Jesús amo eliyaya tlajtlakole, yeka amo kipixki tlaouijkayotl yon kuesoli kej tijpiaj nochi timaseualmej. Maske kiampa, kichijki se ueyi kampeka kinpaleuis sekinok. Amo san kichijki tlen monekiyaya, nojkia kichijki sekinok tlamantli. Ya tlauel kintlasojtlayaya sekinok, yeka kinpaleuik. Uelis tikitasej se keski neskayotl ipan capítulos 32, 37, 57 uan 99.

Nochi maseualmej maske telpokamej uan katli ya uejueyij, ueliyayaj kinechkauiaj Jesús pampa teikneliyaya uan amo moueyimatiyaya. Maseualmej kuali momachiliyayaj kema itstoyaj iuaya pampa kiitayayaj ya nelia kitekipachouayaya tlen kinpanoyaya. Ma tikitakaj kenijkatsa Jesús kiampa kichijki ipan capítulos 25, 27 uan 95.

Kema Jesús itstoya iselti nochipa momaijtouayaya ika nochi iyolo, uan nojkia kema itstoya ininuaya sekinok katli nojkia kiueyichiuayayaj toTeotsij. Miakpa momaijtouayaya uan amo san kema tlakuaskia. Kema momaijtouayaya kitlaskamatiliyaya iTata, kiueyichiuayaya uan kitlajtlaniyaya ma kipaleui kema kitlapejpeniskia se tlamantli tlen tlauel ipati. Ma tikitakaj kenijkatsa kiampa kichijki ipan capítulos 24, 34, 91, 122 uan 123.

Kemantika, Jesús kinpaleuik sekinok maske kinekiyaya mosiajketsas. Amo san mosentlalik ipan tlen ya kinekiyaya. Ika tlen kichijki, technextilik nojkia kiampa moneki tijchiuasej. Ma tikitakaj kenijkatsa kinextik ni kuali tlamantli ipan capítulos 19, 41 uan 52.

Jesús amo san kiijtok moneki titetlapojpoljuisej, ya kiampa kichijki kema kintlapojpoljuik itokilijkauaj uan sekinok maseualmej. Ma tikitakaj kenijkatsa kichijki ipan  capítulos 26, 40, 64, 85 uan 131.

Ipan miak tlajtolpanextili kiijtouayaya judíos amo kiseliskiaj Mesías uan ikualankaitakauaj kimiktiskiaj. Maske Jesús ueltoskia amo kichiuas miak tlamantli, ya kichijki kampeka kinmachtis sekinok kenijkatsa kinamiki ma kiueyichiuakaj toTeotsij. Kiampa technextilik tlake uelis tijchiuasej kema techtlaijiyouiltisej o amo kuali techitasej. Ma timoyoliljuikaj ipan tlen kiijtoua capítulos 16, 72 uan 103.

Jesús kimatiyaya miak tlamantli uan tlauel tlalnamikiyaya, amo kej maseualmej. Ya amo eliyaya tlajtlakole, yeka amo aka ueliyaya kichiua se tlamantli kej ya uan amo aka tlalnamikiyaya kej ya. Maske kiampa eliyaya, amo moueyimatiyaya uan nochipa kinpaleuik sekinok. Uelis tikitasej kenijkatsa Jesús amo moueyimatki ipan capítulos 10, 62, 66, 94 uan 116.

Kema apóstoles uan sekinok maseualmej amo kichiuayayaj tlen Jesús tlamachtiyaya, ya nochipa kipixki iyolo. Ika kuali, Jesús kinilnamikiliyaya tlen kinpaleuiskia ma monechkauikaj iuaya Jehová. Ma tikitakaj kenijkatsa Jesús kinextik kipia iyolo ipan capítulos 74, 98, 118 uan 135.