1, 2. Ноға Иегованың киречілері пӧзік нормалар хоостыра тонанчалар? (Статья алнындағы сомны кӧріңер.)

 «ІЗІГ полған, аннаңар кӧбізі неформальнай кип-азахтығ полған». Пір нидерландскай газетада тигірибнің устағҷыларының чыылиинаңар іди пазылған. Олох статьяда Иегованың киречілерінің конгрезінде кізілер саңай пасха кӧрінчелер тіп пазылған: «Анда оолахтар даа пиджактығ паза галстуктығ чӧрчелер, хызыҷыхтарның паза ипчілернің юбкаларының узуны, тізең, чахсы тонанып оңнапчатханнарын кӧзітче. Олох туста, олар мода хоостыра тонанчалар». Я, Иегованың киречілерін удаа «андар-мындар иртіре сабылбин, иптіг тонанчатхан» паза «Худайға киртістіг кізілерге килістіре чахсы киректернең» чазанчатхан ӱчӱн махтапчалар (1 Тим. 2:9, 10, НТ). Мында Павел христианскай ипчілердеңер чоохтапча, че иреннер дее пу принцип хоостыра тудынарға киректер.

² Иегованың нымысчылары кип-азахты, чахсы сағынып алып, таллапчалар. Пістің тастындағы кӧрімібіс Худайға даа уғаа аарлығ (Быт. 3:21). Ызых Пічікте кип-азахтаңар паза тастындағы кӧрімнеңер чоохталчатханы іле кӧзітче: Тилекейнің Ээзі позының нымысчылары хайди кӧрінерге кирек полчатханына нормалар турғыс салған. Хайди кӧрдібіс, пу сурығда піске позыбыстың хынығыстарыбыснаң на устанарға чарабас. Піске Иегова Худайның кӧңнін санға аларға кирек.

3. Кип-азахха Худай хайди кӧрчеткенінеңер Моисейнің чахиинаң ниме піліп алчабыс?

³ Израиль чонына Худай пирген чахығ оларны ибіркі чоннарның сайбах чуртазынаң арачылаан. Пу чахығда іле кӧрінче: ир алай ипчі кізі бе пілҷее чох иде тонан салған кізілердең Иегова чиркенче. (Второзаконие 22:5 хығырыбыс.) Худай ир кізее, ипчі кізі чіли, ипчі кізее, ир кізі чіли, алай хайдағ кізі піл полҷаа чох иде тонанарға чаратпинча.

4. Кип-азахнаң палғалыстығ сурығларда орта пӧгіннер аларға христианнарға ниме полызар?

⁴ Худай Сӧзіндегі принциптер христианнарға, олар хайда даа чуртазалар, анда хайдағ даа климат паза хайдағ даа культура полза, кип-азахнаң палғалыстығ сурығларда орта пӧгіннер аларға полысчалар. Піске, христианнарға, хайдағ фасоннығ алай стильліг кип-азахты кизерге чарапчатханын алай чарабинчатханын кӧзітчеткен списоктар кирек чоғыл. Піс Библияның принциптерінең тузаланчабыс, олар піске Худайның кӧңнін піліп аларға полысчалар, че олох туста, кип-азахты піс позыбыс таллапчабыс (Рим. 12:1, 2). Ол принциптернің піреезін кӧрібізеелер.

5, 6. Хайди пістің тастындағы кӧрімібіс пасхаларына теелер?

⁵ Ызых хут Павел илҷее 2 Коринфтегілерге 6:4-гі (хығырыбыс) аарлығ принципті пастырған. Пістің тастындағы кӧрімібіс пістеңер кӧп ниме чоохтапча. Тастындағы кӧрімібіс ибіркі кізілерге удаа піс хайдағ кізілер полчатханыбысты кӧзітче (1 Сам. 16:7). Аннаңар піс, Худайның нымысчылары, пілчебіс: постың на кӧңніне кірчеткен паза посха ла истіг кип-азахты таллирға чарабас. Худайның Сӧзіндегі принциптер пісті иртіре чаба чатчатхан, иртіре азых паза кізілерге сексуальнай сағыстар кирчеткен кип-азахты киспеске кӧӧктірчелер. Піске пасха кізілерні уйаттырбас иде тонанарға кирек.

⁶ Пістің тастындағы кӧрімібіс иптіг паза ӧкерек полза, кізілер пісті, Иегованың нымысчыларын, улуғлирлар. Олар, арса, піс нымысчыланчатхан Худайдаңар піліп аларға хынарлар. Ағаа хоза, пістің чахсы тастындағы кӧрімібістің ӱчӱн, кізілер пістің организациядаңар чахсы сағынарлар. Олар піс искірчеткен хабарны даа истерге хынарлар, арса. Ол хабар, тізең, оларның чуртастарын арачылир.

7, 8. Хаҷан тастындағы кӧрімібіске улам хайығ саларға кирек?

⁷ Пістің ах-арығ Худайыбыстаңар, харындас-пиҷелердеңер паза піс чуртапчатхан орындағы кізілердеңер сағынчатсабыс, піс искірчеткен хабар аарлығ полчатханын кӧзітчеткен паза Иегованы саблапчатхан кип-азах кизербіс (Рим. 13:8—10). Духовнай киректернең айғасчатсабыс, кӧзідімге, чыылығларға парчатсабыс паза Худай сӧзін искірерінде араласчатсабыс, хайди тонанчатханыбысты кӧрерге улам кирек. Піске, Худайға киртістіг кізілер чіли, тонанарға кирек (1 Тим. 2:10). Санға аларға кирек, пірее чирде килісчеткен кип-азах пасха чирде киліспеске айабас. Аннаңар Иегованың нымысчыларына, олар хайда даа чуртапчатсалар, андағы кізілерні хомзындырыбыспас ӱчӱн, чуртапчатхан орындағы кибірлерні санға аларға кирек.

⁸ 1 Коринфтегілерге 10:31 хығырыбыс. Конгресске парчатсабыс, пістің кип-азаабыс килістіре поларға кирек. Пу чир-чалбахтағы кізілер чіли, тың хайығ тартчатхан кип-азах киспеске кӱстенерге кирек. Гостиницазар чуртирға кірчетсебіс алай аннаң сыхчатсабыс, конгресс алнында алай соонда тус иртірчетсебіс, піске салбыр паза хайди ла полза тонанарға чарабас. Иптіг тонан салзабыс, пісті Иегованың киречілері тіп танып салзалар, піс оларға Худай сӧзін уйатпин искірербіс.

9, 10. Ноға Филипптегілерге 2:4 хайдағ кип-азах кисчеткенібіске теелерге кирек?

⁹ Филипптегілерге 2:4 хығырыбызыңар. Ноға христианнарға оларның кип-азахтары харындас-пиҷелерге хайди влиять поларынаңар сағынарға кирек? Библия «чӧреес хылыхтарны, арығ нимес киректерні, хыҷыхты» ӧлдірібізерге хығырча (Кол. 3:2, 5). Худайның нымысчылары пу хығырығ хоостыра тудынарға кӱстенчелер. Пістің ӱчӱн оларға пу хығырығ хоостыра тудынарға аар ползын тіп хынминчабыс. Оларның аразында мының алнында сайбах чуртас апарған кізілер пар. Арса, олар постарының хыҷыхтаныстарынаң ам даа харбасчалар (1 Кор. 6:9, 10). Піс оларның чуртастарын улам аар идерге хынминчабыс.

¹⁰ Духовнай харындас-пиҷелерібіс аразында хайда даа ползабыс, христианскай чыылығларда ба алай онааға тоғассабыс па, пістің тонанчатхан оңдайыбыс ӧме нравственнай саринаң арығ орын поларына хабазарға кирек. Хайди тонанарға піс позыбыс пӧкчебіс, че хайдағ даа полза, пістің кип-азаабыс пасхаларына нравственнай саринаң арығ халарға паза сағыстарынаң, сӧстерінең, киректерінең Худайның ах-арығ нормаларынҷа тудынарға полызарға кирек (1 Пет. 1:15, 16). Сын хыныс «иртінминче, посха ла тартынминча» (1 Кор. 13:4, 5).

11, 12. Хайдағ кип-азахты кизерге пӧкчетсе, нимені санға аларға кирек?

¹¹ Худайның нымысчылары, хайдағ кип-азах кизерге пӧгін алчатсалар, «прай нимее позының тузы пар паза... полған на кирекке тус пар» тіп сӧстерні сағысха кирчелер (Эккл. 3:1, 17). Ікінҷілес чоғыл, піс климатха паза чылның тузына килістіре тонанчабыс. Ідӧк, пістің чуртазыбыстағы алызығлар ӱчӱн пасха кип-азах кизерге пӧгін алчабыс. Че Иегованың нормалары, погода чіли, алыспинчалар (Мал. 3:6).

¹² Ізіг климаттығ хазналарда хыйға сағыстығ, пасхаларына улуғлас кӧзідер иде тонанарға сидік. Аннаңар піс иртіре чапсыра алай иртіре азых кип-азахты киспинчетсебіс, харындас-пиҷелерібіс алғыстығ поларлар (Иов 31:1). Пляжта алай бассейнде тынанчатсабыс, пістің купальнай костюмыбыс ідӧк иртіре азых полбасха кирек (Прит. 11:2, 20). Кӧп кізі иртіре азых купальнай костюмнар киссе дее, піс, Иегованың нымысчылары, пістің хынчатхан ах-арығ Худайыбысты, Иегованы, сабландырарға хынчабыс.

13. Хайдағ кип-азах кизерге пӧгін алчатсабыс, ноға 1 Коринфтегілерге 10:32, 33-гі принципче устанарға кирекпіс?

¹³ Хайдағ килістіре кип-азахты кизерге паза пір аарлығ принцип полыс пирер. Пістің ибіркі кізілер, олар Иегованың киречілері бе алай чох па, оларның совестьтерін санға аларға кирек. (1 Коринфтегілерге 10:32, 33 хығырыбызыңар.) Ундутпасха кирек, кип-азаабыснаң пасхаларының чувстволарына теңмеске кирекпіс. Павел илҷі пасхан: «Полғаныбыс ла чағыныбыстың кӧңнінҷе поларға кирекпіс. Киртіністерің пик полар ӱчӱн, ағаа чахсы идерге кирекпіс. Христос таа позының кӧңнін чӧпсіндірбеен» (Рим. 15:2, 3). Я, Иисус иң пастағызын, позына ла истіг ползын тіп сағынмаан, че пасхаларына Худайның кӧңнін толдырарға полысхан. Аннаңар пістің кип-азаабыс пасха кізілерні уйаттырза паза олар аның ӱчӱн чахсы хабарны испин сыхсалар, че пістің кӧңнібіске кірзе дее, іди тонанмаспыс.

14. Хайди іҷе-пабалар палаларын тастындағы кӧрімнерінең Худайны саблир иде тонанарға ӱгрет поларлар?

¹⁴ Христианин полчатхан іҷе-пабалар палаларын библейскай принциптерҷе тудынарға ӱгредерге киректер. Кӧзідімге, оларның палалары иптіг кип-азахтарынаң паза тастындағы кӧрімнерінең Худайның чӱреен ӧріндірчелер бе, чох па кӧрерге киректер (Прит. 22:6; 27:11). Палалары ах-арығ Худайны улуғлазыннар тіп, іҷе-пабаларына постарына чахсы кӧзідім поларға паза оларны хыныснаң ӱгредерге кирек. Іҷе-пабалар саарбах палаларына килістіре кип-азахты хайда аларға паза хайди таллирға чӧп пирчетселер, уғаа чахсы. Оларның кӧңніне кірчеткен не кип-азахты нимес, че Иегованың кізізі полчатханын кӧзітчеткен кип-азах аларға кирек.

15. Піске нименің хоостыра кип-азах таллирға кирек?

¹⁵ Худайның Сӧзінде Худайны сабландырчатхан хыйға пӧгіннер аларға полысчатхан тузалығ чӧптер пирілчелер. Андағ даа полза, полған на кізі хайдағ кип-азах кизерге позы пӧгін алча. Кем-де аарлығ кип-азах ал полбинча. Че пістің кип-азаабыс иптіг паза полчатхан кирекке килістіре поларға кирек. Тастындағы кӧрімібіс ибіркі кізілернің чувстволарына теңмеске кирек.

16. Ноға килістіре кип-азах таап аларға кӱстенерге кирек?

¹⁶ Уйат чох кізілер чіли нимес, андар-мындар иртіре сабылбин, пӧгін аларға оой нимес. Кӧп магазиннерде амғы тустағы модадағы ла кип-азахтарны сатчалар. Аннаңар иптіг юбканы, кӧгенекті, блузканы алай ир кізілерге тың чапсыра нимес пиджак алай ыстан таап алар ӱчӱн, кӧп кӱс саларға кирек. Че пістің харындас-пиҷелерібіс пістің сіліг паза килістіре кип-азах кисчеткенібіске хайығ саларлар паза анзын аарлыға санирлар. Пістің тигірдегі хыныстығ Пабабысты сабландырчатханына ӧрініс христианнарға килістіре кип-азах таллирынаң палғалыстығ сидіктерге хайығ салбасха полызар.

17. Сағаллығ чӧрерге сағынчатса, харындасха нимені санға аларға кирек?

¹⁷ Харындастарға чи, сағал ӧскірерге чарир ба? Моисей чахии хоостыра, прай ир кізілерге сағаллығ чӧрерге кирек полған. Че христианнарға Моисей чахиинҷа тудынарға кирек чоғыл (Лев. 19:27; 21:5; Гал. 3:24, 25). Пірее культураларда иптіг хырых салған сағаллығ чӧрерге чарадылча, аннаңар, харындас сағаллығ чӧрзе, аның сағалы кізілернің хайиин чахсы хабардаң хыйа тартпас. Андағ культураларда ӧмелерде нандырығлығ даа харындастар сағаллығ чӧрчелер. Че пірее харындастар сағаллығ чӧрбеске пӧгін алғаннар (1 Кор. 8:9, 13; 10:32). Пірее культураларда алай орыннарда сағаллығ чӧрбинчелер. Андағ чирлерде христианнарға даа сағаллығ чӧрерге чарабас. Андағ орында харындас сағаллығ чӧрзе, ол позының тастындағы кӧрімінең Худайны саблабас (Рим. 15:1—3; 1 Тим. 3:2, 7).

18, 19. Хайди Михей 6:8 Худайны позыбыстың кип-азаабыснаң сабландырарға полысча?

¹⁸ Иегова кип-азаабысха паза тастындағы кӧрімібіске кӧп правилолар пас пирбеен. Піс ағаа аның ӱчӱн уғаа алғыстығбыс. Ол піске позыбысха, библейскай принциптернең тузаланып, хыйға пӧгіннер аларға чаратча. Іди піс кип-азаабыснаң паза тастындағы кӧрімібіснең Худайның алнында амыр чӧрчебіс (Мих. 6:8).

¹⁹ Позын пӧзік сананминчатхан кізі ах-арығ Иегованың нормаларынҷа тудынча паза пілінче: ағаа пӧгін аларға Худайның устаа кирек. Піс постарыбысты пӧзік сананмазабыс, пасхаларының чувстволарын паза сағыстарын улуғлирбыс. Андағ оңдайнаң, Иегованың пӧзік нормаларынҷа чуртап паза пасхаларының чувстволарын санға алып, постарыбысты пӧзік сананминчатханыбысты кӧзітчебіс.

20. Пістің тастындағы кӧрімібісті паза кип-азаабысты кӧріп, кізілер хайдағ сағыстарға килерге киректер?

²⁰ Кізілер, піссер кӧріп, піс Иегованың киречілері полчатханыбыста ікінҷілебеске киректер. Харындас-пиҷелер дее, пасха даа кізілер Иегованың киречілері полчатханыбысты іле кӧрзіннер. Ол піске пӧзік нормалар турғыс салған. Піс ол нормаларҷа ӧрініснең чуртапчабыс. Харындас-пиҷелер постарының тастындағы кӧрімнерінең паза тудыныстарынаң чуртасты арачылапчатхан библейскай сынға азых чӱректіг кізілерні тартчалар, Иегованы сабландырчалар паза аны ӧріндірчелер. Андағ харындас-пиҷелерні махтирға хынчабыс. Ікінҷілес чоғыл, піс кип-азахты хыйға таллазабыс, аннаң андар илбек паза аарласха турыстығ Худайыбысты саблирбыс (Пс. 104:1, 2).