Ẽbẽra abaʉ̃me neũdukʼawua bakĩrãbʉbʉrʉ nããra kʼawuaibara iyi sãwũãbʉta, maʉ̃ kĩrãkʼa Daizeze neũdukʼawua baira ũdukʼawuaibara iya kʼãrẽ nebiata erbʉta, iya nebia erbʉta audre ũdukʼawua wãne, maʉ̃ba audre kãga wãñi iyira. Iya nebia mejãcha erbʉdebemata audre ũdupanʉ kimare: iyi zareata, burubiata, ne aripe oita akʉza kãgata.

«Jeowa nejõma zokʼaseabʉ, akʉra, bʉa parãsi bajãrata akʉza drʉata bʉ zareaba» (JEREMÍAS 32:17).

Ne parãnaba ũdubibʉ Daizezebara kʼãrẽaba zarea erbʉta, bari jaraita, dayi ewara eda wãnera dayi kakuama sentibʉ bisia jʉ̃wʉrʉata, maʉ̃ jʉ̃wʉrʉra Daizezeba parãna iyi zareadeba. ¿Bisiara kʼãrẽaba jʉ̃wʉrʉabʉpe? Bisia sora 15 millones grado sentigradobayeda jʉ̃wʉrʉabʉ, segundoza bisiabara jʉ̃wʉrʉta ʉ̃tʉzebibʉ bomba nuklearera bio kĩrãkʼa.

Ʉ̃tʉ ewaradera mejãchabʉ chĩdaura bisia audre yi zromarata. Sientipikorabara jarapanʉ chĩdau UY Scutira sistema solardera 1.700 bayeda audre yi zromata bisiaira. Chĩdau UY Scutita basibʉrʉ bisiachu mae naʉ̃ drʉara jõbikausi akʉza jʉ̃ẽkausi Jupiterchuidu. Maʉ̃ ʉ̃rʉ kʼawuaiba kʼarebabʉ bia ũrĩta Jeremíasba jaradata, Jeowabara bajãrara akʉza naʉ̃ drʉara parãsita iya zarea mejãcha erbʉdeba.

¿Sãwũã kʼarebabʉ Daizezebara iyi zareadeba? Dayirarã zokʼaipanʉ Daizezeba parãsi baera bisiata, yikota, baniata akʉza dayirã ĩñababʉta. Daizezebara aba abaka kʼarebabʉ ẽbẽrarãra iyi zareadeba, ¿sãwũã kʼarebabʉ? Nããbema siglodera Daizezebara Jesua zareata diasi ẽbẽrarã bebikuaita, Daizeze Bedʼeaba jarabʉ: «Yi wã be ẽã badarãra wãpanʉ, yi ẽbẽra yara mõgabera yara neneẽãbe, yi ũrĩ ẽã beadarabara ũrĩpanʉ, beidarãra jẽda piradrʉsida» (Mateo 11:5). ¿Idibida kʼarebabʉka Daizezebara? Daizeze Bedʼeaba jarabʉ: «Iya zarea diabʉ yi aukʼarabʉa», adewara jarabʉ: «Yi Jeowa jʉ̃ãpanʉrarã zarea erbayi jẽda» (Isaías 40:29, 31). Daizezebara iyi zareata diayi dayirã bedʼea zroma zebʉrʉde dayirãba awuantadamarẽã (2 Corintios 4:7). Dayirãba kʼawuabʉde Daizezebara zokʼabʉ iyi zareata dayirã kʼarebaita, ¿maʉ̃ba audre iyima orrabibʉ ẽka?

«Bʉa parãnara mejãchabʉ Jeowa, bʉ burubiadeba jõma parãsi» (SALMO 104:24).

Dayirãba Daizezeba ne parãna ʉ̃rʉ audre kʼawuapanʉne krĩcha amaebʉ iyira sãwũã burubiata jipa. Sientipikorabara estudiapanʉ nekʼãrẽ Jeowaba parãna ʉ̃rʉ, ãyabida maʉ̃zadeba ne parãnaita, maʉ̃ siensiara jarapanʉ biomimetika, ãyara parãpanare ne wĩkakirʉta, bari jaraita belkrota (karabari) akʉza ne zromasida, bari jaraita abion parãita.

Daizezeba dayirã sãwũã parãna akʉbʉba ũdubibʉ iyira jipa burubiata. Krĩchaseapanʉ wũãwũã sãwũã zebʉta ãyi papa biteda, iyira jʉ̃drʉbʉ selula abaʉba, maʉ̃ selula abaʉba jõma erbʉ yibarira sãwũãbʉ ʉ̃rʉ yibarirazade baita, maʉ̃ selula abaʉdeba selula bio ʉ̃tʉ zeyi iyi kĩrãkʼa panʉta, maʉ̃ tẽã wabida ʉ̃tʉ zeyi selularata bio, mamina awuarachubeta, maʉ̃neba zeyi wũãwũã wuata, yi nerbiorata akʉza iyi bʉwʉrʉrata akʉza maʉ̃ tẽã ʉ̃tʉ zeyi nekʼãrẽ wuabemara iyi biteda wari wãita, maʉ̃ tẽã jedeko nuebe babʉrʉde selula aba badata biobabʉrʉde edabʉ biteda wũãwũã yi warimata. Ẽbẽra mejãchaʉba akʉbʉde dayi sãwũã parãbʉta abarika krĩchapanʉ Daizeze Bedʼea bʉbariba jarada kĩrakʼa: «Biʼia daucha parãbʉ mʉ̃ra, maʉ̃ kʼarea mʉ̃ra bʉ ʉ̃rʉ ibia bedʼeabʉ» (Salmo 139:14).

¿Sãwũã kʼarebabʉ Daizezebara iyi burubiadeba? Dayirã parãnabara biʼia kʼawuabʉ dayirãbara kʼãrẽta nesidabʉta, iyira jipa burubia baera ũrãgʼa biata diaseabʉ iyi Bedʼeadeba, bari jaraita ũrãgʼabʉ: «Yiya» «ibiade kĩrãduaidua bʉ ʉ̃rʉ nemitiata osidamina» (Colosenses 3:13). ¿Bʉitara yibiaka naʉ̃ ũrãgʼara? Krĩcha yibariraba jarapanʉ daya wuabemara ne kayirua kĩrãduabʉba kʼarebabʉta mejãcha krĩcha oẽ baita akʉza sopʉa ẽ baita, adewara kʼarebabʉ bia kʼãĩta akʉza bei ẽ baita atiaʉde. Daizezera neũdukʼawua bia, maʉ̃ kʼarea iya ũrãgʼa biata diabʉ dayirã bia wã marẽã (2 Timoteo 3:16, 17). ¿Bʉara erbakĩrãbʉ ẽka mawũã bʉ neũdukʼawuata?

«Jeowabara kãga nekʼãrẽ aripe oita» (SALMO 37:28).

Daizezebara nekʼãrẽra aripe obʉ akʉza jipa krĩchabeda ẽ Daizezebara nekʼãrẽ aña obʉta (Job 34:10). Iyara jõma aripe obʉ, salmo bʉda abaʉba jarada kĩrãkʼa, Daizezebara pʉwʉrʉra ʉ̃rʉra aripe oyi (Salmo 67:4). Daizezebara akʉbʉ kʼãrẽta bʉta dayirã sodera, iya dayirãra kʼawua ara oẽ bari ʉ̃rʉ akʉbʉdeba, maʉ̃ kʼarea sewabeda ẽ, iyara kʼawua ara oyi ẽbẽra ãya nekʼãrẽ obʉ kʼarea, iyi aripe obʉdeba akʉza wãrĩnuneba (1 Samuel 16:7). Daizezebara akʉbʉ ẽbẽraba naʉ̃ drʉade ne aña opanʉra akʉza wuabemarata zʉbʉriabipanʉta, maʉ̃ kʼarea ẽbẽra kayiruara naʉ̃ drʉadera jõma makenañi (Proverbios 2:22).

Maʉ̃ba jarakĩrãkʉ ẽ Daizezera ẽbẽra kayiruata akʉza sobiabʉta iya kʼawua ara obʉde ẽbẽrarãta, awuarabʉrʉ Daizeze Bedʼeabara jarabʉ Jeowabara kãga akʉbʉta, kĩrũmia ẽãta akʉza ẽbẽra kayiruata jẽda krĩchabʉbʉrʉ iya maʉ̃ nemitiara kĩrãduabʉta. Naʉ̃ba, ¿ũdubibʉ ẽka Daizezebara wãrĩnu aripe obʉta? (Salmo 103:8; 2 Pedro 3:9).

¿Daizezebara sãwũa kʼarebabʉ iya aripe obʉdeba? Apostol Pedrobara jarasi: «Daizezebara jõma ẽbẽrarãra awuara akʉ ẽãta, awuarabʉrʉ kãga iyi wawiabʉra akʉza nebia opanʉrata, krĩcha ẽã samabema pʉwʉrʉta» (Hechos 10:34, 35). Daizezebara ẽbẽrarãra awuara akʉ ẽ baera jomaʉ̃ba orraseapanʉ, krĩcha ẽ kʼãrẽ bedʼeade bedʼeabʉta, samabema pʉwʉrʉta, mejãcha kʼawuabʉta akʉza mejãcha kʼawuabʉ ẽ mina.

Dayirã parãnaba kãgabʉ kʼawuadamarẽa iyara aripe obʉta akʉza maʉ̃neba bia wãnamarẽã, maʉ̃ kʼarea diabʉ kʼãrẽ dayi krĩchade dayaʼa jarabʉta kʼãrẽta biata akʉza kʼãrẽta kayiruata (Romanos 2:15). Dayi krĩchade nebiata kʼawua erbʉbʉrʉ, maʉ̃ba kʼarebayi akʉita saʉ̃ta biata akʉza saʉ̃ta zeri ẽãta, adewara kʼãrẽba zʉbʉriabiseabʉta, maʉ̃ba ne kayirua obʉrʉdera kʼarebayi jẽda krĩchaita maʉ̃ nemitia oda kʼarea. Dayirãba wãrĩnu biʼia kʼawuapanʉbʉrʉ Daizezeba aripe obʉ ʉ̃rʉ, maʉ̃ba kʼarebayi iyi kʼawa baita.

«Daizezera kãga» (1 JUAN 4:8).

Daizeze Bedʼeabara jarabʉ Daizezebara erbʉta zareata, burubiata akʉza aripe oita mamina adewara jarabʉ Daizezera kãgata, nebiadebema iya erbʉra maʉ̃trʉ audre yibia, wãrĩnu baira iya nekʼãrẽ obʉ iyi zareadeba, iyi burubiadeba akʉza nekʼãrẽ aripe obʉdeba mamina maʉ̃ra jõma obibʉ iya kãgata erbʉ baera.

Daizezebara mia kʼaiba kʼarebaita nesida ẽ, mawũãmina iyara kãgata erbʉ baera parãsi ʉ̃tʉ bajãnera angelerata akʉza nama egorode ẽbẽrarãta, mawũã nama egorode panʉrara iya akʉ erbaita akʉza iyi kãgata ũdudamarẽã. Idibida mawũã obʉ, «Iyara iyi bisia ʉ̃tʉ zebibʉ baera yi kayiruara ʉ̃rʉ akʉza yi biara ʉ̃rʉ akʉza kuera zebibʉ baera ẽbẽra kayiruara ʉ̃rʉ akʉza ẽbẽra biara ʉ̃rʉ» (Mateo 5:45).

«Jeowaba so borekea akʉbʉta akʉza so zʉbʉria akʉbʉta» (Santiago 5:11). Ẽbẽra iyi ũdukʼawuaita zarea obʉara kãga ũdubibʉ, maʉ̃ra ẽbẽrarã ũdukʼawuabʉ Daizezebara, iya aba abaka «krĩchabʉ baera» (1 Pedro 5:7).

¿Daizezebara sãwũã kʼarebabʉ iyi kãgadeba? Daizezebara dayirãra kãga ũdubibʉ kĩrã awuara awuaraka, bari jaraita, wũãwũã zake ipidatakirʉde, dayirã mebẽrãbawara yiya kãgapanʉne akʉza bisia daʉkure wã akʉpanʉne, maʉ̃ra nesidapanʉ ẽ mina dayi zokʼai baita, maʉ̃bara wãrĩnu sobiabibʉ.

Daizezebara kãga ũdubibʉ dayirãra iya yiwidʼiseabʉ baera, Daizeze Bedʼeabara jarabʉ: «Mejãcha krĩcha oraidua, awuarabʉrʉ nekʼare badu berabarinʉmʉne soiduba yiwidʼidua, bika diaidua akʉza bʉ krĩcha obibʉta jõma kʼawuabira Daizezea» (Filipenses 4:6, 7). Daizezebara kãga ũdubibʉ dayirãra iya yiwidʼiseabʉ baera, Daizeze Bedʼeabara jarabʉ dayirã Zeze Jeowabara dayirãra kãga baera kãgabʉ dayi krĩcha obʉra jõma iyaʼa jaramarẽã akʉza jarabʉ iyara kʼarebaita dayirã krĩcha aduʼa bamarẽã.

Naʉ̃ Artikulodera bedʼeasida Daizeze nebia ʉ̃rʉ: iyi zareata, burubiata, aripe oita akʉza kãgata. Wabida leseabʉ Daizezeba kʼãrẽta ozebʉrʉta bʉita akʉza kʼãrẽta wabida oita.