1, 2. Pirang’o Jumulembe pa Yehova giworo cik m’uweco iwi kendo kendi ma cuu? (Nen cal mir acaki.)

GAZETHI moko mi ng’om mi Pays-Bas ukoro kite ma judong dini gikendiri ko i coko migi moko. Eyero kumae: “Dhanu ma dupa gikendo kendi ma kumeno kumeno, asagane i saa ma piny utie lieth.” Ento gazethine umedo kumae: “Jumulembe pa Yehova lundo gikendo ngo kumeno, i coko migi mir adhura. Awobi ku judongo gikendo koti ku kravat, man awiya ma nyir ku jumamon ke gikendo jipe ma boco, re nang’u de etie asu model mi rundi maeni.” Andha de wang’ ma pol dhanu gibed gifoyo Jumulembe pa Yehova nia gikendiri ku ‘kendi m’umaku piny, ma cuu man mi woro, m’uromo ku ju m’ubetimo ni Mungu.’ (1 Tim. 2:9, 10.) I verse maeni jakwenda Paulo ubino weco pi mon, ento cik maeno utie pi jumaco ma gi Jukristu bende.

² Nitiyo ku cik m’uweco iwi kendo kendi ma cuu pire tie tek iwa wa dhanu pa Yehova man pi Mungu ma wabetimo ire bende. (Tha. 3:21) Gin ma Lembagora uyero iwi kendi man ruko, ubenyutho kamaleng’ nia Ubimo ma malu ngbir uketho cik iwi lembe m’uneno kendi pi bero mi jutic pare mandha. Pieno, wacikara ngo kende kende ning’iyo kendi kunoke rukiri ma wafoyo wan giwa. Wacikara bende niparu pi gin ma nyayu anyong’a i Ubimo ma malu ngbir, Yehova.

3. Ponji ma kani ma wacopo nwang’u niai kud i Cik ma Mungu umiyo ni nyithindho mir Israel?

³ Ku lapor, Cik pa Musa ubino ku telowic ma kamaleng’ m’ubed ugwoko nyithindho mir Israel i kum kura kwo ma reco mi thek m’udhokogi. Cikne unyutho nia Yehova udagu magwei bongu ma nyutho ngo tung’ tung’ i kind ng’atu ma nico ku dhaku. I rundi mwa eni, jubed juweco iwi bongu ma nyutho watkum mi nyodo. (Som Poi mi Cik 22:5.) Niai kud i cik ma Mungu umiyo iwi kendi, waneno kamaleng’ nia Mungu umaru ngo kendi ma ketho juneno ng’atu ma nico calu ng’atu ma dhaku man ng’atu ma dhaku calu ng’atu ma nico kunoke ma ketho ebedo tek ning’iyo ng’atu ma nico ku ng’atu ma dhaku.

4. Ang’o ma copo konyo Jukristu nitimo ng’iyong’ic ma cuu iwi bongu ma giromo kendo?

⁴ Cik pa Mungu copo konyo Jukristu nitimo ng’iyong’ic ma cuu iwi lembe m’uneno kendi. Eno ke nik’ebed kabedo mwa, suru mwa, man lietho kadi ng’ico mi kaka ma wabekwo i iye, ucikere ngo nicerowa niworo cikne. Watie ngo ku yeny ma nia jukejuriey iwa list mi bongu ma cuu kunoke ma cuu ngo. Ento wacikara nilubo cik mir ukungu mi Lembagora m’uyiyo nikendo bongu ma wafoyo. Dong’ wakenenu cikne moko ma copo konyowa ning’iyo “yeny pa Mungu m’e ber, m’eyiyere man m’e leng’ de,” kinde ma wabeng’iyo bongu ma wabikendo.​—Rum. 12:1, 2.

5, 6. Kendi mwa romo bedo kud adwogi ma kani iwi jumange?

⁵ Tipo ma leng’ utelo wi jakwenda Paulo niketho nwoc iwi cik mir ukungu ma nwang’ere i 2 Jukorintho 6:4. (Som.) Kite ma dhanu neno kowa ucikere ninyutho nia watie kit dhanu ma nenedi; “kum dhanu neno ayi ma woko.” (1 Sam. 16:7) Pieno, calu ma watie jutic pa Mungu, wanyang’ nia ukwayu ngo kende kende kendi mwa ubed gin ma nyayu anyong’a i iwa kunoke gin ma wafoyo. Cik mir ukungu ma wabetiyo ko ucikere nicwaluwa nikendo ngo kendi ma ridojo, ma weko watkum moko woko man ma cewo ava mi tarwang’. Thelembene tie nia wacikara ngo nikendo kendi ma weko watkum m’upondo kamaleng’. Kendi mwa ucikere ngo niketho lewic uneg dhanu m’ubenenowa kunoke ucwalgi nineno kaka mange.

⁶ Saa ma wabenen ma leng’, wambe ku cilo, wakendo kendi m’umaku piny man warukara ma ber, dhanu copo worowa calu jutic pa Yehova m’Ubimo ma malu ngbir, man gicopo foyo nitimo ni Mungu ma wabetimo ire. M’umedo maeno, kendi mwa nyutho bende lembe ma ber iwi dilo ma watie i iye. E eno romo ketho dhanu gibedo ayika niwinjo lembkwenda mwa ma bodho kwo.

7, 8. Asagane i saa ma kani m’ubekwayu wakend kendi m’umaku pinyi?

⁷ Calu ma wabetimo ni Mungu mwa ma leng’, kendi mwa ucikere ninyutho woro ni umego ku nyimego mwa, ni dhanu mi teritwar ma waberweyo i iye, man ucikere nimiyo yung ni Yehova. (Rum. 13:8-10) Wacikara nikendo kumeno, asagane kinde ma wan’i coko kunoke wan’i lembanyong’a. Wacikara nikendo i ayi “m’uromo ku [dhanu] ma gituco ya giworo Mungu.” (1 Tim. 2:10) Re kendi ma romo yiyere i kabedo moko, romo yiyere ngo i kabedo ma kucelo. Pieno, dhanu pa Yehova i wang’ ng’om zoo gineno lembe ma dhanu gitimo i kabedoman kara kud giketh ng’atu moko ukier.

⁸ Som 1 Jukorintho 10:31. Saa ma wabecidho i coko ma dongo, ubekwayu wakend kendi ma cuu man m’umaku piny, kakare nikendo kendi m’unyutho kite ma rac mi ng’om maeni. Kadok nwang’u wan’i kabedo ma jugonjowa i iye kunoke wabewirara nyanok, kadi ke i wang’ coko kunoke i ng’eye de, wacikara ngo nikendo kendi ma nyakumeno kumeno kunoke ma rac. Eno biketho wabibedo kud anyong’a ninyuthara nia watie Jumulembe pa Yehova. Pieno, gin moko mbe ma bicerowa nimiyo lembatuca, ka kaka unen.

9, 10. Jufilipi 2:4 ucikere nikonyowa nenedi pi kendi mwa?

⁹ Som Jufilipi 2:4. Pirang’o Jukristu gicikiri niparu pir adwogi ma kendi migi copo bedo ko iwi Juyic wadi? Thelembene acel utie nia dhanu pa Mungu gitimo kero migi ceke nilubo juk ma e mi Biblia: “Pieno, wuneg watkumwu ma gin’i ng’om pi lembe m’uneno lembsasa mi tarwang’, sasa, ayiri.” (Kol. 3:2, 5) Umego ku nyimego mwa moko giwok kud i timo maeno ma reco, ento gibenyego fodi asu i dhu timone, pieno wabemito ngo waketh woro cik maeno udok tek igi. (1 Kor. 6:9, 10) M’umbe jiji, wabemito ngo waketh anyego maeno ma gibenyego udok igi tek.

¹⁰ Saa ma watie karacelo kud umego ku nyimego mwa, kendi mwa ucikere niketho cokiri ubed bor ku dhanu ma gitie ku timo m’ucido. Wacikara nikendo kendi ma cuu, kadok nwang’u wa n’i karacelo i coko kunoke kaka mange bende. Watie agonya ning’iyo bongu ma waromo kendo. Re wan ceke wacikara nikendo bongu ma romo royo ngo paru ma reco yot yot iwi jumange ento ebed ma romo konyogi nibedo leng’ i paru, i wec man timo migi kara giwor cik pa Mungu iwi leng’o. (1 Pet. 1:15, 16) Kum mer mandha “etimere rac ungo, eyenyo bero pare gire ngo.”​—1 Kor. 13:4, 5.

11, 12. Wacikara niketho lembang’o i paru mwa kinde ma wabeparu pi bongu ma wabikendo?

¹¹ Saa ma jutic pa Mungu gibeng’iyo bongu ma giromo kendo, wigi wil ungo nia “gin ceke bedo ku nindone.” (Ekl. 3:1, 17) M’umbe jiji, wakendo bongu nimakere ku saa kunoke nindo, ng’ico kunoke lietho, man kite ma kwo man lembe utie ko i kabedo ma wa n’i iye. Ento cik pa Yehova lokere ngo, nik’ebed ng’ico kunoke lietho.​—Mal. 3:6.

¹² I saa ma piny lieth, ecopo bedo lembe ma tek nikendo bongu mi woro man m’umaku piny. Re umego ku nyimego mwa gifoyo dit ka wakendo bongu m’uridowa ngo kunoke ma tie ngo wongla wongla akeca. (Yob 31:1) Bende ka wabenambu i dhu wat, niwacu i dhu nam kunoke i wabekwang’ i nam, wacikara nikendo bongu m’umaku piny. (Rie. 11:2, 20) Kadok nwang’u i ng’om dhanu gikendo bongu ma kumeno kumeno ka gibekwang’ i nam, re wan ma wabetimo ni Yehova wacikara nidieng’ pi Mungu ma leng’ ma wamaru.

13. Juk ma nwang’ere 1 Jukorinto 10:32, 33 cwaluwa nenedi ning’iyo bongu ma waromo kendo?

¹³ Cik mange mir ukungu ma pire tek unuti ma romo konyowa kinde ma wabeng’iyo bongo m’ukwayu wakendi. Utie niparu pi pidocwiny mi jumange; kadok gitie Jukristu wadwa kunoke ngo de. (Som 1 Jukorintho 10:32, 33.) Wacikara nineno ma tek nia wakendo ngo bongu ma romo kiero jumange. Paulo ukiewo kumae: “Ng’atuman m’i kindwa ucikere ninyayu anyong’a i wadi, man nitimo ire lembe ma ber pi niteng’e.” Man enyutho thelembe, eyero kumae: “Kum Kristu de unyayu ngo anyong’a i iye gire.” (Rum. 15:2, 3) Ku lemandha, Yesu uketho timo yeny pa Mungu man konyo jumange ni gin ma kwong’a, kakare niyenyo bero pare. Pieno, wacikara ngo nikendo bongu ma wamaru wan, tekene eromo ketho dhanu gikwero lembanyong’a ma waberweyo.

14. Junyodo gicopo ponjo awiya migi nenedi kara giyung Mungu nikadhu kud i kendi migi?

¹⁴ Junyodo ma Jukristu gitie ku tic mi ponjo juruot migi nitiyo ku cik mi Biblia. Eno ubekwayu nia gin karacelo kud awiya migi gitim kero ninyayu anyong’a i Mungu nikadhu kud i kendi man ruko migi. (Rie. 22:6; 27:11) Junyodo gicopo pidho i adunde awiya migi ayi ma giromo woro ko Mungu nikadhu kud i lapor migi man ponji ma gibeponjo kogi ku mer. Wabefoyo junyodo ma giponjo awiya migi ninwang’u bongu m’umaku piny. Bongune utie ngo kende kende m’awiyane gifoyo, ento bende ma biketho gibiyungo Yehova Mungu ma gibetimo ire.

15. Ang’o m’ucikere nitelo wiya saa ma wabeng’iyo bongu mwa?

¹⁵ Biblia tie ku juk ma beco ma copo konyowa nitimo ng’iyong’ic ma miyo yung ni Mungu. Ento ng’atuman kendo bongu m’efoyo en. Bende kadok nwang’u wang’iewo bongu nimakere ku jamcingwa de, bongune cikere nibedo ma leng’, m’umbe ku cilo, m’umaku piny, ma juromo kendo nimakere ku hali, man kaka ma wabekwo i iye.

16. Pirang’o etie lembe ma pire tek nia waii nikendo kendi ma cuu?

¹⁶ Wacikara niyiyo nia etie lembe ma yot ungo ninwang’u bongu ma cuu. I duka ma pol jubed julworo bongu ma dhanu umaru akeca, pieno eromo kwayu nia wakoy saa man watim kero ma lee pi ninwang’u robe, jip, bluz man torozi kunoke koti m’uridowa ngo. Ento, ng’ei nia umego ku nyimego gibifoyo kero m’itimo pi ninwang’u bongu ma cuu man m’umaku piny. M’umedo maeno, anyong’a ma wanwang’u ka wakendo kendi ma yungo Wegwa mi polo, usagu lembe ceke ma watwonara ko.

17. Ang’o ma copo konyo umego ning’eyo ka nyo eromo tungo yir i tike kunoke ngo?

¹⁷ Nyo etie lembe m’umaku piny nia umego gitung yir tikgi? Cik pa Musa ugam uyiyo nia jumaco gitung yir tikgi. Ento Jukristu gitie ngo i the Cik pa Musa, man etie de ngo cik nia giwore. (Law. 19:27; 21:5; Gal. 3:24, 25) I suru moko, ka ng’atini uyiko yir tike ma ber, junene ngo rac man etie de lembe mi woro. Ecopo ketho de ngo nia dhanu gikwer lembanyong’a mi Ker. Umego moko ma gitie ku rwom de gitie ku yir i tikgi. Re kadok kumeno de, umego moko romo nwang’u nia kwayu ngo gitung yir i tikgi. (1 Kor. 8:9, 13; 10:32) I suru mange lundo dhanu gitungo ngo yir i tikgi man eyiyere de ngo ni umego ma gitie Jukristu. I suru ma kumeno, kan umego utungo yir i tike, eromo ngo nimiyo yung ni Mungu kadi “nibedo ng’atu m’adote mbe i wiye.”​—Rum. 15:1-3; 1 Tim. 3:2, 7.

18, 19. Mika 6:8 konyowa nenedi ninyayu anyong’a i Mungu i kite ma wakendara ko?

¹⁸ Wabedwoko foyofoc ni Yehova pilembe enurowa ngo ku list mi bongu man mi jamruko ma cuu kunoke ma cuu ngo ma wacikara nikendo. Ento eyiyo iwa nia watii ku bedagonya mwa man watim ng’iyong’ic ma cuu m’ujengere iwi cik mir ukungu mi Biblia. Pieno kadok nwang’u wabeng’iyo bongu kunoke kite m’ukwayu wurukara ko, wacopo nyutho nia wabemito ‘wotho ku Mungu mwa ku molcwiny.’​—Mik. 6:8.

¹⁹ Nibedo ku molcwiny kunoke jwigiri konyowa i iye bende niyiyo nia Yehova tie leng’ man nia en re m’eromo pi nitelo wiwa kum cik pare utie m’usagu zoo. Ekonyowa bende niworo paru man kite ma jumange giwinjiri ko. Pieno, ka wabekwo nimakere ku cik pa Mungu man wabeworo kite ma jumange giwinjiri ko, eno nyutho nia ‘wabewotho ku Mungu ku molcwiny.

20. Kendi man ruko mwa copo konyo jumange nenedi?

²⁰ Ng’iyong’ic ma watimo pi kendi ucikere ngo niketho dhanu gipar lembe mange m’uweko nibedo ku paru ma nia watie jutic pa Yehova. Umego ku nyimego man dhanu ceke gicikiri nineno nia andha wacungo kaka Mungu mwa ma pwe. Cik pare utie pwe, man watie kud anyong’a nimoko i kume. Umego ku nyimego dupa giromo ku foyofoc iwi kite ma ginen ko i wang’ dhanu man pi kura migi ma beco m’ubecwalu dhanu m’adundegi atira kara gituc niyiyo rwonglembe mi kwo ma nwang’ere i Biblia; lembe maeno miyo dwong’ ni Yehova man nyayu anyong’a i iye. Ma jiji mbe ng’iyong’ic mi rieko ma wabed watimo iwi kendi bimiyo yung ni Ng’atu m’ubedo aronya “ku yung man dwong’.”​—Zab. 104:1, 2.