Nna Jesus yɛ nyimpa a odzi mũ. Dɛm ntsi, oennhyia ahohia nye ɔhaw a nyimpa afofor hyiaa no bi. Naaso, ɔdaa ɔdɔ kɛse edzi kyerɛɛ nkorɔfo. Ofii ne pɛ mu dze ndzɛmba bɔɔ afɔr yɛɛ adze maa afofor. Ɔyɛɛ ndzɛmba a nna ɔbor nkorɔfo hɔn ehiadze do maa hɔn. Nokwasɛm nye dɛ, ayamuhyehye a ɔwɔ no na ɔkaa no ma ɔboaa afofor. Susu nhwɛdo ahorow a ɔyɛe wɔ Etsir 32, 37, 57, 99 no ho.

Nna nyimpa a ɔsor mfe a woedzi, dɛ wɔyɛ mpanyimfo anaa mbofra no, tse nka dɛ wobotum abɛn Jesus. Siantsir nye dɛ, ɔannyɛ noho tse dɛ obi a onnyi adagyer anaa obi a ɔkrɔn sen biara. Nkorɔfo hun dɛ Jesus dwen hɔnho, dɛm ntsi sɛ wɔwɔ ne nkyɛn a, nna hɔn akoma tɔ hɔn yamu. Sɛ ibohu dɛm nsɛm yi a, hwɛ Etsir 25, 27, 95.

Nna Jesus bɔ n’Egya mpaa daa. Nna ɔyɛ dɛm wɔ kukua mu nye ber a ɔnye n’esuafo anokwafo wɔ hɔ no. Nna aber nyina ɔbɔ mpaa, nnyɛ ber a oribedzidzi nko. Ɔbɔɔ mpaa daa n’Egya ase, yii no ayɛw, hwehwɛɛ akwankyerɛ fii no hɔ ansaana orisi gyinae a no mu yɛ dur. Susu nhwɛdo a ɔwɔ Etsir 24, 34, 91, 122, 123 no ho.

Ɔtɔ da a, nna nkyɛ Jesus botum ada adwedwe noho. Naaso, ɔannyɛ dɛm. Ɔdze n’ehiadze too nkyɛn boaa afofor. Nna ɔnnyɛ pɛsɛankonya. Iyi mu so, ɔayɛ nhwɛdo ama hɛn a yebotum edzi ekyir pɛɛ. Hwɛ mbrɛ oesi ada dɛm nhwɛdo yi edzi wɔ Etsir 19, 41, 52.

Jesus annkyerɛkyerɛ nkorɔfo kɛkɛ dɛ wɔmfa bɔn nkyɛ. Mbom, ɔyɛɛ mbrɛ wosi dze bɔn kyɛ ho nhwɛdo. Yehu iyi wɔ mbrɛ osii nye n’esuafo no nye afofor dzii no mu. Susu nhwɛdo a ɔtse dɛm ho wɔ Etsir 26, 40, 64, 85, 131.

Wɔhyɛɛ nkɔm dɛ Jewfo no bɔpow Messiah no, na n’atamfo so boku no. Ntsi, wɔ dza Jesus yɛe dze boaa afofor no mu no, nkyɛ obotum ayɛ n’adze biara biara. Naaso ɔannyɛ dɛm. Mbom, ɔdze ndamyɛ bɔɔ nokwar som ho dawur. Ɔayɛ ndamyɛ ho nhwɛdo ama n’esuafo nyina a wohyia ɔsoɛrtsia anaa nkorɔfo nntsie hɔn asɛm a wɔdze nam no. Hwɛ Etsir 16, 72, 103.

Nna Jesus krɔn wɔ akwan ahorow pii do kyɛn nyimpa a wɔtɔ sin no. Dɛ nhwɛdo no, sɛ ɔba nyimdzee na nyansa mu a, nna ɔkrɔn kyɛn obiara. Nna Jesus dzi mũ, ntsi ekyingye biara nnyi ho dɛ nna ɔwɔ apɔwmudzen na n’adwen mu da hɔ kyɛn nyimpa a nna woetwa noho ehyia no. Naaso, ofii ahobrɛadze mu soom afofor. Ibenya iyi ho esuadze wɔ Etsir 10, 62, 66, 94, 116 no mu.

Jesus kɔr do daa abotar edzi ber a n’asomafo no nye afofor ennsũasua nhwɛdo pa a ɔyɛe anaa ber a wɔammfa asɛm a ɔkãe kyerɛɛ hɔn no annyɛ edwuma no. Ofii abotar mu tsii nsɛm a ɔkyerɛkyerɛɛ hɔn no mu mbrɛ ɔbɛyɛ a wobotum atwe abɛn Jehovah. Dwendwen abotar ho nhwɛdo a Jesus yɛe no ho wɔ Etsir 74, 98, 118, 135 no ho.