1, 2. Soo’s stäit in Hebreus 13:4, dai wat Jësus någåe, wat muite sai denke oiwer dat forfrigt leewend?

 MAINST DUU dat wij Jehovaa ëre muite? Gans sicher! Jehovaa is dat wërd. God däit oos forsprääke dat wen wij em ëre daue, däit hai oos uk ëre. (1 Sam 2:30, Prov 3:9 un Apo 4:11) God wil dat wij andrer lüür ëre daue, soo as dai wat regijre daue. (Rom 12:10 un 13:7) Åwer is air dail wat wij nog düler ëre muite, dat forfrigt leewend.

² Dai apostel Paulo hät sreewe: “Ale schåle dat forfrigt leewend ëre un dat ber ërig hule.” (Heb 13:4) Paulo hät uutdüürt dat jërer braurer urer swester mut sij forfrigt leewend ëre un groot wërd dårtau geewe. Däist duu soo denke oiwer dat forfrigt leewend? Uphaupt dijne aigen forfrigt leewend?

3. Wat fon gaud formånen hät Jësus geewt oiwer dat forfrigt leewend? (Sai dai bild im anfang fon dës lëren.)

³ Wen’s duu dat forfrigt leewend ëre däist, däist duu Jësus nåmåke. As dai fariseus Jësus frågt häwe wat hai maine däir oiwer dat uutananersrijwen, hät hai sägt dat wat God sägt hät as Adam un Eva frijgt häwe: “Dai kërl däit sijne papa un sijn mama låte, un mut sich anhule an sijn fruug, un sai bëd ware soo as bloos air.” Dun hät Jësus uk sägt: “Wat God uuner dai selwig jük måkt hät, dört kair uutananermåke.” - Lees Marcos 10:2 bet 12. (Gên 2:24)

4. Wosoo wil Jehovaa schal dat forfrigt leewend sin?

⁴ Jësus hät weese dat God dat forfrigt leewend inset hät un dat dai up ümer t’hoop blijwe muite. As hai Adam un Eva frijgt hät, hät God ni sägt dat sai sich uutananersrijwe küüne. God wul dat air kërl, bloos ain fruug häwe schul un dat ain fruug, bloos air kërl häwe schul un dat sai up ümer t’hoop blijwe schule.

5. Wosoo kan dai dood dat forfrigt leewend schåre?

⁵ Soo as duu al waite däist, Adam hät süün måkt un dai daile sin gans aners woore. Dai lüür blijwe dood un dat däit dat forfrigt leewend schåre. Dai apostel Paulo hät dåroiwer sreewe un hai hät sägt dat dai dood, dat forfrigt leewend taum sluss bringt un dai witfruug urer witkërl is frai taum werer frijge. (Rom 7:1 bet 3)

6. Dai lei wat Moisés inlërt hät, wijst oos wat Jehovaa denke däit oiwer dat forfrigt leewend. Wat lëre wij dårfon?

⁶ Dai lei wat Jehovaa taum Israel folk geewt hät, däir låte dat air kërl mër as aine fruug häwe däir. Dai lüür hare al ine moor dit måke, airer as Jehovaa eer dai lei geewt hät. Åwer dai lei däir dai fruug un kiner behüüte. Wen air israelit sich frijge däir un spåre hen, sich ain anerd fruug neeme däir, nog soo, müst hai dai airst fruug geewe ales wat sai bruuke däir. (Êxo 21:9 un 10) Hüüt daue wij ni mër dai lei, wat Jehovaa doir Moisés geewt hät, någåe. Åwer, dës lei däit oos helpe forståe dat dat forfrigt leewend groot wërd tau Jehovaa hät. Dit däit oos helpe nog düler dat forfrigt leewend ëre.

7, 8. (a) Soo as stäit in Deuteronômio 24:1 wat däir dai lei säge oiwer uutananersrijwe? (b) Wat denkt Jehovaa oiwer uutananersrijwen?

⁷ Wat däir dai lei säge oiwer sich uutananersrijwe låte? Tau God dat forfrigt leewend hät groot wërd. (Lees Deuteronômio 24:1) Åwer, wen air israelit ruuterfijne däir dat sijn fruug air dail måkt har wat taum schäämen wäir, küün hai sich uutananersrijwe låte. Dai lei däir ni säge wat wäir dës “dail taum schäämen”. Åwer gans sicher, dat wäir ni irgends air dail. Dat wäir sër forkërd un däir groot schåm bringe. (Deut 23:14) Åwer in Jësus sijne tijd, feel judeus däire sich uutananersrijwe låte weegen “irgends air dail.” (Mat 19:3) Gans sicher, wij wile ni soo sin.

⁸ In der profët Malaquias sijn tijd, feel kërls däire sich uutananersrijwe fon sijne fruuges, kan sin taum frijge mit fruuges wat jünger wäire un wat ni Jehovaa dijne däire. Wat däir Jehovaa hijr oiwer maine? Hai däir säge: “Ik hass dat uutananersrijwen.” (Mal 2:14 bet 16) Dit passt sich gaud t’hoop, mit dat wat hai sägt hät as Adam un Eva frijgt häwe: “Dai kërl mut sich anhule an sijn fruug un sai bëd ware soo as bloos air.” (Gên 2:24) Jësus däir grår soo denke as Jehovaa, hai hät sägt: “Wat God uuner dai selwig jük måkt hät, dört kair uutananermåke.” (Mat 19:6)

9. Wat wul Jësus säge wat stäit in Marcos 10:11 un 12?

⁹ Air wat Jësus någåe däit, kan sich fråge: ‘Is dat erlaubt air sich uutananersrijwe un werer frijge?’ Jësus hät hijr oiwer sägt: “Wee sich uutananersrijwe däit fon sijn fruug un däit mit ander frijge, däit sij truug woord ni hule un wen ain fruug sich mit ander frijgt, nå dat sai sich uutananersreewe hät fon eer kërl, däit sai eer truug woord ni hule.” (Mar 10:11, 12 un Luc 16:18) Jësus däir der andrer eer forfrigt leewend ëre un hai wul dat dai andrer dat uk ëre schule. Dai kërl wat sich uutananersrijwe däit fon sijn reäl fruug urer dai fruug wat sich uutananersrijwe däit fon sij reäl kërl, weegen irgends air dail un däit sich frijge mit ander, däit sij truug woord ni hule. Wen soo is, dat uutananersrijwen bedüürt ni dat ën fon dat forfrigt leewend. Tau God sai bëd sin nog “bloos air.” Un nog, Jësus hät sägt weegen dat uutananersrijwen, küün sin, ain reäl fruug krëg ni dat truug woord hule. Woweegen? In dai tijd, kan sin ain fruug wat uutananersreewe wäir, däir denke sai müst werer frijge dat sai ni hungre bruukt. Åwer werer frijge, wäir soo as ni dat airst truug woord hule.

10. Wonair kan air mësch sich uutananersrijwe låte un werer frijge?

¹⁰ Jësus hät uutdüürt dat air dail is, wat dai mësch sich uutananersrijwe låte kan. Hai hät sägt: “Wee sich uutananersrijwe löt fon sijne fruug, wen ni is weegen huurerig un frijgt mite ande, däit sij truug woord ni hule.” (Mat 19:9) Hai har dat al sägt in dat Preeg upm Barg. (Mat 5:31 un 32) In dai twai måls, hät Jësus oiwer “huurerig” fortelt. Dat bedüürt seks måke ån forfrigt sin, soo as: dai truug woord ni hule, huurerig un seks måke mit aim wat ni sij kërl urer sijne fruug is, seks måke mit tijre un uk kërls mit kërls un fruuges mit fruuges. Wen air forfrigt kërl ni sij truug woord hule däit, em sijn fruug kan uutsuike wen sai sich uutananersrijwe låte wil urer ni. Wen sai uutsuike däit sich uutananersrijwe låte, tau Jehovaa sin sai ni mër forfrigt.

11. Woweegen air braurer un swester wat kain schuld hät däit sich ni uutananersrijwe låte?

¹¹ Jësus hät ni sägt dat dai mësch sich uutananersrijwe mut wen soo wat passijrt. Kan sin dat dai fruug, forfrigt blijwe wil, lijkerst wen dai kërl huurerig måkt hät. Kan sin dat sai em forgeewe wil un sich anstrenge wil t’hoop mit em dat forfrigt leewend beeter wart. Weegen sai em nog lijbe däit. Un wen sai sich uutananersrijwe löt un ni werer frijgt, kan sin dat sai wek swårhëte doirset. Wosoo krijgt sai sich ernäärt? Wosoo däit sai sich drööge mit dai wünsch taum seks måke un alaine blijwe? Däit dat uutananersrijwen dai kiner schåre? Wart dat slime taum dai kiner ine wårhët uptreke? (1 Cor 7:14) Gans sicher, dai kërl urer fruug wat kain schuld hät un sich uutananersrijwe löt, kan feel swårhëte doirsete.

12, 13. (a) Wat hät Oseias beleewt in sijn forfrigt leewend? (b) Woweegen hät Oseias, Gômer werer tröögbröcht, un wat däit dit oos inlëre oiwer dat forfrigt leewend?

¹² Dai profët Oseias sijn leewend däit oos sër inlëre oiwer wosoo God dat forfrigt leewend saie däit. God hät sägt taum Oseias sich mit Gômer frijge, wat “ain fruug fon huurerig” ware däir un wat “kiner fon huurerig” häwe däir. Gômer un Oseias häwe 1 kind hat. (Ose 1:2 un 3) Nåheer, hät Gômer nog 2 kiner hat, kan sin fon anerd kërl. Oseias is forfrigt bleewe mit Gômer, lijkerst dat sai ni sij truug woord hule hät. Dun, is Gômer for t’huus weggåe un is eskrav woore. Nog soo, hät Oseias eer tröögköft. (Ose 3:1 un 2) Jehovaa hät benutst dat wat in Oseias sij leewend passijrt is, taum wijse dat hai Israel forgeewe däir, lijkerst wen dat folk andrer godes anbeere däire. Wat däit oos dat inlëre?

¹³ Wen air kërl urer fruug fone gemaind, ni sij truug woord hule däit, dai wat ni schuld hät mut air uutsuiken måke. Soo as Jësus sägt hät, dai fruug urer kërl wat ni schuld hät, kan sich uutenanersrijwe låte un frai blijwe taum werer frijge. Åwer dai wat ni schuld hät kan uutsuike forgeewe, dat is ni forkërd. Oseias hät Gômer tröögbröcht. As Gômer tröögkåme is, sai dürst ni seks måke mit kair anerd kërl, bloos mit eer kërl Oseias. Un hai hät uk ni seks måkt mit eer doir air tijdlang. (Ose 3:3, nåt.) Åwer, nåheer hät Oseias werer seks måkt mit Gômer. Dat däir wijse dat God dai israeliten forgeewe wul un bijblijwe wul em sij God sin. (Ose 1:11 un 3:3 bet 5) Wat däit oos dat inlëre oiwer dat forfrigt leewend? Wen dai wat kain schuld hät werer seks måke däit mit air kërl urer fruug wat ni sijn truug woord hule hät, dat däit wijse dat sai uutsöcht hät dai forgeewe. (1 Cor 7:3 un 5) Den, koine sai sich ni mër uutenanersrijwe låte. Denåste, muite sai sich t’hoop anstrenge taum dat forfrigt leewend ëre, soo as God dai ëre däit.

14. Soo’s stäit in 1 Coríntios 7:10 un 11, wat kan passijre in dat forfrigt leewend?

¹⁴ Ale dai wat Jësus någåe daue, muite dat forfrigt leewend ëre soo as Jehovaa un Jësus dat måke daue. Åwer, wek krijge dat ni måkt, weegen wij ale häwe fëgels. (Rom 7:18 bet 23) Sogår wek fon dai airste jüngers häwe feel mitmåkt ine forfrigt leewend. Paulo hät sreewe: “Dat dai fruug ni uutenanergäit mit sijn kërl.” Nog soo, däire wek wat forfrigt wäire uutananergåe. (Lees 1 Coríntios 7:10 un 11)

15, 16. (a) Wen dai fruug un kërl swårhëte häwe in eer sij forfrigt leewend, wat muite sai forsuike måke un woweegen? (b) Wosoo kan air braurer urer ain swester wat forfrigt is mit aim wat ni dai selwig gloobe hät, dit måke?

¹⁵ Paulo hät ni fortelt oiwer woweegen dës forfrigt lüür uutananergåe däire. Åwer wij waite dat wäir ni weegen huurerig. Wen dat aners wäir, küün dai fruug sich uutananersrijwe låte fon sij kërl un werer frijge. Åwer in dëse sprüüch sägt Paulo dat dai fruug åne frijgen blijwe müst urer sich werer mit sij kërl fordråge müst. Den, tau Jehovaa wäire sai bëd nog forfrigt. Dun, hät Paulo sägt dat wen dai swårhët nischt besägen hät mit huurerig, müst sai forsuike sich fordråge. Sai koine taum dai ülster hülp forlange. Sai daue ni säge wee richtig urer forkërd is, åwer sai daue formånen fone Bijbel wijse un wosoo dårnå leewe.

¹⁶ Dat kan nog slime sin, wen air wat Jësus någäit, forfrigt is mit air wat ni dai selwig gloobe hät as dai. Koine sai uutananergåe wen dat ni soo gaud gäit ine forfrigt leewend? Soo as wij al saie häwe, dai Bijbel sägt dat huurerig is dai ainsig dail taum sich uutananersrijwe låte. Åwer sägt nischt taum uutananergåe. Paulo hät sreewe: “Wen ain fruug aine kërl hät wat ni dai selwige gloobe hät un em sij wile is mit eer t’hoopblijwe, dat sai ni sijne kërl löt.” (1 Cor 7:12 un 13) Dat is uk tau oos hüüt soo.

17, 18. Nog mit soo feel swårhëte, woweegen häwe wek bruirers un swesters uutsöcht forfrigt blijwe?

¹⁷ Öftens, in wek familge, dai kërl wat ni dai selwig gloobe hät, däit wijse doir dat wat hai måke däit dat em sij wile is ni t’hoop blijwe mit sijne fruug. Kan sin hai hät ine moor dai fruug slåe un dat kan eer gesundhët un leewend schåre. Kan sin hai wil ni dai familg ernääre un sogår em sijn fruug sijne gloobe swak låte. Wen soo is, kan sin dai swester däit saie dat däit nischt wat dai kërl säge däit, dat wat hai måke däit, däit wijse dat em sij wile is ni t’hoop blijwe mit eer. Den, sai hät uutsöcht uutananergåe. Åwer, wen soo wat passijrt is mit andrer bruirers un swesters, sai häwe uutsöcht ni uutananergåe. Wek häwe laiwer uutsöcht foirwärdsgåe un sich anstrenge taum dat forfrigt leewend beeter ware. Woweegen?

¹⁸ Weegen dat sai nog bëd forfrijgt sin, uutananergåe kan dai swårhëte ruutergeewe wat wij al fortelt häwe. Dai apostel Paulo hät nog ain anerd dail sägt taum dai fruug un kërl t’hoop blijwe. Hai hät sägt: “Weegen dai kërl wat ni dai selwige gloobe hät, is hailig weegen sijne fruug un dai fruug wat ni dai selwige gloobe hät, is hailig weegen dai braurer. Wen dat aners wäir, wäire dai kiner ni hailig, åwer nuu sin sai hailig.” (1 Cor 7:14) Feel bruirers un swesters häwe uutsöcht t’hoop forfrigt blijwe nog wen sai feel swårhëte doirsete däire. Sai häwe sägt soo as dit hät sich ales loont, uphaupt nåheer dat dai fruug urer kërl Jehovaas Tüügen woore is. Lees 1 Coríntios 7:16. (1 Ped 3:1 un 2)

19. Woweegen giwt dat soo feel Jehovaas Tüügen upe wild wat air fröölig forfrigt leewend häwe?

¹⁹ Jësus hät sägt oiwer uutananersrijwen un Paulo hät sägt oiwer uutananergåen. Sai bëd wule dat dai ine gemaind, ale dat forfrigt leewend ëre däire. Hüüt in Jehovaa sijn gemaind upe ganse wild, feel häwe air fröölig forfrigt leewend. Forsuik dat saie in dijn aigen gemaind. Duu däist bruirers un swesters saie wat fröölig sin in sij forfrigt leewend. Dit däit passijre weegen dai kërls daue sijne fruuges lijbe un dai fruuges daue eere kërls ëre. Soo, sai daue wijse dat sai dat forfrigt leewend ëre daue, soo as Jehovaa. Is sër gaud saie dat feel eer forfrigt leewend däit wijse, dat God richtig is, wen hai sägt: “Dårweegen löt dai kërl sijne papa un sijn mama un hült sich an sijn fruug un dai bëd ware soo as bloos air.” (Efé 5:31 un 33)