¡DESPERTAD! Núm. 2, 2018 | 12 ña̱ʼa ña̱ kivi chindeétáʼan xíʼin na̱ familia ña̱ koo si̱ína
12 ña̱ʼa ña̱ kivi chindeétáʼan xíʼin na̱ familia ña̱ koo si̱ína
Tiempo vitin káʼa̱nnína xa̱ʼa̱ na̱ familia na̱ va̱ása vií kítáʼan, soo ¿nda̱chun va̱ʼaní kítáʼan sava na̱ familia? ¿Ndáaña chíndeétáʼan xíʼinna?
Chí Estados Unidos, tá ku̱i̱ya̱ 1990 nda̱a̱ 2015 ku̱a̱ʼá na̱ yiví na̱ kúúmií yáʼaka 50 ku̱i̱ya̱ sa̱ndákoo táʼanna, ta ku̱a̱ʼáníka na̱ kúúmií yáʼaka 65 ku̱i̱ya̱ sa̱ndákoo táʼanna.
Sava na̱ xíni̱ va̱ʼa káʼa̱nna ña̱ xíniñúʼu ka̱ʼa̱n na̱ íyo se̱ʼe tu̱ʼun va̱ʼa xíʼin na̱ va̱lí se̱ʼena xa̱ʼa̱ ndiʼi ña̱ kéʼéna, soo inkana káʼa̱nna ña̱ xíniñúʼu kue̱ʼe̱ koona xíʼinna. Ña̱kán na̱ íyo se̱ʼe va̱ása xíni̱kana ndáaña keʼéna.
Tá xa̱a̱ kúchée na̱ va̱lí kúa̱an va̱ása xíni̱na keʼéna iin chiñu ña̱ kivi chindeétáʼan xíʼinna ña̱ vií koona.
Soo mií ña̱ nda̱a̱ síínva íyoña.
Kiviva koo si̱í na̱ xa̱a̱ ti̱ndaʼa̱, ta saátu ndiʼi tiempo koona xíʼin táʼanna.
Na̱ íyo se̱ʼe kiviva sakuaʼana vií sanáʼa̱na na̱ va̱lí se̱ʼena.
Tá ná kuchée na̱ va̱lí kúa̱an kiviva xa̱a̱na vií kachíñuna.
¿Ndáaña chindeétáʼan xíʼinna? Nu̱ú ña̱ ¡Despertad! yóʼo va̱xi 12 ña̱ʼa ña̱ kivi chindeétáʼan xíʼin na̱ familia ña̱ koo si̱ína.
1. Kundi̱ʼi̱-inindó xa̱ʼa̱ na̱ ti̱ndaʼa̱ xíʼinndó
U̱ni̱ consejo ña̱ kivi chindeétáʼan xíʼinndó ña̱ va̱ása ndiʼi-xa̱ʼa̱ ña̱ ti̱ndaʼa̱ndó.
2. Inkáchi kachíñundó
¿Á iin matrimonio kúúndó á inkáchi kuitíva ndóondó?
3. Ixato̱ʼó táʼanndó
¿Ndáaña káʼún á ndáaña kéʼún kivi na̱ʼa̱ ña̱ íxato̱ʼún na̱ tindaʼa̱ xíʼún?
4. Ixakáʼnu-inindó xa̱ʼa̱ táʼanndó
¿Ndáaña chindeétáʼan xíʼún ña̱ va̱ása kiʼinníún kuenta xíʼin ña̱ va̱ása va̱ʼa kéʼé na̱ ti̱ndaʼa̱ xíʼún?
5. Viíní natúʼunndó xíʼin se̱ʼendó
U̱ni̱ ña̱ kivi chindeétáʼan xíʼún ña̱ vií kutáʼún xíʼin na̱ va̱lí se̱ʼún.
6. Taxindó consejo ndaʼa̱ se̱ʼendó
¿Á ndakava-ini na̱ va̱lí se̱ʼún tá ná taxiún consejo ndaʼa̱na?
7. Sanáʼa̱ndó na̱ va̱lí se̱ʼendó ña̱ keʼéna ña̱ va̱ʼa
¿Ndáaña va̱ʼa xíniñúʼu sanáʼún na̱ va̱lí se̱ʼún?
8. Chinúundó iin yichi̱ va̱ʼa nu̱ú na̱ va̱lí se̱ʼendó
Ndóʼó na̱ íyo se̱ʼe, tá kúni̱ndó ná kandíxa na̱ va̱lí se̱ʼendó ña̱ káʼa̱nndó, chinúundó iin yichi̱ va̱ʼa nu̱úna.
9. Xíniñúʼu kunda̱a̱-iniún ndáa na̱ yiví kúún
¿Ndáa ki̱ʼva kivi ka̱ʼa̱n na̱ va̱lí kúa̱an xa̱ʼa̱ ña̱ kándíxana?
10. Ña̱ va̱ʼa kundaa-inina yóʼó
Ña̱ kandíxa na̱ yiváún yóʼó iin ña̱ ndáyáʼviní kúú ña̱yóʼo.
11. Chika̱a̱ ndee̱ ña̱ kachíñún
Tá loʼún ná sakuaʼún kusi̱í-iniún ña̱ kachíñún, ña̱yóʼo chindeétáʼanña xíʼún ña̱ saxínún nda̱a̱ ndáaka ña̱ kúni̱ún keʼún.
12. Ndakanixi̱ní xa̱ʼa̱ ña̱ kúni̱ún keʼún
Tá ná saxínún ña̱ kúni̱ún keʼún, ña̱yóʼo chindeétáʼanña xíʼún ña̱ kandíxaún ña̱ kuchiñún keʼún inkaka ña̱ʼa, tasaá viíka kutáʼún xíʼin inkana ta kusi̱íka-iniún.
Ña̱ kivi chindeétáʼanka xíʼin na̱ familia
Consejo va̱xi nu̱ú ña̱ Biblia kivi chindeétáʼanña xíʼún ña̱ si̱í koún xíʼin na̱ veʼún.
