Ti ririabare juta Puerto Limón, Costa Rica yekänti. Ti rüntre kwe monso namani kwä kwä aune kükükäre ye abokän ti. Kä nämä kwä kwä tibiti angwane ti rün krütaba, yebätä ti meye käkwe nun ngübaba kaibe.

Bola meta ye nämä tuin kwin käre tie, ñobätä ñan aune ti nämä chi ngwane jadaka ye nämä tuin kwin tie. Ti nämä krone ngwane, jadaka kiakia yete tikwe ja mikaba. Kä nämä gre tibiti ngwane, juta Nicaragua yete jadaka nämä bäri kri yekänti ni iti käkwe ti känänba jadakakäre. Akwa ye näire ti meye nämä bren aune ti nämä ngübare yebätä ti ñaka tö nämä näin nüne Nicaragua. Aisete tikwe ñaka kukwe ye ka ngäbitiba. Kä rikaba ruäre ta yekänti ni mada käkwe ti känänba bolameta nämä Costa Rica yekänti, nitre dianka nämä jadakakäre ye abokän ñaka ni jadaka krikri ye kwrere. Ye ngwane brä tikwe ka ngäbitiba. Nitre jadakaka ye ben tikwe jadakaba kä 1949 nememe 1952 aune tikwe jadakaba juta Cuba, México aune Nicaragua yete. Ti nämä ja denkä defensor de base aune ti nämä nuainne kwin krubäte. Tikwe jadakaba partido 17 aune tikwe ñaka nuainba jire chi käme. Ti kädekadrete gwänändrekä kwäre ye ti tö nämäne kukwe nuin.

Ye bitikäre, ti jataba kukwe käme nuainne. Ja kukwei muko nämä tikwe, akwa käre ti nämä näin meritre mada ben. Arato ti nämä dö kwaka ñain krubäte. Bati, tikwe dröba nikaba krubäte aune jändrinaine ti rükaba ngwäte, ñokänti ti nükaninta ja gwirete ñaka rababa gare tie. Ne madakäre, ti nämä jakain dominó yebätä ngwianbätä aune ti nämä lotería ye kökö jai. 

Kä ye näire ti meye käkwe ja mikaba testiko Jehovakwe. Niara törbaba ti tuai kukwe kwe ye mike täte, kenanbe ye ñaka rababa bare ie, ñobätä ñan aune ti töi nämä kwatibe jadakabätä. Ti nämä ja kite jadakakäre ngwane, mrödre käi nämä nüke akwa mrö ñaka nämäne nemen tie. Ti töi nämäne jerekäbe jadaka yebätä, bolameta ye käi nämä juto tibätä.

Kä nämä 29 tibiti ngwane, ti nämä ja di ngwen ne kwe bola rakadre tie ngwane ti juruainba tare krubäte. Ti rababata räre, akwa ti ñan rababara jankunu jadenkä liga profesional yete. Akwa jankunu bolameta ye nämä tuin kwin tie aune ti nämä nitre mada kite jadaka yebätä liga no profesional yebätä.

Kä 1957 ye näire, tikwe ja töi mikaba niken gätä kri nuain nämä nitre testiko Jehovakwe yebätä, ye nuainba estadio ti nämä jadenkä bolametabätä yekänti. Ti nämä täkäni ye ngwane, nitre testiko ye nämä ja ngwen kwin ñaka nitre mada bolameta tuaka ja ngwen käme ye kwrere, ye käkwe ti töi mikaba niä. Tikwe dre tuaba ye käkwe ti töi mikaba ja tötike Bibliabätä nitre testiko ben aune niken gätäbätä.

Kukwe keta kabre tikwe mikaba gare jai Bibliabätä ye käkwe ti töi mikaba ñan krütare. Ñodre, Jesukwe driebare kä krüte ye näire ni ja tötikaka ben käkwe kukwe kwin Gobran Ngöbökwe yebätä ye driedi kä jökräbiti tibien (Mateo 24:14). Arato rababa gare tie, nitre kristiano erametre tä kukwe driere ñan ngwian ganainkäre. Jesús niebare: “Bini ngwarbe munye, aisete munkwe sribi ne nuen angwane, munkwe ñan ütiä kärä” (Mateo 10:⁠8).

Töi kwatibebiti nämäntre kukwe kwin Gobran NgöbökwebÄtä driere kä jökräbiti tibien ye nämä ti töi mike ñan krütare. Jesukwe driebare nitre ja tötikaka kwe ie rabadre ja töi mike mantiame, ye erere niaratre nämä nuainne ye jutuaba tie. Jesukwe niebare “ma jata ti jiebti” tä tikani Marcos 10:21 yebätä tikwe ñäkäba ngwane, tikwe ja töi mikaba ja mike testiko Jehovakwe.

Akwa ñan rababa nuäre ti kräke kukwe ye diankäre nuaindre jai. Ñodre kä kwati krubäte te ti nämä lotería kökö jai número de la suerte jakwe yebätä ganankäre. Akwa nitre tä ngöbö Buena Suerte mike täte aune nitre tö jondron tuabätä krubäte jakwe ye Jehová ñan kain ngäbiti rababa gare Bibliabätä tie (Isaías 65:11; Colosenses 3:⁠5). Aisete ti ja töi mikaba kukwe ye tuenmetre. Tikwe lotería tuanmetreba ye bämän rikaba kena ta ngwane ¡“número de la suerte” tikwe ye käkwe gananba. Nitre ti kötaiba, ñobätä ñan aune bämän yebätä tikwe ñaka lotería ye kökaba aune ni kwati törbaba ti tuai jankunu ja gain, akwa tikwe ñaka nuainba. Tikwe ñaka jankunu jakabata mada.

“Ni kristiano bitin erere” ti rababa ja ngwen ye ngwane, ti nuateba bobukäreta ti ja ngökaba ñöte gätä kri nitre testiko Jehovakwe ye näire (Efesios 4:24). Deu ti rükabata hotelte ti nämä ja düke yekänti ngwane, ti kukwei muko käne ye nämä jukwebätä tie. “Brän, Sammy nieba kwe tie, ani kä ngwen chi juto jabätä”. Ye bengwairebe ti nieba ie: “¡Ñakare!”. Ti nämä nüne dre drieta Bibliakwe ye ererebätä tikwe nieba ie (1 Corintios 6:18). “¡¿Dreri?!”, nieba kwe. Dre drieta Bibliakwe ja mika gure yebätä ye ñaka rababa ütiäte kräke aisete nun rabadreta ja kukwei mukore ye ie törbaba. Akwa ti rikaba gwä aune tikwe jukwe dikaba llavebiti. Nengwane, kätä juto tibätä ye abokän tikwe ja ngökani ñöte ni testiko erere kä 1958 ye näire aune drebätä tikwe ja töi kwitani yebätä tita ja ngwen metre.

Dre kwin namanina tikwe ja jie ngwanbätä Bibliabätä ye tikwe tändre munye akräke tikwe tärä sribedre keteiti. Matare ja ketamuko kwin metre tä tikwe, kukwe kwin tä ti kräke ja känenkäre ye kräke tita nüne aune metrere kätä juto tibätä.

Ti tö täbe jadaikä bolameta yebätä, akwa dre bäri ütiäte ye tita nuainne käre. Jadaka ye köböire jondron ütiäte aune ngwian namani tikwe, akwa ye ñan näin raire. Tita ja kete Ngöböbe aune ja mräkätre kristiano ben yebrä nuai kärekäre. Biblia tä niere: “Nitre ñaka Ngöbö mike täte ye näin ta bätä tö dre dre nuain ye näin ta arato, akwa Ngöbö tö dre dre ie ye erere nire nire tä nuainne yekwe nünain kärekäre” (1 Juan 2:17). Matare kukwe mada käita juto tibätä: sribidre Jehová kräke aune tita juta kwe te. Ye bäri ütiäte ti kräke.