Maicanmanda amigo tucungaj, ministirinmi imasna ashcara yachana. Shinallara Dioshua amigo tucungaj, ministirin pai imasna ajta ricsingaj. Mas ali ricsisha, paima mas mayanllashun. Tucui pai ali rurashcaunamanda, chuscu valishcauna tian: ushaj, sabiru, ali dirichu, llaquinas.

“¡Tucuira Mandaj Señor Jehová! ¡Ricui! Can ahua pacharas cai allparas [...] camba atun ushaihua rurashcangui” (JEREMÍAS 32:17).

Rurashcauna ricuchinun Jehová ushaimanda. Shu ejemplo, ¿imara sintinchi aichai, indi punzha pajllai ashcai? Sintinchi Indi rupaira. Chi rupai shamun Jehová ushaimanda. ¿Masna ursara Indi charin? Núcleo Indi ucui 15.000.000 °C (27.000.000 °F) rupaj an. Caran segundo, Indi ichun ursa huaranga millonguna bomba nuclear cuinta.

Shinajpi, Indi ichilla an ashca estrellaguna randimanda. Cientificoguna quirinun estrella UY Scuti tucui rurashcamanda mas atun an, 1.700 yali Indimanda an. UY Scuti Indi randimanda tiajpi, Allpara pasanga, shinallara Júpiter yali pactanga. Caita yachana ali intindingaj yanapan imarasha Jeremías nica, Jehová ahua pachara, cai Allparas rurarca, cai nisha nin tucui rurashca atun ushaihua.

¿Imasnara Dios ushai yanapan? Dios rurashcauna causasha catingaj yanapan, shu ejemplo indimanda, Dios Allpai rurashca cosasgunahua. Shinallara Dios paihua ushaihua caran shujta yanapan. ¿Ima tunui? Punda sigloi Dios ushaira Jesusta cuca milagrogunara rurangaj. Leashun: “Ñausauna ricunaun, anga changauna purinaun, ismushca aichayujcuna pichashcami anaun, upa rinriuna uyanaun, huañushcauna causachishcami” (Mateo 11:​5). Cuna punzhaunai ¿imara tucun? Biblia nin: “Ursara cun sambayaujta”. Astaumbas nin: “Jehovapi chapaujcunaga cutillara ursara apinungami” (Isaías 40:​29, 31). Dios “paihua ali valij ushaira” cuna ushan, llaquiunara arcaigunaras ahuantangaj (2 Corintios 4:​7). ¿Manzhu amigo tucungaj munangui cai Llaquij Diosmanda paihua atun ushaira yanapangaj utilizashcara?

“¡Jehová, can rurashcauna ashcauna anun! Sabiru iyaihua tucuigunara rurashcangui” (SALMO 104:24).

Dios rurashcaunamanda mas yachasha, paihua sabiru iyai mas sumaj an. Chiraigu ciencia yachachishcaunai biomimética nishca yachachina tian, chibi cientificoguna Jehová rurashcaunara estudianun ali rurangaj paiguna rurashcara Jehová rurashca cuinta ruranun. Caiguna rinun ahualla rurana pegamanda shu atun avión ruranagama.

Mas atun ejemplo, Dios sabiru iyaimanda runa aicha an. Iyarishun imasnara shu llullu huahua rurashcai. Cai rurana callarin, shu ichilla celulahua, chibi ricuchin imasna cai runa rurashca an. Cai celulaguna chaupirianun shuj shujcunais parijulla cuinta ricurin. Shinajpi, pactashca huraspi cai celulaguna cambiaringaj callarinun ashca celulagunai tucunun, imasna yahuar, nervioguna, tulluunas. Huasha, ansa ansa caran tunu parti aichamanda rurarin. Iscun quillaunallai, punda célula ichilla runa tucun, huaranga millonguna celulasguna charin. Runauna ashca sabiru iyaihua rurashcara ricusha, ashcauna iyangaj callarinushca imasna shu Bibliara quillcaj nica: “Canda alabanimi ñuca sumaj manzhanaita rurashca ashcamanda” (Salmo 139:14).

¿Imasnara Diosmanda yachana yanapan? Ñucanchi Ruraj yachan cushi angaj ima ministinchi. Yapa sabiru ashcaraigu, ali camachishcauna cuna ushan paihua shimi, Bibliahua. Shuj ejemplo riman: “Parijumanda perdonanuichi” (Colosenses 3:13). ¿Cai shu ali camachishcachu? Estudiajcuna tupanushca perdonana ali puñungaj yanapana ushan, shinallara presión arterialpi pishiyachingaj. Shinallara yanapan mana yapa llaquirishca angaj, shuj ungüigunaras mana charingaj. Dios shu sabiru amigo cuinta an ñucanchimanda turbarin, ali camachishcauna cunara mana saquin (2 Timoteo 3:​16, 17). ¿Shina tunu amigora charina munanguichu?

“Jehová ali dirichu ruranara llaquij ashcaraigu” (SALMO 37:28).

Dios tucui huras alira ruran. Chiraigu, mana iyana ushanchi Tucui Ushaj Dios manali rurashcara (Job 34:10). Tucui huras dirichuhua taripan, Salmora quillcaj rimashca cuinta: ‘Ali dirichuhua runaunara taripanguimi’ (Salmo 67:​4). Shungüi tiashcara ricushcamanda, ñahuiunallara mana ricun, maspas tucui huras sirtura yachasha ali dirichuhua taripan (1 Samuel 16:​7). Astaun Jehová Dios tucui mana alira mundui rurashcara ricun, shinallara nin manaliuna “ñalla allpamanda tucuchishca anunga” (Proverbios 2:22).

Chita mana intindichin Jehová Dios manali taripaj ashcara, cushihua runaunara libachishcara. Ministishcai, sintij shunguyuj an. Biblia nin ‘Jehovamanda yapa sintij shunguyuj, ali shunguyuj an’, manali runaunahuas shungumanda aripintirijpi. ¿Manzhu ninguima cai sirtu, ali dirichu rurana an? (Salmo 103:​8; 2 Pedro 3:​9).

¿Imasnara ñucanchira yanapan Dios ali dirichu ruraj ashcamanda? Apóstol Pedro nica: “Diospa ñaupajpi tucui runauna chi tupulla anchi. Dios maican llacta runaras, paita manzhajta, alira rauta, llaquin” (Rashcauna [Hechos] 10:​34, 35). Jehová Dios tucui runaunara chi tupullara ricushcamanda, tucuiguna paihua ali dirichu ruranamanda yanapaiguna charinchi. Pai ima llactaunamanda ajpi, estudiashca ajpi, charij ajpi, pugri ajpi chasquinmi, shinallara paita aduranuchu saquin.

Ñucanchi Ruraj munanmi intindinuchu pai ali dirichu ruranara, yanapaiguna charinuchu paimanda chiraigu ali iyaira ñucanchima cushca. Biblia nin ali iyai, shu ley cuinta ashcara ñucanchi shungüi quillcashca, cai yanapan yachangaj ima ali ashcara, manali ashcaras (Romanos 2:15). ¿Imasnara cai yanapan? Shu ali iyai manali ruranuchu mana saquin. Manali rurajpi yanapan aripintiringaj, manalira saquingaj. Sirtumi, Diospa ali dirichu rurana ñucanchira yanapan shinallara paihuajma mayanllachin.

“Dios llaquijmi” (1 JUAN 4:​8).

Biblia mana ninzhu, Dios ushaira, yachanara, ali dirichu ruranara ashcara. Randi Dios llaquijmi an nin. ¿Imarasha? Sirtumi paihua ushaira yanapan imaras rurangaj, shinallara paihua ali dirichu ruranara, yachanaras paihua rurashcara pushan. Shinajpi tucui caita ruran llaquishcamanda.

Jehová imaras, pitas mana ministijpis, llaquishcamanda ali iyaiyuj causajcunaras rurarca ahua pachai, cai pachais, pai llaquingaj cuirangaj. Llaquisha puruntuca shu gustu huasi runaunahuaj: Allpara. Cuna llaquinara ricuchisha catiun runaunara, “indira aitachin manaliuna ahuais aliuna ahuais. Shinallara tamiachin aliuna ahuais manaliuna ahuais” (Mateo 5:​45).

Shinallara Jehová “yapa llaquij shunguyuj, sintij shunguyuj” an (Santiago 5:​11). Llaquinara ricuchin maican ali shunguhua, paita ricsina munajcunara mayanllamushcaras. Dios chi runaunara caran shuj ricsin. Chiraigu “caran ñucanchimanda pai mana caruichu” (Hechos 17:27).

¿Imasnara yanapan Dios llaquishcamanda? Dios ashca tunuunamanda llaquin, iyarishun shu huahua gustu asijpi, ñucanchi aillu llaquijpi, indi sumaj icushcai... Sirtu cai cosasguna mana ministishca an causangahua, shinajpi gustu cushiyachin.

Shuj ricuchinara Dios imasna llaquin an, mañanara. Biblia nin: “Imais ama turbarichichu, astaun canguna mañashcauna Diospa ñaupajpi uyarinauchu tucui mañashcahua, rugashcahua, agrasishcahua”. Ñucanchi Yaya Jehová ñucanchira llaquinmi, tucui ñucanchi turbarishcaunara rimachu munan. Shina rurashcai, pai mana mitsasha ganaslla causai “tucui intindinara pasaj” cungami (Filipenses 4:​6, 7).

Cai temai, punda chuscu Jehová Dios rurashcaunara rimashcanchi: ushaj, yachana, ali dirichu, llaquina. Cuna cumbiranchi leasha catichu ricungaj imara Dios rurashca canmanda, shinallara imara ruranga.