikʼ ta na woʼ chik kiʼilwiikʼ eh chi reʼ taqeh kamnaq na woʼ chik kuktik cho (Isaías 35:5; Juan 5:​28, 29). Inukʼax naq wach kibʼirjik xa reʼ laʼ ruum chi maʼ hin ta okrinaq chi qʼorik, maʼ kinqʼorik ta naq. Atoobʼ ta kinyoʼjik naq chi qʼorik. Reʼ keh maʼ xiqʼuhtik ta eh chaqʼlaam naq taqeh wuukʼ. Maʼ xkikanaaʼ ta kʼulik reh rukʼutjik weh iruqʼor i Santo Laj Huuj. Kibʼehiik naq 10 kilómetros (6 millas) eh kiʼikʼik naq pan taq rax yuuq’ reh ponik pan nuyuqʼul.

Noq reʼ i waas xuqʼor weh nikʼwach naq i kiwiiʼ xuqʼor chi nebʼaa naq taqeh xa reʼ laʼ holohik naq inkitiqʼaa kiibʼ. Inkʼutinik naq chi kinkaaj eh inkiyeew naq nukooch, inukoj naq wach chi xa reʼ woʼ taqeh i manlik ajnimaneel ne inkibʼan i wilih.

Chi wib’il inutijej naq wiibʼ chi riij i Santo Laj Huuj. Noq inukoj taqeh i huuj pan braile inureq naq chi riij i kʼahchiʼ nutijem. Xa reʼ laʼ wilik naq taqeh i maʼ inukoj ta naq wach jeʼ rukabʼ noq inukʼaxkileej naq rukojariik chi reʼ i Dios iraaj naq nuwach eh chi reʼ i tokoom ne kinkil jeʼ rukabʼ kiril i reh. Xnureq chi riij chaaj woʼ reet iruyeʼew qʼabʼ chi ne inwihʼik i mahk wach akʼal xa reʼ laʼ xnukʼaxkileej rilariik chi re’ reh jeʼ rukabʼ naq jenaj ajabʼees ajkʼaxool. a

Chi qʼun qʼun xnureq ch iriij iruqʼor i Santo Laj Huuj eh reʼ i nukʼapebʼal xjaljik. Jeʼ rukabʼ noq xnutijej chi reʼ i Dios intiʼbʼik rukʼux noq qojikʼik pan tiʼ kʼaxik, chi riij taqeh i rajkamanoon inkikʼul i tiʼ kʼaxik. Reʼ reh iruqʼor: «Xwil chik chi korik i tiʼ kʼaxik inkikʼul i nitinamiit [...] Wehtʼal chik i kitʼkiil kikʼaxkiil» (Éxodo 3:7, RLLH). Noq xnukoj rehtaal chi reʼ Jehová wilik ruchaqʼlamiil, xnuqʼasaj i nukʼachariik reh eh xnubʼan reʼ imponik chuwach. Pan haabʼ 1998 xnuqahsaj nuhaaʼ eh xnubʼan chi hin testigo reh i Jehová.

Haabʼ chik nuqahsam nuhaaʼ xinwihʼik pan jenaj tijinik keh taqeh i kʼachareel maʼ kiʼilwiik ta pan tinamit Escuintla. Jenaj kʼamal bʼeeh reh i molaabʼ pan tinamit reʼreʼ xukoj rehtaal chi i nukʼaxkileej naq i ojik pan moloj iibʼ ar Acul, ruum chi jeʼ naq najtil i b’eeh kibʼehik naq taqeh kaxaro testigo reʼ inkikʼuhtaaj weh chi riij i Santo Laj Huuj kinb’ehik naq i hin. Reh nutobʼjik, jenaj hermano xureq jenaj familia testigo reʼ chi ne inkiyeew nuyeʼaabʼ pan kipaat reh nutobʼjik chi ojik pan moloj iibʼ. Ko yuʼnaak kinkichaʼjeej jeʼ rukabʼ reh i kifamilia.

Kʼih naq ne inuqʼor taq aweh chi riij i kichaqʼlamiil kikʼuhtaam weh taqeh hermano. Chikʼlik nukʼux chi kuukʼ taqeh testigo reh i Jehová wilkiin chi kixilak i manlik ajnimaneel (Juan 13:​34, 35).

Maʼ inwikʼraj ta chik wiib’ chi maʼxta hin kamaj, chi maʼxta chik wuy’unik. Yuʼnaak re’ i nukʼachariik wilik chik rukorkil. Maʼ inukapaaj ta chik chi riij chi maʼ kinilwik ta chik. Inukoj laʼ i nuqʼiij reh kitobʼjik taqeh kʼachareel reh runabʼjiik chi riij irubʼesaj qeh i Santo Laj Huuj. Reʼ hin jenaj keh i kinilwik reh i molaabʼ eh inuyeew juʼjun taqeh kʼuhbaal chupaam taqeh molaabʼ maʼ najt ta ayuʼ. Inutyooxeej woʼ chi inuyeew taqeh i kʼuhbʼaal chupaam taqeh moloj iibʼ ahaʼ wiiʼ kiponik i kʼihal chi kʼachareel.

Xnubʼan graduar wiibʼ pan 2010 pan Escuela de Entrenamiento Ministerial (yuʼnaak i rubʼihnaal Escuela para Evangelizadores del Reino) ar El Salvador. Reʼ escuela wilih hin rutobʼeem reh kitobʼjik taqeh chi korik i nuhermano. Re’ tijinik wilih rukʼuhtaam weh chi hin loqʼ chuwach i Jehová eh chi qʼeʼ kirukʼax, reʼreʼ xubʼan chi reʼ hin ne inubʼan i rukamaj.

Reʼ Jesucristo xuqʼor: «Maʼ kʼisiin ta nimal i suqkiil kʼuxliis wilik ruukʼ i yeʼooj chuwach i kʼuluj» (Hechos 20:35, TNM). Atoobʼ ta xnukapaaj chi maʼ ne ta naq irubʼan chi jeʼ reʼ, yuʼnaak inwikʼraj chi ne inutobʼeej taqeh tokoom.