Kantu más nu da kónta di kualidadis ki un algen ten, más txeu nu ta konxe-l i asi nos amizadi ku el ta fika más fórti. Di mésmu manera, kantu más nu prende sobri kualidadis di Jeová, más nu ta konxe-l i nos amizadi ku el ta fika más fórti. Deus ten txeu kualidadi bunitu, má ten kuatu di kes kualidadi ki ta distaka más txeu: Se puder, se sabedoria, se justisa i se amor.

‘Ó Jeová, kel Sinhor Más Grandi! Bu faze Séu ku Téra ku bu grandi puder’. — JEREMIAS 32:17.

Kuzas ki Deus kria ta mostra ma el ten puder. Pur izénplu, óras ki bu ta sai na rua, na un dia di sól, kuzê ki bu ta xinti na bu péli? Bu ta xinti kentura di sól, ka simé? Na verdadi, bu ta xinti puder ki Deus uza pa kria kuzas. Kantu puder ki sól ten? Ta fladu ma tenperatura di sól é uns 15 milhon di grau. Kel-li ta da 150 mil bês más kenti ki agu ta ferbe. Kada sugundu sól ta manda inerjia ki é igual ku senténas di milhon di bonba nukliar ta spludi.

Má simé, sól é pikinoti óras ki nu ta konpara-l ku bilhons di otus stréla ki sta na séu. Pur izénplu, sientistas ta fla ma talvês stréla UY Scuti, é un di kes stréla más grandi ki ten. Es ta fla ma kel stréla é uns 1.700 bês más grandi ki sól. Stréla UY Scuti é uma grandi ki si el podu na lugar di sól, Téra i otus planéta ki ta fika más lonji, sima Marti ku Jupiter, ta fika déntu di el. Talvês kel-li ta djuda-nu ntende midjór kuzê ki Jeremias krê flaba, kantu el fla ma Jeová Deus kria séu ku Téra ku se grandi puder.

Modi ki puder di Deus ta djuda-nu? Nos vida ta dipende di kuzas ki Deus kria, sima sól i otus kuza spetakular ki nu ta atxa na Téra. Alén di kel-li, Deus ta uza se puder pa djuda kada algen ki sta na Téra. Modi ki el ta faze kel-li? Kantu Jizus staba na Téra, Deus da-l puder pa el faze milagri. Bíblia ta fla: ‘Gósi ségus sta ta odja, mankus sta ta anda, kes algen ki ten lépra sta ta purifikadu, kes surdu sta ta obi, mortus sta ta labantadu’. (Mateus 11:5 ) Má kuzê ki Deus sta ta faze pa nos gósi? Bíblia ta fla: ‘El ta da puder pa ken ki sta kansadu’. I tanbê el ta fla: ‘Kes ki ta spéra na Jeová ta torna ganha forsa.’ (Isaías 40:29, 31 ) Deus pode da-nu ‘puder alén di normal’ pa djuda-nu lida ku prublémas di vida. (2 Coríntios 4:7 ) Bu ka ta atxa ma ta sérba rei di bon ser amigu di kel Deus ki ta uza se grandi puder ku amor pa djuda-nu?

‘Ó Jeová, bu faze txeu trabadju! Bu faze tudu es ku sabedoria.’ — SALMO 104:24.

Kantu más nu prende sobri kriason di Deus, más dimiradu nu ta fika ku se sabedoria. Na verdadi, alguns sientista ta studa kriason di Jeová i es ta kôpia ideias ki sta na naturéza, asi pa es midjora ses prujétu. Kes prujétu li ta inklui kuzas sinplis sima fexu di ropa i kuzas más konplikadu sima avion.

Korpu di algen é kel midjór izénplu pa nu odja ma Deus ten sabedoria. Pur izénplu, pensa na manera ki korpu di un bebé ta dizenvolve. Tudu ta kumesa ku un sélula txeu pikinoti ki ten tudu informason ki ta mostra modi ki kel algen ta ben ser. Kel sélula li ta dividi na monti otus sélula ki ta parse ku el. Má na óra sértu kes sélula ta kumesa ta bira diferenti di kunpanheru i kada tipu di sélula diferenti é ki ta forma osu, musklu, péli, karni, veia i otus órgon di korpu ta kumesa ta forma. Dipôs di 9 mês kel un sélula, ki dividi na bilhons di otus sélula, ta forma un bebé. Sabedoria ki nu ta odja na kel-li, ta poi txeu algen ta konkorda ku kes palavra li ki un algen skrebe na Bíblia: ‘N ta lova-u pamodi N fazedu di manera maravilhozu i spetakular.’ — Salmo 139:14.

Modi ki sabedoria di Deus ta djuda-nu? Nos Kriador sabe kuzê ki nu meste pa nu ser filís. El ta uza se grandi sabedoria i ntendimentu pa el da-nu konsedju através di se Palavra, Bíblia. Pur izénplu, Bíblia ta da-nu kel konsedju li: ‘Nhos kontinua ta púrdua kunpanheru di korason’. (Colossenses 3:13 ) Kel konsedju li ta mostra sabedoria? Sin. Alguns piskiza ta mostra ma óras ki nu ta púrdua, kel-li ta djuda-nu durmi midjór i tenson altu ta fika más baxu. Risku di panha depreson tanbê é más poku alén di otus vantaji pa nos saúdi. Deus é sima un amigu ki ten sabedoria, ki ta preokupa ku nos tudu i ki sénpri ta da-nu bons konsedju. (2 Timóteo 3:16, 17 ) Bu ka ta gostaba di ten un amigu asi?

‘Jeová ta ama justisa’. — SALMO 37:28.

Deus sénpri ta faze kuzê ki é dretu. Bíblia ta fla: ‘Deus verdaderu nunka ka ta fazeba kel ki é mau, i Tudu-Poderozu nunka ka ta faze kel ki é mariadu!’ (Jó 34:10 ) Julgamentus di Jeová sénpri é justu, pur isu salmista fla: ‘Bu ta ben julga povus ku justisa.’ (Salmo 67:4 ) Algen ki é finjidu ka ta pode ngana Jeová pamodi el ‘ta odja korason.’ (1 Samuel 16:7 ) Jeová sabe sénpri kal ki é verdadi i se julgamentus é sénpri dretu. Alén di kel-li, Deus sta ta odja tudu injustisa i korupson ki ten na mundu i el promete ma ka ta dura ‘kes algen mau ta ben tradu di Téra’. — Provérbios 2:22.

Má kel-li ka krê fla ma Deus é un juís duru ki krê sô kastiga algen. Sénpri ki ta da, el ta púrdua algen. Bíblia ta fla ma ‘Jeová ten mizerikórdia i konpaxon’ ti mésmu ku kes algen mau si es rapende di korason. Kel-li ki é justisa di verdadi, bu ka ta atxa? — Salmo 103:8; 2 Pedro 3:9.

Modi ki justisa di Deus ta djuda-nu? Apóstlu Pedru fla: ‘Deus ta trata tudu algen igual, i na tudu nasons, el ta seta ken ki ta ruspeta-l i ki ta faze kel ki é dretu.’ (Atos 10:34, 35 ) Deus ka ta faze ningen diferénsa, pur isu nu ta tra pruvetu di se justisa. Kel-li krê fla ma nu pode ser amigu di Deus i adora-l ka ta nporta kal ki é nos rasa, país, puzison na sosiadadi ô kantu skóla ki nu ten.

Deus krê pa nu ntende modi ki el ta aji ku justisa i pa nu tra pruvetu di kel kualidadi li ki el ten. É pur isu ki el da-nu konsénsia. Bíblia ta fla ma konsénsia é sima un lei ‘skrebedu na nos korason’ ki ta ‘da tistimunhu’ ô ki ta aviza-nu si nos konportamentu sta dretu ô mariadu. (Romanos 2:15 ) Modi ki kel-li ta djuda-nu? Óras ki nu ta trena nos konsénsia dretu, el pode djuda-nu ka faze kuzas mariadu ki ta prujudika-nu, i si nu fadja, el ta djuda-nu rapende i koriji kuzê ki nu faze di mariadu. Nton ntende justisa di Deus ta djuda-nu bira más se amigu!

‘Deus é amor.’ — 1 JOÃO 4:8.

Deus ta mostra puder, sabedoria i justisa, má Bíblia ka ta fla ma el é puder, sabedoria ô justisa. Bíblia ta fla ma el é amor. Pamodi? Pamodi nu pode fla ma puder di Deus ta da-l kapasidadi pa el faze kuzas i se justisa ku se sabedoria ta gia kuzê ki el ta faze, má é se amor ki ta pô-l ta aji. Amor ta motiva tudu kuza ki el ta faze.

Nbóra Deus ka mesteba di nada, se amor pô-l ta kria algen intilijenti na Séu ku Téra, asi pa el mostra-s amor i pa el kuida di es. Amor tanbê pô-l ta kria Téra pa el ser un kaza perfetu pa nos i el ta kontinua ta mostra amor pa tudu algen na Téra, pamodi ‘el ta poi se sól ta sai pa algen mau i pa algen bon, i el ta poi txuba ta kai pa algen justu i tanbê pa algen injustu.’ — Mateus 5:45.

Alén di kel-li, ‘Jeová ten grandi konpaxon i el é mizerikordiozu.’ (Tiago 5:11 ) El gosta txeu di kes algen ki ta sforsa di korason pa konxe-l i pa bira se amigu. Deus ta presta atenson na kada algen. Na verdadi, ‘el ta kuida di bo.’ — 1 Pedro 5:7.

Modi ki amor di Deus ta djuda-nu? Nu gosta di odja sól ta kanba bunitu. É sábi obi un bebé ta ri. Nu ta da valor pa amor di nos família pértu. Nu ka meste di kes kuza li pa nu pode sta bibu. Má kes kuza li ta pô-nu ku txeu alegria na vida.

Ten otu manera ki amor di Deus ta djuda-nu: Orason. Bíblia ta fla: ‘Ka nhos fika preokupadu dimás ku ninhun kuza, má na tudu kuza, nhos faze orason ku súplika, djuntu ku agradesimentu, pa nhos dexa Deus sabe kuzê ki nhos krê’. Deus é sima un Pai ki ten amor, el krê pa nu djobe se ajuda pa nu pode lida ku nos preokupason, mésmu kes ki nu ka ta konta ningen. Nton, Jeová, na tudu se amor, el promete da-nu ‘pas di Deus, ki ningen ka ta konsigi ntende’. — Filipenses 4:6, 7.

Nu ta spéra ma kel splikason li sobri kes kualidadi prinsipal di Deus, sima puder, sabedoria, justisa i amor, djuda-u ntende midjór modi ki Deus é. Pa bu gratidon pa Deus bira más txeu, nu ta konvida-u pa bu prende kuzê ki dja el faze i kuzê ki el sta ben faze pa djuda-u.