1, 2. Еврейлерге 13:4-те пазылған сӧстер пісті ниме идерге хығырчалар?

 ПІС прайзыбыс Иегованы аарлирға алай улуғлирға хынчабыс. Ол улуғласха турыстығ паза, аны улуғлазабыс, пісті ідӧк улуғлирға сӧс пирче (1 Сам. 2:30; Прит. 3:9; Аз. ч. 4:11). Ідӧк ол пісті пасха кізілерні, кӧзідімге, ӱлгӱдегілерні улуғлазыннар тіп хынча (Рим. 12:10; 13:7). Че пір нимені, хоныхты, улуғлааны уғаа аарлығ.

² Павел илҷі пасхан: «Ирепчі палғалызын аарлаңар. Ирлері дее, ипчілері дее киртістіг поларға киректер» (Евр. 13:4). Павел позының кӧрізінеңер ле чоохтабаан, че полған на христианинні хоныхты уғаа аарлыға санирға хығырған. Постарыңнаң сурыбызыңар: «Мин хоныхты улуғлапчам ма?» Пу сурығ хоныхта чуртапчатхан кізілерге уламох аарлығ.

3. Хоныхтаңар Иисус хайдағ аарлығ устағ пирген? (Статья алнындағы хоосты кӧріңер.)

³ Хоныхты улуғлапчатсабыс, піс Иисус Христосха кӧӧкчебіс. Фарисейлер аннаң закон хоостыра ир кізее ипчізінең чарылызарға чарир ба тіп сурғаннарында, ол, Худай хоных тӧстеенде, чоохтаан сӧстерні кӧзіт пирген: «Аннаңар ирен, іҷе-пабазын артыс салып, ипчізінең пірік парар. Іди олар пір кізі осхас пол парарлар». Паза Иисус: «Худай піріктір салғаннарны кізее чарарға чарабас», — тіп чоохтап пирген (Марк 10:2—12 хығырыбызыңар; Быт. 2:24).

4. Хоныхтаңар Иегованың хайдағ сағыс полған?

⁴ Иисус хоныхты Худай тӧстеенін паза анзы прай чуртасха пірігіс полчатханын кӧзіт пирген. Худай Адамнаң Еваа чарылыс парарға чарир тіп чоохтабаан. Аның сағызының хоостыра ікі кізі мӧгі тус хада чуртирға кирек полған.

5. Хайди кізілернің ӱреп сыхханы хоныхха теелген?

⁵ Че Адам иткен чазых кізілернің чуртазын алыстырыбысхан. Кізілер ӱреп сыхханнар, аннаңар хоных таа алыс парған. Хайди Павел илҷі чарыда чоохтапча, христианин, хоных хонған кізізі ӱреп парған соонда, хоных палғалызының чахиинда чӧрбинче, аннаңар ағаа наа хоных хонарға чарир (Рим. 7:1—3).

6. Моисей чахии хоостыра, Иегова хоныхха хайди кӧрче?

⁶ Израиль чонына Худай пирген чахығда хоныхха теелчеткен устағлар полғаннар. Ол туста Израильнің иреннері нинҷе-де ипчіліг чуртааннар. Чахығ ідӧк кӧп ипчінең чуртирға чаратхан. Че олох туста чахығ ипчілерні паза палаларны арачылаан. Кӧзідімге, хул ипчіліг израильтянин, ікінҷі ипчізін алчатса, ағаа пастағы ипчізін чиис, кип-азах паза ирепчілернің палғалызы чох артызарға чарабас полған. Худай ирлердең ипчілерін арачылирға паза оларға прай кирек нимелерні пирерге киректеен (Исх. 21:9, 10). Піске Моисейнің чахиин толдырарға кирек полбаза даа, аның сылтаанда піс Иегова хоныхты хайди аарлапчатханын піліп алчабыс. Аннаңар тирең сағынғаны піске хоныхха улуғласнаң хайарға полысча.

7, 8. а) Второзаконие 24:1 хоостыра, ир кізее ипчізінең чарылызарға хаҷан чарадылҷаң? б) Иегова чарылысха хайди кӧрче?

⁷ Чахығда чарылыстаңар ниме чоохталған? Иегованың хоныхха кӧрізі алыспаан. Че андағ даа полза, чахығ израильтянинге, ипчізінің хайдағ-да «хомай хылығын» кӧр салза, аннаң чарылызарға чаратхан. (Второзаконие 24:1 хығырыбызыңар.) Чахығда хайдағ кирек «хомай хылыхха» саналчатханы пазылбинча. Че, ікінҷілес чоғыл, мында чоох полар-полбас киректердеңер парбинча. Хайдағ-да уғаа хомай, сӧбірені дее уйатха сухчатхан тудыныс поларға кирек полған (Втор. 23:14). Ачырғастығ, че Иисус чирде чуртаан туста иудейге ипчізінең «хайдағ ла полза сылтағнаң чарылызарға» чарадылҷаң (Матф. 19:3). Че піске хоныхха, олар чіли, кӧрерге чарабас.

⁸ Худай чарылысха хайди кӧрчеткеннеңер Малахия ухаанҷы пасхан. Ол чуртаан туста иреннер, чиит туста алған ипчілерінең чарылызып, киртіс чох тудынғаннар. Олар пасха чоннардаң чиит ипчілер аларға хынған поларлар. Малахия Иегованың сӧстерін пас салған: «Мин чарылысты хырт кӧрчем» (Мал. 2:14—16). Анзы Худай Сӧзінде пастағы хоныхтаңар пазылған сӧстерге килістіре: «Ирен... ипчізінең пірік парар. Іди олар пір кізі осхас пол парарлар» (Быт. 2:24). Иисус хоныхха, позының Пабазох чіли, кӧрген. Ол теен: «Худай піріктіргеннерні кізее чарарға чарабас» (Матф. 19:6).

9. Марк 10:11, 12-де пазылған Иисустың сӧстері нимені таныхтапчалар?

⁹ Пірее кізі сурар, арса: «Христианинге, ипчізінең чарылызып, пасха ипчі аларға чаратчатхан сылтағ пар ба?» Иисус чоохтаан: «Ир кізі, ипчізінең чарылызып, пасха ипчіні ал салза, ол анынаң оралысханға килісче. Ипчізі дее, ирінең чарылызып, пасха ирге пар салза, ол анынаң оралысханға килісче» (Марк 10:11, 12; Лука 16:18). Пілдістіг, Иисус хоныхха улуғласнаң хайған паза пасхалары даа хоныхты улуғлазыннар тіп хынған. Хайдағ-да сылтағ таап алып, ағаа киртістіг ипчізінең чарылызып, пасха ипчіні алчатхан ирен сынында пастағы ипчізіне киртістіг полбаан. Ағаа киртістіг ирінең чарылысчатхан ипчідеңер ідӧк тирге чарир. Чарылыс ла пічігін пас салған ӱчӱн ирепчілернің хонығы чох пол парбинча. Худайның хараанда ирепчілер ам даа пір кізі осхастар. Иисус ирен, ағаа киртістіг ипчізінең чарылысчатса, ағаа оралызарға сылтағ пирче теен. Ол туста чарылыс парған ипчее аннаң андар хайди-да чуртир ӱчӱн, хатап ирге парарға килісчең. Анзы, тізең, оралысханы полча.

10. Хаҷан христианинге, чарылызып, хатап хоных хон саларға чарадылча?

¹⁰ Андағ даа полза, Иисус чарылызарға чаратчатхан сылтағны кӧзіт пирген. Ол теен: «Кем ипчізінең, ирнең оралысханы ӱчӱн нимес [грек сӧзі порне́йа], че пірее пасха сылтағ ӱчӱн чарылыс парча, ол кізі, пасха ипчі алза, позы хатнаң оралысча» (Матф. 19:9). Олох сағысты Иисус тағдағы ӱгредігде чоохтаан (Матф. 5:31, 32). Тағдағы ӱгредігде дее, соонаң даа Иисус «оралысчалар» тіп чоохтаан. Ол сӧске сексуальнай киректернең палғалыстығ аймах-пасха чазыхтар кірчелер: ирепчілернің удур-тӧдір киртістіг полбааны, проституция, хоных хонмаан кізілернің аразындағы секс, ир ирнең алай ипчі ипчінең хада узааны, кізілернің малларнаң хада узааны. Кӧзідімге, ипчіліг ир кізі ипчізіне киртістіг полбин салза, ипчізі чарылызарға алай чарылыспасха позы пӧгін алча. Андағ кирек ӱчӱн чарылыс парған кізілерні Худай ирепчілер тіп санабинча.

11. Ноға пірее христианнар, библейскай сылтағ полза даа, чарылыспасха пӧгін алчалар?

¹¹ Хайығ салыңар: Иисус сайбах (порне́йа) ит салған кізінең хайди даа чарылызарға кирек тіп чоохтабаан. Кӧзідімге, ипчізі ирінең аннаң андар чуртирға пӧгін алча. Арса, ол ам даа иріне хынча. Аннаңар, аның пырозын тастап, аннаң чаразып аларға пӧгін алча. Ағаа хоза, ипчі кізі, чарылыс парып, хатап ирге пар полбаза, хайдағ сидіктерге урунарын пілінче полар. Чуртасха кирек ахча тоғын полар ба? Сексуальнай кирексіністерінең хайди поларға? Ағаа саңай чалғысханзым тіп пілдірбес пе? Чарылысханы палаларына хайди теелер? Ағаа оларны Библияның сыннарына ӱгредерге хай-хай аар полбас па? (1 Кор. 7:14). Я, чарылысханы уғаа кӧп сидіктерге ағылча.

12, 13. а) Осияның сӧбірезінде хайдағ сидіктер пол сыхханнар? б) Ноға Осия Гомерьні нандыра ибзер айландырған паза ирепчілер анзынаң нимее ӱгренчелер?

¹² Худай хоныхха хайди хайчатханын чахсы арах піліп аларға Осияның чуртазы полысча. Иегова ағаа чоохтаан: «Сайбах чӧрер ипчіні алып ал». Паза ол хосхан: «Ол сағаа пасха иреннердең палалар таап пирер». Ол парып, Гоме́рьні ал салған. Анзы, тізең, ағаа «оол таап пирген» (Ос. 1:2, 3). Соонаң Гомерь ікі сурас пала таап алған — хыс паза оол. Че Гомерь нинҷе-нинҷе хати пасха ирлернең чӧрген полза даа, Осия аннаң чарылыс парбаан. Пола-пола ол, ухаанҷыдаң парыбызып, хул пол парған, че Осия аны нандыра садып алған (Ос. 3:1, 2). Израиль Иеговаа ідӧк киртістіг полбаан. Осияның кӧзідімінең Иегова Израильнің пырозын нинҷе-нинҷе хати тастаанын кӧзіт пирген. Анзы пісті нимее ӱгретче?

¹³ Христианинге, хоных хонғаны ағаа киртістіг халбаанын піліп алза, пӧгін аларға кирек. Пір саринаң, Иисус Христостың сӧстерінің хоостыра христианиннің, чарылызып, пасха кізінең наа хоных хонарға сылтағ пар. Хынза, ол хоных хонғанының пырозын тастабызар. Анзында пір дее хомай ниме чоғыл. Осия Гомерьні, ибзер нандыра ағылып алып, ағаа паза пасха кізілернең чӧрбеске чоохтаан. Пастап Осия аннаң хада узубаанға тӧӧй. Соонаң олар хатап, ирепчі чіли, чуртап сыхханнар полар. Иегова ідӧк, позының чонын нандыра айландырып алып, аннаң чағын палғалыстығ поларға тимде полған (Ос. 1:11; 3:3—5). Ирепчілерге мында хайдағ ӱгредіг? Христианиннің хоных хонғанынаң хатап чуртап сыхханы аның пырозын тастаанын таныхтапча (1 Кор. 7:3, 5). Хатап чуртап сыххан соонда, христианиннің паза чарылызарға библейскай сылтағ чоғыл. Ам ирепчі хоныхты аарлыға санирға, удур-тӧдір полызарға кирек. Андағ оңдайнаң олар Худайға кӧӧгерлер.

14. 1 Коринфтегілерге 7:10, 11 хоостыра, пірееде хоныхта хайдағ сидік пол парча?

¹⁴ Прай христианнар хоныхты, Иегова паза Иисус чіли, улуғлирға киректер. Че піреезіне хоныхты улуғлирға сидік полча (Рим. 7:18—23). Аннаңар пастағы векте пірее христианнарның хоныхта сидіктер полғаннар. Павел ипчі кізее «ирінең чарылыспасха» чоохтаан. Че пірееде андағ ниме пол парҷаң. (1 Коринфтегілерге 7:10, 11 хығырыбызыңар.)

15, 16. а) Ирепчілерге, хоныхта сидіктер полза даа, ниме идерге кирек? Ноға? б) Хоныхта сидіктер ползалар, хоных хонғаны Иеговаа нымысчыланминчатса, христианинге хайди поларға?

¹⁵ Хайдағ сылтағнаң ипчізі, ирінең парыбызып, оонаң чуртапчатханын Павел чоохтабинча. Че ирі пасха ипчінең чӧр сыхса, ипчізінең чарылыс парарға паза наа хоных хон саларға сылтағ поларҷых. Че Павел ирінең парыбысхан ипчее ирге парбасха алай позының ирінең чаразып аларға кирек тіп пасхан. Худайның хараанда олар ам даа пір хоныхталар. Павел илҷінің сӧстерінің хоостыра, ирепчілернің хоныхта аар сидіктер полза даа, удур-тӧдір киртістіг ле ползалар, оларға чаразарға кирек. Оларға полызығ сурынып, ах сағалларзар айланарға чарир. Ах сағаллар, пірдеезінің саринзар турбин, Библияда тӧстелген чӧптер пирерлер.

¹⁶ Пірееде ирепчілернің пірсі Библияның нормаларынҷа чуртабинча. Анзы сидікті улам аар итче. Андада христианинге оонаң чуртирға право пар ба? Хайди чоохталған, Библия хоостыра, хоных хонғаны киртістіг халбаза ла, аннаң чарылызарға право пар. Че хаҷан хоныхтағыларға чара чуртирға право пар Библияда чоохталбинча. Павел пасхан: «Киртініс чох ирліг ипчі дее, хонғаны аннаң хада чуртирға хынчатса, аны халғыспасха кирек» (1 Кор. 7:12, 13). Пу чӧп ам даа килістіре чӧп.

17, 18. Ирепчілерге хада чуртирға уғаа аар полза даа, ноға олар хоных хонғанын тастабыспинчалар?

¹⁷ Пірееде «киртініс чох ирі» христианка-ипчізінең чуртирға хынминчатханын позының тудынызынаң кӧзітче. Пірееде андағ ир ипчізін сохча. Ипчізі, тізең, тың сохтырчатхан ӱчӱн аның хазиина паза чуртазына хорғыс пар тіп сағын сыхча. Арса, сӧбіренің материальнай кирексіністерін толдырбинча алай ипчізіне Худайға пазырарға оңдай пирбинче. Ирі кӧні чоохтабинчатса даа, аның тудынызы ипчізінең чуртирға хынминчатханын кӧзітчетсе, пірее христианкалар ирінең оонаң чуртирға пӧгін алчалар. Пірее христианкалар андағ тустарда, ирінең хада халып, ынағ чуртирға кӱстенчелер. Ноға?

¹⁸ Ирепчілер оонаң чуртазалар даа, олар ирепчілер поларлар. Оларның полғаны ла пу статьяда чоохталған сидіктерге урунар. Павел илҷі хоныхты хайраллирға паза пір сылтағны адапча: «Киртініс чох ир киртіністіг ипчізінің пастыра Худайға чағыннапча. Киртініс чох ипчі киртіністіг ирінің пастыра Худайға чағыннапча нооза. Іди полбаан полза, палалар арығ полбасчыхтар. Амды, тізең, олар ах-арығлар» (1 Кор. 7:14). Худайға киртістіг кӧп христианнар, хоныхта сидіктер полза даа, оларнаң религиознай кӧрістерінең чараспинчатхан хоных хонғаннарын артыспасха пӧгін алчалар. Андағ пӧгін алған соонда, оларның ирлері паза ипчілері Иегованың киречілері пол парғаннар. Ол христианнар андағ тайыға парғаннарына тың ӧрінчелер. (1 Коринфтегілерге 7:16 хығырыбызыңар; 1 Пет. 3:1, 2.)

19. Ноға христианнарның аразында часкалығ сӧбірелер кӧп?

¹⁹ Иисус хаҷан чарылызарға чарапчатханын чарыда чоохтап пирген, Павел илҷі, тізең, христианин ирепчілерге чара чуртирынаңар чӧп пирген. Иисус таа, Павел дее христианнар хоныхты улуғлазыннар тіп хынғаннар. Амғы туста прай чир ӱстӱнде христианскай ӧмелерде кӧп часкалығ сӧбірелер пар, хайзында киртістіг ирлері ипчілеріне хынчалар, ипчілері, тізең, ирлерін улуғлапчалар. Андағ сӧбірелер сірернің дее ӧмеңерде пар полар. Олар тудыныстарынаң хоныхты улуғлирға оңдай парын кӧзітчелер. Миллионар ирлер паза ипчілер чуртастарынаң Иегованың сӧстері сын полчатханын киречілепчелер: «Ир кізі, позының паба-іҷезінең чарылып, ипчізінең пірік парар; олар ікӧлең пір кізі осхас пол парарлар» (Еф. 5:31, 33).