Mʉ puuru Puerto Limón abadauɗe wariɗa baɗa mauɗe puuru kaita koɓeerãɗe chi país Costa Ricaɗe. Mʉ akõrerãba warrarã ocho ira ɓoosia mauɗe mʉ chi sieteɗebena. Mauɗe mʉ akõre biuɗa baɗa mʉ ocho año niiɗe, mʉ dana du aɓa niiba dai waribiaɗa.

Mʉa béisbol ãrĩã jemenebachii chuburi niiɗeeɗa, chi deporte ãrĩã bustabachii bẽrã. Mʉ kũudrãa nibasiiɗe, jemenebachii equipo profesionalwãeɗe. 20 año niiɗe jãma jemene ɓuuɗe, ẽbẽra aɓa niiba chi biʼia jemene nureerã jʉrʉbarii mʉʉmaa jemene wãɗaika Nicaraguaɗe equipo profesionalɗe aɗa baɗa. Jãu tiempoɗe mʉ dana ẽpermo ãrĩã ɓooɗa baɗa mauɗe mʉa cuida ini baɗa basii mʉ nawe, mauɗeeba Nicaraguaɗaa nibaɗe wãi kʉ̃riakabasia. Mʉa jarasii poyaa jemeneɗe wãabai ɓuu. Maaɗakare, june ẽbẽra niiba jʉrʉbarii chi biʼia ãrĩã jemene nureerã mʉʉmaa jemeneɗe wãɗa chi equipo Costa Ricaɗebenarã ome jaraɗa basia, jãma jemene basiɗau chi profesional nureerã wãʼãe. Mʉ wãima jara ɓoosii. Maabea jemene koɓeeɗa baɗa jãu equipo baara 1949ɗeeɗa mau año 1952ɗaa, jemene ɓoosii partidorã Cuba, México mauɗe Nicaraguaɗe. Mʉa jemene basii defensor baseɗe, mau biʼia jemene nibabachia. 17 partido jemeneɗa baɗa mau joma biʼia aseɗa basia. Mʉa bustabachia jemeneɗe wãaruuɗe chi ẽbẽrarã partido ochiaduanuurãba mʉ trʉ̃du jarabachiɗau.

Maaɗakare mʉa chi kachirua ãrĩã ase koɓeeɗa baɗa. Mʉa novia ira ɓosmina junebena wẽra ome kãiɗe wãbachia. Mauɗe itua ãrĩã dobachii, ɓes aɓa mʉa itua ãrĩã dopeɗa mauɗe camaɗe bari ɓuu kawasii mʉa adua chi neeɗa baɗa. Dominó jemenebachii chi nejarra adaui baita mauɗe nedobachia chi billete loteriaɗebena.

Jãu ewariɗe mʉ dana Jeowaɗebena Jaranũrẽrã basii. Mʉ danaba kʉ̃ria ɓoosia ichi kĩraka estudiabi ichia estudiamaa ɓuuɗebena, maamina jãu mʉa aseebasia mʉa kʉ̃ria ɓoosia jemeneiɗeburu. Mʉa jemene ɓuuɗe jarbisiakabachia. Jemeneyúturu kʉ̃risia nii baɗa beisbólturu kʉ̃ria nii bẽrã.

Mʉ 29 año nibasiiɗe, partido jemenemaa ɓuuɗe mʉ puʼuaɗa baɗa. Mʉ anisimina maucha chi liga profesionalɗe waya jemenebasii. Mʉ jãka pasasmina, mʉa traja koɓeeɗa baɗa liga profesionalwãeɗe kawabiayua ẽbẽrarã mʉ de kaita nureerãmaa.

1957ɗe, chi estadio mʉa jemenebachiiɗe chi Jeowaɗebena Jaranũrẽrã Asamblea asesiɗau, jãma mʉ wãsii. Mʉ jãma aka ɓuuɗe unusii saka nuree chi Jeowaɗebena Jaranũrẽrã, mʉa ãrĩã unuɗa baɗa ẽbẽrarã diwara nureerã mʉ jemene nibasiiɗebena unubachii kãyabãra. Jãuba Jeowaɗebena Jaranũrẽrã baara estudiayu kʉ̃risiaɗa baɗa mauɗe ãchirã baare kʉ̃ria ɓooɗa reunionɗaa wãi baita.

Mʉa joma chi Bibliaɗebena kawasiiba mʉ kawayuswẽa koɓeeɗa baɗa. Por ejemplo, mʉa adua basii Jesusba jaraɗa ichi kaaɗe ãdanureerãba iujãa jomauɗe Dachi Akõre Kobiernoɗebena kawabiɗayua, maabea chi joma miadaa barau akabayua (Mateo 24:14). Mauɗe kawasii chi cristiano ariɗe nureeba jaradeabadaumina chi nejarra paaɗakau ãchirãmaa. Jesusba naka jaraɗa: “Bari deasiɗau bẽrã, bari deábaɗa”​(Mateo 10:8).

Bibliaɗebena kawa kãriiɗe, mʉa unu nibaɗe wãsii chi Jeowaɗebena Jaranũrẽrãba saka ase nureerã. Mʉʉmaa ãrĩã busta ɓoosii chi Jeowaɗebena Jaranũrẽrã ãrĩã berekabachiɗau Dachi Akõre Kobiernoɗebena nau iujãa jomauɗe jaradeaɗayu baita. Mauɗe unusii ãchia kʉ̃ria ãrĩã junebenarã aiɗa basiɗau ara jari Jesusba jaraɗa kĩra. Jari Bibliaɗe leasii kĩraka Marcos 10:21ɗe jãma naka jara ɓua Jesusba: “Mʉ baara nibaɗe neese”, jãuɗéburu mʉa kʉ̃riasii Jeowaɗebena Jaranũrẽrã bayua.

Mʉ baita chaarea ɓoosii cambiayu baita. Por ejemplo, año ãrĩã basiiɗe apuesta nedobachii “chi número suerteɗebena”, mʉa ãrĩã bustabachia. Kawasii Bibliaɗe Dachi Akõreba bustakau ẽbẽrarãba june diosmaa wiɗi panuuɗe chi nejarraburu adauɗai baita mauɗe ira ɓoi kʉ̃ria ɓuu joma (Isaías 65:11; Colosenses 3:5). Mauɗeeba chi lotería cheke waa nedoi kʉ̃riabasia. Mʉa waya lotería nedoi kʉ̃riabasiiɗe mʉ número suerteɗebena chi lotería ganasii. Mʉa jãu semanaɗe lotería cheke nedowẽeɗeeba ẽbẽrarãba mʉ ʉ̃rʉbena ãrĩã burlasiɗau mauɗe ãchia maucha nedoi chi lotería jarasiɗaumina mʉa maucha lotería nedokabasii.

Mʉ bautizasii diaɗe Jeowaɗebena Jaranũrẽrã asamblea asesiɗauɗe enebe kuɓusiɗau Dachi Akõre oɗe ɓuibii baita (Efesios 4:​24). Ẽsebuɗe hotelɗaa kãiɗe wã ɓoosiiɗe chi poroaɗe mʉa unusii chi novia naa ira ɓooɗa baɗa. Ichia naka jara ɓoosii: “Sammy kãiɗe wãɗa” jara ɓoosii. Mʉa “Ãʼã, bichi ome kãiɗe wãabai” a ɓoosii. Mʉa jara ɓoosia asebarii Bibliaba jara ɓuudu (1 Corintios 6:​18). Ichia naka jara ɓoosii “¡¿Kãare?!”. Ichia jara ɓoosii Bibliaba jara ɓuuɗe poyaa kãiɗe wãabai kimabaraawẽeɗe jãu setaa ɓuu mauɗe waya jara ɓoosii ichi bari ɓoima kimabaraawẽe ichi baare amañao ɓee. Mʉ piezaɗaa isa wãpeɗa poroa jʉ̃atasii. Iɗibea, mʉ ãrĩã kĩrajʉʉ kuɓuu, 1958ɗeeɗebena bautizabi ɓoosiiɗe Jeowaɗebena Jara nibai baita, kachirua ase nibaɗa iɗiiɗaa akawa ɓuisiiɗeeba.

Mʉa ãrĩã biʼia ɓee adausii Bibliaba jara ɓuuɗebena akawa ase ɓuuɗeeba. Mʉ amiko biʼia ãrĩã ua ɓuu mauɗe mʉ ãrĩã kĩrajatua kuɓuu.

Mʉa waa jemenebarii béisbol maka ɓumina jãdu importantewẽe. Mʉa béisbol jemenebachiiɗe chi nejarra ãrĩã adau ɓoosii, ẽbẽrarã baita mʉ importante ãrĩã ɓoosia. Maamina jãu isa akaba ɓuu. Dachi Akõre ome nibapeɗa mauɗe ãbarã ome nibayua jãu akabakaa. Bibliaba naka jara ɓuu: “Nau iujãa kachirua mauɗe joma chi kachirua ẽbẽrarãba wau kʉ̃ria panuu wãʼãe bai. Maamina chi Dachi Akõreba jara ɓuu beɗea wau ɓuu ewaricha ichi ome chokae ɓuai” (1 Juan 2:​17, Biblia Chamí, WPS.). Iɗi busta ɓuu jãka asei baita: Jeowa baita traja nibai baita ara mau ichi puuruɗe ɓoi baita. Jãdu mʉ baita ãrĩã importante ɓuu.