Ne tupu aka au i kogā koga i tafa o Puerto Limón, se fa‵kai o taulaga i te feitu saegala o Costa Rica. E tokovalu a tama‵liki a oku mātua, kae ko au ko te tokofitu. Ne mate toku tamana kae ko valu oku tausaga. Tela la, ne puti tokotasi aka ei matou ne te motou mātua.

A te baseball ne fai faeloa mo vaega o toku olaga. Ne tafao sāle au i ei kae koi foliki. I te taimi ko tai matua aka au, ne kau atu au ki se tīmu i fakatau‵faiga sē ‵togi. Kae koi tafao au i fakatau‵faiga sē ‵togi konā kae ko 20 tupu oku tausaga, ne fakamolemole mai se tagata ke tafao au i se tīmu ‵togi i Nicaragua. Kae ona ko toku mātua e masaki i te taimi tenā, kae tausi foki ne au a ia, ne seki fia tiaki ne au a Nicaragua. Tela la, ne seki talia ne au te fakamolemole tenā. Fakamuli ifo, ne ‵kami au ne te suā tagata ke tafao i te tīmu baseball i se fa‵kai i Costa Rica, telā ne aofia i ei a tino ta‵fao mai fakatau‵faiga sē ‵togi. I te taimi tenei, ne talia ne au te lotou fakamolemole. Ne aofia au i tīmu fakatau‵fai o te fenua mai te 1949 ki te 1952, kae ne tafao au i se fakasologa o tafaoga i Cuba, Mexico, mo Nicaragua. Au ko te tino mai tua o te tino ‵kini, kae ne ‵lei ‵ki au i ei, telā ne tafao au i tafaoga e 17 e aunoa mo se mea ‵se e tasi. Ne fiafia malosi au ke lagona atu a te vaitino e ka‵laga ki toku igoa!

Se mea fakafanoanoa me ne ola au i se olaga fai valevale. E tiga eiloa ne tokotasi fua taku famau, ne ‵nofo sāle foki au mo nisi fafine. Ne inu malosi foki au. I te aso e tasi, ne konā malosi au, telā i te taimi ne ala aka ei au i toku moega i te suā aso, ne seki masaua ne au me ne foki atu pefea au ki te fale. Ne tafao kemupolo foki au i tafaoga tomino, kae e penā foki i te lotto.

I te taimi ne ola ei au i te vaegā olaga tenā, ne fai toku mātua mo fai se Molimau a Ieova. Ne taumafai a ia o fai au ke saga atu ki tena lotu, kae ne seki manuia muamua tou fafine me ne aofia malosi au i tafaoga. Kafai au e fakamalosilosi toku foitino i taimi ‵kai, e se lagona lele eiloa ne au te fiakai. Ne saga tonu atu toku mafaufau ki te tafaoga. Ne fiafia atu au ki te baseball i lō nisi mea katoa!

Kae i te taimi ko 29 ei oku tausaga, ne pakia malosi au i taku taumafaiga o sapo te pōlo i te tafaoga. I te taimi ne ‵lei ei au, ne fakagata ne au toku tafao i tafaoga ‵lasi. E tiga loa te feitu tenā, ne tumau eiloa toku aofia i tafaoga kolā ne fakatoka faka‵lei ne te kau ta‵fao i fakatau‵faiga sē ‵togi kolā e se ‵mao mai i toku fale.

I te 1957, ne talia ne au se ‵kamiga ke kau atu ki se fono telā ne fai ne Molimau a Ieova i se koga ta‵fao telā ne tafao sāle i ei au. I te taimi ne saga‵saga ei au fakatasi mo te kautaina, ne ofo malosi au i te ‵kese o amioga āva a te kau Molimau mo amioga fai valevale a te vaitino i taimi o tafaoga o te baseball. A te mea ne lavea ne au i te fono tenā, ne fakamalosi mai ke kamata o sukesuke au ki te Tusi Tapu mo te kau Molimau kae kau atu ki fakatasiga a olotou fakapotopotoga.

Ne ofo malosi au i akoakoga faka-te-Tusi Tapu e uke ne tauloto ne au. E pelā mo pati a Iesu, ne ‵valo mai ne ia me i aso fakaoti, ka talai atu ne ana soko a te tala ‵lei o te Malo o te Atua ki te lalolagi kātoa. (Mataio 24:14) Ne iloa aka foki ne au me e se fai ne Kelisiano ‵tonu te lotou galuega talai ke maua ei a tupe. Ne fai mai a Iesu: “Ne maua ne koutou a mea konei e aunoa mo se ‵togi, tuku atu foki e aunoa mo se ‵togi.”—Mataio 10:8.

Kae koi sukesuke au ki te Tusi Tapu, ne fakatusatusa ne au a mea e fai mai ei mo mea ne lavea ne au i Molimau a Ieova. Ne tavae malosi ne au olotou taumafaiga e uke ke fakasalalau atu te tala ‵lei o te Malo o te Atua ki te lalolagi kātoa. Ne lavea foki ne au te lotou uiga fia‵fia o tuku atu e pelā mo te fakatonuga a Iesu ki Kelisiano ke fai ne latou. Tela la, i te taimi ne faitau au ki te Maleko 10:21 kae lavea ne au te ‵kamiga a Iesu, ‘Vau koe o fai mo oku soko,’ ne manako au ke fai mo fai se Molimau.

Kae ne tai leva eiloa te taimi ne ‵tau ei o oko atu au ki te fakaikuga tenā. E pelā mo te fia tausaga ne tafao ei i taku napa “manuia” i vaiaso katoa i te tafaoga ko te lotto. Kae ne tauloto ne au mai te Tusi Tapu, me e taku fakamasei ne te Atua a tino tapuaki ki te “atua o te Manuia,” e pelā foki mo tino kaima‵nako. (Isaia 65:11; Kolose 3:5) Tela la, ne fakaiku aka ne au ke fakagata taku tafao i te kemupolo. A te Aso Sa muamua ne fakagata ei taku tafao, ne manumalo taku napa “manuia!” Ne fakatauemu mai a tino ki a au me ne seki tafao au i te vaiaso tenā kae ne fakamalosi mai latou ke toe tafao au, kae ne seki talia ne au. Ne seki toe tafao au i te kemupolo.

Ne fepaki au mo te suā tofotofoga ki oku “uiga ‵fou” i te aso eiloa telā ne papatiso ei au i se fono a Molimau a Ieova. (Efeso 4:24) I te afiafi tenā, ne foki atu au ki te fale talimalo ne nofo au i ei, kae ne nofo mai taku famau mua mai tua o toku potu. Ne fai mai tou fafine, “Vau koe Sammy, ke na fia‵fia fakatasi tāua!” Kae ne tali fakavave atu au, “Ikai!” Ne fakamasaua atu ne au ki tou fafine me nei la, ko ola au e ‵tusa mo tulaga o te Tusi Tapu i mea tau amioga. (1 Kolinito 6:18) “E a?” ne fai mai tou fafine. Kae oti, ne fakamasei ne ia a te kilokiloga a te Tusi Tapu e uiga ki amioga fakatauavaga sē ‵tau kae ‵losi mai ke toe kamata te mā famau. Kae ne ulu atu fua au ki toku potu, kae ‵loka ne au. I te aso nei, ko fiafia au ke fai atu me talu mai te taimi ne fai au mo Molimau i te 1958, ne puke ‵mautakitaki au mo te fakamaoni ki ‵fuliga ne fai ki toku olaga.

Ne mafaufau au me ne mafai o tusi ne au se tusi e uiga ki mea aoga ne maua ne au mai te fakalogo ki fakatakitakiga i te Tusi Tapu! A nisi mea aoga konā, ko te mauaga ne au o taugasoa ‵tonu e tokouke, te mauaga o se olaga aoga, mo te fiafia tonu.

Koi tafao eiloa au i te baseball, kae ko oti ne ‵fuli oku tulaga i ei. I te baseball ne maua ne au se tulaga fakaaloalo mo tupe, kae ne seki tumau a mea konei. Kae ko toku fesokotakiga mo te Atua mo te kautaina telā ko fai au mo vaega i ei, ka tumau ki te se-gata-mai. E fai mai te Tusi Tapu: “Ka fakaseai atu te lalolagi e pelā foki mo ana manakoga, kae ko te tino telā e fai ne ia te loto o te Atua ka tumau eiloa ki te se-gata-mai.” (1 Ioane 2:17) Nei la, ko alofa malosi atu au ki a Ieova te Atua mo ana tino i lō nisi mea katoa!